IPL 2024: సన్‌రైజర్స్‌ చేతిలో చిత్తైన ముంబై ఇండియన్స్‌

IPL 2024 SRH VS MI Match Highlights And Updates: 

బ్యాటర్ల ఊచకోత.. ముంబైను చిత్తు చేసిన సన్‌రైజర్స్‌

ఐపీఎల్‌ 2024లో భాగంగా ముంబై ఇండియన్స్‌తో ఇవాళ (మార్చి 27) జరిగిన మ్యాచ్‌లో సన్‌రైజర్స్‌ బ్యాటర్లు వీరంగం సృష్టించారు. ఫలితంగా ఆరెంజ్‌ ఆర్మీ 31 పరుగుల తేడాతో ముంబైను చిత్తు చేయడంతో పాటు లీగ్‌ చరిత్రలోనే అ‍త్యధిక టీమ్‌ స్కోర్‌ నమోదు చేసింది. 

ఈ మ్యాచ్‌లో టాస్‌ ఓడి ముంబై ఆహ్వానం మేరకు తొలుత బ్యాటింగ్‌ చేసిన సన్‌రైజర్స్‌.. ట్రవిస్‌ హెడ్‌ (24 బంతుల్లో 62; 9 ఫోర్లు, 3 సిక్సర్లు), అభిషేక్‌ శర్మ (23 బంతుల్లో 63; 3 ఫోర్లు, 7 సిక్సర్లు), హెన్రిచ్‌ క్లాసెన్‌ (34 బంతుల్లో 80 నాటౌట్‌; 4 ఫోర్లు, 7 సిక్సర్లు) మెరుపు అర్దశతకాలతో విరుచుకుపడటంతో నిర్ణీత ఓవర్లలో 3 వికెట్ల నష్టానికి 277 పరుగులు చేసింది. 

ఛేదనలో ముంబై 12 ఓవర్ల వరకు సన్‌రైజర్స్‌ ధీటుగా బదులిచ్చింది. అయితే ఆ తర్వాత స్కోర్‌ నెమ్మదించడంతో ముంబై  ఓటమి ఖరారైంది. ఇషాన్‌ కిషన్‌ (13 బంతుల్లో 34; 2 ఫోర్లు, 4 సిక్సర్లు), రోహిత్‌ శర్మ (12 బంతుల్లో 26; ఫోర్‌, 2 సిక్సర్లు), నమన్‌ ధిర్‌ (14 బంతుల్లో 30; 2 ఫోర్లు, 2 సిక్సర్లు), తిలక్‌ వర్మ (34 బంతుల్లో 64; 2 ఫోర్లు, 6 సిక్సర్లు), టిమ్‌ డేవిడ్‌ (22 బంతుల్లో 42 నాటౌట్‌; 2 ఫోర్లు, 3 సిక్సర్లు), హార్దిక్‌ పాండ్యా (20 బంతుల్లో 24; ఫోర్‌, సిక్స్‌), రొమారియో షెపర్డ్‌ (6 బంతుల్లో 12 నాటౌట్‌; 2 ఫోర్లు, సిక్స్‌) సన్‌రైజర్స్‌ శిబిరంలో కలకలం సృష్టించారు. ముంబై నిర్ణీత ఓవర్లలో 5 వికెట్ల నష్టానికి 246 పరుగులు చేసి లక్ష్యానికి 32 పరుగుల దూరంలో నిలిచిపోయి ఓటమిపాలైంది.

ముంబై గెలుపుకు 30 బంతుల్లో 93 పరుగులు అవసరం
ఈ మ్యాచ్‌లో ముంబై గెలవాలంటే 30 బంతుల్లో 93 పరుగులు చేయాల్సి ఉంది. హార్దిక్‌ పాండ్యా (20), టిమ్‌ డేవిడ్‌ క్రీజ్‌లో ఉన్నారు. 15 ఓవర్‌ తొలి బంతికే కమిన్స్‌ తిలక్‌ వర్మ (64) ఔట్‌ చేశాడు. 15 ఓవర్ల తర్వాత ముంబై స్కోర్‌ 185/గా ఉంది. 

రఫ్ఫాడిస్తున్న తిలక్‌.. 10 ఓవర్లలో ముంబై స్కోర్‌ 141/2
తిలక్‌ వర్మ ఆకాశమే హద్దుగా చెలరేగిపోతున్నాడు. షాబాజ్‌ అహ్మద్‌ వేసిన ఇన్నింగ్స్‌ 10వ ఓవర్‌లో తిలక్‌ 3 సిక్సర్లు బాది 22 పరుగులు పిండుకున్నాడు. తిలక్‌ 24 బంతుల్లో 2 ఫోర్లు, 5 సిక్సర్ల సాయంతో హాఫ్‌ సెంచరీ పూర్తి చేసుకున్నాడు. 10.2 ఓవర్ల తర్వాత ముంబై స్కోర్‌ 146/2గా ఉంది. తిలక్‌తో (52) పాటు నమన్‌ ధిర్‌ (26) క్రీజ్‌లో ఉన్నాడు. 

7.3 ఓవర్లలోనే 100 పరుగులు పూర్తి చేసిన ముంబై ఇండియన్స్‌
భారీ లక్ష్యఛేదనలో సన్‌రైజర్స్‌కు ధీటుగా ముంబై ఇండియన్స్‌ బదులిస్తుంది. ముంబై 7.3 ఓవర్లలనే 100 పరుగుల మార్కును తాకింది. ఇషాన్‌ కిషన్‌ (34), రోహిత్‌ శర్మ (26) ఉతికి ఆరేసి ఔట్‌ కాగా.. నమన్‌ ధిర్‌ (16), తిలక్‌ వర్మ (19) క్రీజ్‌లో ఉన్నారు. 8 ఓవర్ల తర్వాత ముంబై స్కోర్‌ 102/గా ఉంది.

టార్గెట్‌ 278.. ధీటుగా బదులిస్తున్న ముంబై
278 పరుగుల భారీ లక్ష్య ఛేదనలో ముంబై ఇండియన్స్‌ ధీటుగా బదులిస్తుంది. ఆ  జట్టు 5 ఓవర్ల అనంతరం 2 వికెట్లు కోల్పోయి 67 పరుగులు చేసింది. ఇషాన్‌ కిషన్‌ (34), రోహిత్‌ శర్మ (26) ఉతికి ఆరేసి ఔట్‌ కాగా.. నమన్‌ ధిర్‌ (2), తిలక్‌ వర్మ (1) క్రీజ్‌లో ఉన్నారు. 

సన్‌రైజర్స్‌ బ్యాటర్ల వీరంగం.. ఐపీఎల్ చరిత్రలో అత్యధిక స్కోర్‌ నమోదు
ముంబై ఇండియన్స్‌తో ఇవాళ జరుగుతున్న మ్యాచ్‌లో సన్‌రైజర్స్‌  బ్యాటర్లు వీరంగం సృష్టించడంతో ఐపీఎల్‌ చరిత్రలో అ‍త్యధిక టీమ్‌ స్కోర్‌ నమోదైంది. ఈ మ్యాచ్‌లో ముగ్గురు ఎస్‌ఆర్‌హెచ్‌ బ్యాటర్లు సుడిగాలి అర్దశతకాలు బాదారు. ట్రవిస్‌ హెడ్‌ 24 బంతుల్లో 62, అభిషేక్‌ శర్మ 23 బంతుల్లో 63, హెన్రిచ్‌ క్లాసెన్‌ 34 బంతుల్లో 80 పరుగులు (నాటౌట్‌) చేశారు. మార్క్రమ్‌ సైతం తానేమీ తక్కువ కాదని 28 బంతుల్లో 42 పరుగులు చేసి అజేయంగా నిలిచాడు. ఫలితంగా సన్‌రైజర్స్‌ నిర్ణీత ఓవర్లలో 3 వికెట్ల నష్టానికి 277 పరుగులు చేసింది. 

23 బంతుల్లో హాఫ్‌ సెంచరీ పూర్తి చేసిన క్లాసెన్‌
హెన్రిచ్‌ క్లాసెన్‌ కేవలం 23 బంతుల్లో బౌండరీ, 5 సిక్సర్ల సాయంతో హాఫ్‌ సెంచరీ పూర్తి చేశాడు. 18 ఓవర్ల తర్వాత సన్‌రైజర్స్‌ స్కోర్‌ 243/3గా ఉంది. క్లాసెన్‌తో పాటు మార్క్రమ్‌ (40) క్రీజ్‌లో ఉన్నాడు. 

14.4 ఓవర్లలోనే 200 పరుగులు పూర్తి చేసిన సన్‌రైజర్స్‌
సన్‌రైజర్స్‌ కేవలం 14.4 ఓవర్లలోనే 200 పరుగుల మార్కును తాకింది. మార్క్రమ్‌ (31), క్లాసెన్‌ (26) క్రీజ్‌లో ఉన్నారు.

12 ఓవర్లలోనే 173 పరుగులు చేసిన సన్‌రైజర్స్‌
11వ ఓవర్‌ ఆఖరి బంతికి అభిషేక్‌ శర్మ (23 బంతుల్లో 63; 3 ఫోర్లు, 7 సిక్సర్లు) ఔటయ్యాడు. పియూశ్‌ చావ్లా బౌలింగ్‌లో నమన్‌ ధిర్‌కు క్యాచ్‌ ఇచ్చి అభిషేక్‌ ఔటయ్యాడు. 12 ఓవర్ల తర్వాత సన్‌రైజర్స్‌ స్కోర్‌ 173/3గా ఉంది. మార్క్రమ్‌ (21), క్లాసెన్‌ (8) క్రీజ్‌లో ఉన్నారు.

16 బంతుల్లోనే హాఫ్‌ సెంచరీ పూర్తి చేసిన అభిషేక్‌
అభిషేక్‌ శర్మ కేవలం 16 బంతుల్లోనే హాఫ్‌ సెంచరీ పూర్తి చేశాడు. ఇందులో 2 ఫోర్లు, 6 సిక్సర్లు ఉన్నాయి. సన్‌రైజర్స్‌ 10 ఓవర్లలో 2 వికెట్ల నష్టానికి 148 పరుగులు చేసింది. అభిషేక్‌ (54), మార్క్రమ్‌ (13) క్రీజ్‌లో ఉన్నారు.

హాఫ్‌ సెంచరీ అనంతరం ఔటైన హెడ్‌..
పెను విధ్వంసం సృష్టించిన అనంతరం హెడ్‌ (24 బంతుల్లో 62;  9 ఫోర్లు, 3 సిక్సర్లు) కొయెట్జీ బౌలింగ్‌లో హార్దిక్‌కు క్యాచ్‌ ఇచ్చి ఔటయ్యాడు. 8 ఓవర్ల తర్వాత సన్‌రైజర్స్‌ స్కోర్‌ 117/2గా ఉంది. అభిషేక్‌ (32), మార్క్రమ్‌ (4) క్రీజ్‌లో ఉన్నాడు. పవర్‌ ప్లేలో (81/1) సన్‌రైజర్స్‌కు ఇదే అత్యధిక స్కోర్‌.

7 ఓవర్లలోనే 100 పరుగులు పూర్తి చేసిన సన్‌రైజర్స్‌
సన్‌రైజర్స్‌ ఆటగాళ్లు శివాలెత్తిపోతున్నారు. ముఖ్యంగా ట్రవిస్‌ హెడ్‌ (22 బంతుల్లో 62 నాటౌట్‌; 9 ఫోర్లు, 3 సిక్సర్లు) ఆకాశమే హద్దుగా చెలరేగిపోతున్నాడు. హెడ్‌ కేవలం 18 బంతుల్లోనే హాఫ్‌ సెంచరీ పూర్తి చేశాడు. ఇన్నింగ్స్‌ ఏడో ఓవర్‌లో అభిషేక్‌ శర్మ సైతం చెలరేగిపోయాడు. పియూశ్‌ చావ్లా వేసిన ఆ ఓవర్లో అభిషేక్‌ మూడు సిక్సర్లు బాదాడు. 

తొలి బంతికే వికెట్‌ తీసిన హార్దిక్‌
4.1 ఓవర్‌: హార్దిక్‌ పాండ్యా తన స్పెల్‌ తొలి బంతికే వికెట్‌ తీశాడు. టిమ్‌ డేవిడ్‌కు క్యాచ్‌ ఇచ్చి మయాంక్‌ అగర్వాల్‌ (11) ఔటయ్యాడు. 

వీరంగం సృష్టిస్తున్న ట్రవిస్‌ హెడ్‌
సన్‌రైజర్స్‌ ఓపెనర్‌ ట్రవిస్‌ హెడ్‌ వీరంగం సృష్టిస్తున్నాడు. కేవలం 10 బంతుల్లోనే 4 ఫోర్లు, 2 సిక్సర్ల సాయంతో 31 పరుగులు చేశాడు. యువ పేసర్‌ మపాకా వేసిన మూడో ఓవర్‌లోనే హెడ్‌ శివాలెత్తిపోయాడు. ఈ ఓవర్‌లో హెడ్‌ వరుసగా రెండు సిక్సర్లు, రెండు ఫోర్లు బాది 22 పరుగులు పిండుకున్నాడు. 4 ఓవర్ల తర్వాత సన్‌రైజర్స్‌ వికెట్‌ నష్టపోకుండా 45 పరుగులు చేసింది. హెడ్‌ (32),మయాంక్‌ అగర్వాల్‌ (11) క్రీజ్‌లో ఉన్నారు.

ఐపీఎల్‌ 2024లో భాగంగా ఇవాళ (మార్చి 27) సన్‌రైజర్స్‌ హైదరాబాద్‌, ముంబై ఇండియన్స్‌ జట్లు తలపడుతున్నాయి. హైదరాబాద్‌ వేదికగా జరుగనున్న ఈ మ్యాచ్‌ రాత్రి 7:30య గంటలకు ప్రారంభమవుతుంది. ఈ మ్యాచ్‌లో ముంబై కెప్టెన్‌ హార్దిక్‌ టాస్‌ గెలిచి బౌలింగ్‌ ఎంచుకున్నాడు. 

ఈ సీజన్‌లో ఇరు జట్లు తమతమ తొలి మ్యాచ్‌ల్లో ఓటమిపాలై బోణీ గెలుపు కోసం ఎదురు చూస్తున్నాయి. సన్‌రైజర్స్‌ తమ తొలి మ్యాచ్‌లో కేకేఆర్‌ చేతిలో ఓటమిపాలు కాగా.. ముంబై ఇండియన్స్‌ గుజరాత్‌ టైటాన్స్‌ చేతిలో పరాజయంపాలైంది.

తొలి మ్యాచ్‌లో దెబ్బతిన్న ఇరు జట్లు బలాబలాల విషయంలో సమతూకంగా ఉండటంతో నేటి మ్యాచ్‌ రసవత్తరంగా సాగే అవకాశం ఉంది. ఈ మ్యాచ్‌ ముంబై ఇండియన్స్‌ మాజీ సారధి రోహిత్‌ శర్మకు ఆ జట్టు తరఫున 200వ మ్యాచ్‌ కావడం విశేషం. 

సన్‌రైజర్స్ హైదరాబాద్: ట్రవిస్ హెడ్, మయాంక్ అగర్వాల్, అభిషేక్ శర్మ, ఎయిడెన్ మార్క్రమ్, హెన్రిచ్ క్లాసెన్(వికెట్‌కీపర్‌), అబ్దుల్ సమద్, షాబాజ్ అహ్మద్, పాట్ కమిన్స్(కెప్టెన్‌), భువనేశ్వర్ కుమార్, మయాంక్ మార్కండే, జయదేవ్ ఉనద్కత్

ముంబై ఇండియన్స్: ఇషాన్ కిషన్(వికెట్‌కీపర్‌), రోహిత్ శర్మ, నమన్ ధీర్, తిలక్ వర్మ, హార్దిక్ పాండ్యా(కెప్టెన్‌), టిమ్ డేవిడ్, గెరాల్డ్ కోయెట్జీ, షమ్స్ ములానీ, పీయూష్ చావ్లా, జస్ప్రీత్ బుమ్రా, క్వేన మపాకా

ముంబై ఇండియన్స్ సబ్స్: డెవాల్డ్ బ్రెవిస్, రొమారియో షెపర్డ్, మొహమ్మద్ నబీ, విష్ణు వినోద్, నేహాల్ వధేరా

సన్‌రైజర్స్ హైదరాబాద్ సబ్‌లు: నితీష్ రెడ్డి, వాషింగ్టన్ సుందర్, ఉమ్రాన్ మాలిక్, గ్లెన్ ఫిలిప్స్, ఉపేంద్ర యాదవ్