- హెల్త్ వర్సిటీ వీసీ డాక్టర్ టి.రవిరాజు
 - 28న ఏ కేటగిరీ, 29న బీ కేటగిరీ సీట్లకు రెండో విడత కౌన్సెలింగ్
 
 విజయవాడ (హెల్త్ యూనివర్సిటీ): ప్రైవేటు మెడికల్ కళాశాలల్లోని బీ-కేటగిరీ (యాజమాన్య కోటా) సీట్ల భర్తీకి 371డీ రాష్ర్టపతి ఉత్తర్వు వర్తించదని, ఈమేరకు సుప్రీం కోర్టు తీర్పు ఇచ్చినట్లు డాక్టర్ ఎన్టీఆర్ హెల్త్ యూనివర్సిటీ వైస్ చాన్సలర్ డాక్టర్ టి.రవిరాజు తెలిపారు. యూనివర్సిటీలో బుధవారం ఆయన విలేకరులతో మాట్లాడుతూ, ఎన్టీఆర్ హెల్త్ యూనివర్సిటీ నిర్వహించిన కౌన్సెలింగ్‌లో బీ-కేటగిరీ సీట్లకు 371డీ ప్రకారం తెలంగాణ, ఏపీ అభ్యర్థులకు కాకుండా ఇతర రాష్ట్రాల అభ్యర్థులకు సీట్లు కేటాయించారంటూ వస్తున్న ఆరోపణలు సరికావన్నారు.
 
 నీట్ ర్యాంకుల ఆధారంగా బీ-కేటగిరీ సీట్లను దేశవ్యాప్తంగా కేటాయించవచ్చని సుప్రీం కోర్టు స్పష్టమైన తీర్పుఇచ్చిందన్నారు. కాగా, ఈనెల 28న ఏ-కేటగిరీ కన్వీనర్ సీట్లకు, 29న బీ-కేటగిరీ (ప్రైవేటు యాజమాన్య) సీట్లకు రెండో విడత కౌన్సెలింగ్ నిర్వహించనున్నట్లు వెల్లడించారు. కాగా, చిత్తూరు ఆర్‌వీఎస్ మెడికల్ కళాశాలకు కూడా అనుమతి వచ్చిందని, దీంతో రెండో విడత కౌన్సెలింగ్‌లో 75 సీట్లు ఏ-కేటగిరీలో అదనంగా అందుబాటులోకి వస్తాయన్నారు.


 విజయవాడ: తెలంగాణ, ఏపీ ఇరు రాష్ట్రాల్లోనూ వేర్వేరుగా ఎంసెట్ నిర్వహించనుండడంతో 15 శాతం అన్‌రిజర్వుడ్ సీట్ల కోసం విద్యార్థులు 2 ప్రవేశ పరీక్షలు రాయాల్సి ఉంటుందని ఎన్టీఆర్ హెల్త్ యూనివర్సిటీ వైస్ చాన్స్‌లర్ డాక్టర్ టి.రవిరాజు తెలిపారు. గతంలో తెలంగాణ, ఆంధ్ర, రాయలసీమ రీజియన్లలోని మెడికల్ కళాశాలల్లో 85 శాతం సీట్లను ఆయా లోకల్ విద్యార్థులకు, మిగిలిన 15 శాతం సీట్లను మెరిట్ ఆధారంగా ఇతర రీజియన్లకు కేటాయించేవారు. అవిభాజ్య రాష్ట్రంలో ఒకే ఎంసెట్ ఉండేది. ఇప్పుడు రెండు రాష్ట్రాలూ వేర్వేరు ఎంసెట్‌లు నిర్వహిస్తుండడంతో అన్‌రిజర్వుడ్ మెరిట్ సీట్ల కోసం సొంత రాష్ట్రం నిర్వహించే ఎంసెట్‌తో పాటు తెలంగాణ విద్యార్థులు ఏపీ ఎంసెట్, ఏపీ విద్యార్థులు తెలంగాణ ఎంసెట్ రాయాల్సి ఉంటుందన్నారు.
 
 గతంలో మాదిరిగానే లోకల్, అన్‌రిజర్వుడ్ సీట్ల కేటాయింపు జరుగుతుందన్నారు. సాంకేతికంగా పెద్దగా ఇబ్బంది ఉండకపోవచ్చని వీసీ అభిప్రాయపడ్డారు. ప్రెసిడెన్షియల్ రూల్ ప్రకారం ఇప్పటికీ సిద్ధార్థ ప్రభుత్వ వైద్య కళాశాల స్టేట్‌వైడ్ కళాశాలగానే ఉన్న దృష్ట్యా 64 శాతం సీట్లు ఏపీకి, 36 శాతం సీట్లు తెలంగాణ విద్యార్థులకు చెందనున్నాయి. పీజీ మెడికల్ ఎంట్రన్స్‌కు సర్వం సిద్ధం 2015-16 విద్యా సంవత్సరానికి పీజీ వైద్య కోర్సుల్లో అడ్మిషన్లకు మార్చి 1న నిర్వహించే కంప్యూటర్ ఆధారిత ఆన్‌లైన్ ప్రవేశ పరీక్షకు అన్ని ఏర్పాట్లూ చేసినట్టు వీసీ రవిరాజు తెలిపారు. తెలంగాణ, ఏపీలకు సంయుక్తంగా ఒకే ప్రవేశ పరీక్ష నిర్వహిస్తున్నారు. సుమారు 14 వేల మంది అభ్యర్థులు దరఖాస్తు చేసుకున్నట్టు తెలిపారు. ఈ నెల 26 నుంచి డబ్ల్యూడబ్ల్యూడబ్ల్యూ.డీఆర్‌ఎన్‌టీఆర్‌యూహెచ్‌ఎస్.ఓఆర్‌జీ వెబ్‌సైట్ ద్వారా అభ్యర్థులు హాల్‌టికెట్లు డౌన్‌లోడు చేసుకోవచ్చని పేర్కొన్నారు.