ట్రాఫిక్‌ ఉల్లంఘనులు నగరంలో రోజురోజుకూ రెచ్చిపోతున్నారు. జరిమానాలు తప్పించుకోవడానికి నిఘా నేత్రాలు, ట్రాఫిక్‌ కెమెరాలకుతమ వాహన నంబర్‌ చిక్కకుండా ఉండేందుకు వాటిని ‘కవర్‌’ చేస్తున్నారు. దీనికోసం నంబర్‌ ప్లేట్స్‌కు మాస్కులు తొడగటం, వంచేయడం, విరిచేయడం చేస్తున్నారు. ఇప్పటి వరకు ఇలాంటి ఉల్లంఘనులపై పోలీసులు మోటారు వాహనాల చట్టం ప్రకారం జరిమానాలు విధిస్తూ వచ్చారు. అయితే ఈ తరహా ఉల్లంఘనుల్లో మార్పు రాకపోవడం, స్నాచింగ్స్, చోరీలకు పాల్పడేవారు సైతం ఇదే బాటపట్టడంతో హైదరాబాద్‌ ట్రాఫిక్‌ పోలీసులు కఠినంగా వ్యవహరిస్తున్నారు. ఉద్దేశపూర్వకంగా నంబర్‌ ప్లేట్స్‌ మూసేసిన వారిపై క్రిమినల్‌ కేసులు నమోదు చేస్తున్నారు. గత నెలలోనే 35 కేసులు నమోదు చేయించారు. - సాక్షి, హైదరాబాద్‌ఈ–చలాన్లు తప్పించు కోవాలనే ఉద్దేశంతో..ఈ– చలాన్లు తప్పించుకోవడానికే నంబర్‌ ప్లేట్లు మూసేసే వారే ఎక్కువగా ఉంటున్నారు. ప్రస్తుతం నగరవ్యాప్తంగా నాన్‌–కాంటాక్ట్‌ ఎన్‌ఫోర్స్‌మెంట్‌ విధానాలు అమలవుతున్నాయి. క్షేత్రస్థాయి సిబ్బంది తమ చేతిలో ఉన్న డిజిటల్‌ కెమెరాలతో, కమాండ్‌ అండ్‌ కంట్రోల్‌ సెంటర్‌ అధికారులు జంక్షన్లతోపాటు వివిధ ప్రాంతాల్లో ఉన్న సీసీ కెమెరాల ద్వారా ఉల్లంఘనలకు పాల్పడిన వాహనాల ఫొటోలు నంబరు ప్లేట్స్‌తో సహా చిత్రీకరిస్తున్నారు.వీటి ఆధారంగా ఆయా ఉల్లంఘనులకు ఈ–చలాన్లు జారీ చేస్తున్నారు. ఈ విధానంలో ఉల్లంఘనులు వినియోగించిన వాహన రిజిస్ట్రేషన్‌ నంబర్, దాని ఆధారంగా సేకరించే రిజిస్టర్డ్‌ చిరునామానే కీలకం. కొందరు తమ వాహనాలకు సంబంధించిన నంబర్‌ ప్లేట్లను వివిధ రకాలుగా కవర్‌ చేస్తూ ట్రాఫిక్‌ కెమెరాలకు చిక్కుకుండా చేస్తున్నారు. కొందరు నేరగాళ్లు సైతం నంబరు ప్లేట్లు కనిపించకుండా చేసి నేరాలకు పాల్పడుతున్నారు. నగరంలో ఇలా జరిగిన కొన్ని నేరాలను కొలిక్కి తేవడానికి పోలీసులు ఇబ్బందులు పడాల్సి వచ్చింది.ముందు వాటి కంటే వెనుకవే ఎక్కువవాహనాల నంబర్‌ ప్లేట్స్‌ ఎదుటి వారికి, సీసీ కెమెరాలకు చిక్కకుండా కవర్‌ చేయడం అనేది కార్లు వంటి తేలికపాటి వాహనాల కంటే ద్విచక్ర వాహనాలకే ఎక్కువగా కనిపిస్తోంది. రోడ్లపై ఈ తరహా నంబర్‌ ప్లేట్‌ను పోలీసులు గుర్తించి ఆపడానికి ప్రయత్నిస్తే బైక్స్‌ మాదిరిగా ఫోర్‌ వీలర్స్‌ వాహనాలు తప్పించుకొని వెళ్లిపోలేవు. దీంతో వారు అలాంటి చర్యల జోలికివెళ్లరు. ద్విచక్ర వాహనాల్లోనూ 90 శాతం వెనుక వైపు నంబర్‌ ప్లేట్‌కే రూపురేఖలు లేకుండా చేస్తున్నారు.క్షేత్రస్థాయిలో స్పెషల్‌ డ్రైవ్స్‌ చేసేప్పుడు రహదారులపై కొన్ని వాహనాలను తనిఖీ చేస్తారు. ముందు ఉండే నంబర్‌ ప్లేట్‌ వారికి స్పష్టంగా కనిపిస్తుండటంతో ఆ వాహనాలను ఆపి చర్యలు తీసుకునే అవకాశం ఉంటుంది. అదే వెనుక నంబర్‌ ప్లేట్‌ అయితే వాహనం ముందుకు వెళ్లిపోయాకే ట్రాఫిక్‌ పోలీసులకు కనిపిస్తుంది. ఇలా ఉద్దేశపూర్వకంగా ఇలాంటి ఉల్లంఘనలకు పాల్పడిన వారిని గుర్తించి క్రిమినల్‌ కేసులు నమోదు చేయడం మొదలెట్టారు. గత నెల వరకు ఐపీసీలోని సెక్షన్‌ 420 ప్రకారం నమోదు చేయగా, ఈ నెల నుంచి బీఎన్‌ఎస్‌లోని సెక్షన్‌ 318 వినియోగించనున్నారు. ఈ కేసుల్లో నేరం నిరూపణ అయితే ఏడేళ్ల వరకు జైలు లేదా జరిమానా విధించే అవకాశం ఉంది.ఉద్దేశపూర్వకంగా చేసిన వారిపైనే కేసులుఅనివార్య కారణాల వల్ల, పొరపాటుగా వాహనాల రిజిస్ట్రేషన్‌ నంబర్‌ ప్లేట్లు డ్యామేజ్‌ అవుతుంటాయి. మరికొందరికి తమ నంబర్‌ ప్లేట్‌ డ్యామేజ్‌ అయిన విషయం తెలిసినా పని ఒత్తిడి, నిర్లక్ష్యం వంటి కారణాలతో దాన్ని సరి చేసుకోరు. స్పెషల్‌ డ్రైవ్‌లో ఇలాంటి వాహనాలు చిక్కితే వారికి చలాన్‌ ద్వారా జరిమానా మాత్రమే విధిస్తున్నారు. కొందరు మాత్రం నేరాలు చేయాలని, ఈ–చలాన్‌కు చిక్కకూడదనే ఉద్దేశంతో ఉద్దేశపూర్వకంగా నంబర్‌ ప్లేట్లను డ్యామేజ్‌ చేయడం, వాటిపై ఉన్న నంబర్లు మార్చడం, వంచేయడం, స్టిక్కర్లు వేసి మూసేయడం చేస్తున్నారు. ఇలాంటి వారిపై మాత్రమే శాంతిభద్రతల విభాగం పోలీస్‌స్టేషన్లలో కేసులు నమోదు చేయిస్తున్నాం. – పి.విశ్వప్రసాద్, అదనపు పోలీసు కమిషనర్‌ (ట్రాఫిక్‌)

సాక్షి, హైదరాబాద్‌: వాహనాల నంబర్‌ ప్లేట్లపై రాష్ట్ర కోడ్‌ టీఎస్‌ నుంచి టీజీగా మారింది. ఈనెల 15 నుంచి రిజిస్టర్‌ అయ్యే వాహనాలకు టీజీ సీరీస్‌ కేటాయిస్తున్నారు. ఇంతవరకు బాగానే ఉంది.. కానీ రోజుకు దాదాపు 10 వేల వరకు కొత్త వాహనాలు రాష్ట్రంలో రోడ్డెక్కుతాయి.  ఇప్పటి వరకు ఏ వాహనానికి కూడా టీజీ సీరిస్‌ ఆర్‌సీబుక్‌ గానీ, కొత్త లైసెన్సు స్మార్ట్‌కార్డు గానీ జారీ కాలేదు. అయితే దీనిపై  రవాణాశాఖ ఎక్కడా స్పష్టత ఇవ్వకపోవటం ఇప్పుడు అనుమానాలకు తావిస్తోంది. స్మార్ట్‌ కార్డుల జారీ బాధ్యత ప్రైవేట్‌ సంస్థలకు అప్పగించారు. విదేశాల నుంచి దిగుమతి చేసుకొని, చిప్‌తో కూడి కార్డు సరఫరా చేస్తారు. గత ప్రభుత్వ హయాంలో వీటికి సంబంధించి ఒప్పందాలు జరిగాయి. అయితే ఇప్పుడు ఉన్నట్టుండి వాటి జారీ ఆగిపోయింది.   చార్జీల వసూలు సరే... ఆర్‌సీ, నంబర్‌ ప్లేట్, లైసెన్స్‌ బట్వాడా పేరిట చార్జీలు వసూలు చేస్తున్న రవాణాశాఖ వాటిని  వారంరోజులుగా ఇవ్వకపోవడంపై వాహనదా రులు షోరూమ్‌ నిర్వాహకులనో, రవాణాశాఖ అధికారులనో ప్రశ్నిస్తే.. సంబంధిత సాఫ్ట్‌వేర్‌లో ఆమేరకు మార్పు చేయాల్సి ఉందని, అందుకే కొంత జాప్యం జరుగుతోందన్నారు. రెండుమూడు రోజుల్లో వాటి బట్వాడా మొదలవుతుందని చెబుతున్నారు. వాహనాల రాష్ట్ర కోడ్‌ మారినందున సాఫ్ట్‌వేర్‌ను కూడా యుద్ధప్రాతిపదికన మార్చాలి. ఈనెల 15 నుంచి రాష్ట్ర కోడ్‌ మారుతుందని రవాణాశాఖకు స్పష్టమైన అవగాహన ఉంది. వెంటనే సాఫ్ట్‌వేర్‌ను అప్‌డేట్‌ చేయొచ్చు. కానీ వారం రోజులు గడుస్తున్నా అప్‌డేట్‌ కాలేదని పేర్కొంటుండటం విచిత్రంగా ఉంది. రాష్ట్ర కోడ్‌ మార్పు అమలులోకి రావటానికి మూడు రోజుల ముందు నుంచే కార్డుల జారీ నిలిచిపోయిందని తెలుస్తోంది. ఇన్ని రోజులుగా సాఫ్ట్‌వేర్‌ను ఎందుకు అప్‌డేట్‌ చేయటం లేదో..ఎందుకు జాప్యం జరుగుతోందో సమాచారం లేదు. దీనిపై ఉన్నతాధికారులు కూడా స్పందించటం లేదు. ఆర్‌సీ, లైసెన్స్‌ స్మార్ట్‌కార్డులు లేక వాహనదారులు ఆందోళన చెందుతున్నారు. పోలీసులు తనిఖీ చేస్తే డౌన్‌లోడ్‌ చేసుకున్న పత్రాలను చూపండి అంటూ రవాణాశాఖ సిబ్బంది సలహా ఇస్తున్నారు. కానీ, రాష్ట్ర సరిహద్దులు దాటే చోట ఉండే చెక్‌పోస్టుల్లో సిబ్బంది ఆ కాగితాలను పరిగణనలోకి తీసుకోవటం లేదని, చిప్‌ ఉన్న స్మార్ట్‌ కార్డులే చూపాలని పేర్కొంటున్నారని వాహన దారులు చెబుతున్నారు. 

సాక్షి, హైదరాబాద్‌: వాహనాల నంబర్ ప్లేట్లు మార్చే ఆలోచనలో తెలంగాణ ప్రభుత్వం ఉన్నట్లు సమాచారం. ఇప్పటి వరకు అన్ని నంబర్ ప్లేట్లకు ముందు టీఎస్ ఉండగా దాన్ని టీజీగా మార్చనునట్లు తెలిసింది. రేపటి కేబినెట్ భేటీలో టీఎస్‌కు బదులు టీజీగా మారుస్తూ మంత్రి వర్గం ఆమోదం తెలపనున్నట్లు తెలుస్తోంది. కాగా, రాష్ట్ర మంత్రివర్గ సమావేశం సీఎం రేవంత్‌రెడ్డి అధ్యక్షతన ఆదివారం సచివాలయంలో జరగనుంది. కేబినెట్‌ భేటీలో ప్రధానంగా రెండు గ్యారంటీల అమలుకు సంబంధించి చర్చించనున్నట్లు సమాచారం. రూ.500కే గ్యాస్‌ సిలిండర్, 200 యూనిట్ల వరకు ఉచిత విద్యుత్‌ సరఫరాకు సంబంధించి కూలంకషంగా చర్చించి, అమలు చేసే తేదీని కూడా నిర్ణయించే అవకాశం ఉన్నట్లు చెబుతున్నారు. అయితే ప్రజాపాలన దరఖాస్తులకు సంబంధించి నిర్వహించిన సమీక్ష సమావేశంలో ఈ రెండింటితో పాటు, ఇందిరమ్మ ఇళ్లకు సంబంధించి వ్యయం ఎంత అవుతుంది.? ఎంతమందికి లబ్ధి చేకూరుతుందన్న అంశాలపై నివేదిక ఇవ్వాల్సిందిగా అధికారులను సీఎం ఆదేశించిన సంగతి తెలిసిందే. కాగా 4వ తేదీన జరిగే సమావేశంలో ఏ రెండింటిని అమలు చేయాలనే దానిపై తుది నిర్ణయం తీసుకోనున్నట్లు సమాచారం. అలాగే అసెంబ్లీ బడ్జెట్‌ సమావేశాలు ఎప్పటి నుంచి, ఎప్పటివరకు నిర్వహించాలో కూడా నిర్ణయిస్తారని ప్రభుత్వ వర్గాలు తెలిపాయి. గవర్నర్‌ ప్రసంగంతో బడ్జెట్‌ సమావేశాలు ప్రారంభం కానున్న నేపథ్యంలో, ఈ మేరకు కేబినెట్‌ భేటీలో ఆమోదం తీసుకునే అవకాశాలున్నాయి. ఈనెల 8న బడ్జెట్‌ సమావేశాలు ప్రారంభమై ఆరు రోజులు జరిగే అవకాశం ఉందని, 9న బడ్జెట్‌ ప్రవేశపెట్టవచ్చని తెలుస్తోంది.

టాఫిక్‌ పోలీస్‌ లేడని దర్జాగా దూసుకెళ్లినా.. నిబంధనలు అతిక్రమించినా ఒకడున్నాడు చూడ్డానికి. ఇకపై కూడళ్ల వద్ద మిమ్మల్ని నిరంతరం పర్యవేక్షిస్తాడు. ఏమాత్రం నిబంధనలు పాటించకపోయినా క్లిక్‌మని జరిమానా వేసేస్తాడు.  – కాజీపేట  ఇకపై ట్రాఫిక్‌ నిబంధనలు తప్పనిసరిగా పాటించాల్సిందే. లేదంటే మీ జేబుకు చిల్లు పడడం ఖాయం. ఎందుకంటే కాజీపేట చౌరస్తాలో ఇటీవల కొత్తగా ఆటోమెటిక్‌ ఇంటిగ్రేటేడ్‌ కమాండ్‌ కంట్రోల్‌ విధానం అమల్లోకి వచ్చింది. చక్కగా తన పనితాను చేసుకుంటూ వెళ్తోంది. ఇక ముందు బీట్‌ కానిస్టేబుల్‌ చౌరస్తాలో నిలబడి నిబంధనలు అతిక్రమించిన వాహనదారుల ఫొటోలు తీసి జరిమానా విధించే పని ఉండదు. ఆటోమెటిక్‌ కెమెరాలు తీసిన ఫొటోల ఆధారంగా నేరుగా ఈ–చలానా ఇంటికే వచ్చేస్తుంది.  ప్రస్తుతం హైదరాబాద్‌ వంటి నగరాల్లో ఈవిధానం అమలవుతుండగా రాష్ట్రంలోని ముఖ్య నగరాల్లో ప్రయోగాత్మకంగా అమల్లోకి తీసుకొచ్చారు. ప్రస్తుతం నగరంలోని పలు ప్రధాన కూడళ్లలో ఈ సీసీ కెమెరాలను ఏర్పాటు చేశారు. వీటన్నింటికోసం వరంగల్‌లో కమాండ్‌ కంట్రోల్‌ కేంద్రాన్ని ఏర్పాటు చేశారు. వివిధ కూడళ్లలో ఏర్పాటు చేసిన సీసీ కెమెరాలను కమాండ్‌ కంట్రోల్‌ కేంద్రానికి అనుసంధానం చేసి నిర్వహణ కొనసాగించనున్నారు.  (చదవండి: బిహార్‌లో హైదరాబాద్‌ పోలీసులపై కాల్పులు) ఈ నిబంధనలు పాటించాల్సిందే..  ► హెల్మెట్‌ లేకుండా వాహనం నడపొద్దు  ► రాంగ్‌ రూట్‌లో ప్రయాణించొద్దు  ► వాహనాలపై పరిమిత సంఖ్యలో ప్రయాణించాలి  ► ఫోన్‌ మాట్లాడుతూ ప్రయాణించొద్దు  ► నంబర్‌ ప్లేట్‌ వంచొద్దు. స్టిక్కర్లు అంటించొద్దు. ఈవిధానంలో చౌరస్తాలో ఏర్పాటు చేసిన సీసీ కెమెరాల ప్రాంతం నుంచి వాహనదారులు నిబంధనలు పాటించకపోతే వారి ఫొటోలు ఈకెమెరాల్లో నిక్షిప్తమై కంట్రోల్‌ కేంద్రం నుంచి ఆటోమెటిక్‌గా ఈ–చలానా వాహనదారులకు చేరేలా ఏర్పాటు చేశారు. త్వరలో ఏఎంపీఆర్‌ విధానం ఆటోమెటిక్‌గా ఇంటిగ్రెటేడ్‌ కమాండ్‌ కంట్రోల్‌ విధానం అమలు అనంతరం అత్యాధునిక పరిజ్ఞానంతో రూపొందించిన ఏఎంపీఆర్‌ (ఆటో మెటిక్‌ నంబర్‌ ప్లేట్‌ రికగ్నైజేషన్‌) అమలు చేయనున్నట్లు సమాచారం.  ఎవరైనా తమ వాహనం నంబర్‌లో ఒక సంఖ్య తొలగించి వాహనం నడిపితే సీసీ కెమెరాల్లో ఆవాహనం ఫొటో నిక్షిప్తమై తొలగించిన నంబర్‌ను గుర్తు పడుతోంది. అనంతరం ఆయజమాని సెల్‌ఫోన్‌కు ఈ–చలాన్‌ ద్వారా జరిమానా విధిస్తుంది. (చదవండి: లా అండ్‌ ఆర్డర్‌ చేతకాకుంటే ఇంట్లో కూర్చోవాలి: బండి సంజయ్‌)

సాక్షి, హైదరాబాద్‌ : జూబ్లీహిల్స్‌ ట్రాఫిక్‌ పోలీసులు ఇటీవల చెక్‌పోస్టు ప్రాంతంలో ఓ ద్విచక్ర వాహనాన్ని ఆపారు. మహారాష్ట్ర రిజిస్ట్రేషన్‌తో ఉన్న దాని నంబర్‌ ప్లేట్‌ అత్యంత చిత్రంగా, నిబంధనలకు విరుద్ధంగా ఉండటంతో జరిమానా విధించారు. ఫ్యాన్సీ నంబర్‌ ప్లేట్‌గా పిలిచే ఈ ఉల్లంఘనతో పాటు అనేక రకాలైన వైలేషన్స్‌కు పాల్పడుతున్న వాళ్లు సిటీలో ఉన్నారు. తమ వాహనాల నంబర్‌ ప్లేట్లను వంచేస్తూ... కొంత మేర విరగ్గొట్టేస్తున్న... కొన్ని అంకెల్ని చెరిపేస్తూ ‘దూసుకుపోతున్నారు’. ఎన్ని ఉల్లంఘనలకు పాల్పడినా ఈ–చలాన్‌ పడకుండా ఉండేందుకు ఇలాంటి ఎత్తులు వేస్తున్నారు. వీరికి జరిమానాలతో సరిపెడుతున్న ట్రాఫిక్‌ విభాగం అధికారులు తీవ్రమైన ట్యాంపరింగ్‌ విషయంలో మాత్రం సీరియస్‌గా ఉంటున్నారు. తప్పుడు నంబర్‌ ప్లేట్లతో తిరుగుతున్న వారిపై క్రిమినల్‌ కేసులు నమోదు చేస్తున్నారు.   నిబంధనలు, సూచనలు ఇవే.. బైక్‌లు, తేలికపాటి వాహనాలు, కార్లకు తెల్లరంగు ప్లేటుపై నల్ల అక్షరాలతో నంబర్‌ ఉండాలి. కమర్షియల్, గూడ్స్‌ వాహనాలకు పసుపు రం గు ప్లేట్‌పై నల్ల అక్షరాలతో నంబర్‌ ఉండాలి.  నంబర్‌ప్లేట్‌పై పేర్లు, బొమ్మలు, సందేశాలు  నిషేధం. బోగస్‌ నంబర్‌ ప్లేట్లు కలిగి ఉంటే క్రిమినల్‌ కేసులు నమోదుతోపాటు డ్రైవింగ్‌ లైసెన్స్‌ రద్దుకు చర్యలు. వాహనచోదకులు ఒరిజినల్‌ డ్రైవింగ్‌ లైసెన్స్, రిజిస్ట్రేషన్‌ సర్టిఫికెట్‌ (కనీసం జిరాక్సు ప్రతులైనా) లేదంటే స్మార్ట్‌ఫోన్‌లో ఆర్టీఏ యాప్‌లో కలిగి ఉండాలి. ద్విచక్ర, త్రిచక్ర వాహనాలకు నంబర్‌ ప్లేట్‌ 500X120, తేలికపాటి, ప్యాసింజర్‌ వాహనాలు 340X200  లేదా 500X120 మిల్లీ మీటర్లు, మీడియం, హెవీ కమర్షియల్‌ వాహనాలకు 340X200 మిల్లీ మీటర్ల సైజుల్లో ఉండాలి.  రాజధానిలోనే అధికం..  వాహనాల రిజిస్ట్రేషన్‌ నంబర్‌ ప్లేట్ల విష యంలో ట్రాఫిక్‌ పోలీసులు సీరియస్‌ గా ఉంటున్నారు. రాష్ట్రంలో నంబర్‌ప్లేట్లు లేని వాహనాలపై జనవరి నుంచి జూన్‌ వరకు 1,28,621, హైదరాబాద్, సైబరాబాద్, రాచకొండ కమిషనరేట్లలోనే 1,06,692 కేసులు నమోదయ్యాయి.  


 సాక్షి, హైదరాబాద్: తెలంగాణలోని అన్ని వాహనాల నంబర్ ప్లేట్లు ఇక ‘టీఎస్’ సిరీస్‌లోకి మారబోతున్నాయి. న్యాయపరమైన అడ్డంకులను అధిగమించిన రాష్ట్ర ప్రభుత్వం నంబర్ ప్లేట్లపై ‘ఏపీ’ సిరీస్‌ను తుడిచేసేందుకు సిద్ధమవుతోంది. కొత్తగా రిజిస్ట్రేషన్ చేయించుకుంటున్న వాహనాలకు టీఎస్ సిరీస్‌ను జారీ చేస్తున్న ప్రభుత్వం ఇప్పుడు.. ఉమ్మడి ఆంధ్రప్రదేశ్‌లో రిజిస్టర్ అయిన వాహనాలకు కూడా టీఎస్ సిరీస్‌ను కేటాయించబోతోంది. అలాంటి వాహనాలన్నింటికీ రవాణా శాఖ కొత్తగా ఆర్సీ కార్డులను జారీ చేస్తుంది.
 
 ఇందుకోసం ఒక్కో నంబర్ ప్లేట్ మార్పుపై రవాణా శాఖకు రూ.200 చొప్పున చెల్లించాలి. అలాగే వాహనదారులు కచ్చితంగా హైసెక్యూరిటీ నంబర్ ప్లేట్‌ను మాత్రమే బిగించుకోవాలనే నిబంధన విధించబోతున్నారు. దీనికి సంబంధించిన ఫైల్‌ను రవాణా శాఖ సీఎంకు పంపింది.
  
 హైసెక్యూరిటీ ప్లేట్లు తప్పనిసరి
 సాధారణ నంబర్ ప్లేట్లను తీసేసి హైసెక్యూరిటీ నంబర్ ప్లేట్లను అమర్చుకునేందుకు సుప్రీంకోర్టు డిసెంబర్ వరకు గడువు ఇచ్చింది. ఇప్పటికే కొన్ని రాష్ట్ర ప్రభుత్వాలు దీన్ని అమలు చేస్తున్నాయి. తెలంగాణ రాష్ట్రంలోని అన్ని వాహనాలు కూడా డిసెంబర్ నాటికి హైసెక్యూరిటీ నంబర్ ప్లేట్లను ఏర్పాటు చేసుకోవాలి. కానీ నంబర్ ప్లేట్ల సరఫరా సరిగాలేక దీని అమలు ముందుకు సాగడంలేదు.
 
 ఈ నేపథ్యంలో డిసెంబర్ నాటికి తెలంగాణలో ఈ ప్రక్రియను పూర్తి చేయాలని తాజాగా కేంద్రం ఆదేశించింది. దీంతో నంబర్ ప్లేట్ల సరఫరా సంస్థపై రవాణా శాఖ ఒత్తిడి పెంచింది. అయినా సరే డిసెంబర్ నాటికి అన్ని వాహనాలకూ సరిపడా ప్లేట్ల సరఫరా అసాధ్యమని తాజాగా తేల్చారు. దీంతో తెలంగాణకు మరికొన్ని నెలల గడువు ఇవ్వాలని కోరుతూ త్వరలో ప్రభుత్వం కేంద్రానికి లేఖ రాయనుంది. అయితే దీనికి సుప్రీంకోర్టు అనుమతి ఇవ్వని పక్షంలో డిసెంబర్ గడువను అమలు చేయాలి.
 
 అదే జరిగితే మరికొన్ని కంపెనీలకూ హైసెక్యూరిటీ నంబర్ ప్లేట్ల తయారీ బాధ్యత అప్పగించే అంశాన్ని పరిశీలించాలని ప్రభుత్వం భావిస్తున్నట్టు తెలిసింది. ప్రస్తుతం తెలంగాణలో దాదాపు 40 ల క్షల వాహనాలున్నాయి. ఒక్క గ్రేటర్ హైదరాబాద్ పరిధిలోనే 24 లక్షల వాహనాలున్నాయి. తొలుత హైదరాబాద్‌లో ఈ ప్రక్రియను పూర్తి చేయాల్సి ఉంది.
  
 జిల్లా కోడ్.. నంబర్ పాతదే..
 
 తెలంగాణలో తొలి ప్రభుత్వం కొలువుదీరిన వెంటనే నంబర్ ప్లేట్ల మార్పునకు శ్రీకారం చుట్టింది. అన్ని వాహనాలూ టీఎస్ సిరీస్‌లోకి మార్చాల్సిందేనని హుకుం జారీ చేయటంతో కొంతమంది హైకోర్టును ఆశ్రయించారు. దీంతో ఈ ప్రక్రియకు బ్రేక్ పడింది. తాజాగా ఆ అడ్డంకి తొలగిపోవటంతో వాహనాల రిజిస్ట్రేషన్ సిరీస్ మార్చేందుకు రవాణా శాఖ కసరత్తు మొదలుపెట్టి సీఎం అనుమతి కోరింది. కొత్త ఆర్సీల జారీకి ఛార్జీగా రూ.200 నిర్ధారించాలని ప్రతిపాదించింది.
 
 అన్ని వాహనాలకూ అదే వర్తిస్తుందని పేర్కొంది. సుప్రీంకోర్టు మార్గదర్శకాల నేపథ్యంలో.. కొత్త సిరీస్‌లోకి మారే వాహనాలన్నింటికీ హైసెక్యూరిటీ రిజిస్ట్రేషన్ ప్లేట్లను ఏర్పాటు చేసుకోవటాన్ని తప్పనిసరి చేస్తున్నట్టు కూడా అందులో పేర్కొంది. జిల్లాల కోడ్, వాహన నంబర్ పాతదే ఉంటుంది. ప్రస్తుతం ఏపీగా ఉన్న చోట టీఎస్ అన్న అక్షరాలు మాత్రమే కొత్తగా ఏర్పాటు చేసుకోవాల్సి ఉంటుంది.


 హైదరాబాద్: తెలంగాణలో అన్ని వాహనాల నంబర్ ప్లేట్లను టీఎస్ సిరీస్‌లోకి మార్చే కసరత్తు మరో నాలుగైదు రోజుల్లో ప్రారంభమయ్యే అవకాశం కనిపిస్తోంది. దీనికి సంబంధించి సోమ, మంగళవారాల్లో మార్గదర్శకాలు రూపొందించేందుకు ప్రభుత్వం చర్యలు తీసుకోనుంది. ఏపీ సిరీస్‌తో కొనసాగుతున్న పాత వాహనాల సిరీస్‌ను మార్చాలా వద్దా అన్న విషయంలో ప్రజల అభిప్రాయాలు తెలుసుకునేందుకు ప్రభుత్వం ఇచ్చిన గడువు ఆదివారంతో ముగిసింది. ఏపీ సిరీస్‌తో ఉన్న అన్ని వాహనాలను నాలుగు నెలల్లో టీఎస్ సిరీస్‌లోకి మార్చుకోవాలంటూ జారీ చేసిన ఉత్తర్వుకు వ్యతిరేకంగా ప్రజల నుంచి అభ్యంతరాలు అందని నేపథ్యంలో... ఆ ఉత్తర్వును అమలు చేయాలని ప్రభుత్వం భ్చవిస్తోంది.
 
 ఏకంగా 70 లక్షల వాహనాల సిరీస్ మార్చే అంశంపై న్యాయపరమైన చిక్కులొచ్చే అవకాశం ఉన్న నేపథ్యంలో ఇంతకాలం కచ్చితమైన అభిప్రాయం వ్యక్తం చేయకుండా ప్రభుత్వం గందరగోళం సృష్టించింది. దీనిపై ఇప్పటికీ స్పష్టత రానప్పటికీ.. గడువులోపు అభ్యంతరాలు పెద్దగా రానందున సిరీస్ మార్పు విషయంలో పాత ఉత్తర్వులకు కట్టుబడాలని ప్రభుత్వం భావిస్తోందని రవాణా శాఖ మంత్రి పట్నం మహేందర్‌రెడ్డి ‘సాక్షి’తో చెప్పారు.  సిరీస్ మార్చటానికి ఎలాంటి రుసుము అవసరం లేదని పాత ఉత్తర్వులో ప్రభుత్వం స్పష్టం చేసినా.. వాహనానికి సంబంధించిన అధికార పత్రాల మార్పునకు అయ్యే ఖర్చు మాత్రం వాహనదారులే భరించాల్సిన పరిస్థితి కనిపిస్తోంది. కార్లకు, ద్విచక్రవాహనాలకు ఇది విడివిడిగా ఉండనుంది. అయితే ఈ ఖర్చు రూ.200కు మించకుండా ఖరారు చేయనున్నట్టు సమాచారం.