కళ్యాణదుర్గానికి చెందిన ఓ ప్రభుత్వ ఉపాధ్యాయుడు నాలుగు నెలల క్రితం ‘సంకల్ప సిద్ధి మార్ట్‌’ గురించి తెలుసుకుని రూ.5 లక్షలకు పైగా డిపాజిట్‌ చేశాడు. ఆకర్షణీయమైన కమీషన్‌తో ఆదాయం పొందవచ్చని.. తన తరఫున మరో పది మందిని సభ్యులుగా చేర్చి వారితోనే రూ.లక్షల్లో డిపాజిట్‌ చేయించారు. ఇటీవల మార్ట్‌ లావాదేవీలు స్తంభించిపోవడంతో కంగుతిన్నాడు. తనకు రావాల్సిన డబ్బు కోసం ఎదురు చూస్తున్నాడు.  కళ్యాణదుర్గం పట్ణంలో ఆటు నడుపుకుంటూ జీవనం సాగించే యువకుడు చుట్టుపక్కల వారు, స్నేహితులతో సంకల్ప సిద్ది మార్ట్‌లో రూ.20 వేల దాకా డిపాజిట్‌ చేయించాడు. ఆదాయం వస్తుందని ఆశపడితే తీవ్ర నిరాశ ఎదురైంది. మార్ట్‌ లావాదేవీలు నిలిపేశారని తెలుసుకుని లబోదిబోమంటున్నాడు.  ఇలా వీరిద్దరే కాదు. విజయవాడ కేంద్రంగా నడిచిన ‘సంకల్ప సిద్ధి మార్ట్‌’ గొలుసుకట్టు వ్యాపారంలో కళ్యాణదుర్గం నియోజకవర్గ వ్యాప్తంగా వందలాదిమంది డిపాజిట్లు పెట్టి నిలువునా మోసపోయారు.   కళ్యాణదుర్గం(అనంతపురం జిల్లా): గొలుసుకట్టు (చైన్‌లింక్‌) వ్యాపారంలో మరో సంస్థ బోర్డు తిప్పేసింది. మీ సొమ్ముకు రెట్టింపు మొత్తం పొందవచ్చని, ఆన్‌లైన్‌ షాపింగ్‌ ఉచితంగా చేసుకోవచ్చని దాదాపు ఐదు రకరకాల స్కీంలతో ‘సంకల్ప సిద్ధి మార్ట్‌’ సంస్థ మొబైల్‌ యాప్‌ రూపొందించింది. ఇంకేముంది ఎంతోమంది తమ ఆదాయం పెంచుకోవడం కోసం మార్ట్‌ వైపు ఆకర్షితులయ్యారు. డిపాజిట్‌గా వెయ్యి  రూపాయలు కడితే.. రోజుకు పది రూపాయల  కమీషన్, తన తరఫున మరొకరితో డిపాజిట్‌ చేయిస్తే మరో ఐదు రూపాయలు ఇస్తామని తెలిపింది. అందరికీ అందుబాటులోనే డిపాజిట్‌ మొత్తం ఉందని భావించి కళ్యాణదుర్గం నియోజకవర్గంలో కూలీనాలి చేసుకునే వారి నుంచి ఆటో డ్రైవర్లు, వ్యాపారులు, ఉద్యోగులు నమ్మి డిపాజిట్‌ చేశారు. ప్రారంభంలో ఆ సంస్థ చెప్పినట్టుగానే రోజువారీ కమీషన్‌ ఖాతాలకు జమ చేస్తుండటంతో డిపాజిట్‌దారులకు నమ్మకం కలిగింది. అలా సాగిపోతున్న క్రమంలో ఉన్నపలంగా యాప్‌ పనిచేయలేదు. ఈ రోజు పనిచేస్తుంది.. రేపు పని చేస్తుందని ఎదురుచూస్తుండగా విజయవాడలో ‘సంకల్ప సిద్ధి మార్ట్‌’ నిర్వాహకులను పోలీసులు అదుపులోకి తీసుకున్నారు. అప్పుడు డిపాజిట్‌దారులు తాము మోసపోయామని బోధపడింది. కష్టపడి సంపాదించి మార్ట్‌లో పెట్టిన సొమ్ము తిరిగి వస్తుందో రాదో అని ఆందోళన చెందుతున్నారు. డిపాజిట్లు రూ.50 కోట్లు!..  కళ్యాణదుర్గం నియోజకవర్గంలో దాదాపు 600 మంది ‘సంకల్ప సిద్ధి మార్ట్‌’లో డిపాజిట్‌ చేశారు. రూ.1000 మొదలుకొని లక్షలాది రూపాయల వరకు పెట్టుబడులు పెట్టారు. ఇందులో అత్యధికంగా ప్రభుత్వ ఉపాధ్యాయులు రూ.లక్ష నుంచి రూ.5 లక్షల వరకు పెట్టుబడి పెట్టినట్లు సమాచారం. ఇలా మొత్తంగా ఈ ప్రాంతంలోనే రూ.50 కోట్ల మేర పెట్టుబడులు పెట్టినట్లు ప్రాథమిక సమాచారం.   మాయ చేశారిలా..  స్కీమ్‌ –1 : సంకల్పసిద్ధి మార్ట్‌లో రూ.1000 డిపాజిట్‌ చేస్తే రోజుకు రూ.10 కమీషన్‌ తో పాటు నెలలోపు రూ.300 విలువ చేసే కిరాణా సరుకులు ఆన్‌లైన్‌ ద్వారా పొందవచ్చు.   స్కీమ్‌ –2 : రూ.లక్ష డిపాజిట్‌ చేస్తే రోజుకు రూ.1000 చొప్పున 300 రోజుల్లో రూ.3 లక్షలు ఇస్తాం. దీంతో పాటు అదనంగా తన ఖాతా ద్వారా చేర్పించిన సభ్యుల తరపున కమీషన్‌ కూడా జమ అవుతుంది.   స్కీమ్‌ –3 : రూ.లక్ష నగదు చెల్లిస్తే రూ.లక్ష విలువైన బంగారం ఇవ్వడంతో పాటు రోజుకు రూ.100 చొప్పున 300 రోజుల్లో రూ.30 వేలు ఇస్తామని మొబైల్‌కు మెసేజ్‌లు.   స్కీమ్‌ –4 : రూ.2.5 లక్షలు ఇస్తే 25 ఎర్ర చందనం మొక్కలతో కూడిన స్థలం ఇవ్వడంతో పాటు 15 ఏళ్లకు రూ.1.75 కోట్లు వస్తాయంటూ నమ్మబలికింది.  స్కీమ్‌ –5 : రూ.5 లక్షలు చెల్లిస్తే సెంటు భూమి ఇవ్వడంతో పాటు 300 రోజుల్లో తిరిగి రూ.2.5 లక్షలు చెల్లిస్తామని మరో రకంగా కస్టమర్లకు ఆశచూపింది.  ఫిర్యాదు వస్తే పరిశీలిస్తాం  సంకల్ప సిద్ధి మార్ట్‌పై బాధితుల నుంచి ఇప్పటివరకు ఎలాంటి ఫిర్యాదూ అందలేదు. ఆన్‌లైన్‌ ద్వారా డిపాజిట్‌ చేసిన వారు ఎవరైనా ఫిర్యాదు చేస్తే దానిపై ఉన్నతాధికారులకు నివేదిస్తాం. ఫిర్యాదుపై విచారణ చేస్తాం.             – బి.శ్రీనివాసులు, డీఎస్పీ, కళ్యాణదుర్గం

న్యూఢిల్లీ: భారత రిటైల్‌ ఆభరణాల మార్కెట్లో గొలుసుకట్టు ఆభరణ విక్రయ సంస్థల వాటా వచ్చే ఐదేళ్లలో 40 శాతానికి వృద్ధి చెందుతుందని ప్రపంచ స్వర్ణ మండలి (డబ్ల్యూజీసీ) అంచనా వేసింది. 2021 చివరికే చైన్‌ స్టోర్లు రిటైల్‌ మార్కెట్లో 35 శాతం వాటాను సొంతం చేసుకున్నట్టు తెలిపింది. అంటే ఐదేళ్లలో మరో 5 శాతం వాటాను సొంతం చేసుకోనున్నట్టు తెలుస్తోంది. అగ్రగామి ఐదు రిటైల్‌ సంస్థలు వచ్చే ఐదేళ్లలో 800 నుంచి 1,000 వరకు ఆభరణాల విక్రయ కేంద్రాలను ప్రారంభిస్తాయని డబ్ల్యూజీసీ తెలిపింది. భారత్‌లో జ్యుయలరీ మార్కెట్‌ నిర్మాణంపై ఓ నివేదికను బుధవారం విడుదల చేసింది. చిన్న, చిన్న విభాగాలుగా ఈ మార్కెట్‌ విస్తరించి ఉన్నందున, మొత్తం జ్యుయలరీ సంస్థలు ఎన్ని ఉన్నాయో కచ్చితంగా అంచనా వేయడం కష్టమని అభిప్రాయపడింది. పలు వాణిజ్య సంఘాల అంచనాల ప్రకారం భారత్‌లో 5–6 లక్షల వరకు జ్యుయలరీ విక్రేతలు ఉండొచ్చని పేర్కొంది.   సానుకూలతలు.. వినియోగదారుల అనుభవం, వినూత్నమైన డిజైన్లు, హాల్‌ మార్కింగ్‌ పట్ల అవగాహన పెరగడం, మెరుగైన ధరల విధానం, సులభతర వెనక్కిచ్చేసే విధానాలు, జీఎస్‌టీ, డీమోనిటైజేషన్‌ ఇవన్నీ కూడా భారత్‌లో చైన్‌ జ్యుయలరీ స్టోర్ల వైపు కస్టమర్లు మొగ్గు చూపేలా చేసినట్టు డబ్ల్యూజీసీ వివరించింది. పెద్ద సంఖ్యలో విస్తరించి ఉన్న చిన్న ఆభరణాల విక్రేతలే ఇప్పటికీ మార్కెట్‌ను శాసిస్తున్నట్టు తెలిపింది. అయితే, గొలుసుకట్టు సంస్థల మార్కెట్‌ వాటా గత దశాబ్ద కాలంలో క్రమంగా పెరుగుతూ వస్తున్నట్టు వెల్లడించింది. ఈ పరిశ్రమలో సంఘటిత రంగం వాటా మరింత పెరిగేందుకు అవకాశాలున్నట్టు తెలిపింది.   నిర్మాణాత్మక మార్పులు ‘‘భారత రిటైల్‌ జ్యుయలరీ మార్కెట్‌ గత దశాబ్ద కాలంలో ఎన్నో నిర్మాణాత్మక మార్పులను చూసింది. విధానపరమైన ప్రోత్సాహకాలు, కస్టమర్ల ధోరణిలో మార్పు దీనికి దారితీసింది. తప్పనిసరి హాల్‌ మార్కింగ్‌ ఈ రంగంలో అన్ని సంస్థలు సమాన అవకాశాలు పొందేలా వీలు కల్పించింది. పెద్ద మొత్తంలో రుణ సదుపాయాలు, పెద్ద సంఖ్యలో ఆభరణాల నిల్వలను కలిగి ఉంటే సానుకూలతలు జాతీయ, ప్రాంతీయ చైన్‌ స్టోర్లు మరింత మార్కెట్‌ వాటా పెంచుకునేందుకు మద్దతుగా నిలుస్తాయి’’అని డబ్ల్యూజీసీ రీజినల్‌ సీఈవో సోమసుందరం పీఆర్‌ తెలిపారు. చిన్న సంస్థలు మరింత పారదర్శకమైన విధానాలు అనుసరించడం, టెక్నాలజీని అందిపుచ్చుకోవడం ద్వారా పెద్ద సంస్థలతో సమానంగా పోటీ పడడమే కాకుండా, తమ మార్కెట్‌ వాటాను కాపాడుకోవచ్చని సూచించారు. ఆన్‌లైన్‌లోనూ ఆభరణాల విక్రయాలు పెరుగుతున్నాయని, 5–10 గ్రాముల పరిమాణంలో ఉన్నవి, లైట్‌ వెయిట్, రోజువారీ ధారణకు వీలైన 18 క్యారట్ల ఆభరణాల కొనుగోలుకు వినియోగదారులు ఆసక్తి చూపిస్తున్నారని ఈ నివేదిక తెలిపింది.  

ఫుడ్‌ ఐటమ్స్‌ పేరుతో దుకాణం తెరిచారు. దాని చాటున మనీ సర్క్యులేషన్‌కు తెరతీశారు. రూ. 30వేలు పెట్టుబడి పెడితే ప్రతి నెలా రూ. 10 వేలచొప్పున పది నెలలపాటు తిరిగి ఇస్తామంటూ స్కీం ప్రారంభించారు. కొందరికి డబ్బులు తిరిగి ఇవ్వడంతో జనం ఎగబడి సభ్యులుగా చేరారు. ఆ తర్వాత సంస్థ చేతులెత్తేయడంతో వేలాది మంది రోడ్డున పడ్డారు.   సాక్షి, కామారెడ్డి: సులువుగా డబ్బులు వస్తున్నాయంటే చాలు ముందూవెనకా ఆలోచించకుండా చాలామంది ఎగబడుతుంటారు. వీరి బలహీనతను ఆసరా చేసుకుని కొందరు మోసాలకు పాల్పడుతున్నారు. అంతా అయిపోయాక గానీ తాము మోసపోయామని గుర్తించలేకపోతున్నారు. జిల్లాలో ఓ సంస్థ భారీ స్థాయిలో మోసానికి పాల్పడింది. ఒక్కసారి రూ. 30 వేలు కడితే పది నెలల్లో రూ. లక్షలు తిరిగిస్తామని నమ్మించింది. కొందరికి డబ్బులు ఇవ్వడంతో కరోనా వైరస్‌ లాగే ఈ ‘చైన్‌’ పది జిల్లాలకు విస్తరించింది. అయితే కరోనా వైరస్‌ వ్యాప్తి ప్రారంభమైన తర్వాత ఈ స్కీంకు ఆటంకాలు మొదలయ్యాయి. కొత్తగా డబ్బులు రావడం ఆగిపోవడం, డబ్బులు కట్టిన వారు కార్యాలయాల చుట్టూ తిరగడంతో వివాదం మొదలైంది. చివరకు ఓ బాధితురాలి ఫిర్యాదు మేరకు సంస్థ నిర్వాహకుడిని పోలీసులు అరెస్టు చేశారు. రికార్డులన్నింటినీ సీజ్‌ చేశారు. ఈ వ్యవహారంలో సంబంధం ఉన్న 37 మందిని ఇప్పటి వరకు అరెస్టు చేసి రిమాండుకు తరలించారు. అయితే రెండేళ్ల కాలంలో ఈ  సంస్థ రూ. 250 కోట్ల మేర సమీకరించినట్టు పోలీసులు అంచనా వేస్తున్నారు.   ఫుడ్‌ ఐటమ్స్‌ పేరుతో దందా..  2018 జనవరిలో కామారెడ్డి జిల్లా కేంద్రంలోని స్నేహపురి కాలనీలో ‘కీ నెక్ట్స్‌ ఇండియా రియల్‌ ఎస్టేట్స్, ఫుడ్స్‌ అండ్‌ యాడ్స్, బీర్షేబా ఫుడ్స్‌’ పేరుతో కార్యాలయాన్ని తెరిచారు. పిండి, రవ్వ తదితర ఫుడ్‌ ఐటమ్‌లకు సంబంధించిన వ్యాపారం అంటూ సంస్థను మొదలుపెట్టారు. దాని మాటున మనీ సర్కులేషన్‌ స్కీమ్‌కు తెరలేపారు. ఒకేసారి రూ.30 వేలు చెల్లిస్తే నెలకు రూ.10 వేల చొప్పున పది నెలల పాటు తిరిగి ఇస్తామని నమ్మించారు. అత్యాశకు పోయిన పలువురు సభ్యులుగా చేరారు. చెప్పిన ప్రకారం ప్రతి నెల ఒకటో తేదీన రూ. 10 వేల చొప్పున సంస్థ నిర్వాహకులు తిరిగిచ్చారు. ఇలా కొన్ని నెలలు సాగింది. దీంతో స్కీం వైపు చాలామంది ఆకర్షితులయ్యారు. ప్రధానంగా మహిళలు ఎక్కువ సంఖ్యలో స్కీంలో చేరారు. తమ బంధుమిత్రులందరినీ చేర్పించారు. మంచి కమీషన్‌ ఇవ్వడంతో పలువురు ఏజెంట్లు పోటీ పడి సభ్యులను చేర్పించారు. నెలనెలా డబ్బులు వస్తుండడంతో జనంలో నమ్మకం పెరిగిపోయింది. మొదట్లో తాము కట్టిన రూ.30 వేలతో ఆగకుండా రూ.10 లక్షల దాకా పెట్టుబడులు పెట్టిన వారున్నారు. రోజు కూలీ నుంచి మొదలుకుంటే ఉద్యోగులు, వ్యాపారుల దాకా చాలా మంది బీర్షేబా సంస్థలో సభ్యులుగా చేరి డబ్బులు పెట్టుబడిగా పెట్టారు.   కరోనాతో చైన్‌కు బ్రేక్‌..  కరోనాను ఎదుర్కొనేందుకు లాక్‌డౌన్‌ విధించడంతో ఈ చైన్‌కు బ్రేక్‌ పడింది. కొత్త సభ్యులు చేరకపోవడానికితోడు పాతవారు డబ్బుల కోసం తిరగడం మొదలుపెట్టారు. నిర్వాహకులు పెద్ద ఎత్తున ఆస్తులు కొనుగోలు చేసి పెట్టడం, కొత్త సభ్యులు రాకపోవడంతో డబ్బుల రొటేషన్‌కు ఇబ్బంది ఏర్పడింది. సభ్యులు డబ్బుల కోసం కార్యాలయం చుట్టూ తిరుగుతుండడంతో నిర్వాహకుడు కుటుంబ సభ్యులతో సహా కనిపించకుండాపోయాడు. కార్యాలయానికి తాళం పడడంతో డబ్బులు కట్టిన వారంతా ఆందోళనకు గురయ్యారు. ఏజెంట్ల దగ్గరికి వెళ్లి నిలదీశారు. వారూ చేతులెత్తేయడంతో కొందరు సభ్యులు పోలీసులను ఆశ్రయించారు.   పది జిల్లాలు... 27 వేల మంది సభ్యులు  మనీ సర్కులేషన్‌ స్కీంలో దాదాపు పది జిల్లాలకు చెందిన 27 వేల మంది సభ్యులుగా చేరినట్టు పోలీసులు ప్రాథమికంగా నిర్ధారించారు. కామారెడ్డి, సిరిసిల్ల, మెదక్, సిద్దిపేట, నిర్మల్, నిజామాబాద్, జగిత్యాల, కరీంనగర్, మంచిర్యాల, ఆదిలాబాద్‌ తదితర జిల్లాలకు చెందిన వారు సభ్యులుగా చేరినట్టు తెలుస్తోంది. అత్యధికంగా కామారెడ్డి, సిరిçసిల్ల జిల్లాల వారే ఉన్నారు. కూతురి పెళ్లి కోసం జమ చేసిన డబ్బులు, ఇంటి నిర్మాణం కోసం పొదుపు చేసిన సొమ్ము.. ఇలా ఎంతో మంది దాచుకున్న డబ్బులన్నింటినీ బీర్షేబాలో కట్టి మోసపోయారు. తక్కువలో తక్కువ ఒక్కో సభ్యుడు రూ. 30 వేలు పెట్టుబడి పెట్టినట్లు తెలుస్తోంది. కొందరు గరిష్టంగా రూ. 10 లక్షలవరకు పెట్టుబడి పెట్టారు. చాలా మంది బంగారం అమ్ముకుని, భూములు కుదువ పెట్టి మరీ స్కీంలో డబ్బులు కట్టారు. కూలినాలి చేసుకుని బతికే వారు సైతం అప్పులు తెచ్చి సంస్థలో సభ్యులుగా చేరారు. స్కీం నిర్వాహకుడు డబ్బులను దారిమళ్లించి అరెస్టై జైలులో ఉండగా, నమ్మి మోసపోయిన వారంతా రోడ్డున పడ్డారు. డబ్బులు తిరిగి వస్తాయన్న నమ్మకం లేకపోవడంతో ఆందోళన చెందుతున్నారు.    37 మంది అరెస్టు.. బీర్షేబాలో డబ్బులు పెట్టి మోసపోయిన బాధితులు ఒక్కొక్కరుగా పోలీసులకు ఫిర్యాదులు చేయసాగారు. దీంతో పోలీసులు బీర్షేబా కార్యాలయాన్ని సోదా చేసి రికార్డులను సీజ్‌ చేశారు. ఇప్పటి వరకు సంస్థ నిర్వాహకుడితో పాటు 37 మందిని అరెస్టు చేసి రిమాండుకు పంపినట్టు కామారెడ్డి పట్టణ సీఐ జగదీశ్‌ ‘సాక్షి’తో తెలిపారు. ప్రధాన నిందితుడు జూలై 2న అరెస్టూ జైల్లో ఉన్నాడన్నారు. మిగతా వారిని దొరికినవారిని దొరికినట్టుగా అరెస్టు చేస్తున్నామన్నారు. మరో 15 మందిని అరెస్టు చేయాల్సి ఉందన్నారు. సంస్థకు సంబంధించిన స్థిర, చరాస్తుల వివరాలను సేకరించి వాటిని సీజ్‌ చేశామని వివరించారు.  

సాక్షి, కోదాడ: సామాన్యుల బలహీనతలను సొమ్ము చేసుకుంటూ కోదాడలో మరో గొలుసుకట్టు వ్యాపారం గుట్టుచప్పుడు కాకుండా సాగుతున్నట్టు తెలిసింది. ప్రభుత్వ ఉద్యోగులతో పాటు పలువురు ప్రముఖులు దీనిలో భాగస్వాములు కావడంతో సామాన్యులు సులువుగా మోసపోతున్నారు. రూ.12 వేలు చెల్లిస్తే సభ్యత్వంతో పాటు అంతే విలువైన ఉత్పత్తులను (వివిధ రకాలైన వస్తువులు) ఇస్తామని వీటి అమ్మకం వల్ల రూ.2వేల లాభం వస్తుందని, మరో ఇద్దరిని చేర్పిస్తే  మరో రూ.3 వేల లాభం వస్తుందని ఇలా సభ్యులు చేరినా కొద్దీ రూ.లక్షలు మీ జేబుల్లో వచ్చి పడతాయని  చెపుతుండడంతో పలువురు వీరి వలకు చిక్కుతున్నారు. దీని వ్యవహారం ఏమిటంటే.. ఇప్పటికే అనేక మల్టీలెవల్‌ మార్కెటింగ్‌ కంపెనీలు సామాన్యులకు కుచ్చుటోపీ పెట్టి  నిండా ముంచుతున్న ఉదంతాలు వెలుగు చూస్తుండగా  తాజాగా మరో కంపెనీ కోదాడ ప్రాంతంలో గుటుచ్చప్పుడు కాకుండా తన కార్యకలాపాలు సాగిస్తోంది .‘ఇండుస్‌ వివా’ పేరిట మార్కెట్లోకి వచ్చిన ఈ వ్యాపారం ముందుగా నాలుగు రకాల వస్తువులైనా ఐస్లిమ్, ఐకాఫీ, ఐ పల్స్, ఐ చార్జీలను అంటగడుతున్నారు. వీటి కోసం 12,400  రూపాయలను చెల్లించాల్సి ఉంటుంది.  వీటిని అమ్ముకోవడం వల్ల రూ.2 వేల  కమీషన్‌ వస్తుందని, దీంతో పాటు మరో ఇద్దరిని చేర్చడం ద్వారా మరో రూ.5 వేలు, వారు మరో ఇద్దరిని చేర్చడం ద్వారా చైన్‌ పెరిగి మీ ఖాతాల్లో రూ.లక్షలు జమ అవుతాయని నమ్మబలుకుతూ తేలిగ్గా బురిడీ కొట్టిస్తున్నారు.  ఈ వ్యాపారం అంతా రహస్యంగా కొంత మంది తమ ఇళ్లలో సాగిస్తున్నారని సమాచారం. అబ్బో.. కేన్సర్‌ కూడా తగ్గుతుందట...! ఎక్కడ తయారు అవుతున్నాయో, వాటిలో ఏముంటాయో తెలియకుండా వీరు నాలుగు రకాల ఉత్పత్తులను అంటగడుతున్నారు.. వీటిలో ఐ స్లిమ్‌ వాడితే ఎంత లావు ఉన్నా ఒక్క నెలలోనే స్లిమ్‌గా తయారవుతారట. ఇక ఐ ఫల్స్‌ తాగితే ప్రాణాంతకమైన కేన్సర్‌ కూడా తగ్గుతుందట. దీనిలో అసైబెర్రీ అనే ఫలరసం ఉంటుందని, ఇది అమెజాన్‌ అడవుల్లోనే ఉంటుందని మాయమాటలు చెబుతూ అంటగడుతున్నారు. ఇక ఐ చార్జీ వాడితే వెంటనే బాడీలో శక్తి వచ్చి పరుగులు పెట్టవచ్చట. ఇలా ఈ ఉత్పత్తుల్లో ఉన్న బ్రహ్మపదార్థం ఏమిటో అర్థం కాక వైద్యులే తలపట్టుకుంటున్నారు. వీరు మాత్రం సులువుగా మాటలతో బురిడీ కొట్టిస్తున్నారు. అమాయకులు వీరి వలకు చిక్కుతున్నారు ఖరీదైన రిసార్టుల్లో సమావేశాలు సామాన్యులను  బురిడీ కొట్టించడానికి వీరు ఖరీదైన రిసార్టుల్లో సమావేశాలు పెడతారు. సూటు, బూటు వేసుకుని కనికట్టు మాటలతో మభ్యపెడుతుంటారు. అరచేతిలో స్వర్గం చూపిస్తుంటారు. అంతేకాక కొంత మందిని తీసుకొచ్చి ఇప్పటికే  రూ.లక్షలు  తమ బ్యాంక్‌ అకౌంట్‌లో పడుతున్నట్లు చెప్పిస్తుంటారు. దీంతో పలువురు యువకులు తమ తల్లిదండ్రులు వద్దంటున్నా వీరికి సొమ్ముచెల్లించి ఇబ్బంది పడుతున్నారు. ఈ విషయంలో ఇప్పటికైనా పోలీసులు  దృష్టి సారించాలని పలువురు కోరుతున్నారు.


  విశాఖపట్నం, న్యూస్‌లైన్: గొలుసు వ్యాపారంలో పేరొందిన ఆమ్వే సంస్థ మనుగడపై  సందేహాలు రేకెత్తుతున్నాయి. ఈ సంస్థ చీఫ్ ఎగ్జిక్యూటివ్ ఆఫీసర్ స్కాట్ పింక్నీని ఒక చీటింగ్ కేసులో కర్నూలు పోలీసులు మంగళవారం అరెస్టు చేశారన్న వార్తలు రావడంతో విశాఖలోని ఏజెంట్లు, వినియోగదారులు ఆందోళన చెందుతున్నారు. గతంలో కూడా ఈ సంస్థపై పలు ఆరోపణలు రావడం, వాటిని సంస్థ ఖండిస్తూ వార్తా పత్రికలలో ప్రకటనలు ఇవ్వడం తెలిసిందే. ఈ నేపథ్యంలో సంస్థ సీఈఓ అరెస్టు కావడంతో సంస్థ ఉంటుందా మూతపడుతుందా అన్న అనుమానాలు వ్యక్తమవుతున్నాయి. ఆమ్వేకు జిల్లాలో వేలాది సంఖ్యలో ఏజెంట్లు ఉన్నారు.
  
 ప్రతినెలా రూ. కోట్లలో వ్యాపారం జరుగుతోంది. ఈ సంస్థ కార్యాలయం కంచరపాలెం ఇండస్ట్రియల్ ఎస్టేట్‌లో ఉంది. సంస్థ ఏజెంట్లు పలు రకాల ఉత్పత్తులను మార్కెటింగ్ చేయాల్సి ఉంటుంది. ఇదంతా గొలుసుకట్టు విధానంలో సాగుతుంది. ప్రపంచంలోని 88 దేశాలలో డెరైక్ట్ సెల్లింగ్ బిజినెస్ విధానంలో ఆమ్వే సంస్థ పేరు ప్రఖ్యాతులు గడించింది. సంస్థ తరఫున 450 రకాల ఉత్పత్తులను మార్కెటింగ్ చేస్తున్నారు. ఆమ్వే సంస్థ ఏజెంట్లలో పలువురు ప్రముఖులు, అధికారుల బంధువులు కూడా ఉన్నారు. ఆమ్వే ఉత్పత్తులను డెరైక్ట్ మార్కెటింగ్ పేరుతో విక్రయిస్తున్నా అధిక ధరలు ఉండడం పలువురిని ఆలోచింపజేస్తోంది.