తెలంగాణ రాష్ట్ర షూటింగ్‌ టోర్నీ షురూ

సాక్షి, హైదరాబాద్‌: తెలంగాణ రాష్ట్ర షూటింగ్‌ చాంపియన్‌షిప్‌ సోమవారం ప్రారంభమైంది. గచ్చిబౌలిలోని ‘శాట్స్‌’ షూటింగ్‌ రేంజ్‌లో తెలంగాణ రాష్ట్ర రైఫిల్‌ సంఘం (టీఎస్‌ఆర్‌ఏ) అడ్మినిస్ట్రేటర్‌ అలెగ్జాండర్‌ ఫ్రాన్సిస్‌ ఈ పోటీలను ప్రారంభించారు. దాదాపు 700లకు పైగా షూటర్లు ఇందులో పాల్గొన్నారు. ప్రి–నేషనల్స్‌ చాంపియన్‌షిప్‌కు క్వాలిఫయింగ్‌ టోర్నీగా నిర్వహిస్తోన్న ఈ పోటీలు శనివారంతో ముగుస్తాయి. సోమవారం 10మీ. ఎయిర్‌ రైఫిల్, పిస్టల్, 25మీ. పిస్టల్, 50మీ. రైఫిల్, పిస్టల్, షాట్‌గన్‌ ఈవెంట్‌లలో క్రీడాకారులకు ప్రాక్టీస్‌ సెషన్‌ జరిగింది. నేటి నుంచి శనివారం వరకు మెయిన్‌ డ్రా పోటీలను నిర్వహిస్తారు.