అవిశ్వాసానికి అన్నాడీఎంకే మద్దతు లేదు

సాక్షి ప్రతినిధి, చెన్నై: ఏపీకి ప్రత్యేక హోదా కోరుతూ వైఎస్సార్‌ కాంగ్రెస్, తెలుగుదేశం పార్టీలు పార్లమెంటులో ప్రవేశపెట్టే అవిశ్వాస తీర్మానానికి తమ పార్టీ ఎంపీలు మద్దతు ఇవ్వరని అన్నాడీఎంకే పార్లమెంటు సభాపక్ష నేత పి.వేణుగోపాల్‌ స్పష్టం చేశారు. ఏపీకి ప్రత్యేక హోదా సాధన కోసం ఆ రెండు పార్టీలూ అవిశ్వాస తీర్మానాన్ని ప్రవేశపెడుతున్నాయని, ఆ అంశంతో తమకేమీ సంబంధం లేదు కాబట్టి తీర్మానాన్ని బలపరిచేది లేదని చెప్పారు. వైఎస్సార్‌సీపీ తమ మద్దతు కోరిందని, అయితే మద్దతివ్వరాదని నిర్ణయించామన్నారు. అవిశ్వాసానికి  అన్నాడీఎంకే ఎంపీలు మద్దతిస్తారని ప్రకటించిన అదే పార్టీకి చెందిన మాజీ ఎంపీ పళనిస్వామిపై ఆ పార్టీ వేటు వేసింది.