TV
బిగ్‌ బాస్‌ ఫేమ్‌ సయ్యద్‌ సోహైల్‌ హీరోగా శ్రీ కోనేటి తెరకెక్కించిన చిత్రం 'బూట్‌ కట్‌ బాలరాజు' ఓటీటలోకి వచ్చేందుకు రెడీగా ఉంది. ఫిబ్రవరి 2న రిలీజ్‌ అయిన ఈ చిత్రాన్ని గ్లోబల్ ఫిలిమ్స్ & కథ వేరుంటాది బ్యానర్స్‌పై సోహైల్‌ నిర్మించాడు. ఈ చిత్రంలో మేఘ లేఖ హీరోయిన్‌గా నటించగా.. సునీల్‌, సిరి హన్మంత్‌ తదితరులు కీలక పాత్రలలో కనిపించారు. వినోదాత్మకంగా సాగే ఓ ఆసక్తికర కథాంశంతో రూపొందిన ఈ చిత్రం ప్రేక్షకులను మాత్రం పెద్దగా మెప్పించలేదని చెప్పవచ్చు.
తాజాగా ఈ సినిమాకు సంబంధించిన ఒక వార్త నెట్టింట వైరల్ అవుతుంది. మార్చి 1 నుంచి ఈ మూవీ అమెజాన్ ప్రైమ్ వీడియోలో స్ట్రీమింగ్ కానున్న‌ట్లు తెలుస్తోంది. మరో రెండు రోజుల్లో అధికారికంగా ప్రకటన కూడా రావచ్చని ప్రచారం ఉంది. సినిమా విడుదల సమయంలో థియేట‌ర్లకు ప్రేక్షకులు పెద్దగా రాకపోవడంతో సోహైల్‌ ఎమోష‌న‌ల్ అయ్యాడు.. ఆ వీడియోలు సోష‌ల్ మీడియాలో వైరల్ కూడా అయ్యాయి. కానీ అప్పటికీ కూడా పెద్దగా ప్రేక్షకులు థియేటర్ల బాట పట్టలేదు. సినిమా కథ బాగున్నప్పటికీ కొత్త దనం లేకపోవడంతో సినిమా ఫెయిల్‌కు ప్రధాన కారణం అని చెప్పవచ్చు.
ఈ చిత్రంలో సోహైల్‌ కామెడీ మరో రేంజ్‌లో ఉంటుంది. పేద, ధ‌నిక అంత‌రాల‌తో కథ నడిపించిన తీరు బాగానే ఉన్న కమర్షియల్‌గా పెద్దగా మెప్పించలేదని చెప్పవచ్చు. థియేటర్‌లో చూడలేకపోయిన వారు ఓటీటీలో తప్పక చూడాల్సిన సినిమా అని చెబుతూ.. కనీసం ఇప్పుడైన 'బూట్‌ కట్‌ బాలరాజు'పై ఒక లుక్‌ వేయండయ్యా అంటూ ఆయన అభిమానులు కామెంట్లు చేస్తున్నారు. మార్చి 1న అమెజాన్ ప్రైమ్ ఓటీటీలోకి 'బూట్‌ కట్‌ బాలరాజు' వచ్చే అవకాశాలు చాలా ఎక్కువగానే ఉన్నాయి కాబట్టి అప్పుడు ఇంట్లోనే చూసేయండి. అధికారికంగా ప్రకటన రావాల్సి ఉంది.
