మళ్లీ వస్తున్నా

 మళ్లీ వస్తున్నా అవకాశాలివ్వండి అంటోంది బొమ్మరిల్లు బ్యూటీ జెనీలియా. ఒక సారి ముఖానికి రంగేసుకున్న తరువాత దానికి దూరం అవడం అంత సులభం కాదు. ముఖ్యంగా హీరోయిన్లుగా ఒక వెలుగు వెలిగిన నటీమణులకు సినిమా ఆశ తీరదు. పెళ్లి అయిన తరువాత కూడా తమ హవా కొనసాగించాలని కోరుకుంటారు. కొందరికి అది చెల్లినా అలాంటి అవకాశాలు లేనివారు అక్కగానో, వదినగానో చివరికి అమ్మగా నటించడానికైనా సిద్ధపడటం చూస్తూనే ఉన్నాం. అలా మళ్లీ ముఖానికి రంగేసుకోవాలని తహతలాడుతున్న పెళ్లయిన వారి జాబితాలో తాజాగా జెనీలియా చేరారు. ఉత్తరాది నుంచి దక్షిణాది కొచ్చి హీరోయిన్‌గా ప్రకాశించిన హీరోయిన్లలో ఈ అమ్మడు ఒకరు. తమిళంలో బాయ్స్ చిత్రం ద్వారా తెరపైకి వచ్చిన దరహాసిని ఆ తరువాత విజయ్, ధనుష్, జయంరవి వంటి ప్రముఖ హీరోల సరసన నటించి మంచి పేరు పొందారు.