పెళ్లి మండపంలోకి రాగానే వధువు గాలిలోకి కాల్పులు!

ల‌క్నో: దేశంలో కరోనా కల్లోలం కొనసాగుతోంది. ప్రతిరోజు వేలాదిగా కొత్త కేసులు నమోదవుతూనే ఉన్నాయి. ఈ క్రమంలో  అనేక రాష్ట్రాలు కోవిడ్​ కట్టడికి లాక్​డౌన్‌ను విధించిన సంగతి తెలిసిందే. అంతేకాదు, కరోనా నిబంధనలు పకడ్బందీగా అమలయ్యేలా ఆయా ప్రభుత్వాలు చర్యలు తీసుకుంటున్నాయి.

అయితే కల్యాణమొచ్చినా, కక్కొచ్చినా ఆగదన్నట్లు లాక్‌డౌన్‌లో పెళ్లిళ్లు సహా ఇతరత్రా వేడుకలు జరుగుతూనే ఉన్నాయి. కాకపోతే ఈ వేడుకలు అతి కొద్దిమంది సమక్షంలోనే జరుగుతున్నాయి. అయితే, తాజాగా ఉత్తర ప్రదేశ్​లో జరిగిన ఒక పెళ్లిలో కరోనా నిబంధనలను అతిక్రమించడమే కాకుండా, మండపంలో వధువు రివాల్వర్​ను పైకెత్తి ఆకాశంలో కాల్పులు జరిపింది. దీనికి సంబంధించిన వీడియో  ఇప్పుడు సోషల్​ మీడియాలో వైరల్​గా మారింది.  

పూర్తి వివరాల్లోకి వెళితే.. యూపీలోని జేత్వారాలో జరిగిన ఒక వివాహ వేడుకలో వధువు  రూపా పాండె, వరుడితో కలసి పెళ్లి మండపానికి చేరుకుంది. ఈ క్రమంలో ఆమె, తన మేనమామ రామ్నివాస్​ పాండె రివాల్వర్​ను తీసుకుంది. వివాహ వేదికపైకి ఎక్కుతున్న క్రమంలో ఒక్కసారిగా గాలిలో కాల్పులు జరిపింది. ఆ తర్వాత రివాల్వర్​ను తన మామకు అప్పగించింది. అయితే, ఆ రివాల్వర్​కు లైసెన్స్ ఉన్నట్లు తెలుస్తోంది. కాగా, ఈ వీడియో యూపీ పోలీసుల కంట పడటంతో పెళ్లి కూతురిని, ఆమె మేనమామ రామ్నివాస్‌లను అదుపులోకి తీసుకుని వారిపై కేసు నమోదు చేశారు. అతని రివాల్వర్​ లైసెన్స్​ కూడా రద్దు చేయనున్నట్లు  ప్రకటించారు.

ఉత్తర ప్రదేశ్ ప్రభుత్వ మార్గదర్శకాల ప్రకారం వివాహా వేడుకకు కేవలం 25 మందికి మాత్రమే అనుమతి ఉంది. కానీ అక్కడ అంతకన్నా ఎక్కువ మంది జనం హాజరయ్యారు. దీంతో వీరందరిపై అంటు వ్యాధులు నిరోధక ​ చట్టం కింద కేసులను నమోదు చేస్తామని పోలీసు అధికారులు తెలిపారు.  

చదవండి: గాలిలో ఎగిరిన ఐఫోన్​.. వైరల్​ వీడియో