ఆంధ్రప్రదేశ్ రాష్ట్రానికి ప్రత్యేక హోదా కోరుతూ యువత తలపెట్టిన శాంతియుత నిరసనకు ఆంధ్రప్రదేశ్ ప్రభుత్వం అనుమతి ఇవ్వాలని సినీనటుడు పవన్ కల్యాణ్ కోరారు. సోషల్ మీడియా ఆధారంగా చేపట్టే నిరసనలకు అనుమతి ఉండబోదని ఏపీ డీజీపీ, విశాఖ కలెక్టర్, పోలీసు కమిషనర్ తదితరులు ప్రకటనలు చేస్తున్న నేపథ్యంలో పవన్ మరోసారి ట్విట్టర్ ద్వారా స్పందించారు. 
  
 ప్రజాస్వామ్యంలో ప్రజల హక్కులను ఎవరూ కాదనలేరని ఆయన చెప్పారు. యువకులు చేపట్టిన నిరసనకు రాజకీయాలతో సంబంధం లేదని అన్నారు. తమకు ఇచ్చిన హామీలు నెరవేర్చకుండా తప్పించుకున్నప్పుడు నిరసన తెలియజేసే హక్కు పౌరులకు ఉంటుందని ఆయన తెలిపారు. ఇప్పుడు ఈ నిరసనకు అనుమతి ఇవ్వకపోతే.. వాళ్లలో అశాంతి కలగజేసినట్లు అవుతుందని, శాంతియుత నిరసన వాళ్ల హక్కని పవన్ ట్వీట్ చేశారు.
 
 
 #APDemandsSpecialStatus AP Govt should allow youth for a peaceful protest,which they had planned. No one can deny their right in Democracy.
 — Pawan Kalyan (@PawanKalyan) 24 January 2017
 
 
 #APDemandsSpecialStatus 'Youth Protest' is apolitical. It's citizens right to protest when they were denied for what they had been promised.
 — Pawan Kalyan (@PawanKalyan) 24 January 2017
 
 
 #APDemandsSpecialStatus If they don't allow it now; you are creating unrest in them. Peaceful protest is their right.
 — Pawan Kalyan (@PawanKalyan) 24 January 2017


 సోషల్ మీడియా ఆధారంగా చేపట్టే కార్యక్రమాలను తాము అనుమతించేది లేదని ఆంధ్రప్రదేశ్ డీజీపీ సాంబశివరావు స్పష్టం చేశారు. పెద్ద కార్యక్రమాలు జరిగేటప్పుడు వాటి నిర్వాహకులు ఎవరన్న విషయం ముఖ్యమని.. కానీ సోషల్ మీడియా ఆధారంగా జరిగే కార్యక్రమాలకు ఓనర్ షిప్ ఉండదని ఆయన చెప్పారు. విశాఖలో ఈనెల 26వ తేదీన తలపెట్టిన దీక్షకు అనుమతి కావాలని ఎవరూ తమను కోరలేదన్నారు. తమకు శాంతిభద్రతలే ముఖ్యమని.. పోలీసు ఆంక్షలకు అంతా సహకరించాలని చెప్పారు. 
  
 ఏక్షణంలోనైనా హౌస్ అరెస్టు
 శాంతిభద్రతలకు భంగం కలిగించే ఆందోళన దేన్నీ తాము అంగీకరించబోమని డీజీపీ సాంబశివరావు తెలిపారు. ముద్రగడ పద్మనాభం సహా ఎవరైనా అనుమతి తీసుకోవాల్సిందేనని ఆయన అన్నారు. కాపు సత్యాగ్రహ దీక్ష నేపథ్యంలో తాము ఏక్షణమైనా ముద్రగడను హౌస్ అరెస్టు చేసే అవకాశం ఉందని చెప్పారు. 
  
 కాగా, కాపు రిజర్వేషన్ల కోసం కాపు ఉద్యమనేత ముద్రగడ పద్మనాభం బుధవారం నుంచి సత్యాగ్రహ యాత్ర తలపెట్టారు. తూర్పుగోదావరి జిల్లా రావులపాలెం నుంచి అంతర్వేది వరకు ఈ యాత్ర సాగనుంది. ఆయనకు సంఘీభావం తెలిపేందుకు కాపునేతలు భారీగా చేరుకుంటున్నారు. ముద్రగడ నివాసం వద్ద పెద్దసంఖ్యలో పోలీసులను మోహరించారు. తూర్పుగోదావరి జిల్లా వ్యాప్తంగా 144 సెక్షన్ విధించి, మీడియాపై కూడా ఆంక్షలు పెట్టారు.