పోలవరం ప్రాజెక్టు పనులు ఆపేయాలి: ఉండవల్లి

పోలవరం ప్రాజెక్టు పనులను ఆపేయాల్సి ఉంటుందని కాంగ్రెస్ మాజీ ఎంపీ ఉండవల్లి అరుణ్ కుమార్ అన్నారు. తూర్పుగోదావరి జిల్లా రాజమహేంద్రవరంలో ఆయన మీడియాతో మాట్లాడారు. పోలవరం ప్రాజెక్టు గురించి రాజ్యసభలో అడిగిన ప్రశ్నకు సమాధానంగా ఓ మంత్రి 'స్టాప్ వర్క్ ఆర్డర్' అనే ఆదేశాలను 2016 జూలై 7వ తేదీ వరకు అబెయన్స్‌లో పెట్టామన్నారని, ఇప్పుడు ఆ ఆదేశాలు అమలులో లేవు కాబట్టి.. పోలవరం పనులు ఆపేయాల్సి ఉంటుందని ఉండవల్లి తెలిపారు. వాస్తవానికి ఏపీ పునర్వ్యవస్థీకరణ చట్టం ప్రకారం పోలవరం జాతీయ ప్రాజెక్టు అని, దాన్ని పూర్తిగా కేంద్రమే కట్టడంతో పాటు ఆర్అండ్ఆర్ కూడా కేంద్రమే చూడాలని చట్టంలో ఉందని.. కానీ అది ఏమాత్రం అమలు కావట్లేదని అన్నారు. పోలవరం ప్రాజెక్టుకు అనుమతులు కూడా కేంద్రమే ఇప్పించాలని, తెలంగాణ వాళ్లు అనుమతి ఇచ్చేసినట్లే లెక్క అన్నారని.. ఇవన్నీ చట్టంలో ఉన్నాయని ఉండవల్లి గుర్తుచేశారు. కానీ ఈ విషయంలో ఒడిషా ఎంపీ మహంతి అడిగిన ప్రశ్నకు కేంద్ర ఆర్థికమంత్రి అరుణ్ జైట్లీ ఇచ్చిన సమాధానం చూస్తే కడుపు మండిపోయిందని ఆయన ఆగ్రహం వ్యక్తం చేశారు. ''పోలవరం జాతీయప్రాజెక్టు అని సింపుల్‌గా చట్టంలో పేర్కొన్నారు. దానికి వ్యతిరేకంగా నేను చర్యలు తీసుకోలేను. సుప్రీంకోర్టు ఈ చట్టాన్ని కొట్టిపారేస్తే ప్రభుత్వం కూడా కొట్టేస్తుంది. అప్పటివరకు మేం ఏమీ చేయలేం'' అని అరుణ్ జైట్లీ చెప్పిన విషయాన్ని ప్రస్తావించారు.