ముంబై: సాఫ్ట్‌వేర్‌ సేవల దిగ్గజం విప్రో ప్రస్తుత ఆర్థిక సంవత్సరం(2024–25) రెండో త్రైమాసికంలో ఆసక్తికర ఫలితాలు సాధించింది. జూలై–సెప్టెంబర్‌(క్యూ2)లో కన్సాలిడేటెడ్‌ నికర లాభం 21 శాతంపైగా ఎగసి రూ. 3,209 కోట్లను తాకింది. గతేడాది(2023–24) ఇదే కాలంలో రూ. 2,646 కోట్లు మాత్రమే ఆర్జించింది. మొత్తం ఆదాయం నామమాత్రంగా తగ్గి రూ. 22,302 కోట్లకు పరిమితమైంది. గత క్యూ2లో రూ. 22,516 కోట్ల టర్నోవర్‌ అందుకుంది. వాటాదారులకు 1:1 నిష్పత్తిలో బోనస్‌ షేర్లను జారీ చేయనుంది. ఇందుకు బోర్డు గ్రీన్‌సిగ్నల్‌ ఇచ్చింది. వెరసి వాటాదారులవద్దగల ప్రతీ షేరుకి మరో షేరుని డిసెంబర్‌ 15కల్లా ఉచితంగా కేటాయించే వీలుంది. గైడెన్స్‌ వీక్‌ ఈ ఏడాది అక్టోబర్‌–డిసెంబర్‌(క్యూ3)లో పనిదినాలు తగ్గడం, సీజనల్‌ బలహీనతలు ప్రతికూల ప్రభావం చూపనున్నట్లు విప్రో సీఈవో, ఎండీ శ్రీని పల్లియా పేర్కొన్నారు. దీంతో క్యూ3 ఆదాయంలో వృద్ధి అంచనా(గైడెన్స్‌)లను –2 నుంచి 0 శాతానికి సవరించారు. ఇంతక్రితం –1 నుంచి +1% గైడె న్స్‌ ప్రకటించిన సంగతి తెలిసిందే. ప్రధాన క్లయింట్లను పెంచుకోవడంతోపాటు.. మరోసారి భారీ డీల్స్‌ బుకింగ్స్‌ బిలియన్‌ డాలర్లను దాటినట్లు పల్లియా వెల్లడించారు. ఆన్‌బోర్డింగ్‌ పూర్తిచేస్తాం ఈ డిసెంబర్‌కల్లా మొత్తం రిక్రూట్‌మెంట్‌ బ్యాక్‌లాగ్స్‌ను పూర్తి చేయనున్నట్లు విప్రో చీఫ్‌ హెచ్‌ఆర్‌ ఆఫీసర్‌ సౌరభ్‌ గోవిల్‌ పేర్కొన్నారు. ఐటీ కంపెనీలు 6 నెలల నుంచి 2ఏళ్లవరకూ ఆన్‌బోర్డింగ్‌ను ఆలస్యం చేస్తున్నట్లు వెలువడుతున్న విమర్శలకు చెక్‌ పెడుతూ గోవిల్‌ క్యూ3(అక్టోబర్‌–డిసెంబర్‌)లో అన్ని ఆఫర్లను క్లియర్‌ చేయనున్నట్లు వెల్లడించారు. ఈ ఏడాది ప్రతీ త్రైమాసికంలోనూ 2,500–3,000 మంది ఫ్రెషర్స్‌ను తీసుకుంటున్నట్లు వివరించారు. ప్రస్తుతం విప్రో మొత్తం సిబ్బంది సంఖ్య 2,33,889ను తాకింది. 44,000 మందికి శిక్షణ క్యాప్‌కో పురోగతి కొనసాగుతున్నట్లు పల్లియా పేర్కొన్నారు. బీఎఫ్‌ఎస్‌ఐ, కన్జూమర్, టెక్నాలజీ, కమ్యూనికేషన్స్‌ రంగాలలో వృద్ధిని అందుకున్నట్లు తెలియజేశారు. ఏఐ ఆధారిత విప్రోను పటిష్టపరచేందుకు పెట్టుబడులు కొనసాగిస్తున్నట్లు తెలియజేశారు. ప్రస్తుతం అడ్వాన్స్‌డ్‌ ఏఐలో 44,000మంది ఉద్యోగులకు శిక్షణ పూర్తిచేసినట్లు వెల్లడించారు. సెపె్టంబర్‌లో ప్రతిభ ఆధారిత వేతన పెంపును చేపట్టినట్లు తెలియజేశారు. షేరు బీఎస్‌ఈలో 0.7% నీరసించి రూ. 529 వద్ద ముగిసింది.

న్యూఢిల్లీ: ఐటీ సేవల దిగ్గజం విప్రో లిమిటెడ్‌ గత ఆర్థిక సంవత్సరం (2022–23) చివరి త్రైమాసికంలో ఆసక్తికర ఫలితాలు ప్రకటించింది. జనవరి–మార్చి (క్యూ4)లో నికర లాభం నామమాత్ర వెనకడుగుతో రూ. 3,075 కోట్లకు చేరింది. అంతక్రితం ఏడాది (2021–22) ఇదే కాలంలో రూ. 3,087 కోట్లు ఆర్జించింది. మొత్తం ఆదాయం మాత్రం 11 శాతం వృద్ధితో రూ. 23,190 కోట్లను అధిగమించింది. కాగా.. మార్చితో ముగిసిన పూర్తి ఏడాదికి సైతం విప్రో నికర లాభం 7 శాతం క్షీణించి రూ. 11,350 కోట్లకు పరిమితమైంది. అయితే మొత్తం ఆదాయం 14 శాతం పైగా ఎగసి రూ. 90,488 కోట్లను తాకింది. క్యూ4లో 1,823 మంది ఉద్యోగులు తగ్గడంతో మొత్తం సిబ్బంది సంఖ్య 2,56,921కు పరిమితమైంది. అంచనాలు వీక్‌..:  2023–24 తొలి త్రైమాసికం(ఏప్రిల్‌–జూన్‌)లో ఐఎస్‌ఆర్‌ఈ సహా.. ఐటీ సర్వీసుల బిజినెస్‌ నుంచి ఆదాయం త్రైమాసికవారీగా 3–1% మధ్య క్షీణించవచ్చని విప్రో తాజాగా అంచనా వేసింది. వెరసి 275.3–281.1 కోట్ల డాలర్ల మధ్య ఆదాయం సాధించవచ్చని గైడెన్స్‌ ప్రకటించింది. బీఎఫ్‌ఎస్‌ఐ, రిటైల్‌లో  మందగమన పరిస్థితులున్నా, డీల్‌ పైప్‌లైన్‌ పటిష్టంగా ఉన్నట్లు విప్రో సీఈవో, ఎండీ థియరీ డెలాపోర్ట్‌ పేర్కొన్నారు. షేర్ల బైబ్యాక్‌కు సై: సొంత ఈక్విటీ షేర్ల కొనుగోలు(బైబ్యాక్‌)కు బోర్డు గ్రీన్‌సిగ్నల్‌ ఇచ్చినట్లు విప్రో తాజాగా వెల్లడించింది. దీనిలో భాగంగా షేరుకి రూ. 445 ధర మించకుండా 26,96,62,921 షేర్లను బైబ్యాక్‌ చేయనున్నట్లు తెలియజేసింది. ఇవి కంపెనీ ఈక్విటీలో 4.91 శాతం వాటాకు సమానంకాగా..ఇందుకు రూ. 12,000 కోట్లవరకూ వెచ్చించనున్నట్లు వెల్లడించింది.   ఫలితాల నేపథ్యంలో విప్రో షేరు ఎన్‌ఎస్‌ఈలో యథాతథంగా రూ. 375 వద్ద ముగిసింది.

న్యూఢిల్లీ: కొత్త తరం టెక్నాలజీలు, సర్వీసులే ఇన్ఫర్మేషన్‌ టెక్నాలజీ రంగం వృద్ధికి దోహదపడనున్నట్లు దిగ్గజ సంస్థ విప్రో సీఈవో థియెరీ డెలాపోర్ట్‌ తెలిపారు. డేటా, క్లౌడ్, సైబర్‌సెక్యూరిటీ వంటి విభాగాలు భారీ స్థాయిలో ఎదిగే అవకాశం ఉందని వివరించారు. ఎక్కడ నుంచి అయినా పనిచేయడం, క్రౌడ్‌సోర్సింగ్‌ తదితర విధానాలు ప్రాచుర్యంలోకి వస్తున్న నేపథ్యంలో వ్యాపార సంస్థలకు సైబర్‌సెక్యూరిటీ అత్యంత ప్రాధాన్య అంశంగా మారిందని డెలాపోర్ట్‌ పేర్కొన్నారు. వృద్ధి సాధన దిశగా తమ సంస్థ అయిదు సూత్రాల వ్యూహాన్ని అమలు చేస్తోందన్నారు. కీలక రంగాలపై మరింతగా దృష్టి పెట్టడం, క్లయింట్లతో భాగస్వామ్యాన్ని పటిష్టపర్చుకోవడం, ప్రతిభావంతులైన సిబ్బందిపై ఇన్వెస్ట్‌ చేయడం, వ్యాపార నిర్వహణ విధానాన్ని సరళతరం చేయడం మొదలైనవి వీటిలో ఉన్నట్లు డెలాపోర్ట్‌ తెలిపారు. వ్యాపార వ్యూహాల్లో భాగంగా గత ఆర్థిక సంవత్సరం ద్వితీయార్ధంలో అమెరికా, యూరప్, లాటిన్‌ అమెరికా, ఆస్ట్రేలియా తదితర దేశాలతో పాటు భారత్‌లో కూడా ఇతర సంస్థలను కొనుగోలు చేసినట్లు వివరించారు. క్యాప్‌కో సంస్థ కొనుగోలుతో అంతర్జాతీయంగా ఆర్థిక సేవల మార్కెట్లో తమ స్థానం మరింత పటిష్టం కాగలదని ఆయన పేర్కొన్నారు.దీనికోసం విప్రో సుమారు 1.45 బిలియన్‌ డాలర్లు వెచ్చించింది.  చదవండి: Gold: డిజిటల్‌ గోల్డ్‌తో.. లాభాల పంట

బెంగళూరు, సాక్షి: కంపెనీ చీఫ్‌గా బాధ్యతలు చేపట్టిన డెలాపోర్ట్‌ ఐదు నెలల్లోనే సాఫ్ట్‌వేర్‌ సేవల దేశీ దిగ్గజం విప్రోను 100 మీటర్ల విభాగం (స్ప్రింట్‌)లో చేర్చారు. వెరసి ఐటీ బ్లూచిప్‌ కంపెనీ విప్రో అత్యంత వేగంగా పరుగు తీస్తోంది. నిజానికి డెలాపోర్ట్‌కు లాంగ్‌ డిస్టెన్స్‌ రన్నింగ్‌ అంటే మక్కువకావడం ప్రస్తావించదగ్గ అంశం! ఫ్రాన్స్‌కు చెందిన ఐటీ దిగ్గజం క్యాప్‌జెమినీ ఎస్‌ఈ నుంచి విప్రోకు సీఈవోగా బాధ్యతలు చేపట్టిన 53ఏళ్ల థియరీ డెలాపోర్ట్‌ కేవలం ఐదు నెలల్లోనే కంపెనీని టర్న్‌అరౌండ్‌ బాటపట్టించినట్లు విశ్లేషకులు పేర్కొంటున్నారు. ఈ కాలంలో విప్రో షేరు సైతం ఏకంగా 70 శాతం ర్యాలీ చేయడం విశేషం! వెరసి దేశీ స్టాక్‌ ఎక్స్ఛేంజీలలో లిస్టయిన ఇతర నాలుగు ఐటీ దిగ్గజాల షేర్లకంటే అత్యధికంగా లాభపడింది! ఇతర వివరాలు చూద్దాం.. నాయకులను తగ్గిస్తూ కోవిడ్‌-19 నేపథ్యంలో విప్రో సీఈవోగా డెలాపోర్ట్‌ ప్యారిస్‌నుంచే కార్యకలాపాలను చక్కబెడుతున్నారు. వర్చువల్‌ సమావేశాల ద్వారా కస్టమర్లతోపాటు మేనేజర్లు, సిబ్బందితో చర్చలు నిర్వహిస్తూ వస్తున్నారు. విప్రోలో లీడర్‌షిప్‌ పొజిషన్ల సంఖ్యను 25 నుంచి 4కు తగ్గించారు. ఇతర కంపెనీల కొనుగోళ్లకు ఆసక్తి చూపుతున్నారు. క్లయింట్లతో 130కుపైగా సమావేశాల ద్వారా యూరోప్‌, యూఎస్‌ నుంచి మల్టీఇయర్‌ కాంట్రాక్టులను సాధించారు. కాగా.. ఐటీ పరిశ్రమలో ప్రస్తుతం కీలక పరిస్థితులు నెలకొన్నాయని ఒక ఇంటర్వ్యూలో డెలాపోర్ట్‌ ఇటీవల పేర్కొన్నారు. ఈ నేపథ్యంలో విప్రోకు పట్టున్న విభాగాలలో వేగంగా వృద్ధి సాధించాలని భావిస్తున్నట్లు చెప్పారు.  ఇదీ తీరు అజీం ప్రేమ్‌జీ ఐటీ దిగ్గజం విప్రో.. కొన్నేళ్లుగా సాఫ్ట్‌వేర్‌ సేవల రంగంలో ఇతర దేశీ బ్లూచిప్‌ కంపెనీలతో వెనుకబడుతూ వచ్చిన సంగతి తెలిసిందే. గతేడాది(2019-20)లో స్థిరకరెన్సీ ప్రాతిపదికన ఆదాయం 3.9 శాతమే వృద్ధి చూపింది. ఇదేకాలంలో ఇన్ఫోసిస్‌ 9.8 శాతం, టీసీఎస్‌ 7.1 శాతం చొప్పున ఆదాయాన్ని పెంచుకున్నాయి. రెండేళ్ల క్రితం మూడో పెద్ద కంపెనీగా విప్రోను వెనక్కినెట్టిన హెచ్‌సీఎల్ టెక్నాలజీస్‌ సైతం గతేడాది 17 శాతం ప్రగతిని కనబరిచింది. నీముచ్‌వాలా నుంచి 2016లో విప్రో పగ్గాలు అందుకున్న అబిదలీ నీముచ్‌వాలా సైతం విప్రోను ఉన్నపళాన పట్టాలెక్కించే ప్రయత్నాలు చేశారు. అయితే నాలుగేళ్లపాటు ఆశించిన స్థాయిలో కంపెనీ పురోగతిని సాధించలేకపోయింది. 2020కల్లా విప్రోను 15 బిలియన్‌ డాలర్ల దిగ్గజంగా నిలిపే ప్రయత్నం ఫలించలేదు. మార్చితో ముగిసిన గతేడాదిలో విప్రో 8.1 బిలియన్‌ డాలర్లకు మాత్రమే చేరగలిగింది. ఈ నేపథ్యంలో నీముచ్‌వాలా నుంచి సీఈవో బాధ్యతలను డెలాపోర్ట్‌ స్వీకరించారు. విప్రోకు యూఎస్‌ అతిపెద్ద మార్కెట్‌కాగా.. యూరోప్‌, ఆసియా మార్కెట్లపై ప్రత్యేక దృష్టిసారించారు. ఇందుకు అనుగుణంగా చీఫ్‌ గ్రోత్‌ ఆఫీసర్‌ అధ్యక్షతన కొత్త డీల్స్‌ కోసం టీమ్‌ను ఏర్పాటు చేశారు. తద్వారా యూరోపియన్‌ పర్యావరణహిత ఇంధన రంగ కంపెనీల నుంచి ఇటీవల భారీ డీల్స్‌ సాధించగలిగారు. 

కరోనా వైరస్‌కు కారణమైన చైనాను విమర్శిస్తున్న ప్రెసిడెంట్‌ ట్రంప్‌ తాజా ప్రెస్‌మీట్‌లో వాయిస్‌ తగ్గించడంతో ఇన్వెస్టర్లు ఊపిరి పీల్చుకున్నారు. వెరసి వారాంతాన అమెరికా స్టాక్‌ మార్కెట్లు ఆటుపోట్ల మధ్య అటూఇటుగా ముగిశాయి. ఇంట్రాడేలో 25,032 వద్ద కనిష్టాన్ని తాకిన డోజోన్స్‌ చివరికి 18 పాయింట్లు(0.1 శాతం) నీరసించి 25,383 వద్ద నిలిచింది. ఇక ఎస్‌అండ్‌పీ15 పాయింట్లు(0.5 శాతం) బలపడి 3,044 వద్ద స్థిరపడింది. అయితే నాస్‌డాక్‌ 121 పాయింట్లు(1.3 శాతం) జంప్‌చేసి 9,490 వద్ద ముగిసింది. కోవిడ్‌-19 కట్టడికి అమలు చేస్తున్న లాక్‌డవున్‌ను దశలవారీగా ఎత్తివేస్తున్న నేపథ్యంలో ఆర్థిక వ్యవస్థ పుంజుకోనుందన్న అంచనాలు ఇటీవల మార్కెట్లకు జోష్‌నిచ్చినట్లు విశ్లేషకులు పేర్కొన్నారు. అమెరికన్‌ ఎక్స్‌ప్రెస్‌ 3 శాతం, జేపీ మోర్గాన్‌ 2.5 శాతం చొప్పున క్షీణించడంతో శుక్రవారం డోజోన్స్‌ బలహీనపడగా.. సెమీకండక్టర్‌ తయారీ కంపెనీలు మార్వెల్‌ టెక్నాలజీస్‌ 9 శాతం, ఎన్‌విడియా 4.6 శాతం చొప్పున జంప్‌చేయడంతో నాస్‌డాక్‌ జోరందుకుంది. డోజోన్స్‌ భళా గత వారం డోజోన్స్‌ 3.8 శాతం లాభపడగా.. ఎస్‌అండ్‌పీ సైతం 3 శాతం ఎగసింది. నాస్‌డాక్‌ దాదాపు 2 శాతం పుంజుకుంది. ఈ నెలలో ఎస్‌అండ్‌పీ, డోజోన్స్‌ 4.5 శాతం స్థాయిలో జంప్‌చేయగా.. నాస్‌డాక్‌ మరింత అధికంగా 6.7 శాతం ఎగసింది. కాగా.. ఏప్రిల్‌లో వ్యక్తిగత వ్యయాలు 13.6 శాతం క్షీణించగా.. పొదుపు రేటు 33 శాతం ఎగసినట్లు గణాంకాలు వెల్లడించాయి.  ట్రంప్‌ ఇలా వైట్‌హౌస్‌కు చెందిన రోజ్‌గార్డెన్‌లో విలేకరుల సమావేశాన్ని నిర్వహించిన ట్రంప్‌ ప్రపంచ ఆరోగ్య సంస్థ(WHO)తో తెగతెంపులు చేసుకోనున్నట్లు పేర్కొన్నారు. ఈ సంస్థ పూర్తిగా చైనా నియంత్రణలో పనిచేస్తున్నదని విమర్శించారు. యూఎస్‌లో లిస్టయిన చైనా కంపెనీలు ఖాతాలను విభిన్నంగా నిర్వహించడంపై ఆరా తీస్తున్నట్లు చెప్పారు. హాంకాంగ్‌కు ఇస్తున్న ప్రత్యేక వాణిజ్య హోదాను రద్దు చేయనున్నట్లు పేర్కొన్నారు. అయితే చైనాతో వాణిజ్య వివాదాల జోలికి వెళ్లకపోవడం గమనార్హం.  వేదాంతా అప్‌ అమెరికా స్టాక్‌ ఎక్స్ఛేంజీలలో లిస్టయిన దేశీ స్టాక్స్‌ (ఏడీఆర్‌)లో వారాంతాన అత్యధిక శాతం లాభాలతో ముగిశాయి. అయితే టాటా మోటార్స్‌(టీటీఎం) 0.7 శాతం నష్టంతో 5.71 డాలర్ల వద్ద నిలిచింది. కొత్త సీఈవో ఎంపికతో విప్రో లిమిటెడ్‌ 8.2 శాతం దూసుకెళ్లి 3.31 డాలర్లను తాకగా.. డాక్టర్‌ రెడ్డీస్‌ 4 శాతం జంప్‌చేసి 53.44 డాలర్లకు చేరింది. ఈ బాటలో ఐసీఐసీఐ బ్యాంక్‌(ఐబీఎన్‌) 2.6 శాతం ఎగసి 8.7 డాలర్ల వద్ద, వేదాంతా(వీఈడీఎల్‌) 1.9 శాతం బలపడి 4.88 డాలర్ల వద్ద ముగిశాయి. ఇతర కౌంటర్లలో హెచ్‌డీఎఫ్‌సీ బ్యాంక్‌(హెచ్‌డీబీ) 1.8 శాతం ఎగసి 41.83 డాలర్ల వద్ద నిలవగా.. ఇన్ఫోసిస్‌ 0.4 శాతం పుంజుకుని 9.10 డాలర్ల వద్ద స్థిరపడింది.   

న్యూఢిల్లీ: ప్రస్తుత ఆర్థిక సంవత్సరం రెండో త్రైమాసికం(క్యూ2)లో ఐటీ దిగ్గజం విప్రో నికర లాభం 35% ఎగిసింది. రూ. 2,553 కోట్లుగా నమోదైంది. గత ఆర్థిక సంవత్సరం ఇదే వ్యవధిలో కంపెనీ లాభం రూ.1,889 కోట్లు. మరోవైపు, సెప్టెంబర్‌ క్వార్టర్‌లో మొత్తం ఆదాయం రూ.15,203 కోట్ల నుంచి రూ.15,875 కోట్లకు పెరిగింది. మూడో క్వార్టర్‌లో 2,106 మిలియన్‌ డాలర్ల అంచనా..  సీక్వెన్షియల్‌ ప్రాతిపదికన డిసెంబర్‌ త్రైమాసికానికి ఐటీ సేవల విభాగం ఆదాయ వృద్ధి 0.8–2.8 శాతం స్థాయిలో ఉండొచ్చని అంచనా వేస్తున్నట్లు విప్రో గైడెన్స్‌ ప్రకటించింది. ఈ విభాగం నుంచి 2,065–2,106 మిలియన్‌ డాలర్ల స్థాయిలో ఉండగలదని భావిస్తున్నట్లు వివరించింది. రెండో త్రైమాసికంలో ఐటీ సేవల విభాగం ఆదాయం 2,049 మిలియన్‌ డాలర్లుగా నమోదైంది. వార్షిక ప్రాతిపదికన ఇది 2.5 శాతం వృద్ధి చెందినట్లు సంస్థ పేర్కొంది. ఐటీ సేవల విభాగం నిర్వహణ మార్జిన్‌ 18.1 శాతం పెరిగింది. సెప్టెంబర్‌తో ముగిసిన త్రైమాసికంలో 32.31 కోట్ల షేర్ల బైబ్యాక్‌ ప్రక్రియను పూర్తి చేసినట్లు విప్రో తెలిపింది. ఇందుకోసం రూ. 10,500 కోట్లు వెచ్చించినట్లు వివరించింది. మరోవైపు, 5జీ టెలికం సేవలు అందించడానికి సంబంధించి ఆపరేటర్లు, ఇతరత్రా కంపెనీలకు అవసరమైన సొల్యూషన్స్‌ను రూపొందించేందుకు విప్రోతో చేతులు కలిపినట్లు టెలికం పరికరాల తయారీ సంస్థ నోకియా వెల్లడించింది. ఆపరేటర్లు తమ పెట్టుబడులపై గరిష్ట ప్రయోజనాలు పొందేలా తోడ్పడేందుకు 5జీ వినియోగాలపై తమ బెంగళూరు పరిశోధన, అభివృద్ధి కార్యకలాపాలు నిర్వహిస్తున్నట్లు పేర్కొంది. ‘వృద్ధి సాధనకు ప్రాధాన్యమివ్వడం కొనసాగుతుంది. భవిష్యత్‌ అవసరాల కోసం పెట్టుబడులు కొనసాగుతాయి. షేర్ల బైబ్యాక్‌ సెప్టెంబర్‌లో పూర్తయ్యింది. ఇన్వెస్టర్ల నుంచి దీనికి మంచి స్పందన వచ్చింది‘ అని విప్రో చీఫ్‌ ఫైనాన్షియల్‌ ఆఫీసర్‌ జతిన్‌ దలాల్‌ తెలిపారు. మరిన్ని విశేషాలు..  ►సీక్వెన్షియల్‌గా చూస్తే డిజిటల్‌ విభాగం ఆదాయం ఏడు శాతం, వార్షికంగా 29 శాతం మేర వృద్ధి చెందింది. మొత్తం ఆదాయంలో ఈ విభాగం వాటా 39.6 శాతంగా ఉంది.   ►క్యూ2లో కొత్తగా 57 సంస్థలు క్లయింట్లుగా జతయ్యాయి. దీంతో మొత్తం క్లయింట్ల సంఖ్య 1,027కి చేరింది.   ►ఐటీ సేవల విభాగంలో సీక్వెన్షియల్‌గా 6,603 మంది టెకీలు చేరారు. దీంతో ఉద్యోగుల సంఖ్య 1,81,453కి చేరింది.  విప్రో షేరు మంగళవారం బీఎస్‌ఈలో స్వల్పంగా పెరిగి రూ. 243.70 వద్ద క్లోజయ్యింది. ఆదాయాలు, మార్జిన్లపరంగా రెండో త్రైమాసికంలో మెరుగైన ఫలితాలు సాధించగలిగాం. వార్షిక ప్రాతిపదికన మొత్తం 7 విభాగాల్లో 6 విభాగాలు వృద్ధి నమోదు చేయగలిగాయి. కొన్ని రంగాల్లో అనిశ్చితి ప్రభావాలు కొనసాగుతున్నప్పటికీ ఐటీ సేవలకు డిమాండ్‌లో పెద్దగా మార్పు లేదు. కెనడా, ఆస్ట్రేలియా, ఆసియా పసిఫిక్‌ ప్రాంత దేశాలతో పాటు కీలకమైన అమెరికా, బ్రిటన్‌ మార్కెట్లలో కూడా డీల్స్‌ దక్కించుకోగలుగుతున్నాం. అంతర్జాతీయంగా అందిస్తున్న సేవలు భారతీయ కస్టమర్లకు అందించే వ్యూహాల్లో భాగంగా భారత్‌లో ఒక క్లయింఊట్‌తో భారీ డీల్‌ కుదుర్చుకున్నాం. క్యూ1 తో పోలిస్తే క్యూ2లో ఆర్డర్‌ బుక్‌ మరింత మెరుగుపడింది. భారత్, మధ్యప్రాచ్య దేశాల్లో కార్యకలాపాల పునర్‌వ్యవస్థీకరణ కొనసాగుతోంది. ఐసీఐసీఐ వంటి కొన్ని డీల్స్‌ ఇలాంటి వ్యూహాల్లో భాగమే. – అబిదాలి నీముచ్‌వాలా, విప్రో సీఈఓ


 న్యూఢిల్లీ : బెంగళూరుకు చెందిన ఐటీ దిగ్గజం విప్రో సీఈవో అబిద్ అలీ నీముచ్ వాలా వార్షిక వేతనం పెరిగిందట. ఆయన ఈ ఏడాది అక్షరాల రూ.12.04 కోట్ల వేతనం పొందుతున్నారట. ఈ వేతనం అంతకముందు మాజీ సీఈవో టీకే కురియన్ కంటే ఎక్కువట. నీముచ్ వాలా బేసిక్ జీతం, అలవెన్స్ కింద రూ.5,75,85,354, కమిషన్ అండ్ వేరియబుల్ చెల్లింపుల కింద రూ.2,35,42,334లు ఇతర చెల్లింపుల కింద రూ. 3,85,51,290లు దీర్ఘకాలిక పరిహారం కింద రూ.14,22,140లను ఈ ఏడాది అందుకుంటున్నారని రెగ్యులేటరీకి విప్రో నివేదించింది. ఈ ఏడాది ఇన్ఫోసిస్ సీఈవో విశాల్ సిక్కా ప్యాకేజీ సైతం రూ.48.73 కోట్లకు ఎగిసిన సంగతి తెలిసిందే. అదేవిధంగా టీసీఎస్ చీఫ్ ఎన్ చంద్రశేఖరన్ జీతం సైతం రూ.25.6 కోట్లకు పెరిగి, అదనంగా స్పెషల్ బోనస్ రూ.10 కోట్లను అందుకుంటున్నారు.
 2015లో గ్రూప్ ప్రెసిడెంట్, చీఫ్ ఆపరేటింగ్ ఆఫీసర్ గా నీముచ్ వాలా విప్రోలో చేరారు. 2016 మార్చి ఆర్థికసంవత్సరం ముగిసిన సందర్భంగా నీముచ్ వాలా 200,000 స్టాక్ అప్షన్లను పొందారు. ప్రస్తుతం విప్రో షేరు ధర రూ.545.90గా ఉంది. ఈ స్టాక్ విలువ దాదాపు రూ.10.9 కోట్లు. విప్రో మాజీ సీఈవో, ప్రస్తుతం ఎగ్జిక్యూటివ్ వైస్ చైర్మన్ టీకే కురియన్ ప్రస్తుతం రూ.21 కోట్ల వేతనం పొందుతున్నారు.


 న్యూఢిల్లీ: దిగ్గజ టెక్నాలజీ కంపెనీ విప్రో సీఈవోగా అబిద్ అలీ నీముచ్‌వాలా నియమితులయ్యారు. ఇంతవరకు కంపెనీ సీఈవోగా వ్యవహరించిన టీకే కురియన్ విప్రో ఎగ్జిక్యూటివ్ వైస్ చైర్మన్‌గా పదోన్నతి పొందారు. వీరిద్దరూ వచ్చే నెల నుంచి పదవీ బాధ్యతలు చేపట్టనున్నారు. గత ఐదే ళ్ల నుంచి విప్రో సంస్థ నెక్ట్స్ జనరేషన్ టెక్నాలజీ, కన్సల్టింగ్ కంపెనీగా రూపాంతరం చెందుతూ వస్తోందని విప్రో చైర్మన్ అజీమ్ ప్రేమ్‌జీ తెలిపారు. కస్టమర్లతో బలమైన అనుబంధాన్ని కొనసాగిస్తూ, కొత్త టెక్నాలజీ గమ్యాల రూపకల్పన ద్వారా కంపెనీ వృద్ధిలో బాటలో పయనించడానికి కురియన్ కీలక పాత్ర పోషిస్తారని పేర్కొన్నారు.
 
 డిజిటల్, ఆటోమేషన్ వంటి నూతన టెక్నాలజీని వినియోగదారులకు అందించడంలో కొత్త నియామక చర్య కంపెనీకి దోహదపడుతుందని విశ్వసించారు. టీసీఎస్ కంపెనీ నుంచి బయటకు వచ్చిన తర్వాత గతేడాది ఏప్రిల్ నుంచి నీముచ్‌వాలా విప్రోలో తన కెరీర్‌ను గ్రూప్ ప్రెసిడెంట్, సీవోవో స్థాయి నుంచి ప్రారంభించారు.
 
 ఈయన గ్లోబల్ ఇన్‌ఫ్రా సర్వీసెస్, బిజినెస్ అప్లికేషన్  సర్వీసెస్, బిజినెస్ ప్రాసెసింగ్, అడ్వాన్స్‌డ్ టెక్నాలజీ సొల్యూషన్స్ వంటి సర్వీసెస్ లైన్స్ హెడ్‌గా ఉన్నారు. ‘టెక్నాలజీ మీదున్న పట్టు, వ్యాపార దార్శనీయకత, సరైన ఎంపికా సామర్థ్యం, కస్టమర్లు/ఉద్యోగులను ఐక్యం చేసే నేర్పు వంటి ప్రత్యేకతలు నీముచ్‌వాలాలో ఉన్నాయని, ఆయనే కంపెనీ నాయకుడి బాధ్యతలకు సరైన వ్యక్తి’ అని కురియన్ తెలిపారు.