మనసులో మాట బయటపెట్టిన అర్జున్‌రెడ్డి

విజయ్‌ దేవరకొండ నటించిన చిత్రం అర్జున్‌ రెడ్డి బాక్సాఫీస్‌ వద్ద సంచలనం సృష్టించింది. దీంతో యూత్‌లో విపరీతమైన ఫాలోయింగ్‌ వచ్చేసింది. ఈసినిమా ఘన విజయం అనంతరం విజయ్‌ తరువాతి సినిమాపై టాలీవుడ్‌లో ఆసక్తి నెలకొంది. అయితే విజయ్‌ ప్రస్తుతం గీతా ఆర్ట్స్‌ 2 బ్యానర్‌ లో తెరకెక్కుతున్న సినిమాలో నటిస్తున్నాడు. శ్రీరస్తు శుభమస్తుతో హిట్‌ కొట్టిన పరశురామ్‌ ఈ చిత్రానికి దర్శకత్వం వహిస్తున్నాడు. పూర్తి ఫ్యామిలీ ఎంటర్‌టైన్‌మెంట్‌గా తెరకెక్కిస్తున్నట్లు సమాచారం.

రొటీన్‌ సినిమాలకు, కమర్షియల్ సినిమాల కన్నా, ఏదైనా కొత్తదనం ఉన్న కథలకు ప్రాధాన్యం ఇస్తానని విజయ్‌ గతంలోనే తెలిపాడు. అయితే అర్జున్‌ రెడ్డి మనసులో మాత్రం ఓ కోరిక ఉంది. ఒక మంచి యాక్షన్ తరహాలో గ్యాంగ్‌స్టర్ సినిమాను చేయాలని ఉందట. ఇటీవల ఒక కన్నడ సినిమా ఆడియో వేడుకకు అతిథిగా వెళ్లిన విజయ్‌ మనసులోని కోరికను చెప్పాడు.

విజయ్‌ - పరశురామ్‌ సినిమాలో హీరోయిన్‌గా చేస్తున్న రష్మీక మందాన, గణేష్‌ సరసన చమక్‌ అనే కన్నడ చిత్రంలో నటిస్తోంది. ఈ ఆడియో వేడుకలో పాల్గొన్న విజయ్, కన్నడ సూపర్ స్టార్ శివరాజ్ కుమార్ ముఫ్తీ ట్రైలర్‌ని చూసి తనకు కూడా అలాంటి గ్యాంగ్‌స్టర్ నేపథ్యం ఉన్న చిత్రంలో నటించాలని ఉందని చెప్పాడు.