అలా కలిశారు

ప్రియదర్శన్, అజిత్‌

తమిళ నటుడు అజిత్‌ హీరోగా ప్రియదర్శన్‌ దర్శకత్వంలో ఓ సినిమా రూపొందనుందా? అనే సందేహం రాకమానదు ఇక్కడున్న ఫొటో చూస్తే. కానీ అందుకు టైమ్‌ ఉంది. మరి... అజిత్‌–ప్రియదర్శన్‌ కలిసి ఎక్కడ మాట్లాడుతున్నారు? అనే మీ డౌట్‌. హైదరాబాద్‌లోని ఓ ప్రముఖ స్టూడియోలో. మోహన్‌లాల్‌ హీరోగా ప్రియదర్శన్‌ దర్శకత్వంలో ‘మరక్కార్‌: ది అరేబియన్‌ కండలింటే సింహమ్‌’ అనే సినిమా రూపొందుతున్న సంగతి తెలిసిందే. ఈ సినిమా షూటింగ్‌ హైదరాబాద్‌లో జరుగుతోంది. అలాగే అజిత్‌ హీరోగా హెచ్‌. వినోద్‌ దర్శకత్వంలో బాలీవుడ్‌ హిట్‌ ‘పింక్‌’ తమిళ రీమేక్‌ తెరకెక్కుతున్న సంగతి తెలిసిందే. ఈ సినిమా కూడా సేమ్‌ ప్లేస్‌లో షూటింగ్‌ జరుగుతోంది. దాంతో అజిత్‌ ‘మరక్కార్‌’ సెట్‌లోకి వెళ్లారట. అక్కడ ప్రియదర్శన్‌–అజిత్‌ ముచ్చటించుకుంటున్న టైమ్‌లో క్లిక్‌మన్న ఫొటో ఇది.