హెచ్-1బీ వీసాలపై తాత్కాలిక ఊరట

న్యూఢిల్లీ : హెచ్-1బీ వీసాలపై అమెరికా తాత్కాలిక ఊరట కల్పించనుంది. విదేశీల నుంచి దేశంలోకి వచ్చే నిపుణులపై విధించే నిబంధల ప్రక్రియ కఠినతరం చేయడానికి అంచనావేసిన దానికంటే ఎక్కువ సమయమే పడుతుందని వైట్ హోస్ ప్రెస్ సెక్రటరీ సీన్ స్పైసర్ తెలిపారు. దీంతో హెచ్-1బీ వీసా పాలసీలో నిబంధనలు కఠినతరమవుతాయని ఆందోళన చెందుతున్న భారత కంపెనీలకు తాత్కాలిక ఉపశమనం కలిగినట్టైంది. నిర్దేశించిన టైమ్ ఫ్రేమ్ లో కాకుండా... వీసా పాలసీని సమగ్రంగా పరిశీలించిన తర్వాతే ట్రంప్ ప్రభుత్వం కొత్త నిబంధనలను తీసుకొస్తుందని స్పైసర్ చెప్పారు. హెచ్-1బీ వీసా నిబంధనలను కఠినతరం చేస్తున్నట్టు తెలియడంతో  భారత ఐటీ కంపెనీల్లో ఆందోళనలు చెలరేగాయి. విదేశీ, వాణిజ్య శాఖా కార్యదర్శులు పలుమార్లు వాషింగ్టన్ కు పర్యటించి, కంపెనీలు తెలుపుతున్న నిరసనలను ట్రంప్ ప్రభుత్వ అధికారులతో చర్చించారు.