సాక్షిప్రతినిధి, కాకినాడ: అమెరికన్‌ తల్లి రొయ్యకు మన ఆక్వా రైతులు త్వరలో గుడ్‌బై చెప్పనున్నారు. తల్లి రొయ్యలను దేశీయంగా మన హేచరీల్లో ఉత్పత్తి చేసుకునేందుకు ప్రణాళికలు సిద్ధం చేశారు. తీర ప్రాంత రాష్ట్రాల్లోని హేచరీల్లో రొయ్య పిల్లల పునరుత్పత్తి కోసం తల్లి రొయ్యలను కొన్నేళ్లుగా లక్షలు వెచ్చించి అమెరికా నుంచి దిగుమతి చేసుకుంటున్నారు. మన హేచరీల్లో బ్లాక్‌ టైగర్‌(మోనాడామ్‌) తల్లి రొయ్యలు 2009కి ముందు భారతీయ సముద్ర జలాల్లో లభించేవి. ఆ తర్వాత బ్లాక్‌టైగర్‌ 60 శాతం బాక్టీరియాతో రోగాల బారిన పడి తల్లి రొయ్యలు దెబ్బతిన్నాయి. అనంతరం రోగాల్లేని తల్లి రొయ్యలను ఉత్పత్తి చేస్తున్న అమెరికా నుంచి వెనామీ దిగుమతికి కేంద్ర ప్రభుత్వం అనుమతించింది. పసిఫిక్‌ మహాసముద్రంలో మాత్రమే లభించే ఈ వెనామీ(ఎగ్జోటిక్‌ స్పీసిస్‌)వైట్‌లెగ్‌ ష్రింప్‌ను దిగుమతి చేసుకునేలా నిబంధనలను సడలించింది. అమెరికాలో వెనామీని పునరుత్పత్తి చేస్తున్న కంపెనీల్లో ఎంపిక చేసిన 14 కంపెనీల నుంచి తల్లి రొయ్య దిగుమతి చేసుకునేలా ఒప్పందం కుదిరింది. ఇలా దిగుమతి చేసుకునే వెనామీని చెన్నైలోని సెంట్రల్‌ క్వారంటైన్‌లో ఐదు రోజులు అన్ని పరీక్షల అనంతరం ఒడిశా, గుజరాత్, తమిళనాడు, పశ్చిమ బెంగాల్‌ సహా.. మన రాష్ట్రంలోని హేచరీల్లో వినియోగిస్తున్నారు. వెనామీ తల్లి రొయ్య ప్రస్తుతం అమెరికాలో 80 డాలర్లు (రూ.6,400) పలుకుతోంది. కస్టమ్స్, లాజిస్టిక్, ఫ్లైట్‌ చార్జీలు 30 శాతం అదనంగా కలుపుకొంటే సుమారు రూ.10,000 వరకు అవుతుంది. ఇక్కడి హేచరీలు అమెరికాలోని టెక్సాస్, ఫ్లోరిడా రాష్ట్రాల నుంచి ఏటా 2లక్షల నుంచి 2.50 లక్షల తల్లి రొయ్యలను దిగుమతి చేసుకుంటున్నాయి. దేశవ్యాప్తంగా తీరంలో 550 హేచరీలుంటే అత్యధికంగా మూడొంతులు హేచరీలు కాకినాడ తీరంలోనే ఉండటం విశేషం.   మరో రెండేళ్ల సమయం..   కోస్టల్‌ ఆక్వా కల్చర్‌ అథారిటీకి కేంద్రం తీసుకొచ్చి న సవరణలు వెనామీ తల్లి రొయ్యల స్థానే.. దేశీయంగా తల్లి రొయ్యల ఉత్పత్తికి మార్గం సుగమం చేశాయని చెప్పొచ్చు. ఇందుకోసం రెండు దశలను కేంద్ర ప్రభు­త్వం నిర్దేశించింది. తొలి దశలో బ్రూడ్‌స్టాక్‌ మల్టిప్లికేషన్‌ సెంటర్‌(బీఎంసీ)లు, మలి దశలో న్యూక్లియర్‌ బ్రీడింగ్‌ సెంటర్‌(ఎన్‌బీఎస్‌)లు నెలకొల్పుకోవచ్చు. ఈ రెండు దశలు పూర్తయ్యేసరికి తల్లి రొయ్య కోసం అమెరికాపై ఆధారపడాల్సిన అవసరం ఉండదు. ఈ రెండు దశలు చేరుకోవడానికి మరో రెండేళ్లు పడుతుందని అంచనా. తొలి దశలో భాగంగా బీఎంసీ ద్వారా తల్లి రొయ్య స్థానంలో పిల్ల రొయ్యలను దిగుమతి చేసుకుంటారు. బ్రూడ్‌స్టాక్‌ మల్టిప్లికేషన్‌ సెంటర్‌(బీఎంసీ)లలో పిల్ల రొయ్యలను పునరుత్పత్తి చేస్తారు. అమెరికా నుంచి దిగుమతిచేసుకునే ఒక తల్లి రొయ్య స్థానంలో అంతే ఖర్చుతో 1000 పిల్ల రొయ్యలను పునరుత్పత్తి చేయొచ్చు. ఇలా పిల్ల రొయ్యలను దిగుమతి చేసుకుని బీఎంసీలలో పునరుత్పత్తి చేస్తారు. ఈ ప్రక్రియ ఇప్పటికే మన రాష్ట్రంలో నిర్వహించేందుకు వీలుగా పలు సెంటర్లకు శ్రీకారం చుట్టారు. ప్రస్తుతం నెల్లూరు బీఎంఆర్, భీమవరం ఆమందా, శ్రీకాకుళం కోనాబే, విశాఖలో ఎమ్‌పెడా బీఎంసీ(బ్రూడ్‌స్టాక్‌ మల్టిప్లికేషన్‌ సెంటర్స్‌)లు సిద్ధమయ్యాయి. మలి దశలో ఇక అమెరికా వైపు కన్నెత్తి చూడాల్సిన అవసరం లేకుండా మనమే నేరుగా తల్లి రొయ్యను పునరుత్పత్తి చేయొచ్చు. ఇందుకోసం న్యూక్లియర్‌ బ్రీడింగ్‌ సెంటర్లు నెలకొల్పుతారు. ప్రస్తుతం అమెరికాలో మాత్రమే నిర్వహిస్తున్న సెంటినల్‌ ట్రైల్స్‌ ఇక్కడ ఏర్పాటు చేసే ఎన్‌బీసీలలో నిర్వహిస్తారు. ఇక్కడి వాతావరణ పరిస్థితులకనుగుణంగా జెనెటిక్‌ బ్రీడింగ్, జెనెటిక్‌ ప్రాసెసింగ్‌ చేస్తారు.   ఇక లక్షలు ఖర్చుపెట్టాల్సిన అవసరం ఉండదు..   బ్రూడ్‌స్టాక్‌ మల్టిప్లికేషన్‌ సెంటర్ల ఏర్పాటు ద్వా­రా మన తల్లి రొయ్యను మనమే పునరుత్పత్తి చేసుకునేందుకు వీలుంటుంది. దీనివల్ల అమెరికా నుంచి లక్షలు ఖర్చుపెట్టి తల్లి రొయ్యలను దిగుమతి చేసుకోవాల్సిన అవసరం ఇక ఉండదు.    – హరినారాయణరావు,  ప్రధాన కార్యదర్శి, ఆలిండియా  ష్రింప్‌హేచరీస్‌ అసోసియేషన్‌ 

సాక్షి, తాండూరు(వికారాబాద్‌): తన భార్యకు పిల్లలు పుట్టడంలేదని, రెండో పెళ్లి చేసుకుంటానని యువతికి మాయమాటలు చెప్పి లొంగదీసుకుని మోసం చేసిన వీఆర్వోపై తాండూరు పట్టణ పోలీసులు కేసు నమోదు చేశారు. బుధవారం పట్టణ సీఐ రాజేందర్‌రెడ్డి తెలిపిన ప్రకారం.. బషీరాబాద్‌ మండలం దామర్‌చేడ్‌ గ్రామానికి చెందిన బోయ కార్తీక్‌ పెద్దేముల్‌ మండలంలో వీఆర్వోగా విధులు నిర్వర్తిస్తున్నాడు. ఆయనకు ఇంతకుముందే వివాహం కాగా, సంతానం లేదు. దీంతో రెండో పెళ్లి చేసుకుంటానని చెప్పి ఓ యువతికి మాయమాటలు చెప్పి ఆమెపై పలుమార్లు లైంగికదాడికి పాల్పడ్డాడు. అయితే ఇటీవల తన భార్యకు సంతానం కలగడంతో, సదరు యువతితో మాట్లాడటం మానేశాడు. పెళ్లి చేసుకునేది లేదని ఆమెకు తేల్చి చెప్పాడు. దీంతో మోసపోయానని గ్రహించిన బాధితురాలు  కార్తీక్, అతనికి సహకరించిన కుటుంబ సభ్యులపై పట్టణ పోలీసులకు ఫిర్యాదు చేసింది. ఈమేరకు సీఐ కార్తీక్‌తో పాటు అతని కుటుంబ సభ్యులు మరో ఆరుగురిపై కేసు నమోదు చేసినట్లు చెప్పారు. చదవండి: బయటపడ్డ బండారం: అత్యాశకు పోయి.. ఆస్తి మొత్తం పోగొట్టుకుని..


 సాక్షి, సిటీబ్యూరో: మారిన జీవనశైలి, ఆహరపు అలవాట్లు, ఆలస్యపు వివాహాల వల్ల మహిళల సంతాన సామర్థ్యంపై తీవ్ర ప్రభావం చూపుతున్నాయని నోవా ఇన్‌ఫెర్టిలిటీ సెంటర్‌కు చెందిన డాక్టర్‌ సరోజ కొప్పాల చెప్పారు. మద్యం, పొగాకు ఉత్పత్తుల వాడకం వల్ల అండాశయ నిల్వలు పడిపోవడంతో పాటు, ఎగ్స్‌కౌంట్‌ తగ్గడానికి కారణం అవుతున్నట్లు తెలిపారు. గురువారం ఆస్పత్రిలో ఏర్పాటు చేసిన విలేకరుల సమావేశంలో ఆమె మాట్లాడుతూ..
 జీవనశైలిలో మార్పు వల్ల రజస్వల మొదలు గర్భం ధరించడం, నెలసరి రుతుక్రమం వరకు ఇలా అన్ని సమస్యాత్మకంగా మారుతున్నాయన్నారు. తల్లి కావాలని ఆశపడే వారికి ఇదో పెద్దశాపంగా మారిందన్నారు.  సంతానలేమి సమస్యలతో బాధపడుతున్న వారికి తమ వద్ద చక్కని పరిష్కార మార్గం ఉందని చెప్పారు. జీవకణ దానం ద్వారా పిల్లలు పుట్టే అవకాశం ఉందన్నారు.


 లీగల్ కౌన్సెలింగ్
 
 మేడం, నా వయసు 28 సంవత్సరాలు. పోలీసు డిపార్టుమెంట్‌లో పని చేస్తున్నాను. నా సమస్య వివరించాలంటే సిగ్గుగా, భయంగా ఉంది. భయమెందుకంటే 498 ఎ గురించి. పైగా నేను పోలీస్ డిపార్ట్‌మెంట్ వాడిని. అందరూ నన్నే దుమ్మెత్తి పోస్తారు. సిగ్గెందుకంటే నా వివాహమై పదినెలలైంది. ఇంతవరకూ మా మధ్య శారీరక బంధం ఏర్పడలేదు. కొత్తకదా భయపడుతోందేమో అని కొన్ని నెలలు సర్దుకున్నాను. ఎవ్వరికీ చెప్పలేదు. తనలో చాలా ఫ్రెండ్లీగా మెలిగాను. ఎన్ని రకాలుగా ప్రయత్నించినా మా మధ్య ఆ చర్య కష్టమైంది. చివరికి ఆమెను ఎంతో అనునయించి డాక్టర్ దగ్గరకు తీసుకుని వెళ్లాను. లేడీ డాక్టర్ చెప్పిన విషయం విని నాకు నోటమాట రాలేదు. నా కలలు కుప్పకూలాయి. ఒకవైపు కోపం, మరోవైపు ఆవేదన. ఆమెకు అసలు జననాంగాలు అభివృద్ధి చెందలేదట. గర్భసంచి కూడా లేదట. పిల్లలమాట అటువంచి సంసార జీవితమే సాధ్యం కాదట. నాకే ఎందుకిలా జరిగిందో ఏం పాపం చేశానో అర్థం కావట్లేదు. పైగా నా భార్య ఇంతవరకూ మెచ్యూర్ కూడా కాలేదని, సంసారం, సంతానం అసాధ్యమని లేడీ డాక్టర్ రిపోర్ట్ ఇచ్చారు.సెకండ్ ఒపీనియన్‌లో కూడా అలాంటి రిపోర్ట్‌లే వచ్చాయి. సిగ్గుతో, అవమానంతో, భయంతో చచ్చిపోతున్నాను. ఆడవాళ్లకు మంచి సలహాలు ఇస్తారుగా. మరి నాకేం చెప్తారో, దయచేసి చెప్పండమ్మా! - వై.కె.శ్రీనివాస్, పామర్రు
 దిగులు పడకండి శ్రీనివాస్, ఇందులో మీ తప్పేమీ లేదు. మీ భార్య, ఆమె తల్లిదండ్రులు మిమ్మల్ని మోసం చేశారు. ఎందుకంటే అసలు రజస్వలే కాని పిల్లకు పెళ్లి చేయడం వారు చేసిన తప్పు. మీ వివాహం జరిగి పదినెలలు అయిందంటున్నారు కదా, మీ వివాహాన్ని కోర్టు ద్వారా రద్దు చేసుకోవచ్చు. మీ కేసులో మీ భార్య ఇంపొటెంట్. అంటే సంసారానికి, సంతానానికి అర్హురాలు కాదు కాబట్టి సెక్షన్ 12, హిందూ వివాహ చట్టం 1955ను అనుసరించి, మీ వద్దనున్న మెడికల్ రిపోర్టుల ఆధారంగా మీ వివాహాన్ని రద్దు పరుచుకోండి. అంటే నల్ అండ్ వాయిడ్‌గా డిక్లేర్ చేయించుకోండి. ఈ కేసు వివాహమైన సంవత్సరంలోగా వేయాలి. త్వరపడండి. వారు మీమీద 498 ఎ పెట్టడానికి అవకాశం లేదు కాబట్టి ఆందోళన అవసరం లేదు.
  
 
 మేడమ్, నా పేరు సల్మా. మేము ముస్లిమ్స్. నా వివాహమై 15 సంవత్సరాలయింది. నా భర్త ఎలక్ట్రీషియన్‌గా పని చేసేవారు. మాకు ఒక బాబు. హై స్కూల్‌లో చదువుకుంటున్నాడు. ఐదేళ్ల కిందట మావారు ఇంట్లో ఎవ్వరికీ చెప్పకుండా ఎటో వెళ్లిపోయారు. ఆయనకు చెడు అలవాట్లు అనేకం. బాగా తాగడం, పేకాటాడటం, అప్పులు చేయడం మొదలైనవి నేను అతని ఆచూకీ గురించి ఎన్నో ప్రయత్నాలు చేశాను. మా అత్తామామలు కూడా ప్రయత్నించారు. కానీ ఫలితం శూన్యం. మిస్సింగ్ కేసు పెట్టి నాలుగేళ్లైంది. అదీ తేలలేదు. నాకు దుబాయ్‌లో ఆయాగా ఉద్యోగం వచ్చింది. నా బతుకుతెరువు నేను చూసుకోవాలి. నా బాబును చదివించుకోవాలి. బాబు బాధ్యత నా తలిదండ్రులకు అప్పగించి, ఉద్యోగానికి వెళ్లాలి. నేను విడాకులు తీసుకుని దుబాయికి పోవాలి. నేను ఏమి చేయాలో సలహా ఇవ్వగలరు. నాకు మా చట్టం పట్ల సరియైన అవగాహన లేదు.
  మీరు తప్పకుండా విడాకులు తీసుకోవచ్చు. ఆచూకీ తెలియని భర్తకోసం ఎన్నాళ్లు ఎదురు చూస్తారు? మీకోసం ఉన్న చట్టం డిజల్యూషన్ ఆఫ్ ముస్లిం మ్యారేజెస్ యాక్ట్ 1939. అంటే ముస్లిం వివాహాల రద్దు చట్టం అన్నమాట. ముస్లిం మహిళలు ఈ చట్టాన్ని అనుసరించి వివాహం రద్దు చేసుకోవచ్చు. ఏయే కారణాల వల్ల ముస్లిం మహిళలు విడాకులు తీసుకోవచ్చా ఇందులో తెలియపరిచారు. ఒక ముస్లిం మహిళ భర్త ఆచూకీ తెలియవలసిన వారికి; అంటే కుటుంబానికి, స్నేహితులకు, బంధువులకు నాలుగు సంవత్సరాల నుండి తెలియకుండా ఉంటే ఆమె ఆ కారణంగా కోర్టులో విడాకుల దావా వేయవచ్చు. ప్రతివాదులుగా భర్త దగ్గరి బంధువులకు, వారసులుంటే వారికి నోటీసు ఇచ్చి, దావా వేయాలి. ప్రతివాదుల వాదనలు విన్న ఆరునెలల తర్వాత మాత్రమే అమలులోకి వస్తుంది. ఈ ఆరునెలల కాలంలో భర్త స్వయంగా కానీ, ఏజెంట్ ద్వారా కానీ కోర్టు ముందు హాజరై, తన భార్యతో వైవాహిక జీవితం గడుపుతానని కోర్టును సంతృప్తి పరిచినప్పుడు కోర్టు ఆ డిక్రీని రద్దు పరిచే అవకాశం ఉంది.
  
 ఇ.పార్వతి
 అడ్వొకేట్ అండ్ ఫ్యామిలీ కౌన్సెలర్
  


 బ్రౌన్ ఫ్యాట్ మంచిదే!: 
 ప్రత్యేక రకమైన కొవ్వు అయిన బ్రౌన్ ఫ్యాట్ మనకు మంచే చేస్తుందని ఆస్ట్రేలియా శాస్త్రవేత్తలు తేల్చారు. ఇది శరీరంలోని కేలరీలను కరిగించి వేడిని పుట్టిస్తుందని, పెద్దల్లో బ్లడ్ షుగర్‌లో నిలకడకు వీలుందట.
  
 
 ప్రేమ హార్మోన్!: 
 పోస్ట్-ట్రామాటిక్ స్ట్రెస్ డిజార్డర్‌తో బాధపడే పురుషులకు సరైన మోతాదులో ఆక్సిటోసిన్‌ను ఇస్తే అది ప్రేమ హార్మోన్‌లా పనిచేస్తుందని, ఒత్తిడితగ్గి భాగస్వామిపై మక్కువను పెంచుకుంటారని తాజా అధ్యయనంలో కనుగొన్నారు.
 
 రెండో సంతానం లేకపోతే..: 
 రెండో సంతానం కావాలనుకునేవారు.. ఇంట్లో మొదటి సంతానానికి ఊబకాయం రాకుండా ఉండాలంటే వారికి 2-4ఏళ్లు వచ్చేలోగా ఇంకొకరిని కనాలట. మొదటి సంతానం ఆహార అలవాట్లలో మార్పు రావడం ఒకటి కాగా రెండో సంతానం జన్మించడం వల్ల అతనితో ఆటలాడుకుంటూ గడపడం వల్ల కూడా ఊబకాయంరాదని మిచిగాన్ వర్సిటీ పరిశోధకులు చెబుతున్నారు.
  
 ఆదాయం పెరిగితే ఆనందమేనా?: 
 ఆదాయం పెరిగినా కొందరి జీవితంలో ఆనంద ఉండదని పరిశోధకులు కనుగొన్నారు.  18 వేల మందిపై తొమ్మిదేళ్లపాటు ఆదాయ మార్పులు, జీవితంలో తృప్తి అనే అంశంపై సుదీర్ఘంగా అధ్యయనం చేసి ఈ విషయాన్ని గుర్తించారు. వరుసగా ఆదాయం పెరగడమనేది తమకు అంత ముఖ్య విషయం కాదని, దాంతో గొప్ప సంతోషమేం లేదన్నట్లు చాలామంది చెప్పారు.
  
 సీసంతో స్థూలకాయం: 
 జీవితంలో తొలి దశంలో సీసానికి ప్రభావితం కావడం వల్ల స్థూలకాయం వచ్చే అవకాశాలు ఎక్కువగా ఉంటాయని తాజా అధ్యయనం కనుగొంది. ఇది గట్ మైక్రోబయోటాపై ఎక్కువ ప్రభావం చూపుతుందని పరిశోధకులు చెప్పారు.
  
 నడకతో అల్జీమర్స్‌కు చెక్: 
 నడక, ఈత, తోటపని, డ్యాన్సింగ్ చేస్తూ చురుగ్గా ఉండే పెద్ద వయస్సు వారికి అల్జీమర్స్ సోకే ముప్పు తక్కువగా ఉంటుందని శాస్త్రవేత్తలు గుర్తించారు.  మెదడులో గ్రేమ్యాటర్ ప్రభావం ఎక్కువై జ్ఞాపకశక్తి పెరుగుతుంది.
 
 ఆతురతతో ఉంటే: 
 ఆతరుతతో ఉండే వారు ప్రపంచాన్ని విభిన్నంగా అర్థం చేసుకుంటారని తాజా అధ్యయనంలో తేలింది. అలాంటివారు సాధారణ వ్యక్తులతో పోలిస్తే సురక్షిత, ప్రమాద పరిస్థితులను సరిగా గుర్తించలేదు.


 హై-బీపీ.. మందులు వాడాలా?
 
 హోమియో కౌన్సెలింగ్
 నా వయసు 28. పెళ్లయి, మూడేళ్లయింది. ఇంకా సంతానం లేదు. బహిష్టు సమయంలో విపరీతమైన కడుపునొప్పితో బాధపడుతున్నాను. డాక్టర్ దగ్గరకు వెళితే నాకు డిస్మనోరియా అని చెప్పి కొన్ని మందులు ఇచ్చారు. అదేమైనా ప్రమాదకరమైన జబ్బా? దీనికి హోమియోలో చికిత్స ఉందా?
  - బి.శ్రీదేవి, రాజమండ్రి
  స్త్రీల ఆరోగ్యసమస్యలలో నెలసరి సమస్యలు ముఖ్యమైనవి. ఎక్కువశాతం స్త్రీలు పిరియడ్స్ సమయంలో పొత్తి కడుపులో నొప్పితో బాధపడుతుంటారు. దీనిని బహిష్టునొప్పి (డిస్మనోరియా) అంటారు. డిస్మనోరియా అన్ని వయసులలోని వారికీ ఉండే సమస్యే అయినప్పటికీ యుక్తవయస్కులలో ఎక్కువ.
 
 లక్షణాలు: డిస్మనోరియా ముఖ్యంగా మూడు రకాలు. మొదటిరకంలో బహిష్టుకు మూడు నుంచి ఐదురోజుల ముందు నుంచే పొత్తికడుపు, నడుము భాగంలో నొప్పి మొదలవుతుంది. ఇది రుతుస్రావం మొదలయ్యాక మందులు వాడినా, వాడకున్నా తగ్గిపోతుంది. దీనిని కంజెస్టివ్ డిస్మనోరియా అంటారు. రెండవ రకంలో తీవ్రమైన నొప్పి, వాంతులు, శరీరం వణకడం, తలతిరగడం వంటి లక్షణాలు కనపడవచ్చు. దీనిని స్పాస్మోడిక్ డిస్మనోరియా అంటారు. మూడవరకంలో విపరీతంగా నొప్పి, రక్తస్రావంలో పెద్దపెద్ద గడ్డలు ఉంటాయి. దీనిని మెంబ్రేనస్ డిస్మనోరియా అంటారు.
  
 కారణాలు: గర్భాశయం చుట్టూ ఉన్న కండరాల్లో సరైన సంకోచ వ్యాకోచాలు జరగకపోవడం, గర్భాశయం ముఖద్వారం చిన్నదిగా లేదా ముడుచుకుని ఉండటం వల్ల స్రావం సాఫీగా జరగక నొప్పి వస్తుంది. కొందరిలో యోని ముఖద్వారం చిన్నదిగా ఉండటం వల్ల స్రావం సరిగ్గా బయటకు రాక చిన్నచిన్న గడ్డల రూపంలో రుతుస్రావం వెలువడి నొప్పి వస్తుంది. గర్భాశయం ఆకృతిలోనూ, పరిమాణంలోనూ  తేడాలవల్ల, గర్భాశయం వెనుకకు తిరిగి ఉండటం వల్ల, గర్భాశయంలో గడ్డలుండటం, చీము చేరడం, అండాశయంలో కంతులు పెరగడం, గర్భనిరోధక ఔషధాల సేవనం, గర్భనిరోధక పద్ధతులను పాటించడం, మానసిక ఆందోళన, హార్మోన్ల అసమతౌల్యతల వల్ల కూడా నొప్పి కలిగే అవకాశాలు ఉంటాయి.
  
 హోమియో చికిత్స: పాటిజివ్ హోమియోపతిలో కాన్‌స్టిట్యూషన్ పద్ధతిలో మీ సమస్యకు శాశ్వత పరిష్కారం లభిస్తుంది.
  
 డాక్టర్ ఎ.ఎం. రెడ్డి
 సీనియర్ డాక్టర్
 పాజిటివ్ హోమియోపతి
 హైదరాబాద్
  
 కిడ్నీ కౌన్సెలింగ్
 నా వయసు 33 ఏళ్లు. నాకు ఎలాంటి ఇబ్బందులూ లేవు గానీ... ఈ మధ్య జ్వరం వచ్చింది. డాక్టర్‌ను సంప్రదించినప్పుడు ఆయన పరీక్షలు చేశారు. అప్పుడు నా బీపీ 170/120 ఉందనీ, మందులు వాడాలని చెప్పారు. మందులు వాడకుండా ఉంటే భవిష్యత్తులో ఏమైనా సమస్యలు వచ్చే అవకాశం ఉందా?                                    
   - సత్యనారాయణ, విజయవాడ
  మీ వయసు వారికి ఏ కారణం లేకుండా హైపర్‌టెన్షన్ (బీపీ సమస్య) రావడం చాలా అరుదు. కానీ నలభై ఏళ్లలోపు బీపీ ఇంత ఎక్కువగా ఉంటే మూత్రపిండాలకు (కిడ్నీలకు) సంబంధించిన సమస్య ఏదైనా ఉందా అని చూడాలి. దీనికోసం ఒకసారి మూత్రపరీక్ష, అల్ట్రాసౌండ్ అబ్డామిన్ స్కానింగ్, క్రియాటినిన్ వంటి పరీక్షలతో పాటు ఒకసారి డాక్టర్‌ను సంప్రదించి, అవసరమైన ఇతర పరీక్షలూ చేయించుకోండి. వాటి ద్వారా అసలు మీకు బీపీ అంతగా పెరగడానికి కారణాలు తెలుసుకోవాలి. బయటకు కనిపించేలా ఏ లక్షణాలూ లేనప్పటికీ బీపీ మందులు తప్పనిసరిగా వాడాలి. లేకపోతే భవిష్యత్తులో కిడ్నీలు దెబ్బతినే అవకాశం ఉంది. అంతేగాక... ఆహారంలో ఉప్పు చాలా తగ్గించి వాడటం అవసరం. ఇక స్థూలకాయం ఎక్కువగా ఉన్నవాళ్లు బరువు తగ్గించుకోవాలి. పొగతాగే అలవాటు ఉంటే తక్షణం మానేయండి.
  
 నా వయసు 25 ఏళ్లు. రెండేళ్లుగా అప్పుడుప్పుడూ మూత్రం ఎరుపు రంగులో వస్తోంది ఇలా రెండు నుంచి మూడు రోజుల పాటు వస్తోంది. ఆ తర్వాత తగ్గిపోతోంది. నొప్పి లేకపోవడంతో ఇంతవరకూ పట్టించుకోలేదు. దీని వల్ల కిడ్నీలు దెబ్బతినే అవకాశం ఉందా?                                               - విశ్వప్రసాద్, కందుకూరు
  సాధారణంగా కిడ్నీలో రాళ్లు, ఇన్ఫెక్షన్ ఉండటం వల్ల కొందరికి ఇలాంటి సమస్య రావచ్చు. మీరు ఒకసారి అల్ట్రాసౌండ్ స్కానింగ్, యూరిన్ ఎగ్జామినేషన్ వంటి పరీక్షలు చేయించాలి. దాంతో మీ సమస్యకు అసలు కారణం ఏమై ఉంటుందో తెలుస్తుంది. అందుకే మీరు ఒకసారి డాక్టర్‌ను  కలవడం మంచిది. సమస్య నిర్ధారణ అయితే దానికి తగిన మందులు వాడవచ్చు. మీకు సాధారణ ఇన్ఫెక్షన్ ఉంటే అది మామూలు యాంటీబయాటిక్ మందులతోనే తగ్గిపోతుంది. మీరు ఒకసారి యూరిన్‌లో ప్రోటీన్లు పోతున్నాయా అనే విషయాన్ని తెలుసుకునే పరీక్షలూ చేయించాలి.
  
 డాక్టర్ విక్రాంత్‌రెడ్డి
 కన్సల్టెంట్ నెఫ్రాలజిస్ట్,
 కేర్ హాస్పిటల్స్, బంజారాహిల్స్, హైదరాబాద్
  
 లివర్ కౌన్సెలింగ్
  
 నా వయసు 65 ఏళ్లు. కీళ్ల నొప్పులు చాలా ఎక్కువగా ఉన్నాయి. నా సమస్యకు  పరిష్కారం చెప్పండి.
  - శ్రీనాధరావు, కమలాపురం
  కీళ్ల నొప్పులలో చాలా రకాలు ఉన్నాయి. ఎముకలూ, దానిపైన రక్షణగా ఉండే చిగురు ఎముక (కార్టిలేజ్) అరగడం వల్ల కీళ్లనొప్పులు, వాపు వస్తాయి. ఈ కండిషన్‌ను ఆర్థరైటిస్ అంటారు. ఈ రకాలలో ఇప్పటికి వందకు పైగా గుర్తించారు. తమ రోగ నిరోధక వ్యవస్థే తమ ఎముకలపై ప్రతికూలంగా వ్యవహరిస్తుంది. ఈ సమస్యను ‘రుమటాయిడ్ ఆర్థరైటిస్’ అంటారు. ఒక్కోసారి ఏదైనా ప్రమాదంలో గాయపడినా, బ్యాక్టీరియల్, వైరల్ ఇన్ఫెక్షన్ల తర్వాత కూడా ఆర్థరైటిస్ రావచ్చు. మీకు ఏదైనా ప్రమాదం జరిగిందా లేక ఏవైనా జబ్బు వచ్చి తగ్గాక ఈ పరిణామం సంభవించిందా అన్న వివరాలు లేవు. ఇక ఆర్థరైటిస్ ఉన్నవారిలో కీళ్లు నొప్పిగా ఉండటంతో పాటు, ఆ ప్రాంతం ఎర్రబారడం, వేడిగా అనిపించడం, బిగుతుగా అనిపించడం వంటి లక్షణాలూ కనిపించవచ్చు. మీ వయసులో ఉన్నవారికి ఆర్థరైటిస్ మామూలే అయినా ఇప్పుడు అన్ని వయసుల వాళ్లలోనూ (పిల్లల్లోనూ) ఇది కనిపిస్తోంది. మహిళల్లో మరీ ఎక్కువ. (మహిళల్లో 24.3 శాతం ఆర్థరైటిస్‌తో బాధపడుతుంటే పురుషుల్లో ఇది 18.7 శాతం మాత్రమే). ఇక స్థూలకాయం కూడా ఆర్థరైటిస్ వచ్చే అవకాశాలను మరింత పెంచుతుంది. నివారణ: ఆర్థరైటిస్‌ను నివారించడానికి ముందు నుంచే అన్ని కీళ్లూ చురుగ్గా కదిలేలా వాకింగ్, సైక్లింగ్ వంటి వ్యాయామాలు చేయాలి. దీనివల్ల కీళ్లతో పాటు శరీర సంపూర్ణ ఆరోగ్యమూ మెరుగుపడుతుంది. రోజుకు కనీసం 30 నిమిషాలకు తగ్గకుండా వ్యాయామం చేయాలి. వారంలో మీరు వ్యాయామం చేసిన సమయం కనీసం 150 నిమిషాలకు తగ్గకుండా జాగ్రత్త తీసుకోవాలి. అయితే ఇక్కడ శరీరం సహకరిస్తున్నంత  వ్యాయామమే చేయాలి తప్ప... దాన్ని తీవ్రమైన శ్రమకు గురిచేసేలా మీ ఎక్సర్‌సైజ్ ఉండకూడదు. బరువు పెరగకుండా జాగ్రత్తలు తీసుకోవాలి. ఈ సమస్యకు ఎన్‌ఎస్‌ఏఐడీ, డీఎమ్‌ఏఆర్‌డీ, బయాలాజిక్ రెస్పాన్సెస్ అనే మందులు అందుబాటులో ఉన్నాయి. ఇక మీరు ఒకసారి మీ ఫిజిషియన్‌ను లేదా ఆర్థోపెడిక్ సర్జన్‌ను కలిసి, అవసరమైన పరీక్షలు చేయించుకొని తగిన  చికిత్స తీసుకోండి.
  
 డాక్టర్ ప్రవీణ్ రావు
 సీనియర్ ఆర్థోపెడిక్ - జాయింట్ రీప్లేస్‌మెంట్ సర్జన్
 యశోద హాస్పిటల్స్
 సికింద్రాబాద్
  


 జీవన విధానం మారడంతో సరికొత్త సమస్యలు పుట్టుకొస్తున్నాయి. ప్రస్తుత యువత జీవన శైలి మారిపోయింది. అంతేకాకుండా వారు  తీవ్ర మానసిక ఒత్తిడికి లోనవుతున్నారు. ఇవన్నీ వారి  దాంపత్య జీవితంపై తీవ్ర ప్రభావం చూపుతున్నాయి. ముఖ్యంగా మగవాళ్లు సరికొత్త సమస్యలతో బాధపడుతున్నారు. మహిళలతోపాటు మగవారిలో కూడా సంతాన సాఫల్య సమస్యలు తలెత్తుతున్నాయి. పాశ్చాత్య దేశాల్లోలాగే ఇప్పుడు మన దగ్గర కూడా పని సంస్కృతి విపరీతంగా పెరిగిపోయింది. తమ రంగంలో రాణించడం కోసం రాత్రి-పగలు తేడా లేకుండా కృషి చేయడం  సర్వసాధారణమైపోయింది. దాంతో సరైన వయసులో పెళ్లి కాక, పెళ్లైనవాళ్లలో కూడా మానసిక ఒత్తిడి విపరీతంగా పెరిగి సంతానం కలగడానికి అవసరమైన హార్మోన్ల స్రావాలు సరిగా జరగక, సమస్యలు తలెత్తులున్నాయి. సంతానలేమితో బాధపడేవారిలో మగవాళ్ల సంఖ్య క్రమంగా పెరుగుతోంది.
 
 సంతానం కలగలేదంటే అందుకు మహిళను కారణంగా చూపడం మన సమాజంలో పరిపాటి. ఇది కేవలం అపోహ మాత్రమే. సంతానలేమికి కారణాలన్నవి అటు మహిళలలోనూ, ఇటు పురుషులలోనూ లేదా ఒక్కోసారి ఇద్దరిలోనూ ఉండే అవకాశం ఉంది.అసలు పురుషుల్లో సంతానలేమి ఎందుకు వస్తుంది? ఈ సమస్యను నిరోధించే మార్గాలేంటి? అనేది పరిశీలిస్తే ... కాలంతో పాటు పరిగెడుతున్న జీవితాలు, నిత్యం పలుసమస్యలతో తీవ్ర మానసిక ఒత్తిడికి గురికావడం కారణంగా  సంతాన లేమి సమస్య తెలెత్తుతున్నట్లు నిర్ధార్ధించారు.  మన జీవనశైలితో పాటు కాలుష్యం, వాతావరణం, పొగతాగడం, మద్యం సేవించడం, బిగుతైన దుస్తులు ధరించడం, అధికబరువు, మానసిక ఒత్తిడి, కొన్నిరకాల మందులు, ఆరోగ్యకరమైన వీర్యం ఉత్పత్తిపై ప్రభావం చూపిస్తాయి. పురుషుల్లో శుక్రకణాల సంఖ్య తగినంతగా లేకపోవడం, ఉన్నా వాటిలో తగినంత చురుకుదనం లేకపోవడం లేదా వాటి ఆకృతి బాగా లేకపోవడం వంటి లోపాలు ఉన్నప్పుడు వారి భాగస్వామికి గర్భధారణ జరగడం కష్టమే. మరికొందరి వీర్యంలో అసలు శుక్రకణాలే ఉండకపోవచ్చు. భార్యాభర్తలు ఏ గర్భనిరోధక సాధనం వాడకుండా ఒక సంవత్సర వైవాహిక జీవితం కొనసాగించిన తరువాత కూడా సంతానం కలుగకపోతే దానిని సంతానరాహిత్యం లేదా సంతానలేమి అంటారు. ఈ సమస్య ఇప్పుడు మగవారిలో అధికంగా పెరిగిపోతోంది. ఆధునిక జీవన విధానం మగవారిలో ఈ సమస్యను పెంచుతోంది. సంతానం కలగచేసే సామర్థ్యం పురుషుల్లో క్షీణిస్తోంది. వారిలో వీర్య సామర్థ్యం తగ్గిపోతోంది. దానినే మేల్‌ ఫెర్టిలిటిగా పేర్కొంటున్నారు. పురుషుల్లో వీర్యకణాల సంఖ్య తగినంతగా లేకపోవడం కూడా సంతానలేమికి కారణం కావచ్చు.  ప్రతి మగవారిలో సాధారణంగా 3-6 మిల్లీలీటర్ల వీర్యం ఉత్పత్తి అవుతుంది. ఈ వీర్యంలో దాదాపు 60 నుండి 150 మిలియన్ల వీర్యకణాలు ఉంటాయి. ప్రతి వీర్యకణానికి తల, మెడ, తోక అనే భాగాలు ఉంటాయి. 80 శాతం వీర్యకణాలు మామూలు ఆకృతిని కలిగి వుంటాయి. మామూలు వీర్యంలో దాదాపు 60 నుంచి 70 శాతం చురుకుగా కదిలే వీర్యకణాలుంటాయి. పైన చెప్పిన విధంగా వీర్యం వీర్యకణాలను కలిగిఉంటే దానిని సంతానం కలిగించే వీర్యంగా అభివర్ణించవచ్చు. సాధారణంగా సంతాన సాఫల్య సమస్యలను పరిశీలిస్తే మగవారిలో 40 శాతంగా ఉంటుంది. ఇద్దరిలో కలిపి 10 శాతం సమస్యలు ఉంటే, తెలియని కారణాలు 10 శాతం ఉంటాయి.
 
 మగవారిలో ఇన్‌ఫెర్టిలిటీ సమస్య తలెత్తడానికి పలు కారణాలున్నాయి. హార్మోన్ల లోపం, మానసిక ఒత్తిడి, వెరికోసిల్ ఒక రకం కారణాలు ఐతే,  ధూమపానం, మద్యపానం మరోరకం కారణాలుగా వైద్యులు నిర్ధారించారు.  బీజంలో వివిధ ఇబ్బందులు, అంగస్థంభన సమస్యలు,  పుట్టుకతో వచ్చే లోపాల వల్ల ఇన్‌ఫెర్టిలిటీ తలెత్తుతుంది. ఇన్‌ఫెర్టిలిటీ సమస్యను తెలుసుకోవడానికి పలు పరీక్షలున్నాయి. ఆ పరీక్షల ద్వారా కారణం తెలుసుకొని వైద్యుల సలహాపై తగిన మందులు వాడితే ఫలితం ఉండే అవకాశం ఉంటుంది.