కరోనా.. ఎంత వేగంగా వ్యాప్తి చెందుతుందో దాన్ని అరికట్టే వైజ్ఞానిక ప్రయోగాలూ అంతే త్వరితంగా జరుగుతున్నాయి. ఈ  ప్రయత్నాల్లో మన దేశం వెనకబడిపోయిందనే కామెంట్‌ను మోస్తూ వచ్చాం ఇన్నాళ్లూ. ఇప్పుడు ఆ మాటకు చెక్‌ పెట్టారు వైరాలజిస్ట్‌  మినల్‌ దఖావె భోశాలే పుణెలోని ‘మైల్యాబ్‌ డిస్కవరీ’ అనే డయాగ్నస్టిక్‌ కంపెనీలో రీసెర్చ్‌  అండ్‌ డెవలప్‌మెంట్‌ చీఫ్‌గా పనిచేస్తున్న ఆమె కేవలం ఆరు వారాల్లోనే ‘కరోనా’ వ్యాధి నిర్ధారణ కిట్‌ను కనిపెట్టారు. దానిపేరు ‘పాథో డిటెక్ట్‌’. వ్యాధి నిర్ధారణా పరికరాన్ని కనుగొనే వరకు వైరస్‌ ఆగదు కదా.. ‘అందుకే ఆరువారాలు రికార్డ్‌ టైమ్‌. ఆ ఘనత మినల్‌కే దక్కుతుంది’ అన్నారు  ‘మైల్యాబ్‌ డిస్కవరీ’ డైరెక్టర్‌ డాక్టర్‌ గౌతమ్‌ వాంఖడే. మన దగ్గర నేషనల్‌ ఇన్‌స్టిట్యూట్‌ ఆఫ్‌ వైరాలజీ చేత ఆమోదం పొందిన మొట్టమొదటి కరోనా నిర్ధారణా పరీక్షా పరికరం ఇదే. అయితే.. ఇది దేశానికే కాదు... మినల్‌కూ కష్టకాలమే. ఈ ప్రయోగం చేస్తున్నప్పుడు ఆమె నిండు చూలాలు. పైగా ఆరోగ్యపరంగా కొన్ని సమస్యలు ఎదురై ఆసుపత్రిలో చేరింది కూడా. అప్పుడే మైల్యాబ్స్‌ డిస్కవరీ కరోనా టెస్టింగ్‌ కిట్స్‌ ప్రాజెక్ట్‌ను మినల్‌కు అప్పగించింది. క్లిష్టపరిస్థితుల్లో  తనకు చేతనైన దేశసేవ చేయడానికి ఇంతకు మించిన అవకాశం ఏం ఉంటుంది అని ఈ ప్రయోగాన్ని ఛాలెంజింగ్‌గా తీసుకుంది మినల్‌. ఆసుపత్రి నుంచి డిశ్చార్జ్‌ అయిన వెంటనే  పదిమంది టీమ్‌తో టెస్టింగ్‌ కిట్‌ ప్రయోగం మొదలుపెట్టింది. కేవలం నెలా పదిహేనురోజుల్లో విజయం సాధించింది. ఈ కిట్‌కు సంబంధించిన ఫార్ములాను మొన్న పద్దెనిమిదో తేదీన (మార్చి నెల) నేషనల్‌ ఇన్‌స్టిట్యూట్‌ ఆఫ్‌ వైరాలజీకి సమర్పించింది. ఆ తర్వాత రోజే అంటే మార్చి 19న పండంటి పాపాయికి జన్మనిచ్చింది మినల్‌.  ప్రస్తుతం  ఈ రెండు శుభసందర్భాలనూ ఆమె ఆస్వాదిస్తోంది. ఈ కిట్‌ సామర్ధ్యం.. ఇప్పటి వరకు మనం ఈ కిట్స్‌ను విదేశాల నుంచి దిగుమతి చేసుకుంటూ వస్తున్నాం. అందుకే ప్రతి ఒక్కరినీ పరీక్షించే వీలు లేకపోయింది. కేవలం విదేశాల నుంచి వచ్చిన వాళ్లను.. వాళ్లతో కలిసి వాళ్లను, దగ్గు, జలుబు, జ్వరం మొదలైన లక్షణాలు కలిగిన వాళ్లను మాత్రమే పరీక్షిస్తున్నారు. ఇప్పుడు ఈ కిట్‌తో ఆ సమస్య తీరిపోనుంది. ఇప్పటిదాకా మనం దిగుమతి చేసుకుంటున్న వ్యాధి నిర్ధారణా విదేశీ కిట్స్‌ ఒక్కోటి 4,500 రూపాయలు. పాథో డిటెక్ట్‌  కిట్‌ వెల  పన్నెండు వందల రూపాయలు మాత్రమే. అదీగాక విదేశీ కిట్‌లో ఫలితం రావడానికి ఆరు నుంచి ఏడు గంటల సమయం పడితే ఈ స్వదేశీ కిట్‌తో కేవలం రెండున్నర గంటల్లోనే ఫలితం వస్తుంది. ఒక్కో కిట్‌తో వంద శాంపుల్స్‌ను పరీక్షించొచ్చు అని చెప్తున్నారు నిపుణులు. ► తొలి విడతగా 150 ‘పాథో డిటెక్ట్‌’ కిట్‌లను తయారు చేశారు. వీటిని పుణెతోపాటు ముంబై. ఢిల్లీ, గోవా, బెంగళూరు నగరాలకు పంపుతున్నారు.  తర్వాత మరిన్నిటిని మిగిలిన నగరాలకు సరఫరా చేస్తారు.  ► దీన్ని మన దేశంలో కరోనా మీద తొలి గెలుపుగా భావించొచ్చు. ఈ యుద్ధంలో  మహిళ మేధోశక్తి విజయం సాధించడం భారతీయులందరికీ గర్వకారణమే!  ► ‘ఈ అత్యవసర పరిస్థితి దేశానికే కాదు నాకూ సవాలుగానే అనిపించింది. అందుకే ఈ అసైన్‌మెంట్‌ తీసుకున్నాను’ అంటుంది మినల్‌.  ► మినల్‌ ఈ ప్రయత్నం పలువురి ప్రశంసలు అందుకుంటోంది. వాళ్లలో మహీంద్రా గ్రూప్‌ చైర్మన్‌ ఆనంద్‌ మహీంద్రా , బయోకాన్‌ చైర్‌పర్సన్, మేనేజింగ్‌ డైరెక్టర్‌ కిరణ్‌ మజుందార్‌ షా కూడా ఉన్నారు.


 
 ఆపిల్ అనగానే.. మనకు మొదట గుర్తొచ్చేది ఐఫోన్ మాత్రమే. కానీ ఆపిల్ కేవలం స్మార్ట్ఫోన్లపైనే కాక ప్రజాఆరోగ్యం, హెల్త్ కేర్ ఇండస్ట్రి పైనాఎక్కువగా  దృష్టిపెట్టిందట. ప్రపంచవ్యాప్తంగా 8 ట్రిలియన్ డాలర్లుగా ఉన్న హెల్త్ కేర్ ఇండస్ట్రి ద్వారా ఎక్కువ రెవెన్యూలను ఆర్జించాలని ఆపిల్ యోచిస్తున్నట్టు తెలుస్తోంది. ఈ నేపథ్యంలోనే ప్రజా ఆరోగ్యం కోసం వినూత్నమైన సాప్ట్వేర్లను ఎప్పడికప్పుడూ ఆవిష్కరిస్తూ వాటిని ప్రజల్లోకి తీసుకెళ్లేందుకు విశ్వప్రయత్నాలు చేస్తోంది. ఆపిల్ ఇంక్ హెల్త్ కిట్ ఇది యూజర్లకు తెలిసేఉంటోంది. ప్రస్తుతం ఈ హెల్త్కిట్ను ఓ టూల్లాగా మార్చి రోగనిర్ధారణ కనుగునే స్థాయికి తీసుకెళ్లాలని ఆపిల్ మెడికల్ టీమ్ అంతిమ లక్ష్యంగా నిర్ణయించుకుందని తెలుస్తోంది.
 
  
 
 ప్రస్తుతమున్న ఈ హెల్త్కిట్ కేవలం యూజర్లు వాడే డివైజ్ ద్వారా ఫిట్నెస్ డేటాను మాత్రమే సేకరించగలదు.  డేటాను సేకరించడమే కాకుండా దాన్ని విశ్లేషించేలా కొత్త సాప్ట్వేర్ను ఆపిల్ రూపొందిస్తోంది. ఈ సాప్ట్వేర్ యూజర్లకు, డాక్టర్లకు , ఇతరులకు సలహాలు కూడా ఇస్తుందట.ఎలక్ట్రానిక్ హల్త్ రికార్డు సాప్ట్వేర్ను మెరుగుపరచడానికి ఆపిల్ ఇటీవల హెల్త్ కేర్ నిపుణులు భారీగా నియమించుకుంటుంది. దీంతో పేషెంట్ డేటాను మరింత విశ్లేషించి, అర్థం చేసుకోవడానికి వీలవుతుందని కంపెనీకి చెందిన ఒకరు చెప్పారు. 
 
  
 
 అదేవిధంగా ఆపిల్ వాచ్ల్లో కొత్త కొత్త యాప్ల రూపకల్పనకు ఇది దోహదం చేస్తుందట. ఆపిల్ కొత్తగా రూపొందించే యాప్ల ద్వారా యూజర్ల నిద్రను ట్రాక్ చేయడం, హార్ట్ రేట్ బట్టి ఫిట్నెస్ను గుర్తించడం వంటివి చేపట్టవచ్చట. అయితే హార్ట్ రేటును కొలవడానికి ఆపిల్ ఇంతకమునుపే ఓ యాప్ను రూపొందించింది. కానీ ఆ యాప్ ద్వారా సేకరించిన డేటాను విశ్లేషించలేం. ప్రస్తుతం తీసుకొస్తున్న యాప్ ద్వారా హార్ట్ రేటు సేకరించడమే కాకుండా దాన్ని విశ్లేషించుకోవచ్చు. ఆపిల్ ప్రజల ఆరోగ్యానికి సంబంధించి ఎక్కువ సాప్ట్వేర్లు రూపొందించడమే లక్ష్యంగా పనిచేస్తుందని చీప్ ఎగ్జిక్యూటివ్ టిమ్ కుక్ చాలా సందర్భాల్లో పేర్కొన్నారు. వీటితో యూజర్లు ఎక్కువగా తమ కంపెనీ డివైజ్పైనే ఆధారపడాలని భావిస్తున్నారు.