FIFA World Cup 2022: జ‌పాన్‌కు షాకిచ్చిన కోస్టారికా 

ఫిఫా వరల్డ్‌కప్‌-2022లో భాగంగా భారతకాలమానం ప్రకారం ఇవాళ (నవంబర్‌ 27) మధ్యాహ్నం 3:30 గంటలకు అహ్మద్‌ అలీ బిన్‌ స్టేడియం వేదికగా జరిగిన గ్రూప్‌-ఈ మ్యాచ్‌లో ప్రపంచ 24వ ర్యాంకర్‌ జపాన్‌, 31 ర్యాంకర్‌ కోస్టారికా జట్లు తలపడ్డాయి. హోరాహోరీగా సాగిన ఈ మ్యాచ్‌లో కోస్టారికా.. తమ కంటే పటిష్టమైన జపాన్‌కు షాకిచ్చి (1-0) వరల్డ్‌కప్‌-2022లో బోణీ విజయం సాధించింది.

రెండో అర్ధభాగం 81వ నిమిషంలో కీషర్‌ ఫుల్లర్‌ గోల్‌ కొట్టి కోస్టారికాను ఆధిక్యంలోకి తీసుకుకెళ్లాడు. అనంతరం జపాన్‌ ఎంత ప్రయత్నించినప్పటికీ.. గోల్‌ చేయలేక ఓటమిపాలైంది. ఈ గెలుపుతో కోస్టారికా గ్రూప్‌-ఈలో మూడో స్థానానికి ఎగబాకింది. 

ఇదిలా ఉంటే, మెగా టోర్నీలో నవంబర్‌ 23న జరిగిన మ్యాచ్‌లో జపాన్‌.. నాలుగు సార్లు ప్రపంచ ఛాంపియన్‌ జర్మనీపై 2-1 తేడాతో గెలుపొంది సంచలనం సృష్టించిన విషయం తెలిసిందే. అదే రోజు స్పెయిన్‌తో జరిగిన మ్యాచ్‌లో కోస్టారికా 0-7 గోల్స్‌ తేడాతో ఓటమిపాలై దారుణ పరాజయాన్ని మూటగట్టుకుంది.