♦ వరుసగా మూడో సూపర్‌ సిరీస్‌ టోర్నీ ఫైనల్లో శ్రీకాంత్‌
 ♦ ఈ ఘనత సాధించిన తొలి భారతీయ ప్లేయర్‌గా గుర్తింపు
 ♦ రియో ఒలింపిక్‌ చాంపియన్‌ చెన్‌లాంగ్‌తో నేడు టైటిల్‌ పోరు
 
 అంతా కలలా అనిపిస్తోంది. రెండేళ్ల తర్వాత సూపర్‌ సిరీస్‌ ఫైనల్‌ (సింగపూర్‌ ఓపెన్‌) ఆడాను. మళ్లీ రెండు వారాల వ్యవధిలో రెండు సూపర్‌ సిరీస్‌ టోర్నీల్లో (ఇండోనేసియా, ఆస్ట్రేలి యన్‌ ఓపెన్‌) ఫైనల్‌కు చేరుకున్నాను. ఇదంతా కలగానే ఉంది. షి యుకితో మ్యాచ్‌లో ఆద్యంతం నియంత్రణతో ఆడాను. ఎక్కడా సులువుగా పాయింట్లు ఇవ్వలేదు. ఇక చెన్‌ లాంగ్‌తో జరిగే ఫైనల్లో నా అత్యుత్తమ ప్రదర్శన ఇస్తాను. ఫలితం ఎలా ఉంటుందనే విషయంపై  ఆలోచించడంలేదు. –శ్రీకాంత్‌
 
 సిడ్నీ: భారత నంబర్‌వన్‌ కిడాంబి శ్రీకాంత్‌ తన అద్వితీయ ప్రదర్శనను కొనసాగిస్తూ... ఆస్ట్రేలియన్‌ ఓపెన్‌ సూపర్‌ సిరీస్‌ బ్యాడ్మింటన్‌ టోర్నీలో ఫైనల్లోకి దూసుకెళ్లాడు. శనివారం జరిగిన పురుషుల సింగిల్స్‌ సెమీఫైనల్లో ప్రపంచ 11వ ర్యాంకర్‌ శ్రీకాంత్‌ 21–10, 21–14తో ప్రపంచ నాలుగో ర్యాంకర్‌ షి యుకి (చైనా)ను బోల్తా కొట్టించాడు. 37 నిమిషాల్లోనే ముగిసిన ఈ మ్యాచ్‌లో రెండు గేము ల్లోనూ ఆరంభంలో కాస్త పోటీ ఎదుర్కొన్న శ్రీకాంత్‌ ఆ తర్వాత ఆధిక్యంలోకి వెళ్లి వెనుదిరిగి చూడలేదు.
 
 ఈ గెలుపుతో హైదరాబాద్‌కు చెందిన 24 ఏళ్ల శ్రీకాంత్‌ వరుసగా మూడో సూపర్‌ సిరీస్‌ టోర్నీలో టైటిల్‌ పోరుకు అర్హత సాధించాడు. తద్వారా భారత్‌ నుంచి ఈ ఘనత సాధించిన తొలి ప్లేయర్‌గా రికా ర్డు సృష్టించాడు. పురుషుల బ్యాడ్మింటన్‌లో మాత్రం ఈ ఘనత నమోదు చేసిన ఐదో క్రీడాకారుడిగా శ్రీకాంత్‌ గుర్తింపు పొందాడు. 2007లో ప్రపంచ బ్యాడ్మింటన్‌ సమాఖ్య (బీడబ్ల్యూఎఫ్‌) సూపర్‌ సిరీస్‌ టోర్నీలు ప్రవేశపెట్టాక లిన్‌ డాన్‌ (చైనా), లీ చోంగ్‌వీ (మలేసియా), చెన్‌ లాంగ్‌ (చైనా), సోనీ ద్వికుంకురో (ఇండోనేసియా) మాత్రమే వరుసగా మూడు సూపర్‌ సిరీస్‌ టోర్నీలలో ఫైనల్‌కు చేరుకున్నారు.
 
 గత ఏప్రిల్‌లో సింగపూర్‌ ఓపెన్‌లో రన్నరప్‌గా నిలిచిన శ్రీకాంత్, గత వారం ఇండోనేసియా ఓపెన్‌లో విజేతగా నిలిచాడు. రియో ఒలింపిక్స్‌ చాంపియన్‌ చెన్‌ లాంగ్‌ (చైనా)తో ఆదివారం జరిగే ఫైనల్లో శ్రీకాంత్‌ తలపడతాడు. ముఖాముఖి రికార్డులో శ్రీకాంత్‌ 0–5తో వెనుకజంలో ఉన్నాడు. చెన్‌ లాంగ్‌తో ఇప్పటివరకు ఐదుసార్లు ఆడిన శ్రీకాంత్‌ అతనిపై ఒక్క గేమ్‌ మాత్రమే గెలవడం గమనార్హం. అయితే ప్రస్తుతం శ్రీకాంత్‌ ఫామ్‌ చూస్తుంటే ఆదివారం సంచలన ఫలితం వచ్చినా ఆశ్చర్యపోనక్కర్లేదు.
 నేటి ఫైనల్స్‌ ఉదయం గం. 8.30 నుంచి స్టార్‌ స్పోర్ట్స్‌–2లో ప్రత్యక్ష ప్రసారం


 సిడ్నీ: ఆస్ట్రేలియా ఓపెన్‌ సూపర్‌ సిరీస్‌ బ్యాడ్మింటన్‌ టోర్నమెంట్‌లో మరో హైదరాబాద్ ప్లేయర్‌కు చుక్కెదురైంది. మహిళల సింగిల్స్‌ క్వార్టర్స్ లో భాగంగా జరిగిన శుక్రవారం జరిగిన మ్యాచ్‌లో డిఫెండింగ్‌ చాంపియన్‌ సైనా నెహ్వాల్(భారత్) పై 21-17, 10-21, 21-17 తేడాతో సున్ యు (చైనా) విజయం సాధించింది. ఈ విజయంతో భారత స్టార్ షట్లర్ ఇంటిదారి పట్టగా, నెగ్గిన చైనా క్రీడాకారణి సెమీస్‌లోకి దూసుకెళ్లింది.
 
 తొలి గేమ్‌ను కోల్పోయిన సైనా రెండో గేమ్‌లో ప్రత్యర్ధి సున్ యుకు గట్టి పోటీనిచ్చింది. రెండో గేమ్‌ నెగ్గిన సైనా మూడో గేమ్‌లో కొన్ని అనవసరం తప్పిదాలతో భారీ మూల్యం చెల్లించుకుని ఓటమి పాలైంది. డిఫెండింగ్ చాంపియన్‌గా బరిలోకి దిగిన సైనాతో పాటు మరో క్వార్టర్‌ ఫైనల్లో ఓడిన పీవీ సింధు ఇంటిదారి పట్టారు. పురుషుల విభాగంలో కిడాంబి శ్రీకాంత్ సెమీఫైనల్స్‌కు చేరుకున్న విషయం తెలిసిందే.


 సిడ్నీ: ఆస్ట్రేలియా ఓపెన్ సూపర్ సిరీస్ బ్యాడ్మింటన్ టోర్నమెంట్లో భారత క్రీడాకారుడు కిడాంబి శ్రీకాంత్ జోరు కొనసాగుతోంది. శుక్రవారం జరిగిన పురుషుల సింగిల్స్ క్వార్టర్ ఫైనల్లో శ్రీకాంత్ 25-23, 21-17 తేడాతో భారత్ కే చెందిన సాయి ప్రణీత్ పై గెలుపొందాడు. ఇరువురి మధ్య 45 నిమిషాల పాటు జరిగిన పోరులో శ్రీకాంత్ వరుస రెండు సెట్లు గెలిచి సెమీస్ కు చేరాడు. తొలి గేమ్ లో సాయి ప్రణీత్ నుంచి శ్రీకాంత్ కు తీవ్ర ప్రతిఘటన ఎదురైంది.
  
 వీరిద్దరూ హోరాహోరీగా తలపడిన మొదటి గేమ్ లో చివరకు శ్రీకాంత్ పైచేయి సాధించాడు. అదే ఊపును రెండో గేమ్ లో కొనసాగించిన శ్రీకాంత్.. సాయి ప్రణీత్ కు చెక్ పెట్టాడు. తద్వారా సింగపూర్ ఓపెన్ సూపర్ సిరీస్ ఫైనల్లో సాయి ప్రణీత్ చేతిలో ఎదురైన ఓటమికి శ్రీకాంత్ ప్రతీకారం తీర్చుకున్నాడు.  ఆ టైటిల్ పోరులో శ్రీకాంత్ పై సాయి ప్రణీత్ గెలిచి టైటిల్ ను కైవసం చేసకున్న సంగతి తెలిసిందే.
  


 ♦ ప్రిక్వార్టర్స్‌లోకి ప్రవేశం
 ♦ శ్రీకాంత్, సాయిప్రణీత్‌ కూడా
 ♦ పోరాడి ఓడిన కశ్యప్, రుత్విక
 ♦ ఆస్ట్రేలియన్‌ ఓపెన్‌ టోర్నీ
 
 సిడ్నీ: డిఫెండింగ్‌ చాంపియన్‌ సైనా నెహ్వాల్, ప్రపంచ మూడో ర్యాంకర్‌ పీవీ సింధు... ఆస్ట్రేలియన్‌ ఓపెన్‌ సూపర్‌ సిరీస్‌ బ్యాడ్మింటన్‌ టోర్నమెంట్‌లో ప్రిక్వార్టర్‌ ఫైనల్లోకి దూసుకెళ్లారు. బుధవారం జరిగిన మహిళల సింగిల్స్‌ తొలి రౌండ్‌ మ్యాచ్‌ల్లో 15వ ర్యాంకర్‌ సైనా 21–10, 21–16తో ప్రపంచ ఐదో ర్యాంకర్, నాలుగో సీడ్‌ సుంగ్‌ జీ హున్‌ (దక్షిణ కొరియా)పై... ఐదో సీడ్‌ సింధు 21–17, 14–21, 21–18తో గతవారం ఇండోనేసియా ఓపెన్‌ టైటిల్‌ నెగ్గిన సయాకా సాటో (జపాన్‌)పై గెలుపొందారు. క్వాలిఫయర్, మరో తెలుగు అమ్మాయి గద్దె రుత్విక శివాని 17–21, 21–12, 12–21తో చెన్‌ జియోజిన్‌ (చైనా) చేతిలో పోరాడి ఓడింది. గురువారం జరిగే ప్రిక్వార్టర్‌ ఫైనల్స్‌లో సోనియా చెహ (మలేసియా)తో సైనా; చెన్‌ జియోజిన్‌తో సింధు తలపడతారు.
 
 ప్రణయ్, జయరామ్‌లకు నిరాశ
 పురుషుల సింగిల్స్‌ విభాగంలో భారత క్రీడాకారులకు మిశ్రమ ఫలితాలు ఎదురయ్యాయి. తొలి రౌండ్‌లో భారత నంబర్‌వన్‌ అజయ్‌ జయరామ్‌ 21–14, 10–21, 9–21తో ఏడో సీడ్‌ ఎన్జీ కా లాంగ్‌ అంగుస్‌ (హాంకాంగ్‌) చేతిలో... ప్రణయ్‌ 19–21, 13–21తో రాజీవ్‌ ఉసెఫ్‌ (ఇంగ్లండ్‌) చేతిలో... కశ్యప్‌ 18–21, 21–14, 15–21తో ప్రపంచ నంబర్‌వన్‌ సన్‌ వాన్‌ హో (కొరియా) చేతిలో... సిరిల్‌ వర్మ 16–21, 8–21తో విటింగస్‌ (డెన్మార్క్‌) చేతిలో ఓడిపోయారు.
 
 
 మరోవైపు ఇండోనేసియా ఓపెన్‌ చాంపియన్‌  శ్రీకాంత్, యువతార సాయిప్రణీత్‌ తమ ప్రత్యర్థులను ఓడించి ప్రిక్వార్టర్‌ ఫైనల్లోకి అడుగు పెట్టారు. తొలి రౌండ్‌లో శ్రీకాంత్‌ 21–13, 21–16తో కాన్‌ చావో యు (చైనీస్‌ తైపీ)పై, సాయిప్రణీత్‌ 10–21, 21–12, 21–10తో సుగియార్తో (ఇండోనేసియా)పై గెలిచారు. గురువారం జరిగే ప్రిక్వార్టర్స్‌లో సన్‌ వాన్‌ హోతో శ్రీకాంత్‌; హువాంగ్‌ (చైనా)తో సాయిప్రణీత్‌ ఆడతారు. పురుషుల డబుల్స్‌ తొలి రౌండ్‌లో సాత్విక్‌ సాయిరాజ్‌–చిరాగ్‌ శెట్టి ద్వయం 20–22, 21–19, 21–11తో లా చెయుక్‌ హిమ్‌–లీ చున్‌ (హాంకాంగ్‌) జంటపై గెలుపొందగా... మనూ అత్రి–సుమీత్‌ రెడ్డి జంట 20–22, 6–21తో తకెషి కముర–కిగో సొనాడా (జపాన్‌) జోడీ చేతిలో; కోనా తరుణ్‌–ఫ్రాన్సిస్‌ ఆల్విన్‌ ద్వయం17–21, 15–21తో సెతియావాన్‌ (ఇండోనేసియా)–బూన్‌ తాన్‌ (మలేసియా) జోడీ చేతిలో ఓడిపోయాయి. మహిళల డబుల్స్‌ తొలి రౌండ్‌లో సిక్కి రెడ్డి–అశ్విని పొన్నప్ప జంట 21–11, 21–13తో వెండీ చెన్‌–జెన్నిఫర్‌ టామ్‌ (ఆస్ట్రేలియా) జోడీపై గెలిచింది. మిక్స్‌డ్‌ డబుల్స్‌ తొలి రౌండ్‌లో సాత్విక్‌–అశ్విని ద్వయం 13–21, 17–21తో లీ చున్‌–చౌ హో వా (హాంకాంగ్‌) జంట చేతిలో పరాజయం పాలైంది.


 ఈ ఏడాది తొలి టైటిల్ నెగ్గిన భారత బ్యాడ్మింటన్ స్టార్
 రెండోసారి ఆస్ట్రేలియన్ ఓపెన్ సూపర్ సిరీస్ టైటిల్ కైవసం
 ఫైనల్లో చైనా ప్లేయర్ సున్ యుపై విజయం
 రూ. 37 లక్షల 66 వేల ప్రైజ్‌మనీ సొంతం
  
 సరైన సమయంలో సైనా నెహ్వాల్ సత్తా చాటుకుంది. కొంతకాలంగా నిలకడలేని ఆటతీరుతో తడబడుతోన్న భారత బ్యాడ్మింటన్ స్టార్ మళ్లీ ఫామ్‌లోకి వచ్చింది. 15 నెలలుగా ఉన్న టైటిల్ కొరతను ఈ హైదరాబాద్ అమ్మాయి తీర్చుకుంది. ఆస్ట్రేలియన్ ఓపెన్ సూపర్ సిరీస్ టైటిల్‌ను హస్తగతం చేసుకొని ఈ ఏడాది తన ఖాతాలో తొలి అంతర్జాతీయ టైటిల్‌ను జమ చేసుకుంది. తనను తక్కువ అంచనా వేసిన వారికి తగిన సమాధానమిస్తూ... ప్రతిష్టాత్మక రియో ఒలింపిక్స్‌కు ముందు కావాల్సినంత ఆత్మవిశ్వాసాన్ని కూడగట్టుకుంది.
  
 సిడ్నీ: ఫైనల్ చేరే క్రమంలో ఇద్దరు ప్రపంచ మాజీ చాంపియన్‌లపై తాను సాధించిన విజయాలు గాలివాటమేమీ కాదని సైనా నెహ్వాల్ నిరూపించింది. ఆస్ట్రేలియన్ ఓపెన్ సూపర్ సిరీస్ టోర్నమెంట్‌లో విజేతగా నిలిచి ఈ ఏడాది తొలి టైటిల్‌ను దక్కించుకుంది. ఆదివారం జరిగిన మహిళల సింగిల్స్ ఫైనల్లో ప్రపంచ ఎనిమిదో ర్యాంకర్ సైనా 11-21, 21-14, 21-19తో ప్రపంచ 12వ ర్యాంకర్ సున్ యు (చైనా)పై విజయం సాధించింది. విజేతగా నిలిచిన సైనాకు 56,250 డాలర్ల (రూ. 37 లక్షల 66 వేలు) ప్రైజ్‌మనీతోపాటు 9200 ర్యాంకింగ్ పాయింట్లు లభించాయి. ఆస్ట్రేలియన్ ఓపెన్‌ను నెగ్గడం సైనాకిది రెండోసారి. 2014లో తొలిసారి ఆమె ఈ టైటిల్‌ను సాధించింది.
  
 71 నిమిషాలపాటు జరిగిన ఈ మ్యాచ్‌లో సైనా తొలి గేమ్‌ను కోల్పోయినప్పటికీ... ఒత్తిడికి లోనుకాకుండా సంయమనంతో ఆడి తర్వాతి రెండు గేమ్‌లను నెగ్గి చాంపియన్‌గా నిలిచింది. గతేడాది మార్చిలో స్వదేశంలో జరిగిన ఇండియా ఓపెన్ సూపర్ సిరీస్ టోర్నమెంట్‌లో టైటిల్ సాధించిన అనంతరం సైనా ఖాతాలో చేరిన మరో టైటిల్ ఇదే కావడం గమనార్హం. క్వార్టర్ ఫైనల్లో 2013 ప్రపంచ చాంపియన్ ఇంతనోన్ రచనోక్ (థాయ్‌లాండ్), సెమీఫైనల్లో 2011 ప్రపంచ చాంపియన్ యిహాన్ వాంగ్ (చైనా)పై గెలిచిన సైనా... ఫైనల్లో మాత్రం ఆరంభంలో తడబడింది. గతంలో సున్ యుపై ఐదుసార్లు నెగ్గిన రికార్డు కలిగిన సైనా తొలి గేమ్‌లో అనవసర తప్పిదాలు చేసి కేవలం 18 నిమిషాల్లో గేమ్‌ను కోల్పోయింది. అయితే రెండో గేమ్‌లో సైనా కోలుకుంది. ఎక్కువ పొరపాట్లకు అవకాశం ఇవ్వకుండా ఆడుతూ నిలకడగా పాయింట్లు సాధించి 11-8తో ఆధిక్యంలోకి వెళ్లింది. సైనా శక్తివంతమైన స్మాష్‌లతోపాటు డ్రాప్ షాట్‌లు ఆడుతూ సున్ యుపై ఒత్తిడి పెంచింది. దాంతో సున్ యు కొట్టిన పలుషాట్‌లు నెట్‌కే తగిలాయి. అదే జోరులో సైనా రెండో గేమ్‌ను దక్కించుకొని మ్యాచ్‌లో నిలిచింది. నిర్ణాయక మూడో గేమ్‌లో ఇద్దరూ నువ్వా నేనా అన్నట్లు పోరాడారు. దాంతో ఆధిక్యం దోబూచులాడింది. విరామ సమయానికి సైనా 11-10తో ఒక పాయింట్ ఆధిక్యం సంపాదించింది. అయితే కీలకదశలో సైనా తన అనుభవాన్నంతా రంగరించి పోరాడి 18-14తో నాలుగు పాయింట్ల ఆధిక్యంలోకి వెళ్లింది. ఈ దశలో సున్ యు వరుసగా మూడు పాయింట్లు నెగ్గడంతో సైనా ఆధిక్యం 18-17తో ఒక పాయింట్‌కు చేరింది. కీలక సమయంలో సైనా రెండు వరుస పాయింట్లు సాధించి 20-17తో విజయానికి చేరువైంది. సున్ యు వరుసగా రెండు పాయింట్లు నెగ్గినా... మూడోసారి సైనా సంధించిన స్మాష్‌కు జవాబివ్వలేక సున్ యు కొట్టిన షాట్ నెట్‌కు తగలడంతో భారత స్టార్ విజయం ఖాయమైంది.
  
 ఆత్మవిశ్వాసం పెంచే విజయం...
 ప్రతిష్టాత్మక రియో ఒలింపిక్స్‌కు రెండు నెలల సమయమే ఉంది. మరోవైపు టైటిల్ సాధించి 15 నెలలు దాటింది. ఈ ఏడాది బరిలోకి దిగిన ఏ టోర్నీలోనూ ఫైనల్‌కు చేరలేదు. ప్రపంచ ర్యాంకింగ్స్‌లోనూ టాప్-5లో చోటు కోల్పోయింది. ఈ నేపథ్యంలో భారత స్టార్ ప్లేయర్ సైనా నెహ్వాల్‌పై మెరుగైన ప్రదర్శన చేయాలనే ఒత్తిడి అన్నివైపుల నుంచి ఏర్పడింది. ఇలాంటి క్లిష్ట సమయంలో సైనా ఆస్ట్రేలియన్ ఓపెన్ సూపర్ సిరీస్ టైటిల్ సాధించి తనపై ఉన్న ఒత్తిడిని తొలగించుకుంది. 
 
 ఇన్నాళ్లూ చైనాకు చెందిన లీ జురుయ్, యిహాన్ వాంగ్, షిజియాన్ వాంగ్ కఠిన ప్రత్యర్థులుగా ఉన్నారని భావిస్తే... నెమ్మదిగా ఇతర దేశాలకు చెందిన క్రీడాకారిణులు కూడా సైనాను సవాల్ చేయడం ప్రారంభించారు. కరోలినా మారిన్ (స్పెయిన్), తై జు యింగ్ (చైనీస్ తైపీ), మినత్సు మితాని, ఒకుహారా (జపాన్), ఇంతనోన్ రచనోక్ (థాయ్‌లాండ్) సైనా ఆటతీరుపై అవగాహన పెంచుకొని ఆమెపై విజయాలు సాధించారు. దాంతో సైనా ఈ ఏడాది ఏ టోర్నీలోనూ సెమీఫైనల్ దశను దాటలేకపోయింది. ఎలాగైనా రియో ఒలింపిక్స్‌కు ముందు ఫామ్‌లోకి రావాలనే ఉద్దేశంతో సైనా తీవ్రంగా శ్రమించింది. కోచ్ విమల్ కుమార్ పర్యవేక్షణలో తన ఆటతీరులోని లోపాలను సరిదిద్దుకుంది. ఆస్ట్రేలియన్ ఓపెన్‌లో ఎవరూ ఫేవరెట్‌గా అంచనా వేయకున్నా సైనా నిలకడగా రాణించి ఒక్కో అడ్డంకిని అధిగమించింది. క్వార్టర్ ఫైనల్లో, సెమీఫైనల్లో ప్రపంచ మాజీ చాంపియన్స్ రచనోక్, యిహాన్ వాంగ్‌లపై అద్భుత విజయాలు సాధించి ఔరా అనిపించింది. రియో ఒలింపిక్స్‌కు రెండు నెలల సమయం ఉంది కాబట్టి సైనా తన ఆటతీరును మరింత సానబెట్టుకోవాలి. ఫిట్‌నెస్‌నూ కాపాడుకోవాలి. కొంతకాలంగా తనకు కొరకరాని ప్రత్యర్థులుగా మారిన కరోలినా మారిన్, తై జు యింగ్‌లతోపాటు చైనా స్టార్ క్రీడాకారిణులపై పైచేయి సాధించే వ్యూహాలను సిద్ధం చేసుకోవాలి. పక్కా ప్రణాళికతో ముందుకు సాగుతూ ఇదే జోరును రియోలోనూ సైనా కొనసాగిస్తే ఆమె నుంచి మరోసారి పతకం రావడం ఖాయమనుకోవాలి.  -సాక్షి క్రీడావిభాగం
  
 ‘బాయ్’ నజరానా రూ. 10 లక్షలు
 రెండోసారి ఆస్ట్రేలియన్ ఓపెన్ విజేతగా నిలిచిన సైనాను భారత బ్యాడ్మింటన్ సంఘం (బాయ్) అభినందించింది. ఆమె విజయానికి ప్రోత్సాహకంగా రూ. 10 లక్షల నజరానాను ప్రకటించింది. ‘అద్భుత విజయం సాధించిన సైనాకు అభినందనలు. ఆమె కెరీర్‌లో ఈ గెలుపు మరో మైలురాయిలాంటిది. రియో ఒలింపిక్స్‌లో మెరుగైన ప్రదర్శన చేసేందుకు ఈ విజయం ఆమెకు దోహదపడుతుంది. సైనా కోచ్ విమల్ కుమార్, సహాయక సిబ్బందికి కూడా నా అభినందనలు’ అని ‘బాయ్’ అధ్యక్షుడు అఖిలేశ్ దాస్‌గుప్తా తెలిపారు.
  
 10
 సైనా సాధించిన సూపర్ సిరీస్ టైటిల్స్ సంఖ్య. ఇందులో ఇండోనేసియా ఓపెన్ (2009, 2010, 2012), సింగపూర్ ఓపెన్ (2010), హాంకాంగ్ ఓపెన్ (2010), డెన్మార్క్ ఓపెన్ (2012), ఆస్ట్రేలియన్ ఓపెన్ (2014, 2016), చైనా ఓపెన్ (2014), ఇండియా ఓపెన్ (2015) టైటిల్స్ ఉన్నాయి.
  
 ప్రధాని అభినందన
 ఈ ఏడాది తొలి టైటిల్‌ను సాధించిన సైనా నెహ్వాల్‌ను ప్రధాని నరేంద్ర మోదీ అభినందించారు. ‘అద్వితీయ విజయం సాధించినందుకు అభినందనలు. దేశం యావత్తూ నీ విజయాలకు గర్వపడుతోంది’ అని మోదీ ట్వీట్ చేశారు. వైఎస్సార్‌సీపీ అధ్యక్షుడు వైఎస్ జగన్‌మోహన్‌రెడ్డి కూడా సైనాను అభినందించారు. భవిష్యత్‌లో మరిన్ని విజయాలు సాధించాలని ఆకాంక్షించారు.


 * ఆస్ట్రేలియన్ ఓపెన్ ఫైనల్లో భారత స్టార్
 * సెమీస్‌లో ఓడిన శ్రీకాంత్
 సిడ్నీ: ఈ ఏడాది తొలి టైటిల్ సాధించేందుకు... భారత బ్యాడ్మింటన్ స్టార్ సైనా నెహ్వాల్ మరో విజయం దూరంలో నిలిచింది. ఆస్ట్రేలియన్ ఓపెన్ సూపర్ సిరీస్ టోర్నమెంట్‌లో ఈ హైదరాబాద్ అమ్మాయి ఫైనల్లోకి దూసుకెళ్లింది. శనివారం జరిగిన మహిళల సింగిల్స్ సెమీఫైనల్లో ఏడో సీడ్ సైనా 21-8, 21-12తో ప్రపంచ రెండో ర్యాంకర్ యిహాన్ వాంగ్ (చైనా)పై సంచలన విజయం సాధించింది.
 
 కేవలం 31 నిమిషాల్లో ముగిసిన ఈ మ్యాచ్‌లో సైనా రెండు గేముల్లోనూ సంపూర్ణ ఆధిపత్యం కనబరిచింది. గతంలో యిహాన్ వాంగ్ చేతిలో 11 సార్లు ఓడిన సైనా ఈసారి పక్కా ప్రణాళికతో ఆడి తొలి గేమ్ ఆరంభంలోనే 15-6తో ఆధిక్యంలోకి వెళ్లి ఇక వెనుదిరిగి చూడలేదు. రెండో గేమ్‌లోనూ సైనా ఇదే జోరును కొనసాగించి విజయాన్ని ఖాయం చేసుకొని రెండోసారి ఈ టోర్నీలో ఫైనల్‌కు చేరింది.
 
 2014లో సైనా ఈ టోర్నీలో తొలిసారి విజేతగా నిలిచింది. ఆదివారం జరిగే ఫైనల్లో ప్రపంచ 12వ ర్యాంకర్ సున్ యు (చైనా)తో సైనా అమీతుమీ తేల్చుకుంటుంది. సున్ యుతో ముఖాముఖి రికార్డులో సైనా 5-1తో ఆధిక్యంలో ఉంది.
  
 మరోవైపు పురుషుల సింగిల్స్‌లో భారత నంబర్‌వన్ కిడాంబి శ్రీకాంత్ కథ ముగిసింది. సెమీఫైనల్లో శ్రీకాంత్ 20-22, 13-21తో హాన్స్ క్రిస్టియన్ విటింగస్ (డెన్మార్క్) చేతిలో ఓడిపోయాడు.
  
 నేటి ఫైనల్స్
 ఉదయం గం. 8.30 నుంచి స్టార్ స్పోర్ట్స్-4లో ప్రత్యక్ష ప్రసారం


 సిడ్నీ: ఆస్ట్రేలియా సూపర్ సిరీస్ బ్యాడ్మింటన్ టోర్నమెంట్లో భారత షట్లర్ సైనా నెహ్వాల్ ఫైనల్స్లోకి దూసుకెళ్లింది. శనివారం జరిగిన మహిళల సింగిల్స్ సెమీ ఫైనల్లో ఆమె నాలుగో సీడ్ యిహాన్ వాంగ్ (చైనా)ను ఓడించింది.  సిడ్నీలో జరిగిన ఈ మ్యాచ్లో సైనా 21-8, 21-12తో విజయం సాధించింది. ఈ పోరును సైనా కేవలం 31 నిమిషాల్లో ముగించింది.  ఆదివారం జరిగే ఫైనల్స్లో ఆమె చైనా షట్లర్ సన్ యూతో తలపడనుంది. ఇక పురుషుల సింగిల్స్ సెమీ ఫైనల్లో కిడాంబి శ్రీకాంత్ నిరాశపరిచాడు. హాన్స్ క్రిస్టియన్ విటింగస్ (డెన్మార్క్) చేతిలో  20-22, 13-21 తేడాతో ఓడిపోయాడు.
 
  


  సిడ్నీ: ఆస్ట్రేలియన్ ఓపెన్ సూపర్ సిరీస్ బ్యాడ్మింటన్ టోర్నమెంట్‌లో కరోలినా మరిన్ (స్పెయిన్), చెన్ లాంగ్ (చైనా) మహిళల, పురుషుల సింగిల్స్ విభాగాల్లో విజేతలుగా నిలిచారు. ఫైనల్స్‌లో ప్రస్తుత ప్రపంచ చాంపియన్ మరిన్ 22-20, 21-18తో ఐదో సీడ్ షిజియాన్ వాంగ్ (చైనా)పై గెలుపొందగా... టాప్ సీడ్ చెన్ లాంగ్ 21-12, 14-21, 21-18తో విక్టర్ అక్సెల్‌సన్ (డెన్మార్క్)ను ఓడించాడు. ఈ ఏడాది మరిన్‌కిది మూడో ‘సూపర్ సిరీస్’ టైటిల్. ఇంతకుముందు ఆమె ఆల్ ఇంగ్లండ్ ఓపెన్, మలేసియా ఓపెన్‌లలో విజేతగా నిలిచింది.