గోవు మాలక్ష్మికి కోటి దండాలు!
 మా ఇంటి గేటును ఆనుకొని రోడ్డుపై రెండు పెద్ద కానుగ చెట్లు ఉన్నాయి. ఎక్కడి నుంచి వస్తాయో, ఎవరికి చెందినవో తెలియదు కానీ, తెల్లవారేటప్పటికీ డజన్ల సంఖ్యలో ఆవులు, గిత్తలు, దూడలు గుంపులుగా ఈ చెట్లక్రింద చేరుతాయి. ఒక్క మా వీధిలోనే కాదు, ఎక్కడ పడితే అక్కడ ఊరంతా ఇదే తంతు. మనం విధించుకున్న ట్రాఫిక్ ఆంక్షల గురించి వాటికి తెలియదు.
 
 రోడ్డుకు మధ్యలో కొన్ని నిలబడతాయి. ఎక్కువ రద్దీ ఉండే ప్రాంతంలో ఇలా జరగడం వల్ల ట్రాఫిక్‌కు అంతరాయం కలిగి ఎంతో మంది రూట్ మార్చుకొని వారి గమ్యస్థానానికి వెళ్లాల్సి వస్తుంది.వాటిని గట్టిగా అదిలిస్తే పక్కకు తప్పుకుంటాయి. కానీ ఎవరూ ఆ పని చేయరు. ఎందుకంటే ‘గోమాత’ కదా! ఇటువంటి మూఢత్వం వల్ల వాటికి ఎన్నోసార్లు ప్రమాదాలు కూడా జరిగాయి.
  
 కొందరైతే ఈ ఆవులకి తోక మొదలుకొని పసుపుకుంకాలతో బొట్లుపెట్టి, కొండొకచో దాని మూత్రాన్ని శిరస్సుపై చల్లుకొని తమ భక్తి ప్రపత్తులు చాటుకుంటారు. ఇక్కడ విచిత్రమేమిటంటే గోమూత్రం ఔషధగుణాలతో ఉంటుంది కాబట్టి ఆ పని చేసాం అంటారు. కానీ దాని నోటికి మాత్రం కాసింత పచ్చగడ్డో, పండో కాయో తోచినది ఏదైనా పెట్టాలనుకోరు. వాటి యజమానులు ఎవరో, ఎక్కడ ఉంటారో ఎవరికి తెలియదు. తెల్లవారేటప్పటికి వాటిని రోడ్లపైకి వదిలి చేతులు దులుపుకుంటారు. ఆవులు మాత్రం బక్కచిక్కి, ఎవరైనా తినడానికి ఏమైనా పెడతారేమో అని దీనంగా చూస్తుంటాయి.
  
 వాటికి మనం ప్రత్యేకంగా వండి పెట్టనక్కర్లేదు. మనం తరిగిన కూరగాయల తొక్కలు, మాగిన పండ్లు.. ఇవి వేసినా వాటిని అవి ఎంతో తృప్తిగా తింటాయి. ఎవరు వాటికి తిండి పెడతారో ఆ ఇంటి గుమ్మం వదలదు కాబట్టి ..గోవుల యాజమానుల్లారా! మీ పశువులను రక్షిత ప్రదేశాలలో కట్టి వాటికి కాసింత నీడ, నీళ్లు, గడ్డి మీకున్నంతలో ఏర్పాటు చేయండి. అంతేకానీ రోడ్లపైకి వదిలి వాటికి, ప్రజలకీ ప్రమాదాలు కొని తేకండి.వాటిని పోషించే స్థోమత లేనప్పుడు ఏదైనా గోశాలకి వాటిని ఇచ్చి వాటి పోషణార్థం మీకు కలిగినది నిర్వాహకులకి ఇవ్వండి.
 - దుర్గాసూరి, పాతపేట, నూజివీడు, కృష్ణాజిల్లా.
  
 డొల్లతనాన్ని ప్రశ్నిస్తోంది!
 ఢిల్లీ ఉదంతం తర్వాత ఉరికెక్కించే చట్టాలొచ్చాయి కదా అని మగాడు ఊరికే లేడు. ఆ తర్వాత దేశ రాజధాని ఢిల్లీ సహా 11 మహా నగరాల్లో ఓ స్వచ్ఛంద సంస్థ నిర్వహించిన సర్వేలో మగాళ్లలో మార్పు మేడిపండు చందమేనని రుజువైంది. మహిళల వస్త్రధారణ పురుషులను రెచ్చగొట్టేవిధంగా ఉంటుందని.. అది అనివార్యంగా స్త్రీలపట్ల హింసాత్మకంగా మారుతోందని 60 శాతం మంది విద్యార్థులు అభిప్రాయపడడం దేనికి సంకేతం? మన పిల్లల పాఠ్యాంశాలు(కరిక్యులమ్) లింగవివక్షను రూపుమాపే, మానవీయ విలువలు గల పౌరులుగా తీర్చిదిద్దే విధంగా లేవన్నది నిజం.
  
 ఇండియా డాటర్‌తో దేశం పరువుపోతోందంటున్నవారు.. మన సినిమాలు (కొన్ని మినహా) ప్రజలకు ఏం ప్రబోధిస్తున్నాయో ఆలోచించారా? కామెడీ పేరుతో వావివరసలు మరచి డైలాగులు. ఇక రేప్‌లలో వైవిధ్యం.. పరాకాష్టకు చేరిన హింస.. నానాటికీ తీసికట్టుగా హీరోయిన్ల వస్త్రధారణ.. టీచర్, స్టూడెంట్ బాంధవ్యాన్ని అధమావస్థకు చేర్చిన వైనం.. ఏ సంస్కృతికి చిహ్నాలు? దేశంలోని పేదరికంపైనా, మురికివాడలపైనా బయటి వ్యక్తులు సినిమాలు తీసి అంతర్జాతీయ స్థాయిలో పరువు తీస్తున్నారని గగ్గోలు పెడతారు. కానీ ద్వంద్వార్థ సినిమాలతో హిట్లుకొట్టిన కొందరు హీరోలు రాజ్యసభసభ్యులు, మంత్రులు కూడా అయ్యారు. వీళ్ల అనేక సినిమాల్లో కథానాయిక ఓ ఆటబొమ్మ?
  
 అశ్రుధారాపాతం.. ఇండియా డాటర్!
 ఈ డాక్యుమెంటరీ చూసి ఒక్క కన్నీటి చుక్కైనా రాలకుంటే ముఖేష్‌కు మనకు తేడా లేనట్టే! ఈ కేసులో నిందితుల తరఫున డిఫెన్స్‌లాయర్లమైనట్టే!! ఎందువలనంటే.. ఇందులో జ్యోతి గురించి ఆమె తల్లితండ్రులు, ఆమె ట్యూటర్ చెప్పిన విషయాలు మనల్ని చకితుల్ని చేస్తాయి. వివశుల్ని చేస్తాయి.. అప్రయత్నంగా మన కళ్లు చెమ్మగిల్లక మానవు. ఆమె నిండైన వ్యక్తిత్వం, సంస్కరణాభిలాష మనల్ని సిగ్గుపడేలా చేస్తాయి. ముఖ్యంగా ఆ తల్లి పడుతున్న వేదన మనల్ని నిలువనీయదు. అలాగే నిందితుల కుటుంబాల దుర్భర దారిద్య్రం.. వారి దీనస్థితి పట్ల సానుభూతి కలగక మానదు.
 
 లేశమైనా పశ్చాత్తాపం కనిపించని ముఖంతో ముఖేష్, నిందితుల తరఫున వాదించిన లాయర్ల తిరోగమన ఆలోచనాధోరణి.. అసహ్యాన్నీ, ఆగ్రహాన్ని కలిగిస్తాయి. ఇండియాడాటర్ మనకు నేర్పుతోంది అవకాశవాదం కాదు. ఆమె లొంగలేదు. లొంగదీసుకున్నారు. నిబిడాకాశం నివ్వెరపోయేలా ఆమె ప్రతిఘటించింది. ఆ రాత్రి హెల్ప్‌మీ.. హెల్ప్‌మీ.. అని ఆమె అర్థించింది.. తనను రక్షించమని కాదు. దురాలోచనలతో, దుర్లక్షణాలతో కుళ్లికంపుకొడుతున్న సమస్త మానవజాతినీ కాపాడమని! మన విలువలు, ఆలోచనల్లోని డొల్లతనాన్ని ప్రశ్నిస్తోంది ఇండియా డాటర్ !!
 - ఎం.జి.నజీర్, హైదరాబాద్
  
 ఉద్యమకారులు బయలుదేరాలి!
 తెలుగు రాష్ట్రాల్లోని  ఆంగ్లమాధ్యమ పాఠాశాలల్లో విద్యార్థులు తెలుగులో మాట్లాడితే తప్పెందుకో ఆ పాఠాశాల యాజమాన్యులే సమాధానం చెప్పాలి. కర్నాటక, తమిళనాడుతో పాటు మిగిలిన రాష్ట్రాల ఆంగ్లపాఠశాలల్లోనూ ఇలాంటి నిబంధనలు ఉన్నాయా? అంటే లేవనే చెప్పాలి. మరి మన తెలుగు రాష్ట్రాల్లోనే ఈ ప్రకటిత, అప్రకటిత నిబంధనలు ఎందుకు? ప్రభుత్వం కన్నడ భాష అభివృద్ధికి ప్రత్యేకంగా కృషి చేయకపోయిన అక్కడి కన్నడ సంఘాలు తమిళనాడును ఆదర్శంగా తీసుకొని ప్రభుత్వంపై ఒత్తిడి తెచ్చి కన్నడ భాషను అభివృద్ధి చేసుకుంటున్నాయి.
 
 కానీ మన తెలుగు రాష్ట్రాల్లో ప్రభుత్వంతో పాటు ప్రజలదీ ఒకే బాట. తెలుగు భాష పట్ల నిర్లక్ష్యం! తెలుగు భాషకు పూర్వవైభవం రావాలంటే ఒకటే మార్గం.... తెలుగు భాషాభిమానుల నుంచి ఉద్యమకారులు బయలుదేరాలి. తెలుగు భాష అభివృద్ధికి నిర్దిష్టమైన విధానాన్ని అమలు పరిచేలా కృషి చేయాలి.
 - ఆర్.శ్రీనివాస్, సింగసంద్ర, బెంగళూరు
  
 పాఠకులకు ఆహ్వానం
 ‘ఈ కాలమ్ మీదే’ అనే ఈ చర్చావేదికలో పాల్గొనండి. చర్చనీయాంశం మీ ఇష్టం. ఏ సామాజిక అంశాన్నయినా, ఆలోచననైనా మీరు చర్చకు పెట్టొచ్చు.  మీ వాదనను వినిపించవచ్చు. దానిపై మిగతా పాఠకులనూ చర్చకు ఆహ్వానిస్తుంది సాక్షి ఫ్యామిలీ. వీటిని ప్రతి సోమవారం ప్రచురిస్తుంది. వెంటనే రాసి పంపండి.
 మీ చర్చనీయాంశం పంపవలసిన చిరునామా: ‘ఈ కాలమ్ మీదే’ సాక్షి ఫ్యామిలీ, సాక్షి టవర్స్, రోడ్ నంబర్ 1, బంజారాహిల్స్, హైదరాబాద్-34 ఇ-మెయిల్: sakshireaders@gmail.com


 ర్యాంకులు ముఖ్యం కాదు...
  నేను గత ఇరవై సంవత్సరాలుగా స్కూల్ నడుపుతున్నాను. ఎందరో తల్లిదండ్రులు వారి ఆలోచనలను నాతో పంచుకుంటూ ఉంటారు. బాధాకరమైన విషయం ఏమిటంటే, అందరూ మాట్లాడేది మార్కులు, ర్యాంకుల గురించే.
  ‘పిల్లలు పరిపూర్ణమైన వ్యక్తిత్వాన్ని పెంపొందించుకుంటున్నారా?’
  ‘జీవితంలో ఎదురయ్యే సమస్యలను తట్టుకునే విధంగా ఎదుగుతున్నారా?’
 
 
  ‘తోటివారితో కలిసి మెలసి ఉంటున్నారా?’
  ‘ఆడా, మగా సమానమనే భావాన్ని కలిగి ఉన్నారా?’
  ... ఇలాంటి వాటి గురించి ఎవరూ అడగడం లేదు.
  ర్యాంకుల కంటే జీవితాన్ని గెలవగలిగేలా తయారుచేసేదే నిజమైన విద్య. అప్పుడే ఆత్యన్యూనత అనేది దూరంగా పారిపోతుంది. నిజమైన జ్ఞానంతో మనిషి ప్రకాశిస్తూ లోకకళ్యాణానికి దోహదం చేయగలుగుతాడు. తల్లిదండ్రులు ఆ దిశగా ఆలోచించాలని కోరుకుంటున్నాను.
  - కాసర లక్ష్మిసరోజారెడ్డి, జంగారెడ్డి గూడెం, పశ్చిమగోదావరి.
  
 అది ప్రయివేట్ విషయం ఎలా అవుతుంది?!
 
 నూజివీడు నుంచి ఒక పాఠకుడు ‘అయ్యో పాపం... తులసీ’ అనే హెడ్డింగ్‌తో రాసిన ఉత్తరాన్ని చదివిన తరువాత చాలా బాధ కలిగింది. ‘చెట్లను కాపాడండి... అవి మనల్ని కాపాడుతాయి’ అనే మాటను మరిచిపోతున్నారు. ‘చెట్లను కాపాడడం వల్ల మనకు వచ్చే లాభం ఏమిటి? కొట్టేస్తే అనేక లాభాలు ఉన్నాయిగానీ..’’ అని తాత్కాలిక లాభాల గురించి స్వార్థపూరితంగా ఆలోచిస్తున్నారు తప్ప వేరే రకంగా ఆలోచించడం లేదు.
   ఇంట్లో ఫర్నీచర్ చేయించుకోవడానికి మా ఇంటి పక్కాయన కూలీలను నియమించి చెట్టును కొట్టేయిస్తున్నాడు.
  ‘‘అదేంటయ్యా... ఆ చెట్టు ఏం పాపం చేసింది?’’ అన్నాను కాస్త కోపంగా.
  ‘‘ఫర్నీచర్ చేయించుకోవాలి’’ అని తాపీగా ఒక్క ముక్కలో చెప్పాడు.
  ‘‘ఫర్నీచర్ కోసం చెట్టు కొట్టేయడం తప్పు కదా!’’ అన్నాను.
  ‘‘తప్పు ఒప్పుల గురించి మాట్లాడడానికి నువ్వెవరు? ఇది మా సొంత విషయం’’ అని నాతో తగాదా పడ్డాడు ఆ పుణ్యాత్ముడు.
  నేను షాక్ అయ్యాను! చెట్లను నరకడం అనేది ప్రయివేట్ విషయమా?!
  కఠిన చట్టాలు లేకపోవడం వల్ల, ఉన్న చట్టాలు కూడా చప్పగా ఉండడం వల్ల ఇలాంటి సంఘటనలు జరుగుతున్నాయి. దేవుడి కోసం వందలు, వేలు ఖర్చు చేయనక్కర్లేదు. మన బాధ్యతను మనం సక్రమంగా నిర్వహిస్తే చాలు... దేవుడే న్యాయం చేస్తాడు.
  నిజానికి చెట్లు అనేవి మనకు కనిపించే ప్రత్యక్షదైవాల్లాంటివి. నిలవ నీడను ఇచ్చే చెట్ల పట్ల అమానుషంగా ప్రవర్తించడం ఏ రకంగానూ సమంజసం కాదు. క్రూరమైన జంతువులు కూడా ఇలాంటి క్రూరమైన పనులు చేయవు.
  - జి.ప్రభాకర్, కనపర్తి, వరంగల్ జిల్లా.
  
 చెట్లను నిర్లక్ష్యం చేస్తే...
  
 గత వారం ప్రచురించిన ‘అయ్యో పాపం తులసీ’ ఉత్తరం, ‘పీకే’ సినిమాపై వచ్చిన ఉత్తరాలు చదివాక ఇది రాయాలనిపించింది. నిజానికి రెండిటికీ సంబంధం ఉంది. భక్తి అనేది వాణిజ్యపరం కావడాన్ని గురించి ‘పీకే’ సినిమాలో ప్రశ్నించారు. బయట పరిస్థితి కూడా అలా ఉందనే విషయం ‘అయ్యో పాపం తులసీ’ ఉత్తరం చెప్పకనే చెప్పింది.
  ‘దేవుడిని మొక్కుకుంటే చాలు... ఇక మిగతా విషయాలను గురించి పెద్దగా పట్టించుకోవాల్సిన అవసరం లేదు’ అనే భావన పెరిగిపోతుంది. ఇతరులతో మర్యాదగా వ్యవహరించడం, పర్యావరణ స్పృహ కలిగి ఉండడం, నైతిక విలువలతో ప్రవర్తించడం... ఇవి కూడా భక్తిశ్రద్ధలతో చూడాల్సిన విషయాలు.
  ‘దేవుడు అన్నిచోట్ల ఉంటాడు’ అంటుంటారు.
  మనం మనసు పెట్టి చూడాలేగానీ... చెట్టులో కూడా దైవం ఉంది. చెట్టును నిర్లక్ష్యం చేస్తే దైవాన్ని నిర్లక్ష్యం చేసినట్లే కదా!!
  - ఆర్.శ్యాంసుందర్, శ్రీకాకుళం
  
 పైపై చర్యల వల్ల ప్రయోజనం ఉండదు
  
 ‘స్వచ్ఛభారత్’ మంచి కార్యక్రమమేగానీ ‘నామ్‌కే స్వచ్ఛభారత్’గా మారింది. ఒకరోజు శుభ్రం చేయడం, ఫొటోలకు పోజులు ఇవ్వడం వల్ల ‘స్వచ్ఛభారత్’ రాదు. పై పై చర్యల వల్ల ప్రయోజనం ఉండదు. సమస్య మూలాన్ని గుర్తించి దాన్ని నిర్మూలించడం వల్లే ఫలితం ఉంటుంది.
  - సొల్లేటి కొండల్‌రావు, పామూరు, ప్రకాశం జిల్లా.
    
 చిత్తశుద్ధి లేని చెత్తశుద్ధి ఏల?
 
 స్వచ్ఛభారత్ కార్యక్రమం ‘ఫొటో సెషన్’ కార్యక్రమంగా మారిందా? అనిపిస్తుంది. ఒక పని చేస్తే చిత్తశుద్ధితో చేయాలి. లేదంటే చేయకూడదు. స్వచ్ఛభారత్ కార్యక్రమంలో చాలామంది మొక్కుబడిగా పాల్గొంటున్నారు. స్వచ్ఛభారత్ అనేది ప్రభుత్వ కార్యక్రమం కాదు... అది మన కార్యక్రమం అనుకున్నరోజు ఈ కార్యక్రమం విజయవంతం అవుతుంది. చెత్తశుద్ధి చేయడానికే ఎక్కడెక్కడికో వెళ్లనక్కర్లేదు. ఎవరి ఇంటి దగ్గర వాళ్లు, ఎవరు ఆఫీసు దగ్గర వాళ్లు, ఎవరి కాలేజీల దగ్గర వాళ్లు చెత్తను శుభ్రం చేస్తే మంచిది. ప్రచారానికి వెచ్చించే డబ్బును శుభ్రతకు ప్రాధాన్యత ఇచ్చే గ్రామాలు, వీధులకు ప్రోత్సాహక బహుమతిగా ఇస్తే మంచిది.
  - సి.ప్రతాప్, మధిర
  
 పాఠకులకు ఆహ్వానం
  
 ‘ఈ కాలమ్ మీదే’ అనే ఈ చర్చావేదికలో పాల్గొనండి. చర్చనీయాంశం మీ ఇష్టం. ఏ సామాజిక అంశాన్నయినా, ఆలోచననైనా మీరు చర్చకు పెట్టొచ్చు. మీ వాదనను వినిపించవచ్చు. దానిపై మిగతా పాఠకులనూ చర్చకు ఆహ్వానిస్తుంది సాక్షి ఫ్యామిలీ. వీటిని ప్రతి సోమవారం ప్రచురిస్తుంది. వెంటనే రాసి పంపండి. మీ చర్చనీయాంశం పంపవలసిన చిరునామా: ‘ఈ కాలమ్ మీదే’ సాక్షి ఫ్యామిలీ,
  సాక్షి టవర్స్, రోడ్ నంబర్ 1, బంజారాహిల్స్, హైదరాబాద్-34
 ఇ-మెయిల్: sakshireaders@gmail.com


 ‘ఈ కాలమ్ మీదే’ చర్చావేదికకు మాకు అందిన అభిప్రాయాల్లో నుంచి ఇక్కడ మూడింటిని ప్రచురిస్తున్నాం. ఈ మూడిట్లో ఏ అంశంపై అయినా మీరు చర్చలో పాల్గొనవచ్చు. మీ విలువైన అభిప్రాయాన్ని ఇతరులతో పంచుకోవచ్చు.
 
 తెలుగులో మాట్లాడటం తప్పా?
 ఇప్పుడు ఎక్కడ చూసినా ఇంగ్లిష్ వాతావరణమే కనిపిస్తోంది. ఇద్దరు తమిళులు కలిస్తే తమిళం మాట్లాడతారని, ఇద్దరు కన్నడిగులు కలిస్తే కన్నడంలో మాట్లాడతారని... ఇద్దరు తెలుగు వాళ్లు కలిస్తే మాత్రం... కచ్చితంగా ఇంగ్లిష్‌లో మాత్రమే మాట్లాడుకుంటారనే మాట హాస్యం కోసం అన్నది కాదని, నిజమేనని నిత్యజీవిత సంఘటనలను చూస్తే అర్థమవుతుంది.
  
 ‘ఇంగ్లిష్ రాకపోతే జీవనం లేదు. ఇంగ్లిష్ లేకపోతే జీవితం లేదు’ అని తల్లిదండ్రులు ఆలోచించడం వల్లే తెలుగు లేని ఇంగ్లిష్ మీడియం స్కూళ్లు పుట్టగొడుగుల్లా పుట్టుకొస్తున్నాయి. పిల్లలు ఇంగ్లిష్‌లో మాట్లాడడం నేరమైపోయింది. మరోవైపు పిల్లలు ఇంట్లో ఇంగ్లిష్‌లో మాట్లాడుకోవడాన్ని తల్లిదండ్రులు గర్వంగా భావిస్తున్నారు. ఏ రాష్ట్రాల్లో లేని విధంగా మన తెలుగు రాష్ట్రాల్లోనే ఇంగ్లిష్‌కు అధిక ప్రాధాన్యత ఇవ్వడం కనిపిస్తుంది. ఇది సమంజసమేనా? ఏం చేస్తే తెలుగు రాష్ట్రాల్లో తెలుగుకి పూర్వవైభవం వస్తుంది?
  - నల్లపాటి సురేంద్ర, కొత్తగాజువాక
 
 ఇక మన సినిమాల్లో కొత్తదనం కనిపించదా?
 ఒకప్పుడు నేను విపరీతంగా సినిమాలు చూసేవాడిని. ఇప్పుడు మాత్రం సంవత్సరానికి ఒక్క సినిమా చూడడం కూడా కష్టమైపోయింది. దీనికి కారణం అన్ని సినిమాలు ఒకేలా ఉండడమే. మన తెలుగులో గతంలో ఎన్నో గొప్ప సినిమాలు వచ్చాయి. వాటి గురించి గొప్పగా పదే పదే చెప్పుకోవడం తప్ప కొత్త సినిమాలను చూడలేమా?
  
 ఒకవేళ అడపాదడపా మంచి చిత్రాలు వచ్చినా... అవి రీమేక్‌లే తప్ప మనదంటూ దాంట్లో ఏమీ ఉండదు. రీమేక్‌లు చేసే బదులు తెలుగులోనే అలాంటి చిత్రాలు చేయవచ్చుకదా! కొద్దిమంది దర్శకులు ఇంటర్వ్యూలలో... ‘‘ప్రయోగాలు చేయడం అనేది రిస్క్‌తో కూడిన వ్యవహారం. ఒక్క సినిమా పోయిందంటే... వందలాది కుటుంబాలు వీధిన పడతాయి’’ అని తరచు చెబుతుంటారు. ‘రిస్క్’ అనుకున్నప్పుడు సినిమాలు తీయడం ఎందుకు? వ్యాపారం చేసుకుంటే డబ్బులు ఎక్కువ సంపాదించవచ్చు కదా! ఎంత కాదనుకున్నా సినిమా అనేది కళాత్మక ప్రక్రియ. దీంట్లో లాభనష్టాలు బేరీజు వేసుకోవడం తగదు.
 
 ఒక్కసారి మన పాత తెలుగు క్లాసిక్‌లను తీసుకుంటే... కళాత్మక విలువలు తప్ప... మనం తరచు చెప్పుకునే ‘కమర్శియల్ హిట్’ ఫార్ములా కనిపించదు. ‘హిట్ ఫార్ములా’ అంటే ఒక్కడే హీరో వందమందిని ఒంటి చేత్తో కొట్టడమే అనుకుంటే... భారీలొకేషన్లు, విదేశాల్లో పాటలే- అనుకుంటే ఇప్పుడొస్తున్న అన్ని సినిమాలు హిట్ కావాలి కదా! మరి అలా ఎందుకు జరగడం లేదు? అసలు మనం ఉత్తమచిత్రాలు తీయలేమా? తీయాలనుకునేవాళ్లకు ఎలాంటి ఇబ్బందులు ఎదురవుతున్నాయి? ప్రేక్షకుల అభిరుచిలో కొత్తదనం ఉండడం లేదా?... ఇలాంటి విషయాలపై చర్చిస్తే బాగుంటుంది.
 - కొమ్ము రఘువీర్ యాదవ్, వరంగల్
 
 ...అయినా కాలుస్తూనే ఉన్నారు!
 చట్టం అనేది ఆచరణలోకి వచ్చినప్పుడే విలువ ఉంటుంది. అలా కాకపోతే ఎన్ని చట్టాలు చేసుకొని ఏంలాభం? బహిరంగంగా ధూమపానం చేయడం తప్పు అనేది అందరికీ తెలిసిన విషయమే. ఇది తెలిసి కూడా చాలామంది బహిరంగంగానే సిగరెట్ కాలుస్తున్నారు. ఒకసారి నేను బస్‌స్టాప్‌లో నిల్చొని బస్సు కోసం ఎదురుచూస్తున్నాను. నా పక్కన నిల్చొన్న వ్యక్తి తన జేబులో నుంచి సిగరెట్ తీసి తాగడం మొదలుపెట్టాడు.
  
 ‘‘అలా దూరంగా వెళ్లి కాల్చండి. ఇబ్బందిగా ఉంది’’ అన్నాను అతడితో.
  ‘‘ఇబ్బందిగా ఉంటే నువ్వే దూరంగా వెళ్లు. నా సిగరెట్ పూర్తయిన తరువాత వచ్చి నిల్చో’’ అన్నాడు దురుసుగా. ఇలా మా మధ్య మాటా మాటా పెరిగి వాదులాడుకోవడం ప్రారంభించాము. ఇంత జరుగుతున్నా... చుట్టుపక్కల ఉన్నవాళ్లలో ఒక్కరు కూడా ‘‘ఏమయ్యా... తప్పు చేయడమే కాకుండా... అతి తెలివి ప్రదర్శిస్తున్నావా?’’ అని అతన్ని మందలించే ప్రయత్నం చేయలేదు. ఇంతకీ తప్పు ఎవరిది? తప్పు అని తెలిసినా... సిగరెట్ తాగిన ఆ పెద్ద మనిషిదా? తప్పు చేస్తున్నాడని తెలిసినా ఉదాసీనంగా ఉన్న ప్రయాణికులదా?
 - డి.ప్రభావతి, చిత్తూరు
 
 పాఠకులకు ఆహ్వానం
 ‘ఈ కాలమ్ మీదే’ అనే ఈ  చర్చావేదికలో పాల్గొనండి. చర్చనీయాంశం మీ ఇష్టం.  ఏ సామాజిక అంశాన్నయినా, ఆలోచననైనా మీరు చర్చకు పెట్టొచ్చు. మీ వాదనను వినిపించవచ్చు. దానిపై మిగతా పాఠకులనూ చర్చకు ఆహ్వానిస్తుంది  సాక్షి ఫ్యామిలీ. వీటిని ప్రతి సోమవారం ప్రచురిస్తుంది.  వెంటనే రాసి పంపండి. మీ చర్చనీయాంశం పంపవలసిన చిరునామా  
  ‘ఈ కాలమ్ మీదే’ సాక్షి ఫ్యామిలీ, సాక్షి  టవర్స్, రోడ్ నంబర్ 1, బంజారాహిల్స్, హైదరాబాద్-34 . ఇ-మెయిల్: sakshireaders@gmail.com