జైలులో శానిటరీ నాప్కిన్‌ తయారీ యూనిట్‌

జైలులో శానిటరీ నాప్కిన్‌ తయారీ యూనిట్‌

ఆరిలోవ: విశాఖ కేంద్ర కారాగారంలో మహిళా ఖైదీల కోసం శానిటరీ నాప్కిన్‌ తయారీ యూనిట్‌ అందుబాటులోకి వచ్చింది. దీన్ని ఆర్ట్‌ ఆఫ్‌ లివింగ్‌ ఫౌండేషన్‌ సహకారంతో ఏర్పాటు చేశారు. ఈ యూనిట్‌ను బుధవారం జైలు సూపరింటెండెంట్‌ ఎం.మహేష్‌ బాబు ప్రారంభించారు. ఈ సందర్భంగా ఆయన మాట్లాడుతూ దీన్ని మహిళా ఖైదీల బ్లాక్‌ వద్ద ఏర్పాటు చేశామన్నారు. మహిళా ఖైదీల ఆరోగ్యం, పరిశుభ్రతను దృష్టిలో పెట్టుకుని దీని ఏర్పాటుకు ఆర్ట్‌ ఆఫ్‌ లివింగ్‌ సంస్థ ముందుకు రావడం అభినందనీయమన్నారు. ఈ యూనిట్‌లో మహిళా ఖైదీలే పనిచేస్తారని, వారికి ఈ యూనిట్‌ ఆర్థికంగా కూడా సహాయపడుతుందన్నారు. ఇక్కడ తయారైన నాప్కిన్లను భవిష్యత్‌లో రాష్ట్రంలో ఇతర జైళ్లకు సరఫరా చేసే చర్యలు చేపడతామన్నారు. డిప్యూటీ సూపరింటెండెంట్లు సాయి ప్రవీణ్‌, సూర్యకుమార్‌, జవహర్‌బాబు, జైలర్లు, ఆర్ట్‌ ఆఫ్‌ లివింగ్‌ ప్రతినిధులు పాల్గొన్నారు.