లోక్‌ అదాలత్‌లో..6,677 కేసుల పరిష్కారం

లోక్‌ అదాలత్‌లో..6,677 కేసుల పరిష్కారం

విజయనగరం లీగల్‌: ఉమ్మడి విజయనగరం జిల్లాలోని విజయనగరం, పార్వతీపురం, బొబ్బిలి, సాలూరు, శృంగవరపుకోట, చీపురుపల్లి, గజపతినగరం, కొత్తవలస, కురుపాం కోర్టులలో శనివారం నిర్వహించిన జాతీయ లోక్‌ అదాలత్‌లలో 6,677 కేసులు పరిష్కరించినట్టు జిల్లా న్యాయ సేవాధికార సంస్థ చైర్మన్‌, జిల్లా ప్రధాన న్యాయమూర్తి బి.సాయికళ్యాణ్‌ చక్రవర్తి తెలిపారు. రాజీయే రాజమార్గమని తెలిపారు. మోటారు ప్రమాద బీమా క్‌లైమ్‌లకు సంబంధించిన కేసులో రూ.70 లక్షల పరిహారాన్ని అందజేసినట్టు వెల్లడించారు. సుమారు రూ.35 కోట్ల ఆస్తులకు సంబంధించిన (విలువైన) కేసులు పరిష్కారమయ్యాయన్నారు. 10,500 మంది కక్షిదారులు ప్రయోజనం పొందినట్టు తెలిపారు. లోక్‌ అదాలత్‌లలో వివిధ కోర్టుల న్యాయమూర్తులు, జడ్జిలు బి.అప్పలస్వామి, ఎన్‌.పద్మావతి, కె.నాగమణి, టి.వి.రాజేష్‌కుమార్‌, బీహెచ్‌వీ లక్ష్మీకుమారి, ఎల్‌.దేవీరత్నకుమారి, బి.రమ్య, పి.బుజ్జి, ఎమ్‌.శ్రీనివాసరావు, బార్‌ అసోసియేషన్‌ ప్రెసిడెంట్‌ ఎ.హరీష్‌ తదితరులు పాల్గొన్నారు.

రాజీతోనే కేసుల పరిష్కారం

పార్వతీపురం టౌన్‌: రాజీతోనే ఎక్కువ శాతం కేసులు పరిష్కారం అవుతాయని రెండవ అదనపు జిల్లా జడ్జి ఎస్‌.దామోదరరావు అన్నారు. స్థానిక జిల్లా కోర్టుల సముదాయంలో శనివారం ఏర్పాటు చేసిన మెగా లోక్‌ అదాలత్‌తో ఆయన పాల్గొన్నారు. ఈ సందర్భంగా ఆయన మాట్లాడుతూ కేసులు పరిష్కారానికి ఇరువర్గాల సభ్యుల రాజీ ఎంతో అవసరమని తెలిపారు. వివాదాలు ఒకసారి ప్రారంభం అయితే జీవితాంతం కొనసాగుతాయని, వాటిని సత్వరమే పరిష్కరించే విధంగా చర్యలు తీసుకోవాలని కక్షిదారులకు విజ్ఞప్తి చేశారు. సంవత్సరాల తరబడి కేసుల వెంట వెళ్లేకన్నా రాజీ మార్గాన్ని ఎంచుకోవాలని సూచించారు. న్యాయ స్థానాల్లో పెండింగ్‌లో వున్న కేసుల సంఖ్యను తగ్గించుకోవడానికి, వ్యాజ్యాలకు ముందు దశలోనే వివాదాలను పరిష్కరించడానికి న్యాయస్థానాలు లోక్‌ అదాలత్‌ను తీసుకువచ్చాయన్నారు. కార్యక్రమంలో అదనపు జ్యుడిషియల్‌ ఫస్ట్‌క్లాస్‌ మెజిస్ట్రేట్‌ సౌమ్య జోిస్పిన్‌, బార్‌ అసోసియేషన్‌ ప్రెసిడెంట్‌ ఎన్‌ఎస్‌ రావు, అదనపు పీపీ చంద్రకుమార్‌, న్యాయవాదులు, కక్షిదారులు పాల్గొన్నారు.

1/2

లోక్‌ అదాలత్‌లో..6,677 కేసుల పరిష్కారం

2/2

లోక్‌ అదాలత్‌లో..6,677 కేసుల పరిష్కారం