బైక్‌ కంట పడిందా గోవిందా!

 పెనుగొండ : మోటార్‌ సైకిల్‌ కనిపిస్తే చాలు నిమిషాల్లో మాయం చేయడంలో అతను సిద్ధహస్తుడు. మోజు తీరేవరకూ దానిపై తిరిగి చివరకు పాత ఇనుప సామాన్లకు అమ్ముకోవడం అతని నైజం. ఈ ఘరానా దొంగను పెనుగొండ పోలీసులు అరెస్ట్‌ చేశారు. పెనుగొండ సీఐ సి.హెచ్‌.రామారావు, ఎస్‌ఐ వెంకటేశ్వరరావు కథనం ప్రకారం.. పోడూరుకు చెందిన నక్కా చిన్నా సోమవారం పెనుగొండ మార్కెట్‌ వద్ద  అనుమానాస్పదంగా సంచరిస్తుండగా.. పోలీసులు అదుపులోకి తీసుకున్నారు. అతనిని విచారించడంతో మోటార్‌సైకిళ్ల చోరీల వ్యవహారం వెలుగులోకి వచ్చింది. మొత్తం 8 మోటార్‌సైకిళ్లు చోరీ చేసినట్టు చిన్నా అంగీకరించాడు. వీటిని ఘాటాల దిబ్బ సమీపంలో పాత ఇనుప సామాను కొనే దుకాణాల్లో ఉంచాడు. వీటికి రికార్డులు లేక అమ్మలేదు. పక్కనే పాడేసి ఉంచాడు.