TV
25 వారాలుగా అందని కూలి డబ్బు
గుంతకల్లు రూరల్‌ : రోజంతా పనిచేస్తే గానీ కడుపు నిండని కూలి బతుకులు మావి. అలాంటిది 25 వారాలుగా ఉపాధి కూలి డబ్బు రాకపోతే భార్యాపిల్లలు ఏమి తినాలి, ఎలా బతకాలి అంటూ వెంకటాంపల్లికి చెందిన ఉపాధి కూలీలు ఎంపీడీఓ శంకర్‌ ఎదుట ఏకరువు పెట్టుకున్నారు. గ్రామంలో దాదాపు 22 మంది కూలీలకు చెందిన ఉపాధి కూలి 25 వారాలుగా పెండింగ్‌లో ఉన్నాయన్నారు.
ఆధార్‌ లింకేజీ, భ్యాంకు ఖాతా అన్నీ ఉన్నా ఉపాధి కార్యాలయం చుట్టూ చెప్పులరిగేలా తిరిగినా పట్టించుకునే నాథుడు లేడన్నారు. ఒక్కో కూలీకి రూ. 10 వేల నుంచి రూ.20 వేలకు పైగా కూలి రావాల్సి ఉందన్నారు. ఇప్పటికైనా కూలి డబ్బు ఇప్పించేలా చర్యలు తీసుకోవాలని ఎంపీడీవోను కోరారు. సమస్య పరిష్కారానికి కృషిచేస్తానని ఎంపీడీవో వారికి హామీ ఇచ్చారు.
