పోలీస్‌ స్టేషన్‌లో...

హీరోయిన్‌ కేథరిన్‌ ట్రెసా పోలీస్‌ స్టేషన్‌లో ఉన్నారు. ఆమె పోలీసాఫీసర్‌ కాదు.. ఖైదీ కూడా కాదు. మరి.. పోలీస్‌ స్టేషన్‌కి ఎందుకు వెళ్లారంటే.. ఓ సినిమా షూటింగ్‌లో భాగంగా. కేథరిన్‌ హీరోయిన్‌గా ‘జార్జిరెడ్డి, వంగవీటి’ చిత్రాల ఫేమ్‌ సందీప్‌ మాధవ్‌ హీరోగా ఓ చిత్రం రూపొందుతోంది. ఈ చిత్రంలో సందీప్‌ పవర్‌ఫుల్‌ పోలీస్‌ ఆఫీసర్‌ పాత్ర చేస్తున్నారు. కేథరిన్‌ క్యారెక్టర్‌ ఏంటనేది తెలియాల్సి ఉంది. అయితే ఎవరూ ఊహించని రీతిలో ఆమె పాత్రను డిజైన్‌ చేశారట చిత్రదర్శకుడు అశోక్‌ తేజ.

ఈ సినిమా కోసం వేసిన ప్రత్యేకమైన పోలీస్‌ స్టేషన్‌ సెట్‌లో సందీప్, కేథరిన్, ఇతర ప్రధాన తారాగణం పాల్గొనగా కీలక సన్నివేశాలు చిత్రీకరిస్తున్నారు. యాక్షన్‌ థ్రిల్లర్‌గా ఈ చిత్రాన్ని కేసీఆర్‌ ఫిలిమ్స్, శ్రీమహా విష్ణు మూవీస్‌ బ్యానర్‌లపై దావులూరి జగదీష్, పల్లి కేశవరావు నిర్మిస్తున్నారు. ‘‘స్క్రీన్‌ప్లే బేస్డ్‌æ చిత్రమిది. సరికొత్త యాక్షన్‌ థ్రిల్లర్‌గా ఈ చిత్రం కొత్త అనుభూతినిచ్చే విధంగా ఉంటుంది’’ అన్నారు నిర్మాతలు. ‘‘ఈ సినిమాలో ఎవరూ ఊహించని మలుపులు ఉంటాయి. ప్రతి సీన్‌ ఆసక్తికరంగా ఉంటుంది’’ అన్నారు దర్శకుడు.