ఇప్పటికే మార్కెట్‌లోకి కొన్ని రకాల స్మార్ట్‌రింగులు అందుబాటులోకి వచ్చాయి. ఇవన్నీ ఎప్పటికప్పుడు యాప్‌ ద్వారా స్మార్ట్‌ఫోన్‌కు ఆరోగ్య సమాచారాన్ని చేరవేస్తుంటాయి. తాజాగా చైనాకు చెందిన ‘కుమీ టెక్నాలజీస్‌’ మిగిలిన స్మార్ట్‌రింగులను మించిన ఫీచర్లతో ‘కుమి రింగ్‌ హెచ్‌1’ పేరుతో మంత్రదండంలా పనిచేసే స్మార్ట్‌రింగును అందుబాటులోకి తెచ్చింది.దీని తయారీకి మన్నికైన మైక్రోక్రిస్టలిన్‌ జిర్కోనియమ్‌ నానో సిరామిక్స్, యాంటీ బ్యాక్టీరియల్‌ స్టెయిన్‌లెస్‌ స్టీల్‌ ఉపయోగించడం విశేషం. రీచార్జబుల్‌ బ్యాటరీతో పనిచేసే ఈ స్మార్ట్‌రింగు బ్లూటూత్‌కు అనుసంధానమై పనిచేస్తుంది. శరీర ఉష్ణోగ్రత, రక్తంలో ఆక్సిజన్‌ స్థాయి, గుండె పనితీరు, రక్తపోటు వంటి వివరాలను ఇది ఎప్పటికప్పుడు స్మార్ట్‌ఫోన్‌కు పంపుతుంది.వ్యాయామం చేసేటప్పుడు శరీరంలోని మార్పుల వివరాలను కూడా ఇది తెలియజేస్తుంది. ఇందులో ‘ఎస్‌ఓఎస్‌’ బటన్‌ను అత్యవసర పరిస్థితుల్లో ఉపయోగించుకునే వెసులుబాటు కూడా ఉంది. ‘ఎస్‌ఓఎస్‌’ బటన్‌ను నొక్కితే, వెంటనే ముఖ్యమైన కాంటాక్ట్స్‌లో ఉన్నవారిని అప్రమత్తం చేస్తుంది. దీని ధర 199.99 డాలర్లు (రూ.16,788) మాత్రమే!

భవిష్యత్తుపై గంపెడాశలతో గల్ఫ్‌ బాట పడుతున్న వలస కార్మికులకు నీడలా కష్టాలు వెంటాడుతున్నాయి. అవగాహాన లేమి, ట్రావెల్‌ ఏంజెట్ల మోసాలు, పనికి పిలిపించుకున్న యజమానుల కక్కుర్తి.. వెరసి వలస కార్మికుల జీవితాలను పెనం మీద నుంచి పొయ్యిలో పడేస్తున్నాయి. తాజాగా పాతబస్తీకి చెందిన ముగ్గురు మహిలా కార్మికులు పరాయి దేశంలో చిక్కుకుని... యజమానులు చూపించే నరకం నుంచి బయట పడేయాలంటూ మొరపెట్టుకున్నారు.  - సౌదీ అరేబియాలో బ్యూటీ పార్లర్‌లో ఉద్యోగం ఉందంటూ భర్త చెప్పిన మాటలు విని మెహరున్నీసా విమానం ఎక్కింది. నెలకు రూ.35,000ల వరకు వేతనం వస్తుందని చెప్పడంతో సౌదీకి రెడీ అయ్యింది. రియాద్‌కి చేరుకునే సమయానికి తీవ్ర అనారోగ్యం పాలైంది. అక్కడ సరైన ఆశ్రయం, తిండి లభించకపోవడంతో ఆరోగ్యం మరింతగా క్షీణించింది. తనను వదిలేస్తే ఇండియాకి తిరిగి వెళ్తానంటూ చెబితే రూ.2 లక్షలు కడితే కానీ వదిలిపెట్టమంటూ యజమాని హుకుం జారీ చేశారు. దీంతో తనను కాపాడాలంటూ ఆమె వీడియో సందేశాన్ని పంపింది. - రిజ్వానా బేగం అనే మహిళ నెలకు రూ.25 వేల వేతనం మీద మెయిడ్‌గా పని చేసేందుకు గల్ఫ్‌కి వెళ్లింది. కనీసం మనిషిగా కూడా గుర్తించకుండా రోజుల తరబడి తిండి పెట్టకుండా వేధించడం, సరైన వసతి కల్పించకుండా నిత్యం నరకం చూపిస్తున్నారు యజమానులు. ఇదేంటని ట్రావెల్‌ ఏజెన్సీని ప్రశ్నిస్తే.. ఇండియాకు తిరిగి వెళ్లాంటే రూ.2.50 లక్షలు చెల్లించాలు చెప్పారు. దీంతో సాయం అర్థిస్తూ ఆమె ఇండియన్‌ ఎంబసీ అధికారులకు లేఖ రాసింది. - హసీనా బేగం వలస కార్మికురాలిగా కువైట్‌కి చేరుకుంది. అయితే అక్కడకు వెళ్లిన తర్వాత వెన్నుపూసలో సమస్య తలెత్తింది. దీంతో అక్కడ ఉండలేనంటూ తనను ఇండియాకు తీసుకురావాలంటూ కుటుంబ సభ్యుల ద్వారా మొరపెట్టుకుంది. విదేశాల్లో వలస కార్మికులు పడుతున్న కష్టాలపై కేంద్రం స్పందించింది. ఆయా దేశాలకు చెందిన ఎంబసీ అధికారుకుల సమస్యలను వివరించింది. వారికి ఇబ్బంది రాకుండా తగు చర్యలు తీసుకోవాలని కోరింది. అవసరం అయితే వారిని ఇండియాకు రప్పించే ఏర్పాటు చేయాలంది. చదవండి: వలస కార్మికుల మెడపై దేశ బహిష్కరణ కత్తి

న్యూఢిల్లీ: సాధారణంగా తాజ్‌మహల్‌ సందర్శకుల తాకిడి ఎక్కువగానే ఉంటుంది. మంగళవారం అనుకోని అతిధిలా ఓ పైథాన్‌ వచ్చేసి హల్‌చల్‌ చేసింది. తన రాకతో అక్కడి స్థానికులను, తాజ్‌మహల్‌  సిబ్బందిని కాసింత భయభ్రాంతులకు గురి చేసింది. వెస్ట్ గేట్ వద్ద ఉన్న పర్యాటక పోలీసు అధికారుల టికెట్ కౌంటర్ వద్ద 5 అడుగుల పొడవైన ఇండియన్ రాక్ పైథాన్‌ను చూసి జనం షాకయ్యారు. వారు వెంటనే స్పందించి  సమీపంలోని  వైల్డ్ లైఫ్ ఎస్‌ఓఎస్‌ టీంకు సమాచారం అందించారు. నిమిషాల వ్యవధిలో అక్కడికి చేరుకున్న రెస్క్యూ టీం ఆ పాముని చాకచక్యంగా పట్టుకున్నారు. పైథాన్‌ను కొన్ని గంటల పాటు పరిశీలనలో ఉంచి, ఆ తరువాత పక్కనే ఉన్న అడవిలోకి విడిచి పెట్టారు. వైల్డ్‌లైఫ్ ఎస్‌ఓఎస్‌ను సమాచారం అందించిన టూరిజం పోలీస్ కానిస్టేబుల్ విద్యాభూషణ్ సింగ్ మాట్లాడుతూ.. పైథాన్‌ను టికెట్ కౌంటర్ దగ్గర ఉన్నట్లు మొదట స్థానిక పర్యాటకులు గుర్తించారు. వెంటనే ఆ పరిసర ప్రాంతాలల్లో  ప్రజలను అప్రమత్తం చేసి , అటు పక్క ఎవరు రాకుండా చూశాము. ఈ లోగా ఎస్‌ఓఎస్‌ రెస్క్యూ టీం రావడంతో పాముని పట్టుకోగలిగామని అన్నారు. వైల్డ్ లైఫ్ ఎస్ఓఎస్ సహ వ్యవస్థాపకుడు ,సిఇఒ కార్తీక్ సత్యనారాయణ మాట్లాడుతూ..పోలీసులు అప్రమత్తంగా వ్యవహరించి సరైన సమయంలో వైల్డ్ లైఫ్ రక్షణ టీం కు తెలియజేసినందుకు కృతజ్ఞతలు తెలిపారు. ఎందుకంటే పాములు చాలా సున్నితమైన  ప్రాణులు, జాగ్రత్తగా వ్యవహరించకుండా ఉంటే ప్రాణ నష్టం వాటిల్లే అవకాశం ఉందని అన్నారు. ( చదవండి: రిపోర్టర్‌ మైక్‌ లాక్కొని కుక్క పరుగో పరుగు..చివరికి )

సాక్షి, హైదరాబాద్‌ : రాష్ట్ర పోలీసు విభాగం హాక్‌–ఐలో కీలక మార్పు చేసింది. మొబైల్‌ డేటా అందుబాటులో లేని/ఆన్‌లో లేని సందర్భాల్లో ఎస్‌ఓఎస్‌ను సమర్థంగా వినియోగించుకునేలా డయల్‌–100కు అనుసంధానం చేసింది. ఈ అప్‌డేటెడ్‌ ఆండ్రాయిడ్‌ వెర్షన్‌ బుధవారం నుంచి అందుబాటులోకి వచ్చిందని పోలీసు విభాగం పేర్కొంది. హాక్‌–ఐ యాప్‌ వినియోగాన్ని గణనీయంగా పెంచేందుకు పోలీసులు సోషల్‌ మీడియా, ఎస్‌ఎంఎస్‌లు, పలు క్యాబ్‌లపై ఉంటున్న ప్రకటన బోర్డుల్నీ వాడుతున్నారు. ఫలితంగా దీన్ని ప్రజలు భారీ సంఖ్యలో డౌన్‌లోడ్‌ చేసుకున్నారు.  ఆఫ్‌లైన్‌లో ఇలా...  బుధవారం నుంచి అందుబాటులోకొచ్చిన ఈ వెర్షన్‌ ప్రకారం.. మొబైల్‌ డేటా లేనప్పు డు బాధితులు ఎస్‌ఓఎస్‌ బటన్‌ నొక్కితే అది ఫోన్‌ కాల్‌గా మారి ‘డయల్‌–100’కు చేరుతుంది. అక్కడి సిబ్బంది సదరు బాధితురాలు/బాధితుడు ఉన్న ప్రాంతాన్ని తెలుసుకుంటారు. ప్రతి గస్తీ వాహనానికీ జీపీఎస్‌ ఉండటంతో ‘100’ సిబ్బందికి ఏ వాహనం ఏ ప్రాంతంలో ఉందో కంప్యూటర్‌ తెరపై కచ్చితంగా తెలుస్తుంది. దీంతో బాధితుడు ఉన్న ప్రాంతానికి సమీపంలో ఉన్న వాహనానికే నేరుగా ఆ ఫోన్‌కాల్‌ను డైవర్ట్‌ చేస్తారు. ఈ వ్యవహారం మొత్తం కొన్ని సెకన్ల వ్యవధిలో పూర్తయ్యేలా ఏర్పాట్లు చేశారు.


 సాక్షి, ముంబై: ముంబై మహా నగరంలో 117ఏళ్ల పాత భవనం కూలి 34 మంది మృతి చెందిన విషయం తెలిసిందే. ఈ సంఘటనలో ఓ హృదయ విదాకర సంఘటన చోటుచేసుకుంది. శిథిలాల్లో చిక్కుకున్న ఓవ్యక్తి సహాయం కోసం ఆర్తనాదం చేశాడు. చివరి ఆ ఆర్తనాదం గాలిలో కలిసిపోయింది. వివరాల్లోకి వెళ్తే జాఫర్‌ రజ్వీ అనే వ్యక్తి కుప్పకూలిన భవనం శిథిలాల్లో చిక్కుకుపోయాడు. సహాయం కోసం ఆర్తనాదం చేశాడు. తన దగ్గర ఉన్న ఫోన్‌లో అత్యవసర సేవ ద్వారా బంధువులకు సందేశం అందించాడు. తాను ఇంకా ప్రాణాలతో ఉన్నానని వచ్చి కాపాడాలని వేడుకున్నాడు.
 
 సమాచారం అందుకున్న బంధువులు శిథిలాల నుంచి స్పృహ తప్పి పడిపోయి ఉన్న జఫ్ఫార్ రజ్వీని బయటకు తీసి దగ్గరలోని జేజే ఆస్పత్రికి తరలించారు. కానీ అప్పటికే రజ్వీ మృతి చెందాడని డాక్టర్లు ప్రకటించారు.  రజ్వీ ఒక్కడే కాదు తనభార్య రేష్మాన్‌, ఇద్దరు పిల్లలతో సహా కుటుంబం మొత్తం ప్రమాదంలో దుర్మరణం పాలయ్యారు.
 
 జఫ్పార్‌ బంధువు సయ్యద్ సల్మాన్ రజ్వీ మాట్లాడుతూ, తనను కలవడానికి వస్తున్నట్లు ఫోన్‌ చేసి చెప్పాడని అంతలోనే ప్రమాదం జరిగిందని సమాచారం అందిన్నాడు. జఫ్ఫార్‌ నుంచి మెస్సేజ్‌ వచ్చింది. బదులిద్దామంటే జాఫర్ నుండి ఆ తరువాత కమ్యూనికేషన్ లేడన్నాడు.  శిథిలాల నుండి వెలికితీసే సమయానికి జాఫర్‌ అపస్మారక స్థితిలో ఉన్నాడని, దురదృష్టవశాత్తూ జాఫర్‌ను కాపాడుకోలేకపోయం అని సల్మాన్ ఆవేదన చెందాడు.


 మెడి క్షనరీ
  
 డాక్టర్లు మందులు రాసినప్పుడు కొన్ని అవసరమైతేనే అని రాస్తుంటారు. అప్పుడు ఆ మందును ఎస్‌ఓఎస్ అని సూచిస్తుంటారు. ఎస్‌ఓఎస్ అంటే ఏమిటన్నది చాలా ఆసక్తికరం. వైద్యశాస్త్రంలోని చాలా పదాలు లాటిన్ భాషకు చెందినవే. అలాగే  ఎస్‌ఓఎస్ అనేది కూడా లాటిన్ పదబంధమే. ‘సి ఓపస్ సిట్’ అనే లాటిన్ మాటకు ఎస్‌ఓఎస్ అన్నది సంక్షిప్తరూపం.
 
 ‘సి ఓపస్ సిట్’ అంటే లాటిన్‌లో ‘అవరమైతేనే’ అని అర్థం. ఏదైనా మందును ‘అవసరం ఉంటే మాత్రమే తీసుకోండి’ అని సూచించేందుకు ఎస్‌ఓఎస్ అనే మాటను వైద్యులు వాడుతుంటారు. లక్షణాలు కనిపించినప్పుడు మాత్రమే వాడాల్సిన మందులకు (ఉదాహరణకు నొప్పినివారణ మందుల వంటివి) డాక్టర్లు ప్రిస్క్రిప్షన్‌పై ఎస్‌ఓఎస్ అని రాస్తుంటారన్నమాట.
  


 మీ ముందే పోకిరీలు అమ్మాయిలను ఏడిపిస్తున్నారా.. ఎవరైనా ట్రాఫిక్ నిబంధనలు అతిక్రమిస్తున్నారా..
 బహిరంగ ప్రదేశాల్లో మద్యం తాగుతూ హంగామా చేస్తున్నారా.. కాలనీల్లో
 ఎవరైనా అనుమానాస్పదంగా తిరుగుతున్నారా.. మీ అరచేతిలోని మొబైల్ ద్వారా ఆ నేరాల్ని పోలీసులకు తెలియజేయవచ్చు. అందుకోసం హైదరాబాద్ పోలీసులు రూపొందించిన ప్రత్యేక అప్లికేషన్ హాక్ ఐ
 - సాక్షి, వీకెండ్ ప్రతినిధి
 
 అసలు ఏంటీ యాప్..?
 ర్యాగింగ్, ఈవ్ టీజింగ్, ట్రాఫిక్ ఉల్లంఘనలు, పోలీసుల ఉల్లంఘనలు, మహిళలపై నేరాలు, బహిరంగ ప్రదేశాల్లో మద్యం తాగడం, కాలనీల్లో అధిక శబ్దాలు చేస్తూ ఇతరులకు ఇబ్బందులు కలిగించడం, తదితర సమస్యలపై ఫిర్యాదు చేయడానికి మీరు ఇక పోలీస్ స్టేషన్‌కు వెళ్లాల్సిన అవసరం లేదు. మీ ఇంట్లోనే ‘హాక్ ఐ’ ద్వారా పోలీసులకు ఫిర్యాదు చేయొచ్చు. మీ వివరాలు కూడా గోప్యం. ఫిర్యాదు చేసిన వెంటనే పోలీసులు మిమ్మల్ని సంప్రదిస్తారు.
 
 డౌన్‌లోడ్ ఇలా..
 గూగుల్ ప్లేస్టోర్‌కి వెళ్లి Hawk Eye అని టైప్ చేస్తే యాప్ డిస్‌ప్లే అవుతుంది. దాన్ని డౌన్‌లోడ్ చేసి ఇన్‌స్టాల్ చేసుకోవాలి. మీ వివరాలను పోలీసులకు కూడా తెలియపరచడం మీకు ఇష్టం లేదా..? ఇలాంటి వారి కోసమే అనోనిమాస్ ఆప్షన్ ఇచ్చారు. యాప్ డౌన్‌లోడ్ చేసుకుని మీరు ఇందులో రిజిస్ట్రేషన్ చేసుకోకున్నా.. ఈ అనోనిమస్ ఆప్షన్ ద్వారా ఫిర్యాదు చేయవచ్చు.
 
 రిపోర్టు ఏ వైలేషన్ టు పోలీస్
 ట్రాఫిక్ ఉల్లంఘన, మహిళలపై జరుగుతున్న అకృత్యాలు, ఇతర నేరాలను ఈ ఫీచర్ ద్వారా మీరు ఫిర్యాదు చేయవచ్చు. నేరానికి సంబంధించిన ఫొటో లేదా వీడియో అప్‌లోడ్ చేస్తే చాలు.
 
 రిజిస్ట్రర్ విత్ పోలీస్...
 ఈ మధ్య జరుగుతున్న నేరాల్లో నిందితులు ఎక్కువగా ఇంట్లో అద్దెకు ఉన్నవారు లేదా పని మనిషులు, సెక్యూరిటీ గార్డ్స్, డ్రైవర్, పేపర్ బాయ్, మిల్క్ బాయ్, ఇంటికి సర్వీస్ చేయడానికి వచ్చే(ఎలక్ట్రిషియన్, ప్లంబర్,  కార్పెంటర్, ఎల్‌పీజీ సపై్ల సిబ్బంది..) వారు ఉంటున్నారు. వీరికి సంబంధించిన ఎలాంటి వివరాలు దొరక్కపోతుండడంతో వారిని పట్టుకోవడం పోలీసులకు సవాల్‌గా మారింది. దీని కోసమే రిజిస్ట్రర్ విత్ పోలీస్ ఫీచర్‌ను ఇచ్చారు.
 
 ఎమర్జెన్సీ కాంటాక్ట్స్
 హైదరాబాద్‌లోని అన్ని పోలీస్ స్టేషన్ల నంబర్లు ఈ ఫీచర్‌లో నిక్షిప్తమై ఉన్నాయి. మీరు ఏదైనా ఆపదలో ఉన్నప్పుడు దగ్గర్లోని పీఎస్‌కు వెంటనే ఫోన్ చేయవచ్చు. ఇందులో ప్రతి స్టేషన్‌కు సంబంధించి ఫోన్ నంబర్, ఎస్‌ఐ, ఏసీపీ, డీసీపీ, కంట్రోల్ రూం, పెట్రోల్ వాహనం ఇలా అన్ని నంబర్‌లు ఉంటాయి.
 
 రిపోర్టు స్టేటస్
 ఇప్పటి వరకు ఫిర్యాదు చేసిన ఏ ఏడాదికో రెండేళ్లకో మన సమస్యకు పరిష్కారం లభించేది. ఇప్పుడు అలా కాదు అంతా నిమిషాల్లోనే..  మీ ఫిర్యాదుకు సంబంధించిన ప్రతి సమాచారం మీ అకౌంట్‌కు చేరుతుంది.
 
 వుమెన్ ట్రావెల్ మేడ్ సేఫ్...
 ప్రస్తుత పరిస్థితుల్లో సమాజంలో మహిళల భద్రత ప్రశ్నార్థకంగా మారింది. ప్రయాణ సమయంలో మహిళలను సురక్షితంగా గమ్య స్థానాలకు చేర్చాలనే ఉద్దేశంతో ఈ ఫీచర్‌ను రూపొందిం చారు. మహిళలు ట్యాక్సీ, క్యాబ్, ఆటోల్లో ప్రయాణించే ముందు దాని ఫొటో, రిజిస్ట్రేషన్ నంబర్, ఎక్కడ ఎక్కారు.. ఎక్కడికి వెళ్తున్నారు.. అనే వివరాలను ‘హాక్ ఐ’లో పొందుపరచాలి. మార్గమధ్యలో సమస్య ఎదురైతే ఆ సమాచారాన్ని పోలీసులకు ఇవ్వాలి.
 
 ఎస్‌ఓఎస్ బటన్...  
 ఎమర్జెన్సీ సమయంలో ఈ బటన్ నొక్కితే మీరు ముందుగానే నమోదు చేసిన ఐదుగురు మిత్రులకు ప్రీ రికార్డెడ్ మెసేజ్ వెళ్తుంది. మీరు   ఏ ప్రాంతంలో ఉన్నారో ఆ పోలీస్ స్టేషన్ సీఐ, ఏసీపీ, డీసీపీ, పెట్రోలింగ్ వాహనాలు, కంట్రోల్ రూంకు కూడా సందేశం వెళ్తుంది. పోలీసులు అప్రమత్తమై మిమ్మల్ని ఆపద నుంచి  రక్షిస్తారు.
 
 కమ్యూనిటీ పోలీసింగ్
 మీరు కమ్యూనిటీ పోలీస్ కావాలనుకుంటున్నారా..! మీ కోసమే ఈ ఫీచర్. రిజిస్ట్రేషన్ చేసుకుంటే పోలీసులు మీ సేవల్ని వినియోగించుకుంటారు. ట్రాఫిక్ నియంత్రణ, పెట్రోలింగ్, టెక్నాలజీ సపోర్ట్, నైపుణ్యాలపై శిక్షణ ఇలా వీటిలో ఇష్టమైన రంగాన్ని ఎంచుకొని మీరు ఒక కమ్యూనిటీ పోలీస్‌గా సేవలందించవచ్చు.