దినేశ్‌ కార్తిక్‌ (ఫైల్‌ఫోటో)

సాక్షి, స్పోర్ట్స్‌ :  సీనియర్‌ క్రికెటర్‌ మహేంద్ర సింగ్‌ ధోనితో తనకు పోలిక తగదని టీమిండియా క్రికెటర్‌ దినేశ్‌ కార్తీక్‌ అభిప్రాయపడ్డాడు. నిదహాస్‌ ట్రోఫీలో ఈ స్టార్‌ వికెట్‌ కీపర్‌ చివరి బంతిని సిక్సు బాది భారత్‌కు విజయాన్నందించిన విషయం తెలిసిందే. దీంతో కార్తీక్‌ సూపర్‌ హీరో అయ్యాడు. ఈ నేపథ్యంలో మీడియాతో మాట్లాడుతూ.. స్టార్‌ వికెట్‌ కీపర్‌, మ్యాచ్‌ ఫినిషర్‌ మహేంద్ర సింగ్‌ ధోనితో తనను పోల్చవద్దన్నాడు.

ధోని ప్రయాణం, తన ప్రయాణం వేర్వేరని, అతను యూనివర్సిటీ టాపర్‌ అయితే తాను ఆ యూనివర్సిటీలో ఓ విద్యార్థిని మాత్రమేనన్నాడు. తనకు ఆ అవకాశమే గొప్పదని చెప్పుకొచ్చాడు. అందరి నోట నాపేరు రావడం చాలా సంతోషంగా ఉందన్నాడు. తన తల రాత బాగుండటంతోనే ఆ సిక్సు కొట్టగలిగానని, రెండు మిల్లీమీటర్ల వ్యత్యాసంలోని సిక్సు పడిందని గుర్తు చేశాడు. గత రెండేళ్లుగా అభిషేక్‌ నాయర్‌ తన కెరీర్‌కు ఎంతో సాయం చేశాడని ఈ తమిళ క్రికెటర్‌ చెప్పుకొచ్చాడు.

శంకర్‌ బ్యాటింగ్‌పై స్పందిస్తూ.. అతను మంచి నైపుణ్యం ఉన్న ఆల్‌రౌండర్‌ అని, బౌలర్‌గా అద్భుతంగా రాణించాడని, కానీ బ్యాటింగ్‌లో​చాలా ఒత్తిడికి లోనయ్యాడని అభిప్రాయపడ్డాడు. శంకర్‌కు మంచి భవిష్యత్తుందని, తనలో ప్రత్యేక నైపుణ్యాలు ఉన్నాయని, అవే తాను చాలా రోజులు ఆడేలా చేస్తాయన్నారు. ఇక ఐపీఎల్‌ టోర్నీలో కెప్టెన్‌గా వ్యవహరించేందుకు ఉవ్విళ్లూరుతున్నానని, ఈ అద్భుత టోర్నమెంట్‌ తనకెంతో ముఖ్యమని కార్తీక్‌ తెలిపాడు. ఇక ఈ సీజన్‌లో కార్తీక్‌ కోల్‌కతా నైట్‌రైడర్స్‌కు కెప్టెన్‌గా వ్యవహరించనున్నాడు.