బీడీఎంఏ టెక్నాలజీ సెంటర్‌

హెటిరో గ్రూప్‌ చైర్మన్‌ బి.పార్థ సారథి రెడ్డి నుంచి రూ.1 కోటి చెక్‌ను అందుకుంటున్న బీడీఎంఏ ప్రతినిధులు ఆర్‌.కె.అగ్రవాల్, సీహెచ్‌ ఏపీ రామేశ్వర రావు

హైదరాబాద్, బిజినెస్‌ బ్యూరో: బల్క్‌ డ్రగ్‌ మాన్యుఫ్యాక్చరర్స్‌ అసోసియేషన్‌ (బీడీఎంఏ) టెక్నాలజీ, ట్రైనింగ్‌ సెంటర్‌ను ఏర్పాటు చేస్తోంది. హైదరాబాద్‌ జీడిమెట్ల ఫార్మా క్లస్టర్‌లో 2023 ఏప్రిల్‌ నుంచి ఈ కేంద్రం కార్యరూపం దాల్చనుంది. టీఎస్‌ఐఐసీ ఒక ఎకరం స్థలాన్ని దీర్ఘకాలిక లీజు పద్ధతిన సమకూర్చింది. ఈ ఫెసిలిటీ కోసం హెటిరో గ్రూప్‌ రూ. కోటి ఆర్థిక సాయం అందించింది. ఇతర సంస్థలు సైతం ఆర్థిక సాయానికి ముందుకు వస్తాయని అసోసియేషన్‌ భావిస్తోంది.

ఔషధ రంగంలో పనిచేస్తున్న మానవ వనరులకు నైపుణ్యం పెంపొందించేందుకు ఈ సెంటర్‌లో శిక్షణ ఇస్తారు. అలాగే బీడీఎంఏ సభ్య కంపెనీలు నూతనంగా నియమించుకున్న ఉద్యోగులకు ఇక్కడ ట్రైనింగ్‌ కల్పిస్తారు. ఆధునిక పరిశోధన, పరీక్షలకు కేంద్ర స్థానంగా ఇది నిలుస్తుందని బీడీఎంఏ తెలిపింది. పరిశ్రమలకు ప్రాతినిధ్యం వహిస్తున్న సంఘం ఈ విధంగా సాంకేతిక, శిక్షణ కేంద్రం నెలకొల్పడం దేశంలో తొలిసారి అని పేర్కొంది. ఈ సదుపాయం ప్రపంచవ్యాప్తంగా ఫార్మా రంగంలో వస్తున్న నూతన పరిశోధనలు, ఆవిష్కరణలకు అనుగుణంగా ఎప్పటికప్పుడు సామర్థ్యం పెంచుకోవడానికి నాలెడ్జ్‌ సెంటర్‌గా కూడా పని చేస్తుందని అభిప్రాయపడింది.