అంతుచిక్కని వ్యూహం!

 సాక్షి ప్రతినిధి, సంగారెడ్డి:‘తెలంగాణలో నాకు ఇష్టమైన నాయకుడు జగ్గారెడ్డి’ అని పవన్ కల్యాణ్ చెప్పడం వెనుక వ్యూహం ఏమిటీ? ‘కాంగ్రెస్ హటావో.. దేశ్‌కీ బచావో’ అని పవణ్ కల్యాణ్ కాంగ్రెస్ మీద కత్తులు నూరుతుంటే జగ్గారెడ్డి మాత్రం ‘పవనిజం’నే ఎన్నికల ప్రచారాస్త్రంగా ప్రయోగించడంలో మర్మం ఏమిటీ?.. ఆఖరి క్షణంలో పవన్ కల్యాణ్ సంగారెడ్డిలో జగ్గారెడ్డి తరఫున ప్రచారం చేస్తారా?.. పవన్ తమ తరఫున ప్రచారానికి వస్తాడనుకున్న బీజేపీ కూటమి ఆశలు అడియాశలేనా?.. జిల్లా రాజకీయాల్లో ఇప్పుడు ఇదే హాట్ టాపిక్. ఏ ఇద్దరు నేతలు కలిసినా ఇదే అంశంపై చర్చించుకోవడం గమనార్హం. మరో వైపు కాంగ్రెస్ పార్టీని బద్ధ శత్రువుగా చూస్తున్న వ్యక్తి ఫొటోనే పెట్టుకొని నాకో ఓటు, మా ఎంపీ అభ్యర్థికో ఓటు వేయండని జాగ్గారెడ్డి జనాన్ని ఓట్లు అడగడం చూసి కాంగ్రెస్ నాయకులు అయోమయానికి గురవుతున్నారు. ‘ఫైర్ బ్రాండ్’ జగ్గారెడ్డి స్టైలే వేరు. జనంలోకి వెళ్లినా.. జగడమాడినా తన ‘మార్కు’ ఉండాల్సిందే.