‘హీరోపై మిల్కీ బ్యూటీ పొగడ‍్తల వర్షం’

చెన్నై: సినీ హీరో ప్రభాస్‌ను మిల్కీబ్యూటీ తమన్నా పొగడ్తల్లో ముంచేస్తోంది. బాహుబలి చిత్రంలో ఆయన్ని ముద్దుల్లో ముంచెత్తి మైరపించిన తమన్నా ఆ చిత్ర సీక్వెల్‌లో మాత్రం పెద్దగా కనిపించలేదు.  ఆ బాధను కనిపించిన వారందరితో చెప్పుకుని తెగ ఇదైపోయిన ఈ అమ్మడు మార్కెట్‌ మళ్లీ డౌన్‌ అయిపోయింది. ప్రస్తుతం చేతిలో పెద్దగా చిత్రాలు లేవు. తమిళం, తెలుగు, హిందీ భాషల్లో ఒక్కో చిత్రం చేస్తోంది. దీంతో ఎలాగైనా మళ్లీ తన పూర్వ వైభవాన్ని అందిపుచ్చుకోవాలని మిల్కీబ్యూటీ కంకణం కట్టుకున్నట్టుంది.

అది బాహుబలి పెయిర్‌ రిపీట్‌ అయితే బాగుండని భావించిన తమన్న అలాంటి అవకాశం సంపాదించుకునే పనిలో ముమ్మరంగా పడ్డట్టుంది. ఇందులో భాగంగా ఒక భేటీలో నటుడు ప్రభాస్‌ అద్భుతమైన నటుడు, అంతేకాకుండా తనకు మంచి ఫ్రెండ్‌ అంటూ తెగ పొగిడేసింది. మళ్లీ ప్రభాస్‌తో కలిసి నటిస్తారా? అన్న ప్రశ్నకు అలాంటి అవకాశం వస్తే అదృష్టంగా భావిస్తానని పేర్కొంది. అయితే మంచి కథ అయితేనే తామిద్దరం కలిసి నటించే అవకాశం ఉంటుందనీ చెప్పుకొచ్చింది. తనపై ప్రేమాభిమానాలు ఉన్న వారే ఇలాంటి ప్రశ్నలు అడుగుతున్నారన్నారు. వారు బాహుబలి లాంటి విజయవంతమైన చిత్రంలో నటించే అవకాశాన్ని అందిస్తారనే నమ్మకం తనకుందనే ఆశాభావాన్ని తమన్న వ్యక్తం చేసింది.