సాక్షి, సిటీబ్యూరో :ఫస్ట్‌ టైమ్‌ థియేటర్‌లో సినిమా చూస్తే ఎంత ఫీల్‌ ఉంటుంది? అందులోనూ ఐమ్యాక్స్‌లో చూస్తే ఆ కిక్కే వేరు కదా! ఆ అనుభూతిని ఆస్వాదించిన కశ్మీరీ బృందం ఆనందం, ఆశ్చర్యానికి లోనైంది. అంతర్జాతీయ బాలల చలన చిత్రోత్సవాల్లో భాగంగా నగరానికి వచ్చిన ఈ బృందం... తాము హైదరాబాద్‌కు రావడం ఇదే మొదటిసారి అని, థియేటర్‌లో సినిమా చూడడం కూడా ఇదే తొలిసారి అని పేర్కొంది. నదీం అహ్మద్, అర్బీన్‌ హసన్, రశికాజాన్, ఉఫాక్‌ రహీం, అదీబాజాన్, శాయిస్తా, షాబాజ్, అఖిల్‌ అహ్మద్, షేక్‌ సాహీల్, బేగ్‌ అదిల్‌ కశ్మీర్‌లోని జవహర్‌ నవోదయ విద్యాలయ విద్యార్థులు. ఇద్దరు ఉపాధ్యాయులతో కూడిన ఈ బృందం హైదరాబాద్‌కి రావడం ఇదే తొలిసారి. చలన చిత్రోత్సవాల్లో భాగంగా మొదటిసారి థియేటర్‌లో సినిమా చూసిన వీరు.. తమ ఆనందాన్ని ‘సాక్షి’తో పంచుకున్నారు.   కశ్మీర్‌లోనే ఉండవు..   మాది హర్యానా. రెండు నెలల క్రితం ఇక్కడికి వచ్చాను. ముందు చాలా భయపడ్డాను. కానీ వచ్చాక తెలిసింది.. ఇక్కడికి వాళ్లు చాలా మంచివారని. దుస్తులు శరీరాన్ని పూర్తిగా కప్పేలా వేసుకోవాలనే నియమాన్ని ఇక్కడి అమ్మాయిలు నమ్మి పాటిస్తారు. విద్యా, విజ్ఞానం, సాంకేతికత, సోషల్‌ మీడియా వాడకం విషయంలో వేరే రాష్ట్రాలతో పోలిస్తే పెద్దగా తేడాలేమీ లేవు. ఇక్కడ కొన్నేళ్ల క్రితం థియేటర్లు మూయించారు. కేవలం కశ్మీర్‌లోనే సినిమా హాళ్లు ఉండవు. శ్రీనగర్‌లో మాల్స్, థియేటర్లు ఉంటాయి.  – వీనా, టీచర్‌  బిర్యానీ సూపర్బ్‌   నేను ఉర్దూ టీచర్‌. థియేటర్లు లేకపోవడంతో స్కూల్‌లో పిల్లలకు అవసరమైన చిత్రాలను ప్రొజెక్టర్‌తో చూపిస్తాం. కల్చరల్‌ సెంటర్లు ఉంటాయి. అక్కడ మా సంస్కృతి సంప్రదాయాలు తెలిపే నాటకాలు, డ్యాన్స్‌లు ప్రదర్శిస్తుంటారు. నాకు హైదరాబాద్‌ బిర్యానీ బాగా నచ్చింది.   – రజీ, టీచర్‌  అక్కడా ఉంటే బాగుండు..   ఈ చిత్రాలు నాపై చాలా ప్రభావాన్ని చూపాయి. ఇంతమంది పిల్లలతో కలిసి సినిమాలు చూడడం చాలా కొత్తగా ఉంది. మా దగ్గర సినిమా చూసే అవకాశమే లేదు. థియేటర్‌లో సినిమా చూడడం తప్పు అని చెబుతారు. కానీ మేం ఇక్కడ చూసిన సినిమాల్లో తప్పేం కనిపించలేదు. మా దగ్గర కూడా థియేటర్లు ఉంటే బాగుండు.   – అర్బీనాహసన్, విద్యార్థిని నేనే కట్టిస్తా...   దేవుడి దయుంటే నేనే థియేటర్‌ కట్టిస్తాను. నాలాంటి చాలా మంది పిల్లలు చూసేందుకు వీలుగా ఇలాంటి చిత్రాలు ప్రదర్శిస్తాను. వీటిని చూస్తే ఆలోచనల్లో మంచి మార్పులు తథ్యం. అంతగా స్ఫూర్తినిచ్చాయి.   – రశికాజాన్‌ రూపొందిస్తాం..   ఈ చిత్రాలు చూసిన తర్వాత మాకు సినిమాలు తీయాలని అనిపిస్తోంది. అయితే మా దగ్గర అది కుదరదు. కుదిరితే తప్పకుండా సందేశాత్మక చిత్రాలు రూపొందిస్తాం.  – ఉఫక్‌ రహీం అలాగే మాకూ..   ‘హాఫ్‌ టికెట్‌’ సినిమా చూశాను. పిజ్జా తినేందుకు ఒక స్లమ్‌ అబ్బాయి చేసిన పోరు ఈ చిత్రం. బాబుకి పిజ్జా తినాలనే కోరిక ఉన్నట్లే... ఇప్పుడు మాకు కశ్మీర్‌లో థియేటర్లు ఉంటే బాగుండనిపిస్తుంది. పిల్లలందరూ కోరుకుంటే అది జరగవచ్చు కూడా.   – శాయిస్తా సహకరిస్తే సాధ్యమే..   ఇలాంటి స్ఫూర్తివంతమైన చిత్రాలు చూసినప్పుడు సినిమాలు తీయాలనే ఆలోచన మాకు వస్తుంటుంది. కానీ ఏం చేస్తాం.? మా దగ్గర థియేటర్లు లేవు. సినిమాలు తీయనివ్వరు. మాకు పెద్దల సహకారం లభిస్తే మేం కూడా చిత్రాలు రూపొందిస్తాం.    – శాబాజ్‌ అహ్మద్‌ వెరీ ఫ్రెండ్లీ..   పిల్లలు స్వయంగా రూపొందించిన, నటించిన చిత్రాలు తొలిసారి థియేటర్‌లో చూశాం. చాలా స్ఫూర్తిదాయకంగా ఉన్నాయి. మనకు చేతనైనంతలో ఇతరులకు హెల్ప్‌ చేయాలనేది చాలా చిత్రాల్లో ఇచ్చిన మెసేజ్‌. ఇక్కడి వారు చాలా ఫ్రెండ్లీగా ఉన్నారు.  – బేగ్‌ అదిల్‌ 

చిట్టి చిత్రాలు ఆకట్టుకుంటున్నాయి. అంతర్జాతీయ బాలల చలన చిత్రోత్సవం సందడిగా సాగుతోంది. ప్రధాన వేదిక ప్రసాద్‌ ఐమ్యాక్స్‌లో చిన్నారుల సంబరం అంబరాన్నంటుతోంది. సోమవారం ప్రదర్శితమైన పలు చిత్రాలు అలరించాయి.నగరంలోని వివిధథియేటర్లలో ప్రదర్శితమవుతున్న చిత్రాలు చూసేందుకుచిన్నారులు తరలి వస్తున్నారు.   అదృష్టం..   మేం రాజస్థాన్‌ బాల ఆశ్రమం నుంచి వచ్చాం. ఈ ఫెస్ట్‌కు రావడం ఇది మూడోసారి. మా ఆశ్రమంలోని పిల్లలు... కులమత భేదాలను వీడి, అందరూ సమైక్యంగా ఉండాలని సందేశాత్మక నాటకం చేశారు. ఇలా ఇంటర్నేషనల్‌ ఫెస్టివల్‌లో పార్టీసిపేట్‌ చేయడం అదృష్టంగా భావిస్తున్నాం.    – కన్నయ్యలాల్, జైపూర్‌ ఓ గొప్ప మూవీ తీస్తా..   ప్రతిసారి చిల్డ్రన్స్‌ ఫెస్టివల్‌కు హాజరవుతాను. అన్ని సినిమాలూ చూస్తాను. అయితే ఈసారి రెండు రోజులు మిస్‌ అయినందుకు బాధగా ఉంది. వచ్చే ఏడాది పిల్లలతో కలిసి దేశభక్తితో కూడిన ఓ గొప్ప సినిమా తీయాలనుకుంటున్నాను. నేను తెరకెక్కించిన ‘రక్తం‘, ‘నాగలి‘ సినిమాలు విడుదలకు సిద్ధంగా ఉన్నాయి. – సునీతాకృష్ణన్,ప్రజ్వల ఫౌండేషన్‌ ఫౌండర్‌ అవార్డు కొట్టేస్తా..   నేను ముంబై నుంచి వచ్చాను. నేను తీసిన ‘హాఫ్‌–టికెట్‌’ మూవీ ఇక్కడ ప్రదర్శితమైంది. ఈ మూవీ ఇప్పటికే ఎన్నో అవార్డులు గెలుచుకుంది. పిల్లల చిన్ననాటి కోరికలను పెద్దవాళ్లు ప్రోత్సహిస్తే వారెన్నో సాధిస్తారనేదే ఈ చిత్ర సారాంశం. చిత్రోత్సవంలో నా సినిమాకు అవార్డు వస్తుందనే నమ్మకం నాకుంది.  – సమిత్‌ కక్కర్, డైరెక్టర్‌   ఇదే ఫస్ట్‌టైమ్‌   నేను గోవా నుంచి వచ్చాను. సామాజిక అంశాలపై షార్ట్‌ఫిల్మŠస్‌ తీస్తుంటాను. ఈ ఫెస్టివల్‌కి రావడం ఇదే మొదటిసారి. ఇక్కడ స్క్రీన్‌ అయ్యే ప్రతి చిత్రాన్ని చూస్తూ, అందులోని మంచిచెడులను గ్రహిస్తున్నాను. ప్రస్తుత జనరేషన్‌కు ఇవి ఎంత వరకు సింక్‌ అవుతాయో? రాసుకుంటున్నాను.    – కబీర్‌నాయక్, గోవా ‘పిల్లలకు నచ్చే సినిమా తీయాలనుకున్నాను. ‘అప్పూ’ సినిమాలో జలపాతాలు, జంతువులు, సాహస సన్నివేశాలు థియేటర్‌లో చూసినప్పుడు పిల్లలు ఎంతో అబ్బురపడ్డారు. వారిలో ఆ ఆనందాన్ని నింపాలనే ఈ చిత్రం రూపొందించాన’ని అన్నారు డైరెక్టర్‌ మోహన్‌. చిత్ర యూనిట్‌ సోమవారం మీడియాతో అనుభవాలు పంచుకుంది. ‘నాకు ఇంతకముందు ఎలాంటి అనుభవం లేదు. అడవిలో 30 రోజులు షూటింగ్‌ చేసినా.. అదో పిక్నిక్‌లా సాగింద’ని ఆనందం వ్యక్తం చేశాడు హీరో శ్రీవంత్‌. రాష్ట్ర ప్రభుత్వం పిల్లల పండగను నిర్వహించడంపై నటుడు లోహిత్‌ హర్షం వ్యక్తం చేశారు.

బాలలూ పర్యావరణాన్ని కాపాడండి..’అంటూ చిన్నారులకు పాఠాలు చెప్పింది బాలీవుడ్‌ భామ దియామీర్జా. చిల్డ్రన్స్‌ ఫిలిం ఫెస్టివల్‌లో భాగంగా శుక్రవారం ఐమ్యాక్స్‌లో నిర్వహించిన ఓ కార్యక్రమంలో ఆమె పాల్గొంది. నగరంలో అంతర్జాతీయ బాలల చలన చిత్రోత్సవం సందడి కొనసాగుతోంది. చిన్నారుల చిత్రాలు ఆబాల గోపాలాన్ని ఆకట్టుకుంటున్నాయి. రెండోరోజూ ప్రసాద్‌ ఐమ్యాక్స్‌ పిల్లల కేరింతలతో కళకళలాడింది. ప్రముఖులూ ఉత్సవంలో పాల్గొని చిన్నారులతో ఆడిపాడారు.  ప్రసాద్‌ మల్టీఫ్లెక్స్‌లోని 3 స్క్రీన్స్‌లో శుక్రవారం 9 సినిమాలు ప్రదర్శించారు. దేశవిదేశీ చిత్రాలు చిన్నారులను అలరించాయి. నగరం నలుచెరగుల నుంచే కాకుండా నాగాలాండ్, అరుణాచల్‌ ప్రదేశ్, రాజస్థాన్‌ తదితర రాష్ట్రాల నుంచీ చిన్నారులు తరలివచ్చారు. చికాగో తదితర విదేశీ నగరాల నుంచి కూడా బాలబాలికలు వచ్చి సందడి చేశారు.   ప్రకృతి పరిరక్షణ మరవొద్దు.. సినీ నటి దియామీర్జా మనం జీవనశైలిలో కొన్ని మార్పులు చేర్పులు చేసుకుంటే ఆరోగ్యంతో పాటు పర్యావరణాన్ని కూడా కాపాడుకోగలుగుతామని సినీ నటి దియామీర్జా అన్నారు. చిత్రోత్సవాల్లో భాగంగా పర్యావరణ పరిరక్షణ అంశంపై జరిగిన సదస్సులో ఆమె మాట్లాడారు. ఉదయం టూత్‌బ్రష్‌ వాడకంతో మొదలెట్టి ఎన్నో రకాలుగా పర్యావరణానికి నష్టం కలిగించే పనులు చేస్తున్నామని అన్నారు. సృష్టిలోని అన్ని ప్రాణులతో కలిసి జీవించడాన్ని అలవాటు చేసుకోవాలన్నారు. ఈ సందర్భంగా ఆమె చిన్నారులతో చాలాసేపు ముచ్చటించారు. మనమేం తీసిపోం.. విదేశీ చిత్రాలతో పోలిస్తే టెక్నికల్‌గా కొంత తేడా తప్పితే.. మనమేం వాళ్లకి తీసిపోం. నార్వే, నెదర్లాండ్స్, స్వీడన్‌ తదితర దేశాల చిత్రాలు ఇక్కడ ప్రదర్శిస్తున్నారు. ఆ లోకేషన్స్‌ మనకు నచ్చుతాయి. అదే మన లొకేషన్స్‌ను ఆస్వాదించలేం. అలాగే వారికి మన చిత్రాలు నచ్చుతాయి. ఎగిరే తారాజువ్వలు తదితర భారతీయ చిత్రాలకు మంచి గుర్తింపు లభిస్తోంది. మన దగ్గర చిన్నారుల చిత్రాలు థియేటర్లలో ఆడవు. ఆర్థికంగా ప్రభుత్వం ప్రోత్సహించాలి.      – రాంప్రసాద్, దర్శకులు పిల్లలకు ఏవీ..? బాలల చిత్రం ‘ఆదిత్య క్రియేటివ్‌ జీనియస్‌’ రూపొందించాను. కలాం స్ఫూర్తితో సైంటిస్ట్‌గా మారిన ఆదిత్య పాత్రలో బాలనటుడు ప్రేమ్‌ చక్కగా నటించాడు. ఈ చిత్రానికి తెలుగు ప్రభుత్వాలు పన్ను మినహాయింపునిచ్చాయి. చిన్నారి శాస్త్రవేత్తల్లో స్ఫూర్తి నింపేందుకు రూపొందించిన చిత్రం ఇది. విదేశాల్లో పిల్లల కోసం ప్రత్యేకంగా సినిమా హాల్స్‌ ఉంటాయి. వారానికి ఒకసారైనా బాలల చిత్రాలను థియేటర్లలో చూపిస్తే పిల్లల్లో ఉత్సాహం, స్ఫూర్తి కలుగుతుంది.   – భీమగాని సుధాకర్‌గౌడ్, దర్శకుడు టచ్‌ స్క్రీన్‌ టు నేచర్‌ టచ్‌ బాలల చిత్రం ‘డూడూ డీడీ’ రూపొందించాను. కొమరం భీమ్, దాసి చిత్రాలతో జాతీయ గుర్తింపు పొందిన నటులు భూపాల్‌ ఇందులో ముఖ్య పాత్ర పోషించారు. పిల్లలు టచ్‌ స్క్రీన్‌ నుంచి నేచర్‌ టచ్‌లోకి వెళ్లడమే ఈ చిత్ర నేపథ్యం. వారం రోజులే ఈ సందడి. తర్వాత అంతా శూన్యమే. కోట్లు ఖర్చు చేసి కమర్షియల్‌ సినిమాలు తీసేవారు.. పిల్లల చిత్రాల జోలికి రాకపోవడం దురదృష్టకరం. పిల్లల చిత్రాల రూపకల్పన సామాజిక బాధ్యత. – అల్లాణి శ్రీధర్, బాలల చిత్రాల రూపకర్త అంశాలపై అవగాహన..      చిత్రోత్సవంలో భాగంగా జేఎన్‌టీయూ ఆడిటోరియంలో వివిధ అంశాల్లో చిన్నారులకు అవగాహన కల్పిస్తున్నారు. ప్రతి రోజూ మధ్యాహ్నం 12:30 గంటల నుంచి యానిమేషన్‌లో, మధ్యాహ్నం 2:30 గంటల నుంచి ఫిల్మ్‌ మేకింగ్, సాయంత్రం 4:30 గంటల నుంచి స్టోరీ టెల్లింగ్‌లో చిన్నారులకు శిక్షణ ఇస్తున్నారు. చిల్డ్రన్‌ ఫిల్మ్‌ సొసైటీ చైర్మన్‌ ముఖేష్‌ఖన్నా శుక్రవారం హాజరై చిన్నారులకు పలు అంశాలపై అవగాహన కల్పించారు. ఆటిజం, బుద్ధిమాంద్యం కలిగిన చిన్నారులకు ప్రత్యేక తరగతులు నిర్వహించారు.    మనమూ మారాలి..   ‘డూడూ డీడీ’లో నేను చేసిన తాత పాత్ర.. నా సొంత క్యారెక్టరే అనిపించింది. పిల్లలకు సొంతంగా సెల్‌ఫోన్, ల్యాప్‌టాప్‌లు ఎంతవరకు అవసరం? పిల్లలు మారాలంటే పెద్దలు మారాలి. తల్లిదండ్రుల్లో మార్పు వస్తేనే పిల్లల్లోనూ మార్పు వస్తుంది. దర్శకులు, నిర్మాతలు వారి బాల్యం వైపు ఒకసారి తిరిగి చూడాలి. ప్రతి నిర్మాత ఒక్క బాలల చిత్రమైనా రూపొందించడం బాధ్యతగా తీసుకుంటే  బ్రహ్మాండమైన చిత్రాలు వస్తాయని నా అభిప్రాయం.   – భూపాల్, నటుడు   స్ఫూర్తినివ్వాలి..   చిన్నారుల చిత్రాలు వారిలో స్ఫూర్తి నింపేలా, భవిష్యత్తు  సవాళ్లను ఎదుర్కొనేలా ఉండాలి. ప్రభుత్వాలు ఆర్థిక సహకారం అందిస్తే అలాంటి సినిమాలు మరిన్ని రావడానికి అవకాశం ఉంటుంది. నేను రూపొందించిన  ‘సత్యమేవ జయతే’ త్రీడీ యానిమేషన్‌ సినిమా చిత్రోత్సవంలో ప్రదర్శితమైంది. క్వాలిటీ పరంగా రాజీ పడకుండా, వ్యయప్రయాసలకు ఓర్చి తీసిన సినిమా ఇది. హాలీవుడ్‌ చిత్రాల శైలిలో తీయడం లేదా వాటిని పునర్నిర్మించడం కన్నా భారతీయతను ప్రతిబింబించే సినిమాలు మనం తీయాలి.     – కొత్తపల్లి సీతారామ్, నిర్మాత యానిమేషన్‌.. సూపర్బ్‌   రోజంతా వివిధ భాషా చిత్రాలను చూడడం మంచి అనుభవం. యానిమేషన్‌ సినిమాలు చాలా బాగున్నాయి. కొత్త విషయాలు తెలుసుకునేందుకు, పంచుకునేందుకు ఈ చిత్రోత్సవం అవకాశం ఇస్తోంది. హైదరాబాద్‌కు ఫస్ట్‌టైమ్‌ వచ్చాం. చాలా బాగుంది. ఇక్కడికి మళ్లీ రావాలనుకుంటున్నాం.   – అతేలి డేనియల్, నాగాలాండ్‌ సినిమా తీస్తా.. అవార్డు కొట్టేస్తా   ఇండియాకు రావడం తొలిసారి. స్కూల్‌ పిల్లల కేరింతల మధ్య రకరకాల సినిమాలు చూడడం చాలా ఆనందంగా అనిపిస్తోంది. నేను కూడా జంతువులతో పాటు విభిన్న రకాల అంశాలతో షార్ట్‌ఫిల్మ్స్‌ తీస్తుంటాను. మంచి డైరెక్టర్‌గా పేరు తెచ్చుకోవాలని నా కోరిక. ఈ చిత్రోత్సవం ఆ కోరిక తీరేందుకు ఉపయోగపడుతుంది. ఈ సినిమాల్లో వినియోగించిన టెక్నాలజీ తదితర నోట్‌ చేసుకుంటున్నాను. అవార్డు గెలుచుకునే బాలల చిత్రం తీయాలని ఆశ. – డానియల్, చికాగో నేనూ తీస్తాను... నేను దర్శకత్వం వహించిన ‘ఒక్కడు మిగిలాడు’ సినిమాని చూసేందుకు ఇక్కడికి వచ్చాను. అయితే ఇక్కడ బాలల సినిమాల ప్రదర్శన, పండగ వాతావరణం చాలా అద్భుతంగా ఉంది. చాలా బాగా ఏర్పాట్లు చేశారు. ఇంత మంచి ఫెస్టివల్‌కు మన నగరం వేదిక కావడం గర్వంగా అనిపిస్తోంది. ఇది చూస్తుంటే నాకు కూడా మంచి బాలల చిత్రం తీయాలనే ఆలోచన వస్తోంది. తప్పకుండా మంచి సందేశంతో తీస్తాను.   – అజయ్‌ ఆండ్రూస్, దర్శకుడు