మడిలో.. తడబడుతూ..

 

 

అమలాపురం : 

నైరుతి రుతుపవనాలకు తోడు ఉపరితల ఆవర్తన ద్రోణి పుణ్యమా అని జిల్లాలో జూన్‌ నెలలో భారీ వర్షాలు కురిశాయి. రైతులు తొలకరిపై భారీగా ఆశలు పెట్టుకున్నారు. అనావృష్టితో రెండేళ్లపాటు అష్టకష్టాలు పడ్డ మెట్ట, ఏజెన్సీ రైతులు.. ఈ ఏడాది మంచి దిగుబడి సాధించాలని ఆశించారు. కానీ అవసరమైన సమయంలో కరుణ చూపని వరుణుడు వారి ఆశలపై నీళ్లు చల్లాడు. జూన్‌లో రెట్టింపు కురిసి.. తొలకరిపై రైతుల్లో ఆశలు రేపిన వర్షం.. జూలైలో మాత్రం కురవాల్సినదానిలో సగం కూడా పడలేదు. జూలై ఒకటి నుంచి 23వ తేదీ (శనివారం) వరకూ సగటున 177.4 మిల్లీమీటర్ల వర్షపాతం నమోదు కావాలి. కానీ 103.3 మిల్లీమీటర్లు మాత్రమే నమోదైంది. ఏజెన్సీలోని చింతూరులో సాధారణంకంటే 2.5 మిల్లీమీటర్ల వర్షపాతం అధికంగా నమోదు కాగా.. మిగిలిన ఏజెన్సీ, మెట్ట మండలాల్లో ఆశించిన స్థాయిలో వర్షం లేదు. మెట్టలోని తొండంగి, గొల్లప్రోలు, శంఖవరం, ప్రత్తిపాడు, ఏలేశ్వరం, గోకవరం, రంగంపేట మండలాల్లో సగం వర్షం లోటే. ఈ నేపథ్యంలో జిల్లాలో సాగు ఒడుదొడుకులకు లోనవుతోంది. జిల్లాలో ప్రధాన పంటయిన వరి సాగు లక్ష్యం 5.69 లక్షల ఎకరాలు కాగా, ఇప్పటివరకూ 1.76 లక్షల ఎకరాల్లో మాత్రమే నాట్లు పడ్డాయి. మరోపక్క ఖరీఫ్‌లో జిల్లా రైతులు సాగు చేసే చిరుధాన్యాలు, అపరాలు, పత్తి, చెరకు పంటల సాగు సైతం ఇంకా 30 శాతం కూడా మించలేదు. సాగులో జరుగుతున్న ఈ అసాధారణ జాప్యంవల్ల.. అక్టోబర్, నవంబర్‌ నెలల్లో కురిసే  వర్షాలకు నష్టపోయే ప్రమాదముందని రైతులు ఆందోళన చెందుతున్నారు.

 

గోదావరి డెల్టా ధవళేశ్వరం బ్యారేజ్‌ వద్ద ప్రస్తుత పరిస్థితి :

తూర్పు డెల్టాకు నీటి విడుదల : 4,100 క్యూసెక్కులు 

మధ్య డెల్టాకు : 2,000 క్యూసెక్కులు

పశ్చిమ డెల్టాకు : 6,500 క్యూసెక్కులు

సముద్రంలోకి : 1,57,711 క్యూసెక్కులు

ఇన్‌ ఫ్లో : 1,69,848 క్యూసెక్కులు

పాండ్‌ లెవెల్‌ : 13.81 మీటర్లు

మొత్తం ఆయకట్టు : 10.16 లక్షల ఎకరాలు

జిల్లాలో ఆయకట్టు : 5 లక్షలు ఎకరాలు

 

ఏలేరు ప్రాజెక్టు

ప్రాజెక్టు సామర్థ్యం : 24 టీఎంసీలు

ప్రస్తుత నీటినిల్వ : 2.87 టీఎంసీలు

 

భూపతిపాలెం

ప్రాజెక్టు గరిష్ట నీటిమట్టం : 204 మీటర్లు

ప్రస్తుత నీటిమట్టం : 201.5 మీటర్లు

ఈ ప్రాజెక్టు పరిధిలో వాస్తవ ఆయకట్టు 16 వేల ఎకరాలు. కానీ 11 వేల ఎకరాలకు మాత్రమే నీటి సరఫరా చేస్తున్నారు. నీరు సమృద్ధిగా ఉన్నా ఆయకట్టుకు విడుదల చేయడం లేదు. 10 శాతం నారుమడులు పడగా, నాట్లు ఒక్క శాతం కూడా పడలేదు.

 

తాండవ

ప్రాజెక్టు గరిష్ట నీటిమట్టం : 380 అడుగులు

ప్రస్తుత నీటిమట్టం : 355 అడుగులు

ఆయకట్టు : తూర్పు, విశాఖ జిల్లాల్లో కలిపి 51,234 ఎకరాలు

జిల్లాలో ఈ ప్రాజెక్టు కింద ఆయకట్టులో మాత్రమే ఖరీఫ్‌ సాగు ఆశాజనకంగా ఉంది. 90 శాతం నాట్లు పూర్తయ్యాయి.

 

పంపా

గరిష్ట నీటిమట్టం : 106 అడుగులు

ప్రస్తుత నీటిమట్టం : 88 అడుగులు

గత ఏడాది ఇదే సమయానికి : 92 అడుగులు

ఆయకట్టు : 12,500 ఎకరాలు

పంపా దిగువన ఇప్పటివరకూ 200 ఎకరాల్లో నారుమడులు వేశారు. అది కూడా బోర్లు ఉన్న రైతులు మాత్రమే వేశారు. కొన్ని ప్రాంతాల్లో ఆకుమడులు ఎండిపోయాయి కూడా. ఆగస్ట్‌లో పుష్కర ఎత్తిపోతల నుంచి పంపాకు నీరు వస్తే తప్ప ఖరీఫ్‌ సాగయ్యే పరిస్థితి లేదు.

 

పుష్కర ఎత్తిపోతలు

సామర్థ్యం : 1,400 క్యూసెక్కులు

ప్రస్తుత తోడకం : లేదు.

ఈ పథకంపై 1.85 లక్షల ఎకరాల ఆయకట్టు ఆధారపడి ఉంది. రాజానగరం, జగ్గంపేట, ఏలేశ్వరం, తుని నియోజకవర్గాల పరిధిలో ఈ పథకం ద్వారా సాగు జరగాల్సి ఉంది. పంపా ఆయకట్టుకు కూడా దీనినుంచే సాగునీరు అందాలి. గోదావరికి వరదలు వచ్చి వందల టీఎంసీల నీరు సముద్రంలోకి వృథా పోతున్నా ఆయకట్టుకు మాత్రం నీరు విడుదల చేయడం లేదు. రాష్ట్ర ఇరిగేషన్‌ మంత్రి దేవినేని ఉమామహేశ్వరరావు వచ్చి మోటార్‌ స్విచ్‌ వేయాలని చెబుతూ అధికారులు ఇప్పటివరకూ సాగునీరు సరఫరా చేయకపోవడం విడ్డూరం.

 

పంటలవారీగా సాగు వివరాలు (ఎకరాల్లో)

పంట లక్ష్యం ఎంత సాగు శాతం

వరి 5.69 లక్షలు 1.76 లక్షలు 31

చిరుధాన్యాలు 3,675 466 13

అపరాలు 9,781 3,276 33

నూనెగింజలు 793.6 1,683 200

పత్తి 53,701 16,978 32

చెరకు 31,959 6,133 19