జీవితంలో ప్రతి ఒక్కరికీ మంచి కాలం అంటూ ఒకటి వస్తుంది. అయితే దాన్ని సద్వినియోగం చేసుకునే సామర్థ్యం ఉన్న వాళ్లే ఉన్నత స్థాయికి చేరుకుంటారన్న విషయాన్ని పక్కన పెడితే ఎంత ఎదిగితే అంత ఒదిగి ఉండాలన్న నానుడి కూడా ఉంది. కానీ నటి తాప్సీ అలాంటిదేమీ పట్టించుకునే పరిస్థితిలో ఉన్నట్లు కనిపించడం లేదు. దక్షిణాదిలో ఆశించిన అవకాశాలు రాకపోవడంతో బాలీవుడ్‌కు మకాం మార్చిన ఈ ఢిల్లీ చిన్నది అక్కడ రెండు మూడు చిత్రాలు విజయం సాధించడంతో వరుసగా అవకాశాలు తలుపు తడుతున్నాయి. దీంతో తాప్సీ మైండ్‌సెట్‌ మారిపోయింది. తాను అవకాశాల కోసం ఎదురు చూసే కాలం పోయ్యిందని, తన కోసం చిత్ర దర్శక నిర్మాతలు వేచి చూసే టైమ్‌ నడుస్తోందని అహంతో కూడిన వ్యాఖ్యలు చేస్తోంది.  ఇంతకీ తాప్సీ ఏమంటుందో చూద్దాం.. ఈ మధ్య టాలీవుడ్‌లో ఆనందోబ్రహ్మ అనే చిత్రంలో తానే నటించాలని ఆ చిత్ర దర్శక నిర్మాతలు భావించారని చెప్పింది. అందుకు ఆ చిత్రం తన కాల్‌షీట్స్‌ కోసం ఏడాది పాటు వేచి ఉండాల్సి వచ్చింది అని చెప్పింది. అంతే కాదు ఆ చిత్రానికి తన పారితోషికానికి బదులు షేర్‌ ఇవ్వడానికి రెడీ అన్నారని తెలిపింది. అదే విధంగా ప్రస్తుతం మరో అవకాశం వచ్చిందని, ఆ చిత్రం తన కాల్‌షీట్స్‌ కోసం నెల రోజులు వేచి ఉండాల్సిన పరిస్థితి నెలకొందని అంది. అందుకు ఆ చిత్ర దర్శక నిర్మాతలు అంగీకరించారని చెప్పింది. అంతే కాకుండా తన కాల్‌షీట్స్‌కు తగ్గట్టుగా చిత్ర షూటింగ్‌ను నిర్వహించడానికి హీరోను అంగీకరింపజేశారని తెలిపింది. దీంతో తానా చిత్రంలో నటించడానికి ఒప్పుకున్నానని చెప్పింది. అలా తనకు బదులు వేరే నటిని ఎంపిక చేసుకునే పరిస్థితి మారి తనను మార్చలేనంత స్థాయిలో తాను ఉన్నట్లు పేర్కొంది.


 సాక్షి, హైదరాబాద్‌: తెలుగు బిగ్‌బాస్‌షో కొత్త సినిమాలకు ప్రచార వేదిక అవుతోంది. షోకు అత్యధిక టీఆర్పీ రేటింగులు ఉండటంతో నటీనటులు సైతం తమ సినిమా ప్రచారం కోసం బిగ్‌బాస్‌షోని ఉపయోగించుకుంటున్నారు. ఇందుకోసం కొత్త కొత్త నటులు షోలోకి గెస్ట్‌ ఎంట్రీ ఇస్తున్నారు. గతంలో నేనే రాజు నేనే మంత్రి సినిమా ప్రచారం కోసం దగ్గుపాటి రానా గత వారం బిగ్‌బాస్‌ షోలో సందడి చేశాడు. గత వారం దృవ ఫేం నవదీప్‌ షోలో వైల్డ్‌ కార్డ్‌ ఎంట్రీతో అడుగు పెట్టిన సంగతి తెలిసిందే.
 
 తాజాగా హీరోయిన్‌ తాప్సీ పన్ను ప్రధాన పాత్రలో తెరకెక్కి.. తొలి ట్రైలర్ నుంచి సినీ ప్రేక్షకుల్లో ఆసక్తి కలిగించిన కామెడీ హర్రర్ మూవీ ఆనందో బ్రహ్మా. ఈ చిత్రం త్వరలో విడుదలకు సిద్ధమౌతోంది. ఇందులో భాగంగా సినిమా యూనిట్‌ ప్రచార కార్యక్రమాలను ముమ్మరం చేస్తోంది.  ప్రచారంలో భాగంగా తాప్సీ బిగ్‌బాస్‌షోలో పాల్గొననుంది. షో కంటెస్టంట్లతో కలిసి ఈరోజు రాత్రి ప్రసారం అయ్యే ఎపిసోడ్‌లో ప్రేక్షకులను అలరించనుంది.


 తాప్సీ ప్రధాన పాత్రలో తెరకెక్కి.. తొలి ట్రైలర్ నుంచి సినీ ప్రేక్షకుల్లో ఆసక్తి కలిగించిన కామెడీ హర్రర్ మూవీ ఆనందో బ్రహ్మా. నిర్మాత విజయ్ చల్లా తో పాటు డల్లాస్ కు చెందిన ఎన్నారై శశి దేవిరెడ్డి సయుక్తంగా నిర్మిస్తున్న ఈ సినిమా ప్రీమియర్ షో బుకింగ్స్ లో అరుదైన రికార్డ్ సొంతం చేసుకుంది. 70ఎమ్ ఎమ్ సంస్థ నిర్మించిన ఈ సినిమా ప్రీమియర్స్ ఆగస్టు 17న ప్రదర్శించనున్నారు.
 
 ఈ సినిమాను తెలుగు రాష్ట్రాల్లో నిర్వాణ సినిమాస్ సంస్థ ఆగస్టు 18న రిలీజ్ చేస్తోంది. మహి వి రాఘవ దర్శకత్వం వహిస్తున్న ఈ సినిమాకు పెద్ద సంఖ్యలో థిటయేర్స్ కోసం ప్రయత్నిస్తున్నారు. తాప్సీ ప్రధాన పాత్రలో నటించిన ఈ సినిమాలో శ్రీనివాస్ రెడ్డి, వెన్నెల కిశోర్, తాగుబోతు రమేష్, శకలక శంకర్, రాజీవ్ కనకాలలు ఇతర ప్రధాన పాత్రల్లో నటించారు.