మహేష్‌ మేనల్లుడి కోసం మెగాపవర్‌ స్టార్‌!

హీరో మహేష్‌ బాబు బావ, గుంటూరు పార్లమెంట్‌ సభ్యుడు జయదేవ్‌ గల్లా తనయుడు అశోక్‌ గల్లా హీరోగా ఎంట్రీ ఇవ్వబోతున్న విషయం తెలిసిందే. ‘భలే మంచి రోజు, శమంతక మణి, దేవదాస్‌’వంటి చిత్రాలతో కమర్షియల్‌ హిట్స్‌ దక్కించుకున్న శ్రీరామ్‌ ఆదిత్య ఈ చిత్రానికి దర్శకత్వం వహించనున్నారు. రామానాయుడు స్టూడియోలో న‌వంబ‌ర్ 10న గ్రాండ్ లెవ‌ల్లో జ‌ర‌గ‌నున్న ఈ సినిమా ప్రారంభోత్స‌వ కార్య‌క్ర‌మానికి ప‌లువురు సినీ ప్ర‌ముఖులు హాజ‌రుకానున్నారు. 

అయితే ఈ కార్యక్రమానికి మెగాపవర్‌ స్టార్‌ రామ్‌చరణ్‌ ముఖ్య అతిథిగా హాజరుకానున్నట్లు టాలీవుడ్‌ టాక్‌. మహేష్ కోసం అతడి మేనల్లుడిని దీవించడానికే షూటింగ్‌ పూజాకార్యక్రమంలో రామ్‌చరణ్‌ పాల్గొనబోతున్నట్లు తెలుస్తోంది. అయితే దీనిపై ఇప్పటివరకు అధికారికి ప్రకటన రాలేదు. ఇక ఈ చిత్రంలో అశోక్‌ సరసన ‘ఇస్మార్ట్‌’బ్యూటీ నిధి అగర్వాల్‌ హీరోయిన్‌గా నటిస్తున్నారు. అమర్‌రాజా మీడియా అండ్‌ ఎంటర్‌టైన్‌మెంట్‌ బ్యానర్‌పై పద్మావతి గల్లా నిర్మిస్తున్న ఈ చిత్రానికి జిబ్రాన్‌ సంగీతమందిస్తున్నాడు. న‌రేశ్‌, స‌త్య‌, అర్చ‌నా సౌంద‌ర్య త‌దిత‌రులు నటిస్తున్న ఈ చిత్రానికి రిచ‌ర్డ్ ప్ర‌సాద్ సినిమాటోగ్ర‌ఫీ అందిస్తున్నారు.