ఇంటిపేరు నిర్ణయించే అధికారం తల్లికే 

సాక్షి, అమరావతి: తండ్రి మరణానంతరం బిడ్డ సహజ సంరక్షకురాలు తల్లే కాబట్టి ఆ బిడ్డ ఇంటి పేరు నిర్ణయించే విషయంలో ఆమెకు సంపూర్ణ హక్కు ఉంటుందని సుప్రీంకోర్టు స్పష్టంచేసింది. రికార్డుల్లో ఆమె రెండో భర్త పేరును ‘సవతి తండ్రి’గా పేర్కొనాలంటూ ఏపీ హైకోర్టు ఓ మహిళ విషయంలో ఇచ్చిన ఉత్తర్వులను జస్టిస్‌ దినేశ్‌ మహేశ్వరి, కృష్ణ మురారిలతో కూడిన ధర్మాసనం కొట్టేవేసింది.

ఆమె రెండో భర్తను సవతి తండ్రిగా చేర్చాలని హైకోర్టు ఆదేశించడం క్రూరమైనది, అనాలోచితమైనదని వ్యాఖ్యానించింది. ఇది మానసికంగా ఆ బిడ్డపై ఎంతో ప్రభావం చూపుతుందని, అలాగే ఆత్మగౌరవానికి కూడా ఇబ్బంది కలిగిస్తుందని చెప్పింది. దత్తత ఇచ్చే విషయంలో కూడా తల్లికే పూర్తి హక్కు ఉందని తేల్చిచెప్పింది. ఇలాంటి కేసుల్లో ముందుగా పిల్లల ప్రయోజనాలనే పరిగణనలోకి తీసుకోవాలని ధర్మాసనం తెలిపింది.