ఈ వేతనాలు ‘గౌరవ’ప్రదమేనా?

 అమలాపురం :ప్రభుత్వ అభివృద్ధి కార్యక్రమాల ప్రారంభోత్సవాలు, శంకుస్థాపనల వంటి కార్యక్రమాలు, సమీక్షా సమావేశాలు, అవగాహన సదస్సుల నిర్వహణలో తమకు పెద్దపీట వేస్తున్న ప్రభుత్వం.. గౌరవవేతనాల విషయంలో చిన్నచూపు చూస్తోందని స్థానిక సంస్థల ప్రజాప్రతినిధులు వాపోతున్నారు. గౌరవ వేతనం పేరుతో అగౌరవ పరుస్తున్నారని, ఆ మొత్తాన్ని పెంచాలని కొన్ని ఏళ్లుగా డిమాండ్ చేస్తున్నా పట్టించుకోవడం లేదని నిరసిస్తున్నారు. ఉమ్మడి రాష్ట్రంగా ఉన్నప్పటి నుంచే స్థానిక సంస్థల ప్రజాప్రతినిధుల జీతాలు పెంచాలే డిమాండ్ బలంగా ఉంది. విభజనకు ముందు మూడేళ్లపాటు స్థానిక సంస్థలకు ఎన్నికలు లేకపోవడంతో ఈ విషయం తాత్కాలికంగా మరుగునపడింది.
 
 అయితే గత ఏడాది సాధారణ ఎన్నికలకు ముందు స్థానిక సంస్థల ఎన్నికలు జరిగారుు. రెండు రాష్ట్రాల్లో కొత్త ప్రభుత్వాలు ఏర్పడిన తరువాత స్థానిక సంస్థలు కొలువుదీరాయి. అప్పటి నుంచి గౌరవ వేతనం పెంచాలన్న డిమాండ్ తిరిగి ఊపందుకుంది. ఇప్పుడిస్తున్న వేతనాలు చెప్పుకోవడానికి కూడా ఇబ్బందిగా ఉందని, గౌరవ వేతాలు పెంచాలని స్థానిక ప్రతినిధులు పట్టుబడుతున్నారు. లక్షలాది రూపాయల జీతాలు తీసుకుంటున్న శాసనసభ్యులు తమ జీతాల పెంపువిషయాన్ని పట్టించుకోవడం లేదని స్థానిక ప్రతినిధులు బహిరంగంగానే విమర్శించేవారు. ఎట్టకేలకు తెలంగాణ  ప్రభుత్వం స్పందించి గౌరవ వేతనాలు భారీగా పెంచింది. దీనితో మన రాష్ట్రంలో కూడా గౌరవ వేతనాలు పెంచాలనే డిమాండ్ మరింత ఊపందుకోనుంది.
 
 43 శాతం ఫిట్‌మెంట్ ఇచ్చారుగా..
 రాష్ట్ర ఆర్థిక పరిస్థితి అంతంత మాత్రంగా ఉందంటూనే ప్రభుత్వం ప్రభుత్వోద్యోగులకు పదో వేతన సవరణ  సంఘంసిఫార్సు కన్నా ఎక్కువగా ఫిట్‌మెంట్ ఇచ్చింది. తొలుత తెలంగాణ  ప్రభుత్వం 43 శాతం ఫిట్‌మెంట్ ఇవ్వగా, ఏపీ ప్రభుత్వం కూడా అదే స్థాయిలో ఇచ్చింది. ఇప్పుడు తెలంగాణ  ప్రభుత్వం స్థానిక ప్రజాప్రతినిధుల గౌరవ వేతనాన్ని భారీగా పెంచినందున తమకు ఆ స్థాయిలో గౌరవ వేతనం పెంచాలని ఏపీ స్థానిక సంస్థల ప్రతినిధులు కోరుతున్నారు.
 
 మన రాష్ట్రంలో.. తెలంగాణ లో
 స్థానిక సంస్థల ప్రజాప్రతినిధులు గౌరవ
 వేతనాలు ఇలా (రూపాయల్లో...)
 హోదా    రాష్ట్రంలో    తెలంగాణ లో    (పెంపు తరువాత)
 జెడ్పీ చైర్మన్    7,500    లక్ష
 జెడ్సీటీసీ సభ్యుడు    2,250    10,000
 ఎంపీపీ    1,500    10,000
 ఎంపీటీసీ సభ్యుడు    750    5,000
 గ్రామ సర్పంచ్    1,500    5,000
 కార్పొరేషన్ పరిధిలో...
 మేయర్    14,000    50,000
 డిప్యూటీ మేయర్    8,000    25,000
 కార్పొరేటర్    4,000    6,000
 స్పెషల్ గ్రేడ్ మున్సిపాలిటీల్లో...
 మున్సిపల్ చైర్మన్    10,000    15,000
 వైస్ చైర్మన్    5,000    7,500
 కౌన్సిలర్    2,200    3,500
 ఇతర మున్సిపాలిటీల్లో...
 చైర్మన్    8,000    12,000
 వైస్ చైర్మన్    3,200    5,000
 కౌన్సిలర్    1,800    2,500