ఆర్థికంగా దివాలా తీశామని ఒకవైపు దేశ రక్షణ మంత్రే ప్రకటిస్తున్న పరిస్థితుల్లో  తెహ్రిక్‌–ఇ–తాలిబన్‌ రూపంలో కొత్త ముప్పుని ఎదుర్కొంటోంది. అఫ్గాన్‌లో తాలిబన్లు అధికారం చేజిక్కించుకున్నప్పుడు సంబరాలు చేసుకున్న పాకిస్తాన్‌ ఇప్పుడు తాము బలిపశువుగా మారినందుకు ఎలా అడుగు లు వెయ్యాలో తెలీక బిత్తరపోతోంది. ఎవరీ తెహ్రిక్‌–ఇ–తాలిబన్లు, వారి లక్ష్యమేంటి ..?          2021, ఆగస్టు అఫ్గాన్‌లో తాలిబన్‌ ప్రభుత్వం ఏర్పాటైన సందర్భం... పాకిస్తాన్‌లో సంబరాలు జరిగాయి. తమ కనుసన్నల్లో మెలిగిన తాలిబన్లు అమెరికానే తరిమి కొట్టారని, అగ్రరాజ్యంపై ఇస్లాం ఘన విజయం సాధించిందంటూ నాయకులందరూ ప్రకటనలు గుప్పించారు. ఆ నాటి పాక్‌ ఐఎస్‌ఐ చీఫ్‌ ఫయాజ్‌ హమీద్‌ కాబూల్‌కు వెళ్లి తాలిబన్ల ప్రభుత్వ స్థాపనకు స్వయంగా ఏర్పాట్లు చేసి మరీ వచ్చారు.   నెల రోజులయ్యేసరికి..   అఫ్గాన్‌లో అధికారంలోకొచ్చిన తాలిబన్ల అండతో తెహ్రిక్‌–ఇ–తాలిబన్‌ పాకిస్తాన్‌ (టీటీపీ) రెచ్చిపోవడం ప్రారంభించింది. పాకిస్తాన్‌ సార్వభౌమాధికారాన్నే ప్రశ్నిస్తూ దాడులకు దిగడం మొదలు పెట్టింది. 2021 ఆగస్టు నుంచి 2022 ఆగస్టు వరకు పాక్‌లో కనీసం 250 దాడులు జరిగాయని పాక్‌ ఇనిస్టిట్యూట్‌ ఫర్‌ పీస్‌ స్టడీస్‌ (పీఐపీఎస్‌) గణాంకాలు తేటతెల్లం చేస్తున్నాయి.  అంతకు ముందు ఏడాదితో పోల్చి చూస్తే దాడుల సంఖ్య రెట్టింపు అయింది. ఈ దాడుల్లో 95శాతం బెలూచిస్తాన్, ఖైబర్‌ పఖ్‌తుఖ్వా(కె.పి)లో కీలక ప్రాంతాలు లక్ష్యంగా జరిగాయి. భద్రతా సిబ్బందిని లక్ష్యంగా చేసుకునే దాడులు జరుపుతున్నారు. ఈ ఏడాది జనవరిలో 100 మంది ప్రాణాలను బలితీసుకున్న పెషావర్‌ మసీదు దాడి ఘటన జరిగిన కొద్ది రోజులకే కరాచీలో పోలీసుల్ని లక్ష్యంగా చేసుకొని దాడులకు దిగడం ఆందోళన కలిగిస్తోంది.   ఏమిటీ టీటీపీ   తెహ్రిక్‌–ఇ–తాలిబన్‌ పాకిస్తాన్‌ను టీటీపీ అని పిలుస్తారు. అఫ్గానిస్తాన్‌లో తాలిబన్ల మద్దతుతో వీళ్లు తమ కార్యకలాపాలు నిర్వహిస్తారు. 2001లో అమెరికాపై ట్విన్‌ టవర్స్‌ దాడి తర్వాత అగ్రరాజ్యం చేసిన ఉగ్రవాదుల ఏరివేత కార్యక్రమానికి పాకిస్తాన్‌ అండగా నిలవడంతో తీవ్రంగా ఆగ్రహం వ్యక్తం చేసిన వీరంతా ఒక గూటి కిందకి చేరారు. పాక్‌ విధానాలను వ్యతిరేకిస్తూ దక్షిణ వజిరిస్తాన్‌లో బైతుల్లా మెహసూద్‌ నేతృత్వంలో 2007లో తెహ్రిక్‌–ఇ–తాలిబన్‌ పాకిస్తాన్‌ (టీటీపీ) ఏర్పాటైంది. టీటీపీ ప్రస్తుత చీఫ్‌ నూర్‌ వలీ మెహసూద్‌ అఫ్గాన్‌ నుంచి పాక్‌లో హింసను రాజేస్తున్నాడు.   అనుకున్నదొక్కటి అయినదొక్కటి.! అఫ్గానిస్తాన్‌లో తాలిబన్ల ప్రభుత్వం ఏర్పాటైన వెంటనే పరిస్థితులన్నీ తమకు అనుకూలంగా మారిపోతాయని పాక్‌ ప్రభుత్వం భావించింది. రెండు దశాబ్దాల పాటు అఫ్గాన్‌లో మౌలిక సదుపాయాల కల్పనకు సాయం అందించి అంతర్జాతీయంగా మంచి పేరు సంపాదించుకున్న భారత్‌ ఓ పక్కకి వెళ్లిపోతుందని ఆనందపడింది. అయితే సరిహద్దు రూపంలో తాలిబన్లతో సమస్య మొదలైంది.డ్యూరాండ్‌ రేఖపై ఇరు దేశాల మధ్య విభేదాలు తలెత్తాయి. టీటీపీ తుపాకీలు వదిలి జన జీవన స్రవంతిలోకి రావాలని పాక్‌ సర్కార్‌ చేసిన ప్రయత్నాలు కొనసాగలేదు. సరిహద్దుల్లో ఉన్న గిరిజనుల్ని పాక్‌ చేతుల నుంచి విడిపించడమే తమ లక్ష్యమన్నట్టుగా టీటీపీ మారిపోయింది. అఫ్గానిస్తాన్‌ సరిహద్దుల నుంచి సైన్యాన్ని వెనక్కి తీసుకోవాలని డిమాండ్‌ చేసింది. కొన్నాళ్లు కాల్పుల విరమణ ప్రకటించినప్పటికీ పాకిస్తాన్‌ కొత్త ఆర్మీ చీఫ్‌గా గత ఏడాది నవంబర్‌లో జనరల్‌ అసీమ్‌ మునీర్‌ బాధ్యతలు స్వీకరించగానే కాల్పుల విరమణను రద్దు చేసింది. అప్పట్నుంచి పాకిస్తాన్‌లో ఆత్మాహుతి దాడులు, ప్రభుత్వ అధికారుల కిడ్నాప్‌లు, బెదిరింపులు వంటివి చేయసాగింది. మరోవైపు పాక్‌ ప్రభుత్వం కూడా తాలిబన్లను అదుపు చేయడానికి దాడులకు దిగుతూ ఉండడంతో ఇరుపక్షాల మధ్య ఉద్రిక్తతలు పెరిగిపోతున్నాయి. ఇన్నాళ్లూ అఫ్గాన్‌లో మంచి తాలిబన్లు, పాక్‌లో ఉన్న టీటీపీ చెడ్డ తాలిబన్లు అని భావించిన పాక్‌కు ఇద్దరూ చేతులు కలపడంతో అనుకున్నదొక్కటి అయినది ఒక్కటి అని నిట్టూరుస్తోంది. ఈ పరిణామాలన్నీ దేశంలో అంతర్యుద్ధానికి దారి తీయవచ్చుననే అభిప్రాయాలు కూడా వినిపిస్తున్నాయి.   దివాలా తీశాం: పాక్‌ రక్షణ మంత్రి ఆర్థిక సంక్షోభంతో విలవిలలాడుతున్న పాకిస్తాన్‌ రేపో మాపో దివాలా తీస్తుందని అందరూ అనుకుంటున్న వేళ ఆ దేశ రక్షణ మంత్రి ఖవాజా అసీఫ్‌ బాంబు లాంటి నిజం చెప్పారు. ఇప్పటికే దేశం దివాలా తీసిందని అన్నారు. ఆదివారం సియాల్‌కోట్‌లో ఒక కార్యక్రమానికి హాజరైన ఆయన మాట్లాడుతూ ‘‘పాక్‌ దివాలా తీస్తుందన్న వార్తలు మీరు వినే ఉంటారు. వాస్తవానికి ఇప్పటికే దేశం దివాలా తీసింది. మనం ప్రస్తుతం దివాలా తీసిన దేశంలో బతుకుతున్నాం’’ అని కుండబద్దలు కొట్టినట్టుగా చెప్పారు. దేశంలో ఆర్థిక సమస్యల పరిష్కారానికి అంతర్జాతీయ ద్రవ్య నిధి (ఐఎంఎఫ్‌) ఏమీ చేయలేదని మనమే ఏదో ఒకటి చెయ్యాలన్నారు. పాకిస్తాన్‌లో చట్టం, రాజ్యాంగాన్ని అనుసరించడం లేదని, ఈ దుస్థితికి రాజకీయ నాయకులు, అధికార యంత్రాంగం, మన వ్యవస్థలు అన్నీ బాధ్యతవహించాలన్నారు.    టీటీపీ లక్ష్యాలేంటి ?   పాకిస్తాన్‌ మిలటరీ విధానాలను తీవ్రంగా వ్యతిరేంచిన ఈ సంస్థ దేశాన్ని తన నియంత్రణలోకి తెచ్చుకోవడానికి అన్ని రకాలుగా ప్రయత్నిస్తోంది. 2021లో అఫ్గాన్‌ నుంచి అమెరికా, నాటో దళాలు వెళ్లిపోయి ప్రభుత్వాన్ని ఏర్పాటు చేశాక పాకిస్తాన్‌పై దృష్టి సారించింది. ఇస్లాం విస్తరణ తాలిబన్ల ప్రధాన ధ్యేయంగా మారింది. అఫ్గానిస్తాన్‌లో మాదిరిగా పాకిస్తాన్‌లో కూడా ప్రభుత్వాన్ని కూల్చివేసి ఇస్లామిక్‌ రాజ్యాన్ని స్థాపించి షరియా చట్టాలను కఠినంగా అమలు చేయాలని  ఉవ్విళ్లూరుతోంది. పాకిస్తాన్‌ జైళ్లలో ఉన్న తమ వారిని బయటకు తీసుకురావాలని, అఫ్గాన్, పాక్‌ సరిహద్దుల్లోని గిరిజన ప్రాంతాల్లో పాకిస్తాన్‌ సైనికుల్ని వెనక్కి తీసుకువెళ్లేలా చర్యలు తీసుకోవాలంటూ పాక్‌ ప్రభుత్వంపై ఒత్తిడి తీసుకువస్తోంది.   పాకిస్తాన్‌లో ఉగ్ర దాడులకు ఐసిస్‌ అవసరం లేదు. పాకిస్తానీ తాలిబన్లు చాలు. అఫ్గానిస్తాన్‌ తరహాలో ఏదో ఒకరోజు తాలిబన్లు పాకిస్తాన్‌ను స్వాధీనం చేసుకున్నా ఆశ్చర్యపడాల్సిన పని లేదు. – తస్లీమా నస్రీన్, బంగ్లాదేశ్‌ రచయిత్రి  – సాక్షి, నేషనల్‌ డెస్క్‌  


 ఇస్లామాబాద్‌: గడిచిన ఏడాదికాలంలో తాము 686 మందిని చంపేశామంటూ పాకిస్థాన్ తాలిబన్ సంస్థ తొలిసారి తన వార్షిక నివేదికను విడుదల చేసింది. అయితే తాలిబన్లు తమ బలాన్ని అధికంగా చాటుకోవడానికి  మృతుల సంఖ్యను పెంచి చెప్తున్నారని, పాకిస్థాన్‌లో ఇటీవల భద్రత మెరుగుపడిందని నిపుణులు చెప్తున్నారు.
 
 జనవరి 3 నుంచి డిసెంబర్ 26 మధ్యకాలంలో పాకిస్థాన్ నగరాలు, వాయవ్య గిరిజన ప్రాంతంలో భద్రతా దళాలు, పోలీసులు, రాజకీయ నాయకులు లక్ష్యంగా తాము చేసిన దాడుల వివరాలను ఉర్దూలో రాసిన ఈ నివేదికలో తాలిబన్లు వెల్లడించారు. 2015లో మొత్తంగా 73 లక్షిత హత్యలను చేశామని, 12 మెరుపు దాడులు, 10 దాడులు, 19 ఐఈడీ పేలుళ్లు, ఐదు ఆత్మాహుతి దాడులు, 17 క్షిపణి దాడులు నిర్వహించామని, ఈ దాడుల్లో మొత్తంగా 686 మంది చనిపోయారని పాకిస్థాన్ తెహ్రీక్‌ ఎ తాలిబాన్‌ (టీపీపీ) తెలిపింది. సెప్టెంబర్‌లో పెషావర్ ఎయిర్‌బేస్‌పై తాము జరిపిన దాడిలో 247 మంది చనిపోయారని టీపీపీ తన నివేదికలో పేర్కొంది. అయితే అధికారికంగా మాత్రం 29మంది మాత్రమే చనిపోయినట్టు పాక్ ప్రభుత్వం తెలిపింది.


 న్యూఢిల్లీ: ప్రముఖ ఆధ్యాత్మిక గురువు శ్రీశ్రీ రవి శంకర్కు మరోసారి బెదిరింపులు వచ్చినట్లు తెలిసింది. ఆయనను త్వరలోనే హత్య చేస్తామంటూ తెహ్రిక్ ఈ తాలిబన్ అనే ఉగ్రవాద సంస్థ హెచ్చరికలు పంపించినట్లు సమాచారం. దీంతో ఆయన పోలీసు అధికారులకు సమాచారం అందించారు.
 
 గతంలో కూడా రవిశంకర్కు ఇస్లామిక్ స్టేట్, ఇతర తాలిబన్ ఉగ్రవాద సంస్థల నుంచి బెదిరింపు ఫోన్లు రాగా.. వాటిపై ఇంటెలిజెన్స్ అధికారులు దర్యాప్తు చేశారు. అయితే, అవన్నీ, ఫేక్ కాల్స్ అని గుర్తించారు. అలాగని తేలికగా తీసుకోకుండా తాజాగా వచ్చిన బెదిరింపుల విషయంలో మరోసారి పోలీసు అధికారులు బెదరింపులు ఎక్కడ నుంచి వచ్చిన విషయం గుర్తించే పనిలో పడ్డారు. ఇప్పటికే రవిశంకర్కు భద్రతను మరింత పెంచాలని ఆదేశించినట్లు తెలిసింది.


 ఇస్లామాబాద్: పెషావర్ స్కూల్ దాడి ప్రధాన సూత్రధారి, తెహ్రీక్-ఈ-తాలిబన్ పాకిస్తాన్ (టీటీపీ) చీఫ్ ముల్లా ఫజలుల్లాను టెర్రరిస్టుగా  పాకిస్తాన్ ప్రకటించింది. అమెరికా విదేశాంగ మంత్రి జాన్ కెర్రీ పర్యటన అనంతరం పాక్  ఈ ప్రకటన చేయటం విశేషం. టీటీపీ చీఫ్ ముల్లా ఫజలుల్లా శనివారం హతమైనట్టు పాకిస్తాన్ మీడియాలో కథనాలు కూడా వెలువడ్డాయి.
  
 ఈ నేపథ్యంలో పాక్ ఇలాంటి వ్యాఖ్యలు చేయటం పెద్ద దుమారం రేపుతోంది. దీంతో పాటు టీటీపీ, జేయూడీతో సహా మొత్తం పది ఉగ్రవాద సంస్థలపై కూడా పాక్ నిషేధం విధించే యోచనలో ఉంది.
  


 * పాకిస్తాన్‌లో పేట్రేగిన తాలిబన్లు
 * పెషావర్‌లోని ఆర్మీ పాఠశాలలో విచక్షణారహితంగా కాల్పులు
 * 141 మంది మృతి.. 130 మందికి గాయాలు
 * బడిలోకి చొరబడిన ఏడుగురు ఆత్మాహుతి దళ సభ్యులు
 * తరగతి గదులపై తూటాల వర్షం.. మృతుల్లో 132 మంది విద్యార్థులు
 * పాకిస్తాన్ సైన్యం ఎదురుదాడిలో ముగ్గురు తాలిబన్లు హతం
 * తమను తాము పేల్చేసుకున్న నలుగురు మిలిటెంట్లు
 * ఈ ఘటన జాతీయ విషాదమన్న పాక్ ప్రధాని నవాజ్ షరీఫ్
 * దాడి తామే చేశామని తెహ్రీక్ ఈ తాలిబన్ ఉగ్రవాద సంస్థ ప్రకటన
 * ఘాతుకాన్ని తీవ్రంగా ఖండించిన ప్రధానమంత్రి నరేంద్రమోదీ
 
 ఊహకందని ఉన్మాదం..
 మాటలకందని రాక్షసత్వం..
 హృదయం వికలమయ్యే కర్కశత్వం..
 నిలువెల్లా విషం నిండిన
 ఉగ్ర భుజంగాల కరాళ నృత్యం..
 అన్నెం, పున్నెం ఎరుగని పసిమొగ్గలపై
 తూటాలతో విరుచుకుపడిన మారణహోమం!
 - పాకిస్తాన్‌లోని పెషావర్‌లో జడలు విప్పిన ‘ఉగ్ర’భూత వికృత రూపాన్ని వర్ణించడానికి ఈ పదాలు చాలవు!!
 
 ప్రతీకార పొరలతో కళ్లు మూసుకొనిపోయిన తాలిబన్ రక్కసిమూక పాక్‌లోని ఓ సైనిక పాఠశాలపై ఒక్కసారిగా విరుచుకుపడింది. తరగతి గదుల్లో ప్రశాంతంగా పరీక్ష రాసుకుంటున్న విద్యార్థులపై విచక్షణారహితంగా బుల్లెట్ల వర్షం కురిపించింది. 141 మంది ప్రాణాలను బలితీసుకున్న మృత్యుహేళ పెషావర్‌లో మంగళవారం చోటుచేసుకుంది. హింసోన్మాదం నెత్తికెక్కిన రాక్షసుల తుపాకీ గుండ్ల తాకిడికి స్కూలే స్మశానంగా మారిపోయింది.
 
 ఛిద్రమైన పసిదేహాలు.. బాలబాలికల ఆర్తనాదాలతో కూడిన దృశ్యాలు అందరినీ నివ్వెరపరిచాయి. సైన్యం ఎదురుదాడి నుంచి రక్షించుకునేందుకు చిన్నారులనే రక్షణ కవచాలుగా మార్చుకున్న ఉగ్రవాదులు ప్రపంచానికి తమ వికృత రూపాన్ని చూపించారు. చరిత్రలో చెరగని రక్తపు మరకగా నిలిచే ఈ దారుణ ఘాతుకానికి తామే బాధ్యులమంటూ పాక్‌లోని ‘తెహ్రీక్ ఈ తాలిబన్’ సంస్థ ప్రకటించింది. ఉత్తర వజీరిస్తాన్‌లో పాక్ సైన్యం దాడులకు ప్రతీకారంగా ఈ దాడి చేసినట్లు ప్రకటించింది.
 
 పెషావర్: పాకిస్తాన్‌లో ‘ఉగ్ర’ భూతం మరోసారి విశ్వరూపం చూపింది. ఈ సారి అభంశుభం ఎరుగని చిన్నారుల ప్రాణాలు లక్ష్యంగా విజృంభించింది. పెషావర్‌లో సైన్యం నిర్వహిస్తున్న పాఠశాలలోకి మంగళవారం ఉదయం భారీ ఎత్తున ఆయుధాలతో, పారా మిలటరీ సరిహద్దు దళ సైనికుల దుస్తుల్లో వచ్చిన ఏడుగురు ఆత్మాహుతి దళ తాలిబన్లు.. ఆ పాఠశాలలో నెత్తుటేర్లు పారించారు. వాచ్‌మెన్‌తో ప్రారంభించి.. సిబ్బంది, ఉపాధ్యాయులు, ముఖ్యంగా విద్యార్థులు లక్ష్యంగా తూటాల వర్షం కురిపించారు. ప్రతీ తరగతి గదిలోకి వెళ్లి పరీక్ష రాసుకుంటున్న విద్యార్థులపై విచక్షణారహితంగా కాల్పులు జరిపారు. దాదాపు 8 గంటల పాటు విధ్వంసం సృష్టించారు.
 
 వారి కాల్పుల్లో 141 మంది చనిపోగా, వారిలో 132 మంది విద్యార్థులున్నారు. కాల్పుల్లో 130 మంది గాయాలపాలయ్యారు. వారు పెషావర్‌లోని పలు ఆసుపత్రుల్లో చికిత్స పొందుతున్నారు. వారిలో పలువురి పరిస్థితి విషమంగా ఉంది. దాడి సమాచారం అందుకున్న ఆర్మీ ఘటనాస్థలికి చేరుకుని ఉగ్రవాదులను ఏరివేసే ఆపరేషన్ చేపట్టింది. స్కూల్లోకి ప్రవేశించి తాలిబన్లపై ఎదురుకాల్పులు ప్రారంభించింది. ఆర్మీ దాడులను ఎదుర్కొనేందుకు విద్యార్థులు, ఉపాధ్యాయులను ఉగ్రవాదులు రక్షణ కవచాలుగా ఉపయోగించుకున్నారు. అయినా, అప్రమత్తంగా వ్యవహరించిన సైనికులు చాలామంది విద్యార్థులను రక్షించగలిగారు.
 
 ఉగ్రవాదుల కాల్పుల సమయంలో టీచర్ సూచన మేరకు ముందు జాగ్రత్త చర్యగా తరగతి గదుల్లో నేలపైన పడుకుని సురక్షితంగా ఉన్న విద్యార్థులను పాఠశాల వెనుక ద్వారం ద్వారా బయటకు పంపించారు. మంగళవారం రాత్రికి ఆపరేషన్ ముగిసింది. నలుగురు మిలిటెంట్లు తమనుతాము పేల్చేసుకోగా, మరో ముగ్గురిని ఆర్మీ మట్టుబెట్టింది. ఉగ్రవాదుల దాడిలో 132 మంది విద్యార్థులు, 9 మంది సిబ్బంది మరణించారని సైనిక దళాల ముఖ్య ప్రతినిధి మేజర్ జనరల్ ఆసిమ్ బజ్వా ప్రకటించారు.
 
 118 మంది విద్యార్థులు, ముగ్గురు సిబ్బంది, ఏడుగురు సైనికులు, ఇద్దరు సైన్యాధికారులు గాయపడ్డారన్నారు. 960 మందిని రక్షించామన్నారు.ఉగ్రవాదులు భారీ మందుగుండు, ఆహార పదార్థాలతో వచ్చారని, దాడిని కొన్ని రోజుల పాటు కొనసాగించే ఉద్దేశంతో వారు వచ్చి ఉండొచ్చ అన్నారు. ఉగ్రవాదుల నుంచి డిమాండ్లేమీ రాలేదని, ఎంతమందిని వీలైతే అంతమందిని చంపే ఉద్దేశంతోనే వారు ఈ దాడికి దిగారని వివరించారు.
 
 పాయింట్ బ్లాంక్ రేంజ్‌లో కాల్పులు
 ఈ ఘటనను జాతీయ విషాదంగా పేర్కొన్న పాక్ ప్రధాని నవాజ్ షరీఫ్ హుటాహుటిన పెషావర్ వెళ్లారు. ఉన్నతాధికారులతో పరిస్థితిని సమీక్షించారు.  పాకిస్తాన్‌లో మూడు రోజులు సంతాప దినాలుగా ప్రకటించారు.  ఈ దాడిలో చనిపోయిన వారి మృతదేహాలను స్థానిక కంబైన్డ్ మిలిటరీ ఆసుపత్రి, లేడీ రీడిండ్ హాస్పిటల్‌ల్లో భద్రపరిచారు. చనిపోయిన విద్యార్థుల్లో చాలామందిపై చాలా దగ్గరి నుంచి(పాయింట్ బ్లాంక్ రేంజ్) కాల్పులు జరిపినట్లు తెలుస్తోందని ఆసుపత్రి వర్గాలు చెప్పినట్లు  మీడియా పేర్కొంది.
 
 ఆ బాధ వారికీ తెలియాలి
 మంగళవారం ఉదయం 10 గంటల సమయంలో స్కూల్ పక్కనున్న స్మశాన వాటిక ద్వారా పాఠశాలలోకి ఉగ్రవాదులు ఆయుధాలతో ప్రవేశించారని, సల్వార్ కమీజులు ధరించి, పెద్దపెద్ద గడ్డాలతో ఉన్న వారంతా అరబిక్ బాషలో మాట్లాడారని దాడి నుంచి సురక్షితంగా బయటపడిన ఒక విద్యార్థి తెలిపాడు. వారంతా విదేశీయుల్లా ఉన్నారన్నాడు. ఉగ్రవాదులు ప్రవేశించిన సమయంలో ఆ స్కూళ్లో విద్యార్థులు, టీచర్లు, స్టాఫ్ అంతా కలిపి దాదాపు వెయ్యి మందికి పైగా ఉన్నారు.
 
 కాగా, ఈ దాడికి తామే బాధ్యత తీసుకుంటున్నామని పాక్‌కు చెందిన తెహ్రీక్ ఇ తాలిబన్ ఉగ్రవాద సంస్థ ప్రకటించింది. పెషావర్‌కు సమీపంలో ఉన్న ఉత్తర వజీరిస్తాన్‌లో మిలటరీ చర్యకు నిరసనగా ఈ దాడి చేసామని ఆ సంస్థ అధికార ప్రతినిధి ప్రకటించారు. మిలటరీ దాడుల్లో తమవారు చనిపోయినప్పుడు తాము అనుభవించిన బాధను సైనికులు కూడా అనుభవించాలనే ఉద్దేశంతో ఈ దాడి చేశామన్నారు. ఉత్తర వజీరిస్తాన్‌లో వి పాక్ ప్రభుత్వం  సైనిక చర్య ‘జర్బ్ ఇ అజబ్’ను పెద్ద ఎత్తున ప్రారంభించింది. అప్పటినుంచి  1300 మంది ఉగ్రవాదులను హతమార్చినట్లు సైన్యం ప్రకటించింది. ఈ సైనిక చర్యకు వ్యతిరేకంగానే ఆర్మీ స్కూల్‌పై ఆత్మాహుతి దాడి చేసినట్లు తెహ్రీక్ ఇ తాలిబన్ ప్రకటించింది.
 
 ఉగ్రవాదంపై పోరు ఆగదు: షరీఫ్
 పెషావర్: ఈ నరమేధాన్ని పాక్ ప్రధాని నవాజ్ షరీఫ్ తీవ్రంగా ఖండించారు. ఉగ్రవాదుల ఉన్మాదాన్ని పిరికిపంద చర్యగా అభివర్ణించారు. అయితే తాలిబన్లపై తన ప్రభుత్వం సాగిస్తున్న సైనిక చర్యలను ఈ మారణకాండ ఎంతమాత్రం నిలువరించబోదన్నారు. దేశం నుంచి ఉగ్రవాదాన్ని పూర్తిస్థాయిలో తుడిచిపెట్టేదాకా ఆపరేషన్ కొనసాగుతుందన్నారు. దాడిని పాక్ నేత, తెహ్రీక్ ఏ ఇన్సాఫ్ చీఫ్ ఇమ్రాన్‌ఖాన్ తీవ్రంగా ఖండించారు.
 
 మానవత్వంపై జరిగిన నేరమిది: భారత్
 న్యూఢిల్లీ: పాకిస్తాన్‌లోని పెషావర్‌లో సైనిక స్కూలుపై తాలిబన్ల మారణహోమాన్ని పొరుగు దేశమైన భారత్ సహా ప్రపంచ దేశాలన్నీ  ముక్తకంఠంతో ఖండించాయి.
 
 ఉగ్ర రక్కసిపై ఐక్యంగా పోరాడాలి: ప్రణబ్, మోదీ
 ఈ నరమేధం ఉగ్రవాదుల ఉన్మాద తీవ్రతకు నిదర్శనం. ప్రతి దేశం నుంచి ఉగ్రవాదాన్ని తరిమికొట్టేందుకు ప్రపంచ సమాజమంతా ఏకతాటిపైకి వచ్చి రెట్టింపు చర్యలు చేపట్టాలి. స్కూలు విద్యార్థులపై తాలిబన్ల మారణహోమం పిరికిపందల మతిలేని, చెప్పనలవికాని క్రూరమైన చర్య.
 
 పాక్‌కు మా మద్దతు: ఒబామా
 ఉగ్రవాదంపై పోరులో పాకిస్తాన్‌కు మద్దతిచ్చేందుకు కట్టుబడి ఉన్నట్లు పునరుద్ఘాటిస్తాన్నా. విద్యార్థులను లక్ష్యంగా చేసుకుని ఉగ్రవాదులు మరోసారి నైతిక పతనాన్ని చాటుకున్నారు.
 
 చీకటి రోజు: సత్యార్థి (నోబెల్ శాంతి బహుమతి గ్రహీత)
 తాలిబన్ల నరమేధం మానవత్వానికే చీకటి రోజు. బందీలుగా పట్టుకున్న విద్యార్థులను తాలిబన్లు విడిచిపెడితే నాకు నేనుగా వారికి బందీని అవుతా.
 
 గుండె పగిలింది: మలాలా (నోబెల్ బహుమతి గ్రహీత)
 దాడితో నా గుండె పగిలింది. స్కూళ్లలో ఇలాంటి ఘాతుకం తగదు.  ఇది పరికిపంద చర్య.
 
 గతంలోనూ నెత్తుటి మరకలు...
 * పాకిస్తాన్‌లో తాలిబన్లు పసిమొగ్గలను చిదిమేసినటువంటి దారుణ మారణకాండలు గతంలోనూ చోటుచేసుకున్నాయి. వీటిలో రష్యా పాఠశాలలో జరిగిన ఉదంతంలో అత్యధికంగా 386 మంది బలి అయ్యారు.
 
 * బెస్లన్(రష్యా), సెప్టెంబరు1, 2004: 186 మంది చిన్నారులు సహా 386 మంది బలికాగా, 700 మంది గాయపడ్డారు. 32 మంది చెచెన్   మిలిటెంట్లు  ‘స్కూల్ నంబర్ వన్’లో ఈ ఘాతుకానికి ఒడిగట్టారు.   
 
 * బాత్ స్కూల్(అమెరికా), మే 18, 1927: 45 మంది చనిపోగా, 58 మంది గాయపడ్డారు. మిచిగన్‌లోని బాత్ టౌన్‌షిప్‌లో గల స్కూలులో మూడు బాంబులు పేల్చి స్కూలు బోర్డు మాజీ సభ్యుడు ఆండ్రూ కిహో ఈ దారుణానికి పాల్పడ్డాడు.
 
 * వర్జీనియా టెక్(అమెరికా), ఏప్రిల్ 16, 2007: 32 మంది మృతి. 17 మందికి గాయాలు. వర్జీనియాలోని పాలిటెక్నిక్ ఇన్‌స్టిట్యూట్‌లో చొరబడిన సియంగ్ హూయి చో అనే ఉన్మాది విచక్షణారహితంగా కాల్పులు జరిపి తనను తాను కాల్చేసుకున్నాడు.
 
 ‘మరణాన్ని దగ్గరగా చూశా...’
 పెషావర్: తాలిబన్ల నరమేధంలో తీవ్రంగా గాయపడి ప్రాణాలతో బయటపడ్డ షారుఖ్‌ఖాన్(16) అనే విద్యార్థి ఆ భీతావహాన్నికళ్లకు కట్టినట్లు వివరించాడు. కాళ్లలోకి తూటాలు దూసుకెళ్లి భరించలేనంత నొప్పి కలుగుతున్నా  ప్రాణాలను కాపాడుకునేందుకు నొప్పిని పంటిబిగువున అదిమిపట్టి, తన ఆర్తనాదాలు ముష్కరులకు వినబడకుండా నోట్లో టై కుక్కుకొని ఉగ్రవాదులకు విగతజీవిలా కనిపించినట్లు చెప్పాడు. మరణాన్ని దగ్గరి నుంచి చూశానని లేడీ రీడింగ్ ఆస్పత్రిలో షారుఖ్ తెలిపాడు. ‘సైనిక దుస్తుల్లో ఉన్న నలుగురు సాయుధులు స్కూలు ఆడిటోరియంలోకి  చొచ్చుకొచ్చారు. సహచరులతో కలసి నేను కెరీర్స్ గెడైన్స్ సెషన్‌లో ఉన్నా. వారిని చూడగానే బెంచీల కింద దాక్కోవాలంటూ ఎవరో బిగ్గరగా అరిచారు.
 
 సాయుధులంతా కాల్పులు జరిపే ముందు అల్లాహు అక్బర్ అని అరిచారు. వారిలో ఒకడు బెంచీల కింద దాక్కున్న విద్యార్థులు చూడాలని మరొకడిని ఆదేశించడంతో నల్ల బూట్లు వేసుకున్న వ్యక్తి నా వద్దకు వచ్చాడు. నా మోకాళ్ల కింద కాల్చాడు. ఆపై నా సహచరుల శరీరాల్లోకి తూటాల వర్షం కురిపించాడు.  కళ్లు మూసుకొని కదలకుండా పడుకున్నా. అయినా నా శరీరం వణుకుతూనే ఉంది. మరణాన్ని ఎంతో దగ్గరి నుంచి చూశా. నల్ల బూట్లు నావైపు రావడాన్ని మరచిపోలేను. ఆ వ్యక్తి అలా వస్తుంటే మరణం నావైపు నడిచి వస్తున్నట్లు అనిపించింది’ అని చెప్పాడు.


 మాస్టర్ బ్లాస్టర్ సచిన్ టెండూల్కర్ ను పాక్ మీడియా ఆకాశానికెత్తడం నిషేధిత తెహరీక్ ఏ తాలీబాన్ కు ఒళ్లు మండినట్లుంది. దాంతో సచిన్ పై ప్రశంసల వర్షం కురిపించడం ఆపాలని పాకిస్థాన్ మీడియాకు తాలీబాన్ వార్నింగ్ ఇచ్చింది. ఏకే 47 ఆయుధాన్ని ధరించిన తాలీబాన్ అధికార ప్రతినిధి షాహీదుల్లా షాహీద్ వీడియో సందేశంలో అంతర్జాతీయ క్రికెట్ కు సచిన్ వీడ్కోలు పలుకడంపై మాట్లాడారు. భారతీయ క్రికెటరైన సచిన్ పై పాకిస్థాన్ మీడియా తన పరిధిని మించి ప్రశంసించడం చాలా దురదృష్టకరం అని షాహీద్ వ్యాఖ్యానించాడు. అదే మీడియా పాక్ కెప్టెన్ మిస్బా ఉల్ హక్ పై విమర్శలు చేస్తూ మీడియాలో దుష్ప్రచారం చేయడం విచారకరమైన సంఘటన అని వీడియో సందేశంలో తెలిపారు. 
  
 టెండూల్కర్ ఎంత గొప్ప క్రికెటైనా.. ఓ భారతీయుడు అని వివాదస్పద వ్యాఖ్యలే తాలీబాన్ నేత చేశాడు. అంతేకాక సచిన్ గురించి ప్రశంసించడం ఆపివేయాలని తాలిబాన్ హెచ్చరించింది. నవంబర్ 16 తేదిన అంతర్జాతీయ క్రికెట్ నుంచి నిష్క్రమించిన తర్వాత పాక్ మీడియా, దినపత్రికలు డాన్, ది ఎక్స్ ప్రెస్ ట్రిబ్యున్, డెయిలీ టైమ్స్ లు సచిన్ ఘనతను ఆకాశానికెత్తేసింది. పాక్ దిన పత్రిక డాన్ సచిన్ పై ప్రత్యేక కథనాన్ని వెల్లడించింది. సచిన్ తన ఆటతో ప్రపంచ క్రికెట్ కు వన్నె తెచ్చారని పలు పత్రికలు ప్రచురించాయి. 1989లో కరాచీ లో పాకిస్తాన్ పై తన కెరీర్ ను ఆరంభించిన సచిన్ ఆతర్వాత క్రికెట్ లో రికార్డులను తిరగరాశాడని పలు పత్రికలు కీర్తించాయి. ఇక ఇన్సాఫ్ అనే ఉర్దూ పత్రిక సచిన్ లాంటి ఆటగాళ్లు చాలా ఆరుదుగా వస్తుంటారు అని వ్యాఖ్యలు చేసింది. సచిన్ లేడనే వార్త  అభిమానులను విషాదానికి గురి చేస్తోంది అని పత్రికలు రాశాయి. 
  


 పోలీసు సిబ్బంది జరిపిన కాల్పుల్లో నిషేధిత తీవ్రవాద సంస్థ తెహ్రిక్-ఈ-తాలిబాన్కు చెందిన నలుగురు తీవ్రవాదులు మృతి చెందారని సీఐడీ ఎస్పీ చౌదరి అస్లామ్ బుధవారం ఇక్కడ వెల్లడించారు. మృతుల వద్ద నుంచి  దాదాపు 200 కేజీల పేలుడు పదార్థంతోపాటు ఆయుధాలను స్వాధీనం చేసుకున్నట్లు చెప్పారు. మృతుల్లో ఇద్దరిని గుర్తించినట్లు తెలిపారు. బాంబుల తయారీలో వారిద్దరు నిపుణులని పేర్కొన్నారు. గత అర్థరాత్రి బలూచిస్థాన్ నుంచి కరాచీ వైపు వస్తున్న ఓ ట్రక్ను పోలీసులు తనిఖీలలో భాగంగా అపారు.
  
 అయితే ఆ ట్రక్లో ఉన్న తీవ్రవాదులు ఒక్కసారిగా  కాల్పులు ప్రారంభించారు. దాంతో పోలీసులు ఎదురుదాడికి దిగారు. ఆ ఘటనలో ఇద్దరు పోలీసులకు తీవ్రగాయాలపాయ్యారు. అయితే వారు ఆసుపత్రిలో చికిత్స పొందుతున్నారని చౌదరి అస్లామ్ వివరించారు. ఈ ఏడాది మేలో జరిగిన ఎన్నికల అనంతరం పాకిస్థాన్లో కరాచీలో జరిగిన పలు బాంబు దాడులతో ఈ తీవ్రవాదుల ప్రమేయం ఉందని చౌదరి అస్లామ్ చెప్పారు.