ఎవరు ఆడారు?

ఎవరు ఆడారు?

హాస్యనటునిగా, క్యారెక్టర్ ఆర్టిస్ట్‌గా గుర్తింపు తెచ్చుకున్న ఖయ్యుమ్ (అలీ తమ్ముడు) ఫస్ట్ టైమ్ హీరోగా నటించిన చిత్రం ‘డర్టీ గేమ్’. అస్మిత కథానాయిక. షిరిడీసాయి క్రియేషన్స్ పతాకంపై తాడి మనోహర్ కుమార్ స్వీయ దర్శకత్వంలో నిర్మించారు. సునీల్ కశ్యప్ స్వరపరచిన ఈ చిత్రం పాటల సీడీని దర్శకుడు సాగర్, నిర్మాత ప్రసన్న కుమార్ విడుదల చేశారు. దర్శక-నిర్మాతలు మాట్లాడుతూ- ‘‘మంచి కథ కుదిరింది. డర్టీ గేమ్ ఏంటి? ఎవరెవరు ఆడారు? అన్నది ఆసక్తికరం. ప్రస్తుత ట్రెండ్‌కు తగ్గ అంశాలన్నీ మా చిత్రంలో ఉంటాయి.

సునీల్ సంగీతం హైలెట్‌గా నిలుస్తుంది’’ అన్నారు. ‘‘పూరీ జగన్నాథ్ వంటి దర్శకులతో పని చేసిన నేను ఈ చిత్రం చేయడానికి కారణం కథ నచ్చడమే. పాటలు ప్రేక్షకులను అలరిస్తాయనే నమ్మకం ఉంది’’ అని సునీల్ కశ్యప్ అన్నారు. ఖయ్యుమ్, అస్మిత, కవిత, జీవీ, కోటా శంకర్ రావు, సునీల్ కుమార్  పాల్గొన్నారు. ఈ చిత్రానికి కెమెరా: బీఎస్ కుమార్.