TV
సాక్షి, అమరావతి: ఏపీలోని పెట్టుబడుల ప్రోత్సాహక విధానం బాగుందని జపాన్‌ పారిశ్రామికవేత్తల బృందం కొనియాడింది. జపాన్‌ కాన్సుల్‌ జనరల్‌(చెన్నై) తగ మసయుకి నేతృత్వంలోని ఆ దేశ ఎక్స్‌టర్నల్‌ ట్రేడ్‌ ఆర్గనైజేషన్‌ ప్రతినిధుల బృందం సోమవారం రాష్ట్ర పరిశ్రమల శాఖ మంత్రి గుడివాడ అమర్‌నాథ్‌ను, ఏపీఐఐసీ ఉన్నతాధికారి సృజనను కలిసింది. ఈ సందర్భంగా మంత్రి అమర్‌నాథ్‌ రాష్ట్రంలో పెట్టుబడులకు ఉన్న అవకాశాలు, ప్రోత్సాహకానికి రాష్ట్ర ప్రభుత్వం చేపడుతున్న విధానాలను వివరించారు.
జపాన్‌కు చెందిన పలు దిగ్గజ కంపెనీలు ఇప్పటికే ఏపీలో భారీగా పెట్టుబడులు పెట్టాయని వివరించారు. ఇదే స్ఫూర్తితో మరిన్ని పెట్టుబడులు పెట్టాలని మంత్రి కోరారు. సమావేశంలో జపాన్‌కు చెందిన ఇసుజు, యూనిచార్మ్, కొబెల్కో, వన్‌స్టీల్‌ ప్లేట్, పియోలాక్స్, మియామా ఎలక్ట్రిక్, ఎంయూఎఫ్‌జీ బ్యాంక్‌ తదితర సంస్థల ప్రతినిధులు పాల్గొన్నారు.
సీఎస్‌తోనూ భేటీ..
జపాన్‌ కాన్సుల్‌ జనరల్‌(చెన్నై) తగ మసయుకి సోమవారం సచివాలయంలో రాష్ట్ర ప్రభుత్వ ప్రధాన కార్యదర్శి(సీఎస్‌) డాక్టర్‌ కేఎస్‌ జవహర్‌రెడ్డిని మర్యాదపూర్వకంగా కలిశారు. ఈ సందర్భంగా వారిద్దరూ ఏపీకి సంబంధించిన వివిధ అంశాలపై చర్చించారు. ఈ సమావేశంలో జపాన్‌ ప్రతినిధులు కూడా పాల్గొన్నారు.
Comments
Please login to add a commentAdd a comment