అమెరికా వస్తువులపై చైనా దిగుమతి సుంకాలు

బీజింగ్‌: అమెరికా నుంచి చైనాకు దిగుమతయ్యే 128 వస్తువులపై చైనా తాజాగా దిగుమతి సుంకాలను విధించింది. అమెరికా నుంచి వచ్చే పందిమాంసం, పండ్లు తదితర ఉత్పత్తుల పై ఈ సుంకాలు విధించామని తెలిపింది.  అమెరికాకు దిగుమతయ్యే ఉక్కు, అల్యూమినియం ఉత్పత్తులపై అమెరికా విధించిన సుంకాలకు ప్రతిగా తాము సుంకాలు విధిస్తున్నామని చైనా పేర్కొంది.

పండ్లు, సం బంధిత 120 ఉత్పత్తులపై 15%, పంది మాంసం, సంబంధిత 8 ఉత్పత్తులపై 25% చొప్పున సుంకాలను వేసినట్లు పేర్కొంది. బహుళపక్ష వాణిజ్య వ్యవస్థను సమర్థిస్తామని, అయితే తమ దేశ ప్రయోజనాల పరిరక్షణ కోసం ప్రపంచ వాణిజ్య సంస్థ(డబ్ల్యూటీఓ) నిబంధనల ప్రకారం అమెరికా దిగుమతులపై సుంకాల రాయితీలను రద్దు చేస్తున్నామని చైనా వివరించింది.