చైన్నై సినిమా: 'కాక్కా ముట్టై', 'ఆండవన్‌ కట్టలై' వంటి విజయవంతమైన చిత్రాలను తెరకెక్కించిన దర్శక నిర్మాత మణికంఠన్‌. ఈయన నిర్మాతగా మారి కథ, కథనం, మాటలు, ఛాయాగ్రహణం, దర్శకత్వం వహిస్తూ రూపొందిన చిత్రం 'కడైసీ వ్యవసాయి'. నల్లాండి అనే 86 ఏళ్ల వృద్ధుడు ప్రధాన పాత్రలో నటించిన ఈ చిత్రంలో విజయ్‌ సేతుపతి, యోగిబాబు కీలకపాత్ర పోషించారు.  'కడైసీ వ్యవసాయి' చిత్రానికి సంతోష్‌ నారాయణన్‌, రిచర్డ్‌ హార్వీ సంగీతం అందించారు. ఈ సినిమాను ఫిబ్రవరి 11 తేదిన విడుదల చేస్తున్నట్లు యూనిట్‌ వర్గాలు వెల్లడించాయి. కాగా మణికంఠన్‌ విలేకరులతో మాట్లాడుతూ వ్యవసాయం, రైతులు, గ్రామీణ ప్రజల జీవన విధానాన్ని ఆవిష్కరించే చిత్రం ఇదని పేర్కొన్నారు.

తమిళసినిమా: మన హీరోయిన్లు ఆ ఊ అంటే విదేశాలకు చెక్కేస్తున్నారు. అదే మంటే అక్కడ కరాటే నేర్చుకుంటున్నాను. డాన్స్‌లో శిక్షణ పొందుతున్నాను అంటూ ట్విట్టర్, ఫేస్‌బుక్‌లలో కొన్ని ఫొటోలను పోస్ట్‌ చేస్తూ ఫ్రీ పబ్లిసిటీ పొందే ప్రయత్రం చేస్తున్నారు. ఆ మధ్య నటి తమన్నా, అమలాపాల్‌ లాంటి కొందరు ఇలానే చేశారు. తాజాగా నేనేం తక్కువా అన్నట్టు నటి క్యాథరిన్‌ ట్రెసా బయలుదేరింది. అవకాశం ఇవ్వాలే గానీ అందాలారబోతలో తన తడాకా చూపిస్తాననే ఈ బ్యూటీ ఇటీవల కలగప్పు–2 చిత్రంలో అలానే అందాలను సిల్వర్‌స్క్రీన్‌పై పరిచేసింది. అలా తమిళం, తెలుగు, మలయాళం భాషల్లో నటిస్తున్నా, అవకాశాలు అడపాదడపానే వస్తున్నాయి. ప్రస్తుతం తెలుగులో ఒక చిత్రం వరించింది. తమిళంలో విజయ్‌ హీరోగా నటించిన తెరి చిత్రం తెలుగులో రవితేజ హీరోగా రీమేక్‌ కానుంది. ఇందులో ఒక హీరోయిన్‌గా క్యాథరిన్‌ ట్రెసా నటించనుందట. అసలు విషయం ఏమిటంటే ప్రస్తుతం ఈ అమ్మడు అమెరికాలోని న్యూయార్క్‌ మహానగరంలో ఉందట. అక్కడ డాన్స్‌లో శిక్షణ పొందుతోంది. ఆ ఫొటోను ఇంటర్నెట్‌లో విడుదల చేసింది. దీని గురించి క్యాథరిన్‌ ట్రెసా తానిప్పుడు అమెరికాలో ఉన్నానని, అక్కడ న్యూయార్క్, బ్రాడ్‌వేలోని బాబింగ్‌ లాగింగ్‌ అనే డాన్స్‌ స్కూల్‌లో శిక్షణ పొందుతున్నట్లు పేర్కొంది. మిస్‌లీ అనే ప్రముఖ శిక్షకురాలు క్యాథరిన్‌ ట్రెసాకు డాన్స్‌లో శిక్షణ ఇస్తోందట. అక్కడ రెండు వారాల డాన్స్‌ శిక్షణను పూర్తి చేసుకుని ఇండియాకు తిరిగి రానుందట. ఈ శిక్షణతో ప్రత్యేక డాన్స్‌ మూమెంట్స్‌ను తాను ప్రదర్శించగలనని క్యాథరిన్‌ ట్రెసా అంటోంది.

తమిళనాడు ,టీ.నగర్‌: ఏసుక్రీస్తుపై అనుచిత వ్యాఖ్యలు చేసిన సంగీత దర్శకుడు ఇళయరాజాపై పోలీసు శాఖ చర్యలు తీసుకోవాలంటూ జిల్లా కలెక్టర్‌ ఉత్తర్వులు ఇచ్చారు. ఇటీవల జరిగిన ఒక సంగీత కార్యక్రమంలో మాట్లాడిన సంగీత దర్శకుడు ఇళయరాజా హఠాత్తుగా ఏసుక్రీస్తు పునరుత్థానం గురించి వ్యాఖ్యలు చేయడం సంచలనం కలిగించింది. ఏసుక్రీస్తు చనిపోయాడు, ఆ తరువాత తిరిగి లేచాడనే విశ్వాసం క్రైస్తవుల్లో ఉందని, అయితే అది వాస్తవం కాదంటూ పరిశోధనలు జరిపి యూట్యూబ్‌లో వేస్తున్నారంటూ ఒక డాక్యుమెంటరీని ప్రదర్శించారు. అంతేకాకుండా వాస్తవంగా మరణించి తిరిగి లేవడం రమణ మహర్షికే చెందిందని అన్నారు. ఈ వ్యాఖ్యలు క్రైస్తవుల్లో ఆగ్రహావేశాలు తెప్పించగా క్రైస్తవ సంఘాలు ఆందోళనలు జరిపాయి. ఇలా ఉండగా చెన్నై కమిషనర్‌ కార్యాలయంలో క్రైస్తవ సంఘాలు ఇళయరాజాపై ఫిర్యాదు చేశాయి. తాము ఏసుక్రీస్తు పునరుత్థానాన్ని విశ్వసిస్తున్నామని అన్నారు. అందువల్ల ఇళయరాజాపై కఠిన చర్యలు తీసుకోవాలని కోరారు. ఇలా ఉండగా న్యాయవాది దినేష్‌ చెన్నై పోలీసు కమిషనర్, కలెక్టర్, ప్రభుత్వ కార్యదర్శి, ఇళయరాజాలకు నోటీసులు పంపారు. దీంతో చెన్నై జిల్లా కలెక్టర్‌ పోలీసు కమిషనర్‌కు ఇళయరాజాపై చర్యలు తీసుకోవలసిందిగా సిఫార్సులు చేశారు.

తమిళసినిమా: హన్సిక కూడా రెడీ అయిపోతోంది అనగానే ప్రేమ, పెళ్లి లాంటి ఆలోచనలకు వెళ్లిపోతున్నారా? అయితే పప్పులో కాలేసినట్లే. ఈ ముంబై బ్యూటీ నోట ఇంకా పెళ్లి మాట రానే లేదులెండి. మరి దేనికి రెడీ అవుతోందనేగా మీ ఆసక్తి. థ్రిల్లర్‌ కథా చిత్రానికండి. నయనతార, అనుష్క, త్రిష బాటలో పయనించడానికి సిద్ధం అవుతోంది హన్సిక. అవును హన్సిక కూడా హీరోయిన్‌ ఓరియెంటెడ్‌ పాత్రలో నటించబోతోంది. ఈ అందగత్తె ఇప్పుటి వరకూ అభినయంతో కూడిన గ్లామరస్‌ పాత్రలోనే నటించి దక్షిణాది ప్రేక్షకులకు దగ్గరయ్యారు. అరణ్మణై–2 చిత్రంతో హర్రర్‌ పాత్రను కూడా రక్తి కట్టించారు. అయితే థ్రిల్లర్‌ కథా చిత్రాల్లో నటించలేదు. అదేవిధంగా హీరోయిన్‌ ఓరియెంటెడ్‌ చిత్రంలో కూడా ఇప్పటి వరకూ నటించలేదు. అలాంటిది ఇప్పుడా అవకాశం హన్సికను వరించింది. మసాలా పడం, భోగన్, రోమిమో జూలియట్‌ వంటి చిత్రాలకు అసోసియేట్‌ డైరెక్టర్‌గా పని చేసిన యూఆర్‌.జమీల్‌ మెగాఫోన్‌ పడుతున్న చిత్రంలో హన్సిక కథానాయకిగా సెంట్రిక్‌ పాత్రను పోషించడానికి రెడీ అవుతోంది. నిజం చెప్పాలంటే ఈ అమ్మడి చేతిలో ఒక్క చిత్రం కూడా లేదు. ఇలాంటి సమయంలో కథనంతా తన భుజస్కంధాలపై మోసుకెళ్లే చిత్రంలో నటించే అవకాశం రావడం విశేషమే. ఈ చిత్రం వివరాలను దర్శకుడు జమీల్‌ తెలుపుతూ హన్సికను దగ్గరుండి చూసిన తనకు ఈ చిత్ర కథ తయారు చేసుకున్నప్పుడు ఇందులో కథానాయకి పాత్రకు తనే కరెక్ట్‌గా నప్పుతుందనిపించిందన్నారు. కథ చెప్పగానే హన్సిక వెంటనే ఓకే చెప్పారని తెలిపారు. ఇది సస్పెన్స్‌ థ్రిల్లర్‌ కథా చిత్రంగా ఉంటుందని చెప్పారు. ఇప్పుటి వరకూ పోషించనటువంటి వైవిధ్యభరిత పాత్రలో హన్సికను ప్రేక్షకులు చూస్తారన్నారు. మహిళలు తమ కష్టాల నుంచి బయట పడడానికి ఏం చేస్తారన్నది ఈ చిత్ర ప్రధాన ఇతివృత్తం అని పేర్కొన్నారు. ఇంతకంటే ఎక్కువగా ఈ చిత్రంలో హన్సిక పాత్ర గురించి ప్రస్తుతానికి చెప్పలేనని, అయితే ఇందులో హన్సిక భారీ ఫైట్స్‌ను కూడా చేస్తారని, అవి చాలా థ్రిల్లింగ్‌గా ఉంటాయని అన్నారు. ప్రేమ, హాస్యం అంటూ జనరంజక అంశాలు చోటు చేసుకుంటాయని, జాయ్‌స్టార్‌ ఎంటర్‌ప్రైజస్‌ సంస్థ నిర్మించనున్న ఇంకా పేరు నిర్ణయించని ఈ చిత్రం జూలైలో సెట్‌ పైకి వెళ్లనుందని తెలిపారు. పూర్తి వివరాలను త్వరలోనే వెల్లడించనున్నట్లు జమీల్‌ చెప్పారు.

తమిళసినిమా: సూపర్‌స్టార్‌ రజనీకాంత్‌ తరువాత కోలీవుడ్‌లో ఆ స్థాయికి చేరుకున్న నటుడు జీవీ.ప్రకాశ్‌కుమార్‌నే. ఏమిటీ నమ్మశక్యంగా లేదా? అయితే రండి చూద్దాం. అప్పుడెప్పుడో నటుడు పార్థిబన్‌ ప్రధాన పాత్రలో అంబలి అనే 3డి చిత్రం రూపొందింది. రజనీకాంత్‌ ఈ మధ్య కోచ్చడయాన్‌ అనే 3డీ యానిమేషన్‌ చిత్రంలో నటించిన విషయం తెలిసిందే. అదే విధంగా తాజాగా ఆయన నటిస్తున్న 2.ఓ చిత్రం 3డీ ఫార్మెట్‌లోనే రూపొందుతోంది. రజనీకాంత్‌ మినహా కోలీవుడ్‌ మరే హీరో 3డీ చిత్రంలో నటించలేదు. అయితే తాజాగా యువ నటుడు, సంగీత దర్శకుడు జీవీ.ప్రకాశ్‌కుమార్‌ 3డీ చిత్రంలో నటించడానికి రెడీ అవుతున్నారు. ఈయన హీరోగా ఇంతకు ముందు త్రిష ఇల్లన్నా నయనతార చిత్రాన్ని తెరకెక్కించిన ఆధిక్‌ రవిచంద్రన్‌ ఆ తరువాత శింబు హీరోగా అన్భానవన్‌ అసరాదవన్‌ అడంగాదవన్‌ చిత్రానికి దర్శకత్వం వహించారు. ఆ చిత్రం ఫ్లాప్‌ అవడంతో ఆధిక్‌ రవిచంద్రన్‌ తదుపరి చిత్రం ఏమిటన్నది ప్రశ్నార్థకంగా మారింది. అలాంటి పరిస్థితుల్లో జీవీ ఆయనకు అవకాశం కల్పించారు. వీరి కాంబినేషన్‌లో 3డీ చిత్రం తెరకెక్కుతోందన్నది తాజా సమాచారం. ఇప్పటికే రెండు షెడ్యూల్స్‌ షూటింగ్‌ పూర్తి చేసుకున్న ఈ చిత్రంలో కథానాయకిగా నటి అమిరదస్తూర్‌ నటిస్తోంది. తాజాగా ఈ చిత్రంలో నటి సంజితాశెట్టి, సోనియా అగర్వాల్‌ వచ్చి చేరారు. 2.ఓ చిత్రానికి పనిచేసిన కొందరు సాంకేతిక నిపుణులు జీవీ చిత్రానికి పనిచేస్తున్నారట. తాజా షూటింగ్‌ చెన్నై, కారైక్కుడి ప్రాంతాల్లో నిర్వహించడానికి చిత్ర వర్గాలు రెడీ అవుతున్నారని సమాచారం.