కరణ్ జోహార్‌కు బెదిరింపులు

 ముంబై: ప్రముఖ దర్శకుడు కరణ్ జోహార్‌కు, రవి పుజారీ ముఠా నుంచి బెదిరింపులు వచ్చాయి. నగరంలోని ప్రముఖులను బెదిరిస్తూ ఈ ముఠా బలవంతపు వసూళ్లకు పాల్పడుతున్న విషయం తెలిసిందే. డబ్బులు ఇవ్వాల్సిందిగా కరణ్‌కు శనివారం ఉదయం కరణ్‌కు గుర్తుతెలియని వ్యక్తి నుంచి సంక్షిప్త సందేశం వచ్చింది. అయితే ఎంత ఇవ్వాల్సిందిగా బెదిరించారనే విషయాన్ని పోలీసులు వెల్లడించడంలేదు. పంపిన వ్యక్తి మాత్రం రవి పుజారీ ముఠాకు చెందినవాడని మాత్రమే చెప్పారు. అంతర్జాలం నుంచి సందేశం పంపడంతో ఆగంతకుడిని గుర్తించడం కష్టంగా మారిందన్నారు. దీంతో కరణ్ ఇంటివద్ద ప్రత్యేక భద్రతను ఏర్పాటు చేసినట్లు చెప్పారు. ఇటీవలే నిర్మాత బోనీకపూర్‌కు కూడా ఇలాంటి బెదిరింపులే వచ్చాయి. ఇలా సినీ ప్రముఖులను లక్ష్యంగా చేసుకోవడంతో పరిశ్రమలో నటులుగా, దర్శకులుగా, నిర్మాతలుగా కొనసాగుతున్నవారు ఆందోళన వ్యక్తం చేస్తున్నారు.