సాక్షి, కనిగిరి రూరల్‌ : ప్రకాశం జిల్లా వెలిగండ్ల మండలం జిల్లెల్లపాడుకు చెందిన వివాహిత కోటా రాధ (35) బుధవారం రాత్రి హత్యకు గురైంది. ఈ కేసులో మృతురాలి స్నేహితుడు కేతిరెడ్డి కాశయ్య అలియాస్‌ కా శీరెడ్డి కీలక నిందితుడిగా పోలీసులు అనుమాని స్తున్నారు. ఆర్థికపరమైన అంశాలే హత్యకు ప్రధాన కారణంగా తెలుస్తోంది. మృతురాలి తల్లిదండ్రులు కూడా కాశయ్యపైనే ఫిర్యాదు చేశారు.   వివరాలివీ.. రాధ, కాశయ్యలు స్నేహితులు. ఒకే పాఠశాలలో చదువుకున్నారు. జిల్లెల్లపాడుకు చెందిన కె. రాధకు, నల్గొండ జిల్లా కోదాడకు చెందిన మోహన్‌రెడ్డితో వివాహమైంది. హైదరాబాద్‌లో నివాసం ఉంటున్నారు. మోహన్‌రెడ్డి సాఫ్ట్‌వేర్‌ ఉద్యోగి, రాధ గృహిణి. అప్పటికే హైదరాబాద్‌లోనే నివాసముంటున్న కాశయ్య తాను సాఫ్ట్‌వేర్‌ కంపెనీ పెడుతున్నానని, దానికి నగదు కావాలంటూ వీరి వద్ద నుంచి సుమారు రూ.51 లక్షల వరకు అప్పుగా తీసుకున్నాడు. కంపెనీలో నష్టంరావడంతో అక్కడి నుంచి ఉడాయించాడు. అప్పుగా తీసుకున్న నగదు వడ్డీతో కలిపి సుమారు రూ.80 లక్షలు అయింది. అయితే, రెండేళ్ల నుంచి డబ్బులు చెల్లించకపోవడంతో తరచూ రాధ, మోహన్‌రెడ్డి ఒత్తిడి చేస్తుండటంవల్లే రాధను కాశయ్య హత్యచేశాడనే ప్రచారం సాగుతోంది.  అసలేం జరిగిందంటే.. ఈనెల 11న జిల్లెలపాడులోని చౌడేశ్వరమ్మ తిరు నాళ్లకు రాధ కుటుంబీకులు హైదరాబాద్‌ నుంచి పుట్టింటికి వచ్చారు. అది తెలుసుకున్న కాశయ్య.. తాను ఇప్పుడు బెంగళూరులో ఉంటున్నానని, తండ్రికి, భర్తకు ఎవరికీ చెప్పకుండా కనిగిరికి వస్తే రూ.2 లక్షలు చెల్లిస్తానని ఐదురోజుల క్రితం మెసేజ్‌ పెట్టాడు. అయితే, రాధ వెళ్లలేదు. తిరిగి బుధవారం మరో మెసేజ్‌ పెట్టాడు. దీంతో రాధ అదేరోజు తన చిన్న కుమారుడిని తీసుకుని తండ్రికి చెప్పకుండా, ఇంట్లో అమ్మకు చెప్పి కనిగిరి వెళ్లింది. అక్కడ చిన్నాన్న ఇంట్లో పిల్లవాడ్ని వదిలిపెట్టింది. తర్వాత బాబాయ్‌తో వచ్చి పిల్లవాడికి దుస్తులు షాపింగ్‌ చేసింది. సా.6.47 గంటల సమయంలో పామూరు బస్టాండ్‌లో గల సీసీ ఫుటేజీల్లో కనిపించింది. రా.8.30 గంటల నుంచి రాధ ఫోన్‌ పనిచేయలేదు. నాగిరెడ్డి మృతురాలి తల్లిదండ్రులకు సమాచారమిచ్చారు. వారు వచ్చి అన్నిచోట్ల వెతికారు. ఫలితం లేకపోవడంతో అర్ధరాత్రి పోలీసులకు ఫిర్యాదు చేశారు. రాత్రి 12.50 గంటలకు ఫోన్‌ లొకేషన్‌ కనిపెట్టారు. అది జిల్లెల్లపాడు వద్ద కన్పించడంతో అక్కడికి వెళ్లి చూడగా రాధ విగతజీవిగా పడి ఉంది. చదవండి: సరదాగా తిరిగొద్దామనుకుంటే.. కబళించిన మృత్యువు  రాధను ఒక చోటికి తీసుకెళ్లి హత్యచేసి ఆ తర్వాత మరో ప్రదేశానికి తీసుకెళ్లి పడేసినట్లు పోలీసులు అనుమానిస్తున్నారు. రాధను హంతకులు కారులోకి ఎక్కించుకుని మత్తు మందు ఇచ్చి ఎవరూ లేని నిర్జన ప్రదేశానికి తీసుకెళ్లి చున్నీతో గొంతు నులిమి, తలపై బలంగా కొట్టి హత్యచేసి ఉంటారని ఆనవాళ్లను బట్టి తెలుస్తోంది. ఆ తర్వాత ఆమెను జిల్లెల్లపాడు క్రాస్‌ రోడ్డు వద్ద పడేసి దాన్ని రోడ్డు ప్రమాదంలా చిత్రీకరించేందుకు ప్రయత్నించినట్లు ప్రచారం జరుగుతోంది.  ఈనాడు కథనం అవాస్తం : డీఎస్పీ  ఈ హత్యకు సంబంధించి ఈనాడు కథనం పూర్తిగా అవాస్తమని కనిగిరి డీఎస్పీ ఆర్‌ రామరాజు అన్నారు. పోలీసులు జాప్యం చేశారని, సకాలంలో స్పందించలేదని రాయడాన్ని ఆయన తీవ్రంగా ఖండించారు. పోస్ట్‌మార్టం ప్రాథమిక నివేదికలో అత్యాచారం జరిగినట్లు వెల్లడికాలేదన్నారు. మృతురాలి తల్లిదండ్రులు కాశయ్యపై ఫిర్యాదు చేశారని, ఆ కోణంలో దర్యాప్తు జరుపుతున్నామన్నారు.  

సాక్షి, వెలిగండ్ల (ప్రకాశం): ఈత సరదా ఇద్దరు విద్యార్థుల ఉసురు తీసింది. వారు స్వయానా సొంత అన్నదమ్ముల పిల్లలు. నీటిలో మునిగిపోతున్న తమ్ముడిని కాపాడబోయి అన్న కూడా ప్రాణాలు కోల్పోయాడు. ఈ విషాదకర సంఘటన మండల కేంద్రం వెలిగండ్ల పాలేటివాగు వద్ద సోమవారం జరిగింది. వివరాలు.. వెలిగండ్ల ఎస్సీ కాలనీకి చెందిన తాతపూడి కృష్ణవంశీ (15), తాతపూడి కృష్ణకృప (12), జూటికే రాకేష్, తాతపూడి టింకు అనే నలుగురు విద్యార్థులకు సోమవారం బక్రీద్‌ సందర్భంగా సెలవు కావడంతో ఈత కొట్టేందుకు గ్రామానికి సమీపంలోని పాలేటి వాగు వద్దకు వెళ్లారు. వాగు లోతు తెలియని నలుగురు విద్యార్థులు ఈత కొట్టేందుకు సిద్ధమయ్యారు. తొలుత తాతపూడి టింకు, తాతపూడి వంశీ, కృష్ణకృప వాగులో దిగారు. టింకు భయ పడటంతో గట్టుపై ఉన్న రాకేష్‌ తన చొక్కా విప్పి అందించాడు. టింకు అతికష్టం మీద ఒడ్డుకు చేరుకున్నాడు. కృష్ణకృప వాగులో మునిగిపోతూ చేతులు పైకెత్తడంతో గట్టుపై ఉన్న కృష్ణవంశీ తన తమ్ముడిని కాపాడేందుకు వాగులోకి దూకాడు. కృష్ణవంశీ, కృష్ణకృప ఇద్దరూ వాగులో మునిగిపోయారు. గమనించిన టింకు, రాకేష్‌లు కేకలు పెడుతూ కాలనీలోకి పరిగెత్తారు. కేకలు విన్న స్థానికులు మల్లిబోయిన సుబ్బరాయుడు, అన్నెబోయిన చిన రంగయ్యలు వాగు వద్దకు చేరి వాగులో దూకి కృష్ణవంశీని బయటకు తీశారు. అప్పటికే మరణించినట్లు వారు గుర్తించారు. ఇంకొకరు వాగు లోపల ఉన్నారని చెప్పడంతో మళ్లీ వాగులో దూకి కృష్ణకృపను కూడా బయటకు తీశారు. కొనూపిరితో కొట్టుమిట్టాడుతున్న కృష్ణకృపను స్థానిక ఆర్‌ఎంపీ వద్దకు తీసుకెళ్లేలోపు మృతి చెందాడు. బంధువులు వచ్చి అన్నదమ్ముల మృతదేహాలను ఇంటికి తీసుకొని వెళ్లారు. ఎస్సై టి.వెంకటరమణ సంఘటన స్థలాన్ని పరిశీలించి వివరాలు సేకరించారు. బంధువులు ఇచ్చిన ఫిర్యాదు మేరకు కేసు నమోదు చేశారు. పోస్టుమార్టం కోసం మృతదేహాలను కనిగిరి ప్రభుత్వ వైద్యశాలకు తరలించారు. కనిగిరి సీఐ టీవీవీ ప్రతాప్‌కుమార్‌ తన సిబ్బందితో వచ్చి మృతదేహాలను పరిశీలించి ఘటన జరిగిన తీరును బంధువులను అడిగి తెలుసుకున్నారు. ఒకే కుటుంబంలో ఇద్దరు చిన్నారులు.. ఒకే కుటుంబానికి చెందిన ఇద్దరు చిన్నారులు మృతి చెందడంతో ఆ కుటుంబంలో విషాదం నెలకొంది. తాతపూడి రాజరత్నం, సునీత దంపతులకు ముగ్గురు కుమారులు. మొదటి కుమారుడు మారుతీరావు మూడేళ్ల క్రితం కడుపునొప్పి తట్టుకోలేక తన ఇంట్లోనే ఉరేసుకొని చనిపోయాడు. మూడో కుమారుడు కృష్ణకృప స్థానిక జిల్లా పరిషత్‌ హైస్కూల్లో 7వ తరగతి చదువుతున్నాడు. మొదటి కుమారుడు, మూడో కుమారుడు ఇద్దరూ చనిపోవడంతో ఆ కుటుంబంలో తీవ్ర విషాదం నెలకొంది. చేతికి అందివచ్చిన ఇద్దరు కుమారులు చనిపోవడంతో తల్లిదండ్రులు తల్లడిల్లిపోతున్నారు. కష్టాలన్నీ ఆ కుటుంబానికి రావలా..అయ్యో పాపం..అంటూ గ్రామస్తులు, బంధువులు విచారం వ్యక్తం చేశారు. తాతపూడి రాజరత్నం అన్న తాతపూడి మార్కు(నాని), కెజియమ్మ దంపతులకు ముగ్గురు కుమారులు. మొదటి కుమారుడు కృష్ణ బీటెక్‌ చదువుతున్నాడు. రెండో కుమారుడు కృష్ణవేణు డిప్లొమా చదువుతున్నాడు. మూడో కుమారుడు కృష్ణవంశీ వెలిగండ్ల హైస్కూల్లో 10వ తరగతి చదువుతున్నాడు. చేతికంది వచ్చిన కుమారుడు మృతి చెందడంతో తల్లిదండ్రులు, బంధువులు విషాదంలో మునిగిపోయారు. తాతపూడి మార్కు(నాని) వైఎస్సార్‌ సీపీ ఎస్సీ సెల్‌ మండల అ«ధ్యక్షుడిగా పనిచేస్తున్నాడు. ఒకే కుటుంబంలో అన్నదమ్ముల పిల్లలు చనిపోవడంతో కాలనీలో విషాదం నెలకొంది. వెలిగండ్ల, తాడువారిపల్లి ఎస్సీ కాలనీ వాసులు వచ్చి మృతదేహాలను సందర్శించి బిడ్డలను పొగొట్టుకున్న తల్లిదండ్రులను ఓదారుస్తున్నారు.


 వెలుగండ్ల: సాక్షి టీవీ ప్రతినిధి శ్రీనివాస్‌పై ప్రకాశం జిల్లా వెలుగండ్ల ఎస్సై చంద్రశేఖర్‌ దౌర్జన్యానికి పాల్పడ్డారు. వైఎస్ జగన్మోహన్ రెడ్డి ఎన్నికల ప్రచారాన్ని కవరేజ్‌కు వెళ్తుండగా శ్రీనివాస్‌ను ఎస్సై అడ్డుకున్నారు. వాహనాన్ని తనిఖీ చేశారు.
 
 అక్కడితో ఆగకుండా శ్రీనివాస్ చొక్కా పట్టుకుని పోలీసు స్టేషన్కు లాక్కేళ్లారు. గంటపాటు పీఎస్‌లో నిర్బంధించారు. రౌడీషీటు తెరుస్తానంటూ బెదిరింపులకు పాల్పడ్డారు. ఎస్సై చంద్రశేఖర్‌ ప్రవర్తించిన తీరుపై జర్నలిస్టులు అభ్యంతరం వ్యక్తం చేశారు. దురుసుగా ప్రవర్తించిన ఎస్సైపై చర్య తీసుకోవాలని డిమాండ్ చేశారు.