ప్రియురాలి ఆత్మహత్యకు కారకుడైన వ్యక్తి కోసం గాలింపు

సాక్షి, బంజారాహిల్స్‌: అసలే పదహారేళ్ల అమ్మాయి... ఇంకా మైనార్టీ తీరలేదు... ఇంకో రెండేళ్లు ఆగితే దగ్గరుండి మేమే పెళ్లి చేస్తాం.. అంత వరకు ఓపిక ప­ట్టు.. మా అమ్మాయిని వేధించకు.. నీ కాళ్లు పట్టుకుంటాం.. మా జోలికి రావొద్దంటూ తండ్రితో పా­టు కుటుంబ సభ్యులు కాళ్లావేళ్లా పడ్డా వినిపించుకోలేదు ఆ మూర్ఖుడు. చుట్టుపక్కల వాళ్లు చూస్తున్నా... తండ్రి కాళ్లు పట్టుకుంటున్నా కనికరించలే­దు. ఇప్పటికిప్పుడు పెళ్లి చేయకపోతే మీ అంతు చూస్తానంటూ కుటుంబ సభ్యులతో పాటు మైనార్టీ తీరని ఆ బాలికను బెదిరించి వెళ్లిపోయిన ఘటనలో తన తండ్రిని చంపుతాడేమోనని భయపడి ఆత్మహత్య చేసుకుంది తూర్పు గోదావరి జిల్లా రౌతులపూడి గ్రామానికి చెందిన శ్యాంసన్‌ రెండో కూతురు కండ్రకోట దుర్గాభవానీ(16).

ఈ ఘటనలో నిందితుడైన అదే గ్రామానికి చెందిన ట్రాక్టర్‌ డ్రైవర్‌ కళ్యాణ్‌(30)పై బంజారాహిల్స్‌ పోలీసులు ఐపీసీ 306, 506 సెక్షన్ల కింద కేసు నమోదు చేసి ముమ్మరంగా గాలింపు చేపట్టారు. ప్రేమలో పడి వెంటపడి వేధిస్తుండటంతో భయపడ్డ దుర్గాభవానీ కళ్యాణ్‌తో పా­టు హైదరాబాద్‌కు చేరుకుంది. ఇక్కడికి వచ్చాక కూడా కళ్యాణ్‌ వేధింపులు ఆగలేదు. ఎప్పటికైనా కళ్యాణ్‌తో ముప్పేనని భావించి ఆత్మహత్యకు ఒడిగట్టింది. 

చదవండి: అకౌంట్స్‌ డీ–ఫ్రీజ్‌ కేసు: ఎట్టకేలకు అనిల్‌ చిక్కాడు!