Wimbledon 2023, Women's Singles Winner Marketa Vondrousova: వింబుల్డన్‌ మహిళల సింగిల్స్‌ ఫైనల్లో అన్‌సీడెడ్‌, చెక్‌ రిపబ్లిక్‌ ప్లేయర్‌ మర్కెటా వొండ్రుసోవా సంచలన విజయం సాధించింది. ట్యునీషియా టెన్నిస్‌ స్టార్‌ ఆన్స్‌ జబర్‌ను ఓడించి కెరీర్‌లో తొలి గ్రాండ్‌స్లామ్‌ టైటిల్‌ అందుకుంది. 6-4, 6-4 తేడాతో ప్రత్యర్థిపై గెలుపొంది సరికొత్త చరిత్ర సృష్టించింది. వింబుల్డన్‌ చరిత్రలో 60 ఏళ్ల తర్వాత చాంపియన్‌గా అవతరించిన తొలి అన్‌సీడెడ్‌ క్రీడాకారిణిగా రికార్డులకెక్కింది. రెండో గ్రాండ్‌స్లామ్‌ ఫైనల్‌ కాగా వొండ్రుసోవా చేతిలో ఓడిన 28 ఏళ్ల జబర్‌ గత ఏడాది వింబుల్డన్, యూఎస్‌ ఓపెన్‌ గ్రాండ్‌స్లామ్‌ టోర్నీల్లో ఫైనల్‌కు చేరి రన్నరప్‌తో సరిపెట్టుకున్న విషయం తెలిసిందే. మరోవైపు ఓపెన్‌ శకంలో (1968 తర్వాత) వింబుల్డన్‌ టోర్నీలో ఫైనల్‌ చేరిన తొలి అన్‌సీడెడ్‌ క్రీడాకారిణిగా గుర్తింపు పొందిన 24 ఏళ్ల వొండ్రుసోవా ఏకంగా విజేతగా నిలిచింది. కెరీర్‌లో ఆడిన రెండో గ్రాండ్‌స్లామ్‌ ఫైనల్లోనే టైటిల్‌ గెలిచింది. ప్రైజ్‌మనీ ఎంతంటే అంతకు ముందు 2019 ఫ్రెంచ్‌ ఓపెన్‌లో వొండ్రుసోవా ఫైనల్‌ చేరి రన్నరప్‌గా నిలిచింది. ఈ ఏడాది జబర్‌తో జరిగిన రెండు మ్యాచ్‌ల్లోనూ గెలుపొందిన వొండ్రుసోవా తాజాగా ఆమెను ఫైనల్లో ఓడించి ట్రోఫీ గెలుచుకుంది. తద్వారా 23 లక్షల 50 వేల పౌండ్లు (రూ. 25 కోట్ల 29 లక్షలు) ప్రైజ్‌మనీ గెలిచింది. ఇక రన్నరప్‌ ప్లేయర్ జబర్‌‌కు 11 లక్షల 75 వేల పౌండ్లు (రూ. 12 కోట్ల 64 లక్షలు) ప్రైజ్‌మనీ దక్కనుంది.  POV: you just become a Wimbledon champion 🏆#Wimbledon pic.twitter.com/kf484DhHUt — Wimbledon (@Wimbledon) July 15, 2023 Marketa's magical moment 🏆 Marketa Vondrousova becomes the third Czech woman to win the ladies' singles title, defeating Ons Jabeur 6-4, 6-4#Wimbledon pic.twitter.com/AAHThI1ZYn — Wimbledon (@Wimbledon) July 15, 2023 Unseeded. Unstoppable.#Wimbledon pic.twitter.com/sgSwIWirDM — Wimbledon (@Wimbledon) July 15, 2023

పారిస్‌: ఫ్రెంచ్ ఓపెన్‌ మహిళల విభాగంలో చెక్‌ రిపబ్లిక్‌ క్రీడాకారిణి బర్బోర క్రిచికోవా చరిత్ర సృష్టించింది. నిన్న ఫ్రెంచ్ ఓపెన్ సింగిల్స్ టైటిల్ గెలిచిన క్రిచికోవా.. ఇవాళ డబుల్స్‌ విజేతగా అవతరించింది. తన దేశానికే చెందిన కేథరీనా సినియాకోవాతో జత కట్టిన క్రిచికోవా.. ఫైనల్లో ఇగా స్వియాటెక్‌, బెతానీ మాటెక్‌ సాండ్స్‌ జోడీపై 6-4, 6-2తో ఘన విజయం సాధించింది. దీంతో 2000 సంవత్సరం తర్వాత ఫ్రెంచ్‌ ఓపెన్‌లో ఒకే ఏడాది సింగల్స్‌, డబుల్స్‌ టైటిళ్లు సాధించిన తొలి క్రీడాకారిణిగా చరిత్ర సృష్టించింది. ఈ అరుదైన ఫీట్‌ను చివరిసారిగా 2000లో మేరీ పియర్స్‌ సాధించింది. కాగా, గ్రాండ్‌స్లామ్‌ చరిత్రలో ఇలా సింగల్స్‌, డబుల్స్‌ టైటిళ్లను చివరిసారిగా సెరీనా విలియమ్స్‌ సాధించింది. సెరీనా 2016 వింబుల్డన్‌లో ఈ ఘనత సాధించింది.   ఇదిలా ఉంటే, శనివారం జరిగిన మహిళల సింగల్స్‌ ఫైనల్లో ప్రపంచ 33వ ర్యాంకర్, అన్‌సీడెడ్‌ క్రిచికోవా 6–1, 2–6, 6–4తో ప్రపంచ 32వ ర్యాంకర్, 31వ సీడ్‌ అనస్తాసియా పావ్లుచెంకోవా (రష్యా)పై విజయం సాధించి తొలిసారి టైటిల్‌ను ఎగురేసుకుపోయింది. ఓవరాల్‌గా క్రిచికోవా ఇప్పటివరకు కెరీర్‌లో నాలుగు గ్రాండ్‌స్లామ్‌ టైటిళ్లు సాధించింది‌. చెక్‌ రిపబ్లిక్‌కే చెందిన సినియకోవాతో కలిసి 2018లో ఫ్రెంచ్‌ ఓపెన్‌ సాధించిన క్రిచికోవా...  2018 వింబుల్డన్‌ ఓపెన్‌లోనూ మహిళల డబుల్స్‌ టైటిల్‌ సాధించింది. తాజాగా ఫ్రెంచ్ ఓపెన్‌లో సింగల్స్‌, డబుల్స్‌ టైటిళ్లు సాధించడంతో ఆమె గ్రాండ్‌స్లామ్ల సంఖ్య నాలుగుకు చేరింది. చదవండి: French Open: క్వీన్‌ క్రిచికోవా  

పారిస్‌: అందరి అంచనాలను తారుమారు చేసి ఫ్రెంచ్‌ ఓపెన్‌ మహిళల సింగిల్స్‌ విభాగంలో విజేతగా నిలిచిన పోలాండ్‌ క్రీడాకారిణి ఇగా స్వియాటెక్‌ మహిళల టెన్నిస్‌ సంఘం (డబ్ల్యూటీఏ) ర్యాంకింగ్స్‌లోనూ దూసుకుపోయింది. ఫ్రెంచ్‌ ఓపెన్‌కు ముందు ప్రపంచ ర్యాంకింగ్స్‌లో 54వ స్థానంలో ఉన్న 19 ఏళ్ల స్వియాటెక్‌ ‘గ్రాండ్‌’ విజయంతో 37 స్థానాలు పురోగతి సాధించి కెరీర్‌ బెస్ట్‌ 17వ ర్యాంక్‌కు చేరుకుంది. రన్నరప్‌గా నిలిచిన సోఫియా కెనిన్‌ రెండు స్థానాలు మెరుగుపర్చుకొని నాలుగో స్థానానికి చేరింది. యాష్లే బార్టీ (ఆస్ట్రేలియా) టాప్‌ ర్యాంక్‌లో కొనసాగుతుండగా... సిమోనా హలెప్‌ రెండో ర్యాంక్‌లో (రొమేనియా), నయోమి ఒసాకా (జపాన్‌) మూడో ర్యాంక్‌లో ఉన్నారు.   పురుషుల ర్యాంకింగ్స్‌లో ఫ్రెంచ్‌ ఓపెన్‌ రన్నరప్‌ జొకోవిచ్‌ (సెర్బియా) నంబర్‌వన్‌ స్థానంలోనే కొనసాగుతుండగా... విజేత రాఫెల్‌ నాదల్‌ (స్పెయిన్‌) రెండో స్థానాన్ని నిలబెట్టుకున్నాడు. కెరీర్‌లో తొలిసారి గ్రాండ్‌స్లామ్‌ టోర్నీలో సెమీస్‌ చేరిన డీగో ష్వార్ట్‌జ్‌మన్‌ (అర్జెంటీనా) 14వ ర్యాంక్‌ నుంచి కెరీర్‌ బెస్ట్‌ 8వ ర్యాంక్‌కు చేరుకోగా... ఆండ్రీ రుబ్లెవ్‌ (రష్యా) తొలిసారి పదో ర్యాంక్‌ను అందుకున్నాడు.  

కటక్‌: కామన్వెల్త్‌టేబుల్‌ టెన్నిస్‌ (టీటీ) చాంపియన్‌షిప్‌ మహిళల సింగిల్స్‌ విభాగంలో భారత్‌కు ప్రాతినిధ్యం వహిస్తున్న తెలంగాణ ప్లేయర్‌ ఆకుల శ్రీజ మెయిన్‌ ‘డ్రా’కు అర్హత సాధించింది. శనివారం నిర్వహించిన క్వాలిఫయింగ్‌ పోటీల్లో గ్రూప్‌–6లో పాల్గొన్న శ్రీజ టాపర్‌గా నిలిచింది. తొలి మ్యాచ్‌లో శ్రీజ 11–7, 11–4, 11–6తో కొన్‌స్టాటినా (సైప్రస్‌)పై గెలిచింది. రెండో మ్యాచ్‌లో శ్రీజకు ఆమె ప్రత్యర్థి తెగీనా నకిబులె (ఉగాండా) నుంచి వాకోవర్‌ లభించింది. శ్రీజతోపాటు భారత్‌ నుంచి కృత్విక సిన్హా రాయ్, సుతీర్థ ముఖర్జీ, మౌసుమి పాల్, ప్రాప్తి సేన్, సెలీనా సెల్వకుమార్, దివ్య దేశ్‌పాండే, సాగరిక ముఖర్జీ, అనూష కూడా మెయిన్‌ ‘డ్రా’కు అర్హత పొందారు.  

ఆల్‌టైమ్‌ గ్రాండ్‌స్లామ్‌ సింగిల్స్‌ టైటిల్స్‌ రికార్డును సమం చేసే అవకాశాన్ని అమెరికా టెన్నిస్‌ దిగ్గజం సెరెనా విలియమ్స్‌ మరోసారి చేజార్చుకుంది. సహజశైలిలో, స్థాయికి తగ్గట్టు ఆడితే విజయం ఖాయమనుకున్న చోట ఈ నల్లకలువకు ఊహించని పరాజయం ఎదురైంది. గతంలో సెరెనాతో ఆడిన పది మ్యాచ్‌ల్లో కేవలం ఒక్కసారి మాత్రమే నెగ్గిన రొమేనియా క్రీడాకారిణి సిమోనా హలెప్‌ వింబుల్డన్‌ వేదికపై తన కెరీర్‌లోనే చిరస్మరణీయ విజయం నమోదు చేసుకుంది. 23 గ్రాండ్‌స్లామ్‌ టైటిల్స్‌ విజేత సెరెనాపై కేవలం 56 నిమిషాల్లో అదీ నాలుగు గేమ్‌లు మాత్రమే కోల్పోయి జయకేతనం ఎగురవేసిన హలెప్‌ కెరీర్‌లో రెండో గ్రాండ్‌స్లామ్‌ టైటిల్‌ను దక్కించుకుంది. లండన్‌: మరో గ్రాండ్‌స్లామ్‌ టైటిల్‌ గెలిచి చరిత్ర సృష్టించాలని భావించిన సెరెనా విలియమ్స్‌కు మళ్లీ ఆశాభంగమైంది. ఇప్పటికే 23 గ్రాండ్‌స్లామ్‌ టైటిల్స్‌ నెగ్గిన ఈ అమెరికా స్టార్‌ మరో టైటిల్‌తో మార్గరెట్‌ కోర్ట్‌ (ఆస్ట్రేలియా–24 టైటిల్స్‌) పేరిట ఉన్న ఆల్‌టైమ్‌ అత్యధిక గ్రాండ్‌స్లామ్‌ టైటిల్స్‌ రికార్డును సమం చేయాలని ప్రయత్నించి విఫలమైంది. గత ఏడాది వింబుల్డన్‌లో, యూఎస్‌ ఓపెన్‌లో ఫైనల్‌ చేరి రన్నరప్‌తోనే సరిపెట్టుకున్న సెరెనా ఈ యేడు కూడా వింబుల్డన్‌ ఫైనల్లో ఓటమి రుచి చూసింది. గత సంవత్సరం తుది పోరులోఎంజెలిక్‌ కెర్బర్‌ (జర్మనీ) షాక్‌ ఇవ్వగా... ఈసారి సిమోనా హలెప్‌ (రొమేనియా) ఆ పని చేసింది. శనివారం జరిగిన మహిళల సింగిల్స్‌ ఫైనల్లో ఏడో సీడ్‌ హలెప్‌ 6–2, 6–2తో 11వ సీడ్, ఏడుసార్లు చాంపియన్‌ సెరెనా విలియమ్స్‌ను చిత్తుగా ఓడించి తొలిసారి వింబుల్డన్‌ టైటిల్‌ను హస్తగతం చేసుకుంది. అంతేకాకుండా వింబుల్డన్‌ టైటిల్‌ గెలిచిన తొలి రొమేనియా ప్లేయర్‌గా ఆమె రికార్డు సృష్టించింది. విజేతగా నిలిచిన హలెప్‌కు 23 లక్షల 50 వేల పౌండ్లు (రూ. 20 కోట్ల 26 లక్షలు)... రన్నరప్‌ సెరెనాకు 11 లక్షల 75 వేల పౌండ్లు (రూ.10 కోట్ల 13 లక్షలు) ప్రైజ్‌మనీగా లభించాయి. ఆరంభం నుంచే దూకుడు... గతంలో 37 ఏళ్ల సెరెనాపై ఒక్కసారి మాత్రమే నెగ్గిన 27 ఏళ్ల హలెప్‌ ఈసారి మాత్రం ఆరంభం నుంచే తన ఆధిపత్యాన్ని చాటుకుంది. తొలి గేమ్‌లో, మూడో గేమ్‌లో సెరెనా సర్వీస్‌లను బ్రేక్‌ చేసిన హలెప్‌ తన సర్వీస్‌లను కాపాడుకొని 4–0తో ఆధిక్యంలోకి వెళ్లింది. ఆ తర్వాత సెరెనాకు కోలుకునే అవకాశం ఇవ్వకుండా ఆడిన హలెప్‌ తొలి సెట్‌ను దక్కించుకుంది. రెండో సెట్‌లో సెరెనా పుంజుకుంటుందని ఆశించినా హలెప్‌ జోరు ముందు ఆమె తేలిపోయింది. ఐదో గేమ్‌లో, ఏడో గేమ్‌లో సెరెనా సర్వీస్‌లను బ్రేక్‌ చేసిన హలెప్‌ ఎనిమిదో గేమ్‌లోనూ తన సర్వీస్‌ను నిలబెట్టుకొని విజయాన్ని ఖాయం చేసుకుంది. గతేడాది హలెప్‌ ఫ్రెంచ్‌ ఓపెన్‌లో విజేతగా నిలిచి కెరీర్‌లో తొలి గ్రాండ్‌స్లామ్‌ టైటిల్‌ను సాధించింది. నా జీవితంలోనే గొప్ప మ్యాచ్‌ ఆడాను. వింబుల్డన్‌ ఫైనల్‌ ఆడాలన్నది మా అమ్మ కోరిక. వింబుల్డన్‌ ఫైనల్‌ ఆడితే టెన్నిస్‌లో ఏదో ఘనత సాధించినట్టేనని మా అమ్మ చెప్పింది. ఆ రోజు రానే వచ్చింది. ఆమె కోరుకున్నట్టే వింబుల్డన్‌లో ఫైనల్‌ ఆడటమే కాకుండా టైటిల్‌ కూడా గెలిచాను. మా అమ్మ కలను నిజం చేశాను.      – సిమోనా హలెప్‌

తొలి రెండు మ్యాచ్‌ల్లో అతి కష్టమ్మీద గట్టెక్కిన మహిళల సింగిల్స్‌ ప్రపంచ నంబర్‌వన్‌ నయోమి ఒసాకా మూడో రౌండ్‌లో మాత్రం ఆ అద్భుతం చేయలేకపోయింది. డబుల్స్‌లో నంబర్‌వన్‌గా ఉన్న కాటరీనా సినియకోవాతో జరిగిన మ్యాచ్‌లో వరుస సెట్‌లలోనే చేతులెత్తేసిన ఒసాకా ఫ్రెంచ్‌ ఓపెన్‌ నుంచి నిష్క్రమించింది. మరోవైపు మాజీ చాంపియన్‌ సెరెనా విలియమ్స్‌ కూడా ఇంటిదారి పట్టింది. అమెరికాకే చెందిన సోఫియా కెనిన్‌ వరుస సెట్‌లలో సెరెనాను ఓడించి తన కెరీర్‌లో తొలిసారి గ్రాండ్‌స్లామ్‌ టోర్నీలో ప్రిక్వార్టర్‌ ఫైనల్‌కు చేరుకుంది. పారిస్‌: ఫ్రెంచ్‌ ఓపెన్‌ గ్రాండ్‌స్లామ్‌ టెన్నిస్‌ టోర్నీలో శనివారం పెను సంచలనాలు చోటు చేసుకున్నాయి. మహిళల సింగిల్స్‌లో ప్రపంచ నంబర్‌వన్, టాప్‌ సీడ్‌ క్రీడాకారిణి నయోమి ఒసాకా ... పదో సీడ్, మాజీ చాంపియన్‌ సెరెనా విలియమ్స్‌ (అమెరికా) పోరాటం మూడో రౌండ్‌లోనే ముగిసింది. డబుల్స్‌ నంబర్‌వన్, సింగిల్స్‌లో 42వ ర్యాంకర్‌ కాటరీనా సినియకోవా (చెక్‌ రిపబ్లిక్‌) ధాటికి ఒసాకా ఇంటిముఖం పట్టింది. 77 నిమిషాల పాటు జరిగిన మూడో రౌండ్‌ మ్యాచ్‌లో సినియకోవా 6–4, 6–2తో ఒసాకాను ఓడించి తన కెరీర్‌లో తొలిసారి ఓ గ్రాండ్‌స్లామ్‌ టోర్నీ సింగిల్స్‌ విభాగంలో ప్రిక్వార్టర్‌ ఫైనల్లోకి దూసుకెళ్లింది. ప్రపంచ 35వ ర్యాంకర్‌ సోఫియా కెనిన్‌ 6–2, 7–5తో సెరెనాను బోల్తా కొట్టించింది. ఈ ఫ్రెంచ్‌ ఓపెన్‌లో ఆడిన తొలి రెండు మ్యాచ్‌ల్లో ఒసాకా తొలి సెట్‌ను కోల్పోయి, తర్వాతి రెండు సెట్‌లు గెలిచి నిలిచింది. కానీ మూడో మ్యాచ్‌లో మాత్రం అది సాధ్యం కాలేదు. ఒసాకా దూకుడుకు పగ్గాలు వేస్తూ సినియకోవా తొలి సెట్‌లో ఒకసారి... రెండో సెట్‌లో రెండుసార్లు సర్వీస్‌ బ్రేక్‌ సాధించింది. మరోవైపు ఒసాకా ఏకంగా 38 అనవసర తప్పిదాలు, మూడు డబుల్‌ ఫాల్ట్‌లు చేసింది. సినియకోవా సర్వీస్‌లో బ్రేక్‌ సాధించేందుకు ఏడు సార్లు అవకాశం వచ్చినా ఈ జపాన్‌ స్టార్‌ ఒక్కసారీ సద్వినియోగం చేసుకోలేదు. ఇతర మూడో రౌండ్‌ మ్యాచ్‌ల్లో డిఫెండింగ్‌ చాంపియన్‌ సిమోనా హలెప్‌ (రొమేనియా), 14వ సీడ్‌ మాడిసన్‌ కీస్‌ (అమెరికా), ఇగా స్వియాటెక్‌ (పోలాండ్‌) కూడా ప్రిక్వార్టర్‌ ఫైనల్లోకి ప్రవేశించారు. హలెప్‌ 6–2, 6–1తో సురెంకో (ఉక్రెయిన్‌)పై, కీస్‌ 6–3, 6–7 (5/7), 6–4తో బ్లిన్‌కోవా (రష్యా)పై, స్వియాటెక్‌ 0–6, 6–3, 6–3తో మోనికా పుయిగ్‌ (ప్యూర్టోరికో)పై గెలిచారు. సీడెడ్‌ ఆటగాళ్ల జోరు... పురుషుల సింగిల్స్‌ మూడో రౌండ్‌ మ్యాచ్‌ల్లో టాప్‌ సీడ్‌ జొకోవిచ్‌ 6–3, 6–3, 6–2తో కరుసో (ఇటలీ)పై, ఆరో సీడ్‌ సిట్సిపాస్‌ 7–5, 6–3, 6–7 (5/7), 7–6 (8/6)తో క్రాజినోవిచ్‌ (సెర్బియా)పై, నాలుగో సీడ్‌ డొమినిక్‌ థీమ్‌ (ఆస్ట్రియా) 6–3, 4–6, 6–2, 7–5తో పాబ్లో క్యువాస్‌ (ఉరుగ్వే)పై, ఐదో సీడ్‌ జ్వెరెవ్‌ (జర్మనీ) 6–4, 6–2, 4–6, 1–6, 6–2తో లాజోవిచ్‌ (సెర్బియా)పై, తొమ్మిదో సీడ్‌ ఫాగ్‌నిని 7–6 (7/5), 6–4, 4–6, 6–1తో అగుట్‌ (స్పెయిన్‌)పై గెలిచారు. పదో సీడ్‌ ఖచనోవ్‌ (రష్యా), మాజీ చాంపియన్‌ వావ్రింకా (స్విట్జర్లాండ్‌), ఎనిమిదో సీడ్‌ డెల్‌పొట్రో (అర్జెంటీనా) కూడా ప్రిక్వార్టర్‌ ఫైనల్‌ చేరారు. పురుషుల డబుల్స్‌ రెండో రౌండ్‌లో లియాండర్‌ పేస్‌ (భారత్‌)–బెనోయిట్‌ పెయిర్‌ (ఫ్రాన్స్‌) జంట 0–6, 6–4, 3–6తో మూడో సీడ్‌ కబాల్‌–ఫరా (కొలంబియా) జోడీ చేతిలో ఓడిపోయింది.


 ఫ్రెంచ్‌ ఓపెన్‌ విజేత జెలెనా ఒస్టాపెంకో
 ♦ అన్‌సీడెడ్‌ హోదాలో అద్భుతం
 ♦ ఆడిన తొలి ‘గ్రాండ్‌’ ఫైనల్లోనే ట్రోఫీ కైవసం
 ♦ ఫైనల్లో మూడో సీడ్‌ హలెప్‌పై విజయం
 ♦ రూ. 15 కోట్ల 10 లక్షల ప్రైజ్‌మనీ సొంతం
 
 ముఖంపై ఇంకా వీడని అమాయకత్వపు ఛాయలు... కానీ కోర్టులో దిగితే మాత్రం తన రాకెట్‌తో ప్రత్యర్థులకు చెమటలు పట్టేలా ఆటతీరు... ఎలాంటి అంచనాలు లేకుండా అనామకురాలిగా అడుగు పెట్టినా... తనకంటే ఎంతో మెరుగైన వారు ప్రత్యర్థులుగా ఎదురైనా... పూర్తి విశ్వాసంతో ఒక్కో అడ్డంకిని అధిగమిస్తూ... చివరకు ఎవ్వరూ ఊహించనిరీతిలో ‘గ్రాండ్‌’గా ఫినిష్‌ చేసింది. గ్రాండ్‌స్లామ్‌ టోర్నమెంట్‌ల చరిత్రలోనే సంచలనాత్మక విజయం సాధించి అందర్నీ ఔరా అనిపించేలా చేసింది. ఆమే లాత్వియాకు చెందిన 20 ఏళ్ల జెలెనా ఒస్టాపెంకో. ఫ్రెంచ్‌ ఓపెన్‌లో అన్‌సీడెడ్‌గా బరిలోకి దిగిన ఒస్టాపెంకో ఏకంగా టైటిల్‌నే సొంతం చేసుకొని టెన్నిస్‌ క్రీడాలోకాన్ని నివ్వెరపరిచింది.
 
 టైటిల్‌ సాధించిన క్రమంలో ఒస్టాపెంకో రెండో రౌండ్‌లో రియో ఒలింపిక్స్‌ చాంపియన్‌ మోనికా పుయిగ్‌ (ప్యూర్టోరికో)పై, ప్రిక్వార్టర్‌ ఫైనల్లో 2011 యూఎస్‌ ఓపెన్‌ చాంపియన్‌ సమంతా స్టోసుర్‌ (ఆస్ట్రేలియా)పై, క్వార్టర్‌ ఫైనల్లో ప్రపంచ మాజీ నంబర్‌వన్‌ వొజ్నియాకి (డెన్మార్క్‌)పై, సెమీఫైనల్లో 30వ సీడ్‌ బాసిన్‌స్కీ (స్విట్జర్లాండ్‌)పై గెలిచింది.  
 
 పారిస్‌: అనుభవంపై యువతరంగం గెలిచింది. సత్తా ఉండాలేగానీ సీడింగ్స్‌తో, ర్యాంక్‌లతో సంబంధం లేదని జెలెనా ఒస్టాపెంకో నిరూపించింది. టెన్నిస్‌ సీజన్‌ రెండో గ్రాండ్‌స్లామ్‌ టోర్నమెంట్‌ ఫ్రెంచ్‌ ఓపెన్‌లో 20 ఏళ్ల ఈ లాత్వియా అమ్మాయి మహిళల సింగిల్స్‌ చాంపియన్‌గా అవతరించింది. రొలాండ్‌ గారోస్‌లో శనివారం గంటా 59 నిమిషాలపాటు జరిగిన మహిళల సింగిల్స్‌ ఫైనల్లో అన్‌సీడెడ్‌ ఒస్టాపెంకో 4–6, 6–4, 6–3తో మూడో సీడ్‌ సిమోనా హలెప్‌ (రొమేనియా)పై గెలిచింది. విజేతగా నిలిచిన ఒస్టాపెంకోకు 21 లక్షల యూరోలు (రూ. 15 కోట్ల 10 లక్షలు)... రన్నరప్‌ హలెప్‌నకు 10 లక్షల యూరోలు (రూ. 7 కోట్ల 19 లక్షలు) ప్రైజ్‌మనీగా లభించాయి.
 
 ఈ టోర్నీకి ముందు ప్రపంచ ర్యాంకింగ్స్‌లో 47వ స్థానంలో ఉన్న ఒస్టాపెంకో తాజా ప్రదర్శనతో సోమవారం విడుదలయ్యే ర్యాంకింగ్స్‌లో 12వ స్థానానికి చేరుకుంటుంది. ఒకవేళ హలెప్‌ గెలిచిఉంటే కెరీర్‌లో తొలి గ్రాండ్‌స్లామ్‌ టైటిల్‌ సాధించడంతోపాటు ఆమెకు ప్రపంచ నంబర్‌వన్‌ ర్యాంక్‌ ఖాయమయ్యేది. ఈ టోర్నీకి ముందు కెరీర్‌లో ఏడు గ్రాండ్‌స్లామ్‌ టోర్నీలు ఆడిన ఒస్టాపెంకో ఏనాడూ రెండో రౌండ్‌ను దాటలేకపోయింది. అంతేకాకుండా ఫ్రొఫెషనల్‌ కెరీర్‌లో కేవలం మూడు టోర్నీలలో ఫైనల్‌కు చేరుకొని మూడింటిలోనూ ఓడిపోయి రన్నరప్‌గా నిలిచింది. గ్రాండ్‌స్లామ్‌ రూపంలోనే ఒస్టాపెంకో తన కెరీర్‌లో తొలి టైటిల్‌ను సాధించడం విశేషం.
 
 వెనుకబడినా...
 ఒస్టాపెంకోతో పోలిస్తే కెరీర్‌లో 28వ గ్రాండ్‌స్లామ్‌ టోర్నీ ఆడుతోన్న హలెప్‌ను అందరూ టైటిల్‌ ఫేవరెట్‌గా భావించారు. 2014లో ఈ టోర్నీలో రన్నరప్‌గా నిలువడం కూడా హలెప్‌పై అంచనాలు పెంచాయి. తొలి సెట్‌ను హలెప్‌ గెలుపొందడం... రెండో సెట్‌లో 3–0తో ఆధిక్యంలో ఉండటంతో హలెప్‌కు టైటిల్‌ లభించడం లాంఛనమే అనిపించింది. కానీ ఒస్టాపెంకో మాత్రం అలా భావించలేదు. పోరాడితే పోయేదేముందీ అనుకుంటూ జూలు విదిల్చింది. ఒకవైపు అనవసర తప్పిదాలు చేస్తున్నా... వాటికి ఏమాత్రం తగ్గకుండా విన్నర్స్‌ కూడా కొడుతుండటంతో ఒస్టాపెంకో విజయావకాశాలకు ఊపిరి వచ్చింది.
 
 తొలి సెట్‌లో ఓడి, రెండో సెట్‌లో 0–3తో వెనుకబడిన దశలో ఒస్టాపెంకో విజృంభించింది. హలెప్‌ సర్వీస్‌ను బ్రేక్‌ చేయడంతోపాటు తన సర్వీస్‌లను కాపాడుకొని స్కోరును 3–3తో సమం చేసింది. పదో గేమ్‌లో హలెప్‌ సర్వీస్‌ను మరోసారి ఒస్టాపెంకో బ్రేక్‌ చేసి రెండో సెట్‌ను దక్కించుకొని మ్యాచ్‌లో నిలిచింది. నిర్ణాయక మూడో సెట్‌లో ఒస్టాపెంకో 1–3తో వెనుకబడింది. కానీ మళ్లీ పోరాడిన ఒస్టాపెంకో వరుసగా ఐదు గేమ్‌లను గెలిచి హలెప్‌ ఆశలను ఆవిరిచేసింది. తన కెరీర్‌లోనే చిరస్మరణీయ ఘట్టాన్ని ఆవిష్కరించుకుంది.
 
 నా కల నెరవేరింది. ఈ విజయాన్ని ఇప్పటికీ నమ్మలేకపోతున్నా. దానికి మరికొంత సమయం పడుతుందేమో. బంతిని బలంగా బాదగల నైపుణ్యం నాకు మొదటి నుంచి ఉంది. టోర్నీలో నా షాట్‌లన్నీ బాగా పనిచేశాయి. మ్యాచ్‌కు పది నిమిషాల ముందు మినహా ఎలాంటి ఒత్తిడికి లోను కాలేదు. ఫైనల్‌కు ముందు రాత్రి కూడా ప్రశాంతంగా పడుకున్నాను. రెండో సెట్‌లో వెనుకబడిన దశలో ఇక పోయేదేమీ లేదు, ఆటను ఆస్వాదించాలని నిర్ణయించుకున్నాను. ఫైనల్‌ చేరిన సంతృప్తి ఉంది కాబట్టి చివరి వరకు పోరాడాలని మాత్రం భావించాను. దూకుడుగా ఆడటంతో మ్యాచ్‌ నా వైపు తిరిగింది. కుయెర్టన్‌ గెలిచిన రోజే నేను పుట్టడం అదృష్టం కావచ్చేమో. నాకు గ్రాస్‌కోర్టు అంటే ఇష్టం. ఇక వింబుల్డన్‌ సాధించడంపైనే దృష్టి.  –ఒస్టాపెంకో
 
 ఆమె బంతిని చాలా బలంగా కొట్టసాగింది. ఒక దశలో నేను ప్రేక్షకురాలిగా మారిపోయాను. గెలిచేందుకు ఒస్టాపెంకో అన్ని విధాలా అర్హురాలు. నాకు సంబంధించి ఇది వేదనాభరిత క్షణం. అయితే కాలం సాగిన కొద్దీ ఆ బాధ తగ్గుతుందని ఆశిస్తున్నా. భవిష్యత్‌లో నాకు ఏం రాసిపెట్టి ఉందో చూద్దాం. –హలెప్‌  
 
 ఒస్టాపెంకో విజయం విశేషాలు
 ⇔ 1933లో మార్గరెట్‌ స్క్రివెన్‌ వివియన్‌ (బ్రిటన్‌) తర్వాత ఫ్రెంచ్‌ ఓపెన్‌లో విజేతగా నిలిచిన తొలి అన్‌సీడెడ్‌ క్రీడాకారిణిగా గుర్తింపు.
 ⇔ 2001లో జెన్నిఫర్‌ కాప్రియాటి (అమెరికా) తర్వాత ఫ్రెంచ్‌ ఓపెన్‌ ఫైనల్లో తొలి సెట్‌లో ఓడిపోయాక కూడా  టైటిల్‌ నెగ్గిన తొలి ప్లేయర్‌గా ఘనత.
 ⇔ 1997లో ఇవా మయోలీ (క్రొయేషియా–19 ఏళ్ల 300 రోజులు) తర్వాత ఫ్రెంచ్‌ ఓపెన్‌... 2006లో మరియా షరపోవా (యూఎస్‌ ఓపెన్‌–19 ఏళ్ల 77 రోజులు) తర్వాత గ్రాండ్‌స్లామ్‌ టైటిల్‌ నెగ్గిన రెండో పిన్న వయస్కురాలిగా గుర్తింపు.
 ⇔ కెరీర్‌లో తొలి ప్రొఫెషనల్‌ టైటిల్‌గా గ్రాండ్‌స్లామ్‌ టోర్నీని గెలుచుకున్న మూడో ప్లేయర్‌. మహిళల విభాగంలో బార్బరా జోర్డాన్‌ (1979 ఆస్ట్రేలియన్‌ ఓపెన్‌) ముందుగా ఈ రికార్డు నెలకొల్పగా... 1997 జూన్‌ 8న గుస్తావో కుయెర్టన్‌ (బ్రెజిల్‌) కూడా దానిని సాధించాడు. అదే రోజు పుట్టిన ఒస్టాపెంకో 20 ఏళ్ల తర్వాత మళ్లీ అలాంటి విజయాన్ని అందుకోవడం విశేషం.  
 ⇔ కేవలం 20 లక్షల జనాభా ఉన్న యూరోపియన్‌ దేశం లాత్వియా నుంచి గ్రాండ్‌స్లామ్‌ చాంపియన్‌గా అవతరించిన తొలి ప్లేయర్‌గా గుర్తింపు.
 
 నాదల్‌ @ వావ్రింకా
 నేడు ఫ్రెంచ్‌ ఓపెన్‌  పురుషుల సింగిల్స్‌ ఫైనల్‌
 సా. గం. 6.30 నుంచి
 స్టార్‌ స్పోర్ట్స్‌ సెలెక్ట్‌–1లో  ప్రత్యక్ష ప్రసారం