సాక్షి, అమరావతి: ప్రజలు ఎన్నుకున్న ప్రతినిధులతో కూడిన శాసనసభ బిల్లు ఆమోదించిపంపితే శాసనమండలిలో అప్రజాస్వామికంగా, నిబంధనలకు విరుద్ధంగా అడ్డుకోవడాన్ని వైఎస్సార్‌సీపీ ఎంపీ విజయసాయి రెడ్డి తీవ్రంగా తప్పుబట్టారు. సభలో యనుమల రామకృష్ణుడు అవలంభించిన తీరుపై విజయసాయి రెడ్డి తన ట్విటర్‌ ఖాతా ద్వారా స్పందించారు. 'ఎన్టీఆర్‌కు వెన్నుపోటు పొడిచే ప్రణాళికలో భాగంగా అప్పట్లో యనమలని చంద్రబాబు స్పీకర్‌గా తెరపైకి తీసుకొచ్చాడని, అదే విధంగా యనమల కూడా తన బాస్ ముఖ్యమంత్రి కావడానికి స్పీకర్ స్థానంలో ఉండి ఆయన 'చరిత్రలో నిల్చేంత' సేవ చేశారని విమర్శించారు. ఇప్పుడు శాసనమండలి ప్రతిష్ఠను కూడా చంద్రబాబు తన స్వార్థం కోసం మంటగలిపారని' మండిపడ్డారు. (మనుగడ కోసం బాబు ఎంత నీచానికైనా దిగజారుతాడు) కాగా.. మరో ట్వీట్‌లో 'అహంకారం, దుర్భుద్ధితో చంద్రబాబు వేసిన ఒక్కో తప్పటడుగు పార్టీని, నమ్ముకున్న వాళ్లని అధ:పాతాళానికి నెట్టి వేసింది. ఈ వయసులో శక్తికి మించిన విన్యాసాలు చేస్తున్నాడు. పప్పు నాయుడు రాజకీయ జీవితం కూడా ముగిసినట్టే. యనమల లాంటి తిరస్కృతులకు చరమాంకం చేదు జ్ఞాపకంగా మిగులుతుందంటూ' శాసనమండలిలో బాబు, యనుమల తీరుపై విజయసాయి రెడ్డి ధ్వజమెత్తారు. చదవండి: (ఇది తప్పే..) 

సాక్షి, అమరావతి : పోలవరం కాంట్రాక్టర్లను వైదొలగమని చెబితే టీడీపీ మాజీ మంత్రి దేవినేని ఉమా ఎందుకు ఉలిక్కి పడుతున్నారని వైఎస్సార్‌ కాంగ్రెస్‌ పార్టీ పార్లమెంటరీ నేత, ఎంపీ విజయసాయిరెడ్డి ప్రశ్నించారు. గత ప్రభుత్వ హయాంలో ప్రాజెక్టు పనులన్నింటినీ బినామీ కాంట్రాక్టర్లకు అప్పగించి వేల కోట్ల రూపాయల కమిషన్లు దండుకున్నారని ఆరోపించారు. ఇప్పుడు ఈ విషయాలన్నీ బయటపడి.. అడ్డంగా దొరికిన తర్వాత వారికి పులివెందులా పంచాయతీలా అనిపిస్తోందా అంటూ వ్యంగ్యాస్త్రాలు సంధించారు. ఈ మేరకు ఆయన ట్వీట్‌ చేశారు. ఇక అన్న క్యాంటీన్ల విషయంలో టీడీపీ ఎమ్మెల్సీ లోకేశ్‌ స్పందిస్తున్న తీరును విజయసాయిరెడ్డి విమర్శించారు. ‘అన్న క్యాంటీన్లను మీ హెరిటేజ్ సొమ్ముతో ఏమైనా నడిపారా లోకేశ్ బాబూ? మూసేశారని టీఎంసీల కొద్ది కన్నీరు కారుస్తున్నావు. మీ పథకాలన్నీ ప్రజల సంక్షేమానికి కాకుండా దోచుకునేందుకే మొదలు పెట్టారు. క్యాంటీన్ నిధులను పసుపు-కుంకుమ ప్రలోభాలకు మళ్లించి 43 కోట్ల బకాయి పెట్టారు’ అని గత ప్రభుత్వ తీరును ఎండగట్టారు. ములాఖత్‌లో కలుద్దురు...! ముఖ్యమంత్రి వైఎస్‌ జగన్‌మోహన్‌రెడ్డిపై అనుచిత వ్యాఖ్యలు చేస్తున్న టీడీపీ నేతలపై విజయసాయిరెడ్డి ట్విటర్‌ వేదికగా మండిపడ్డారు. ఎన్టీఆర్‌కు వెన్నుపోటు కుట్రలో చంద్రబాబుకు సహకరించిన యనుమల.. ఇప్పుడు గురివిందలా విలువల గురించి మాట్లాడుతున్నారని విమర్శించారు. అర్ధరాత్రి ఆనాటి కేంద్ర మంత్రి చిదంబరం కాళ్లు పట్టుకుని వైఎస్‌ జగన్‌పై కేసులు పెట్టించింది మీ బాసే కదా అంటూ యనుమలపై ఆగ్రహం వ్యక్తం చేశారు. ‘రేపు మీ నాయకుడు, ఆయన కొడుకు ఏ జైల్లో ఉంటారో? ములాఖత్‌లో కలుద్దురు. సిద్ధంగా ఉండండి’ అంటూ టీడీపీ అధ్యక్షుడు చంద్రబాబు, ఎమ్మెల్సీ లోకేశ్‌లను ఉద్దేశించి విమర్శలు గుప్పించారు.


 అమరావతిలో తొలి పద్దులోనే చంద్రబాబు ప్రభుత్వం ప్రగతికి పొద్దుపొడుపు లేకుండా చేసింది.  ఎన్నో ఆశలతో అమరావతిలో తొలి రాష్ట్ర బడ్జెట్‌ కోసం నిరీక్షించిన ప్రజలకు అడియాసే మిగిల్చింది. ఆర్థిక మంత్రి యనమల రామకృష్ణుడు అసెంబ్లీలో బుధవారం ప్రవేశపెట్టిన రాష్ట్ర బడ్జెట్‌ ఆసాంతం మాటల కనికట్టు... అంకెల గారడీతో బురిడీ కొట్టించింది. కీలకమైన రాజధాని నిర్మాణానికి నామమాత్రపు నిధులు విదిల్చి చేతులు దులుపుకుంది. సాగునీటి రంగంపై నిర్లక్ష్యం... రుణమాఫీపై దొంగాట... మెట్రో రైలుపై ప్లేటు ఫిరాయింపు... సర్క్యులర్‌ రైలు పేరుతో కనికట్టు... స్మార్ట్‌సిటీకి అత్తెసరు నిధులు.. ప్రకటనలే తప్ప నిధుల ఊసు లేని ఇతర రంగాలు... ఇలా బడ్జెట్‌లో ఆసాంతం అమరావతికి అన్యాయమే చేశారు. 
 సాక్షి, అమరావతి బ్యూరో :
 ‘ప్రపంచస్థాయి రాజధానిగా అమరావతి’ అనే నినాదం ప్రగల్భాలుగానే మిగిలి పోయేట్లుగా ఉంది. రాజధాని నిర్మాణం కోసం నామమాత్రపు నిధుల కేటాయింపు నిర్ఘాంతపరిచింది. లక్షల కోట్లతో నిర్మిస్తామన్న రాజధానికి ప్రభుత్వం ఈ బడ్జెట్‌లో కేటాయించింది కేవలం రూ.1,061కోట్లు. అందులోనూ రూ.వెయ్యి కోట్లు కేంద్రం తన వాటాగా ఇస్తామని కేంద్ర బడ్జెట్‌లో పేర్కొంది. అంటే రాష్ట్ర ప్రభుత్వం కేవలం రూ.61కోట్లు విదిల్చిందన్నమాట. మౌలిక సదుపాయాల కల్పనకే రూ.5,500కోట్లు అవసరం.
  
 మాస్టర్‌ప్లాన్లో‌ చూపించిన రంగుల ప్రపంచంలో పేర్కొన్నట్లుగా లెజిస్లేచర్‌ సిటీ, అడ్మినిస్ట్రేషన్‌ సిటీ, జస్టిస్‌ సిటీ, స్పోర్ట్స్‌ సిటీ, ఇండస్ట్రియల్‌ సిటీ, ఐటీ సిటీ, అమ్యూజ్‌మెంట్‌ పార్కులు, ఫ్‌లై ఓవర్లు... ఇలా నిర్మించాలంటే ఎన్ని లక్షల నిధు లు కావాలో కదా...
  హడ్కో రూ.7వేల కోట్ల రుణ సహాయానికి ఒప్పందం కుదిరిందని ఆర్థిక మంత్రి యనమల చెప్పుకొచ్చారు. ప్రపంచ బ్యాంకుతో చర్చలు జరుగుతున్నాయని కూడా అన్నారు... అంటే ఆ నిధులపై ఎలాంటి స్పష్టత లేదని స్పష్టమవుతోంది. మరోవైపు రాజధానికి భూములు ఇచ్చిన రైతుల గురించి ప్రభుత్వం పట్టించుకోనేలేదు. 
  
 సాగునీటిపై నిర్లక్ష్యం ...
 ఎన్నడూలేని రీతిలో కృష్ణా డెల్టాలో సాగునీరు లేక ఈ ఏడాది రైతులు పంటలు వేయకుండా భూములు విడిచిపెట్టేశారు. రైతుల పరిస్థితి ఇంత దైన్యంగా ఉన్నప్పటికీ రాష్ట్ర ప్రభుత్వం మనసు మాత్రం కరగలేదు. రాష్ట్ర బడ్జెట్‌లో అమరావతిలో సాగునీటి రంగానికి సరైన కేటాయింపులే చేయలేదు. కీలకమైన పులిచింతల ప్రాజెక్టు పూర్తికి ఆర్‌ అండ్‌ ఆర్‌ ప్యాకేజీ కింద కనీసం రూ.150 కోట్లు అవసరమని అంచనా. కానీ ప్రభుత్వం కేవలం రూ.43.41 కోట్లు మాత్రమే కేటాయించడం విస్మయపరిచింది. ఇక కృష్ణా డెల్టా ఆధునీకరణ మీద కూడా ప్రభుత్వం చిత్తశుద్ధి ప్రదర్శించలేదు. గత బడ్జెట్‌లో డెల్టా ఆధునీకరణ కోసం కేటాయించిన రూ.112.89 కోట్లను విడుదల చేయనేలేదు. ఈ బడ్జెట్‌లో మరోసారి అవే రూ.112.89కోట్లను కేటాయిస్తున్నట్లు చూపిస్తూ కనికట్టు చేసింది. అన్నదాతను ఆదుకునే ఉద్దేశమే లేనట్లుగా వ్యవహరించింది
 . 
 స్మార్ట్‌ ప్రగతి పరుగులేవీ..!
 విజయవాడ, గుంటూరులను స్మార్ట్‌సిటీలుగా అభివృద్ధి చేస్తామని ప్రభుత్వం గతంలో ఘనంగా ప్రకటించిం ది. కానీ నిధుల కేటాయింపు వచ్చేసరికి ప్లేటు ఫిరాయించింది. కేంద్రం గుర్తించిన విశాఖపట్నం, కాకినాడ, తిరుపతిలకు రూ.450 కోట్లు కేటాయించింది. కానీ రాష్ట్ర ప్రభుత్వం ప్రకటించిన విజయవాడతోపాటు 13 నగరాలకు కేవలం రూ.150 కోట్లు ఇస్తున్నట్లు మంత్రి యనమల ప్రకటించారు. అంటే సగటున రూ.11.50కోట్లు మాత్రమే ఇస్తారన్న మాట. ఈ నిధులతో మౌలిక సదుపాయాల కల్పన అసాధ్యమని అధికారులు పెదవి విరుస్తున్నారు. 
  
 మెట్రో మాయే..!
 విజయవాడకు మెట్రో రైలు గురించి రాష్ట్ర ప్రభుత్వం పట్టించుకోనేలేదు. డీపీఆర్‌సిద్ధమైందని చెబుతూ అది కేంద్ర ప్రభుత్వ వ్యవహారం అన్నట్లుగా మంత్రి యనమల చెప్పుకొచ్చారు. ఇక కొత్తగా విజయవాడ, అమరావతి, గుంటూరు, తెనాలి లను కలుపుతూ సరŠుక్యలర్‌ రైలు అంశాన్ని తెరపైకి తెచ్చారు. కానీ అది కేవలం ప్రతిపాదన దశలోనే ఉందని తేల్చేశారు. సర్వే కోసం కూడా నిధులు కేటాయించనే లేదు. 
  
 పరిశ్రమలపై చిన్నచూపు 
 రాజధానిలో ఉపాధి కల్పన దిశగా పారిశ్రామిక రంగానికి ప్రాధన్యమివ్వనే లేదు. అమరావతి పరిధిలో పరిశ్రమల ఏర్పాటుకు ఎలాంటి చర్యలు చేపడుతున్నారో స్పష్టం చేయలేదు. ఇక ఐటీ రంగంపై కూడా శీతకన్ను వేశారు. విశాఖపట్నం, అనంతపురం, చిత్తూరు జిల్లాల్లో ఇంక్యుబేషన్‌ సెంటర్లు, క్లస్టర్లు ఏర్పాటు చేస్తామని మంత్రి  తెలిపారు తప్ప అమరావతి గురించి ప్రస్తావించనే లేదు. పెద్ద నోట్ల రద్దుతో దెబ్బతిన్న రియల్‌ ఎస్టేట్, ఇతర రంగాలకు ఎలాంటి ప్రోత్సాహకాలు ప్రకటించలేదు.  
  
 రుణమాఫీ హామీ విషయంలో ప్రభుత్వం మరోసారి అన్నదాతను దొంగదెబ్బ తీసింది. బడ్జెట్‌లో కేటాయింపుల ప్రకారం జిల్లా రైతులకు ఈ ఏడాది రూ.300కోట్లు మాత్రమే విడుదలయ్యే అవకాశాలున్నాయి. వాస్తవానికి జిల్లాలో 4,44,972మంది రైతులకు రూ.1,519 కోట్లు రుణాన్నీ దశలవారీగా మాఫీ చేస్తామని ప్రభుత్వం 2014లో ప్రకటించింది. మొదటి విడతగా 2015–16లో రూ.577 కోట్లు, రెండో విడతగా 2016–17లో రూ.232.11కోట్లు మొత్తం మీద రూ.809కోట్లు దశలవారీగా ఇచ్చింది. దాతో వడ్డీలు పెరిగి రైతులపై రుణభారం పెరిగిపోయింది. ప్రభుత్వం ఇచ్చింది వడ్డీలకే సరిపోయింది. ఈ నేపథ్యంలో ఈ బడ్జెట్‌లో కూడా కేవలం రూ.300 కోట్లతో సరిపుచ్చడం అన్నదాతను నిరాశకు గురిచేసింది.