TV
రాజమండ్రిలో సీన్‌ తీస్తే సూపర్‌ హిట్టే
ఆల్కాట్‌తోట (రాజమహేంద్రవరం రూరల్‌): తను హీరోగా నటించిన రాబిన్‌ హుడ్‌ చిత్రం అందరికీ నచ్చుతుందని హీరో నితిన్‌ అన్నారు. గతంలో వెంకీ కుడుముల దర్శకత్వంలో తను నటించిన భీష్మ మంచి విజయం సాధించిందని, ఆ సినిమాలో ఒక సన్నివేశం రాజమండ్రిలో చిత్రీకరించామని అది హిట్టని అన్నారు. ఆ సెంటిమెంటుతో రాబిన్‌ హుడ్‌ సినిమాలో ఒక సీన్‌ ఇక్కడ చిత్రీకరించామని, ఇది కూడా సూపర్‌ హిట్‌ అవుతుందన్న ఆశాభావం వ్యక్తం చేశారు. ఈ నెల 28 న విడుదల కానున్న ఈ చిత్రం ప్రమోషన్‌ కోసం రాజమండ్రి వచ్చిన చిత్ర బృందం శనివారం మధ్యాహ్నం మంజీరా హోటల్‌లో మీడియాతో మాట్లాడింది. నితిన్‌ మాట్లాడుతూ దర్శకుడు వెంకీ తొలి చిత్రం చలో నుంచి తనకు పరిచయం ఉందని తర్వాత తమ కాంబినేషన్‌లో వచ్చిన భీష్మ చిత్రం విజయం సాధించిందన్నారు. దర్శకుడు వెంకీ మాట్లాడుతూ ఇప్పటికే రాబిన్‌ హుడ్‌ టీజర్‌, సాంగ్స్‌కు మంచి స్పందన వస్తోందని సినిమా కూడా హిట్టవుతుందన్న నమ్మకం ఉందని చెప్పారు. శ్రీలీల ఈ చిత్రంలో మంచి పెర్ఫార్మెన్స్‌ ఇచ్చినట్టు వెంకీ తెలిపారు. శ్రీలీల మాట్లాడుతూ తనకు రాజమండ్రి కొత్తకాదని తమ గ్రాండ్‌ ఫాదర్‌ ధవళేశ్వరంలో ఉండేవారని చెప్పారు. ఈ సినిమాలో తన పాత్రను ప్రేక్షకులు చాలా ఎంజాయ్‌ చేస్తారని, పిల్లలతో కలిసి చూడాలని కోరారు.
Comments
Please login to add a commentAdd a comment