సాక్షి, హైదరాబాద్‌: రాష్ట్రంలో హైటెన్షన్‌ (హెచ్‌టీ) కేటగిరీ వినియోగదారులకు విద్యుత్‌ బిల్లులు షాక్‌ కొట్టనున్నాయి. విద్యుత్‌ చార్జీలతోపాటు ఫిక్స్‌డ్‌ చార్జీలు కూడా పెరగబోతున్నాయి. లోటెన్షన్‌ (ఎల్టీ) కేటగిరీలో కూడా నెలకు 300 యూనిట్లకుపైగా వినియోగించేవారికీ ఫిక్స్‌డ్‌ చార్జీ (డిమాండ్‌ చార్జీ)లు వాతపెట్టబోతున్నాయి. ప్రస్తుత ఆర్థిక సంవత్సరం (2024–25)లో రాష్ట్రంలో రూ.1,200 కోట్ల మేర విద్యుత్‌ చార్జీల పెంపునకు అనుమతి కోరుతూ.. దక్షిణ/ఉత్తర తెలంగాణ విద్యుత్‌ పంపిణీ సంస్థలు (టీజీఎస్పీడీసీఎల్‌/టీజీఎన్పిడీసీఎల్‌) బుధవారంరాత్రి రాష్ట్ర విద్యుత్‌ నియంత్రణ మండలి (ఈఆర్సీ) అనుమతి కోరాయి. ఈ మేరకు వార్షిక ఆదాయ అవసరాల నివేదిక, కొత్త టారిఫ్‌ ప్రతిపాదనలను సమర్పించాయి. హెచ్‌టీ కేటగిరీకి చార్జీల పెంపుతో రూ.700 కోట్లు, ఫిక్స్‌డ్‌ చార్జీల పెంపుతో రూ.100 కోట్లు కలిపి రూ.800 కోట్లు భారం పడనుంది. మరో రూ.400 కోట్లను ఎల్టీ వినియోగదారులకు ఫిక్స్‌డ్‌ చార్జీల పెంపు ద్వారా రాబట్టుకుంటామని డిస్కంలు ప్రతిపాదనల్లో పేర్కొన్నారు. దీనిపై ఈఆర్సీ త్వరలో బహిరంగ విచారణ, ప్రజాభిప్రాయ సేకరణ నిర్వహించి కొత్త టారిఫ్‌ ఉత్తర్వులను జారీ చేస్తుంది. నవంబర్‌ 1 నుంచి పెరిగిన చార్జీలు అమల్లోకి వచ్చే అవకాశం ఉంది. హెచ్‌టీలో ఏకరూప చార్జీలతో.. ప్రస్తుతం హైటెన్షన్‌ (హెచ్‌టీ) కేటగిరీలో 11 కేవీ, 33 కేవీ, 132 కేవీ/ఆపై సామర్థ్యం పేరిట మూడు ఉప కేటగిరీల విద్యుత్‌ కనెక్షన్లు ఉన్నాయి. మూడింటికి వేర్వేరు చార్జీలను విధిస్తున్నారు. ఇందులో 132 కేవీ చార్జీలు తక్కువగా, 33 కేవీ చార్జీలు కొంత తక్కువగా ఉండగా.. వీటికంటే 11 కేవీ చార్జీలు ఎక్కువగా ఇకపై అన్నింటికీ 11 కేవీతో సమానంగా.. ఎక్కువ చార్జీలను వసూలు చేయనున్నారు. అంటే 33కేవీ చార్జీలు ఒక్కో యూనిట్‌పై 50పైసల చొప్పున, 132కేవీ/ఆపై కనెక్షన్ల చార్జీలు రూపాయి చొప్పున పెరగనున్నాయి. హెచ్‌టీ కేటగిరీలోకి సాధారణ పరిశ్రమలు, లైట్స్‌ అండ్‌ ఫ్యాన్స్, కోళ్ల ఫారాలు, సీజనల్‌ పరిశ్రమలు, ఫెర్రో అల్లాయ్‌ యూనిట్లు, ఇతరులు, విమానాశ్రయాలు, రైల్వేస్టేషన్లు, బస్‌ స్టేషన్లు, తాత్కాలిక సరఫరా వంటి వినియోగదారులు వస్తారు. ఎల్టీ కేటగిరీలో 300 యూనిట్లు దాటితే వాతేఎల్‌టీ కేటగిరీలోని గృహ కనెక్షన్లకు లోడ్‌ సామర్థ్యం (కాంట్రాక్టెడ్‌ లోడ్‌) ఆధారంగా ప్రతి కిలోవాట్‌ (కేడబ్ల్యూ)కు రూ.10 చొప్పున ప్రస్తుతం ఫిక్స్‌డ్‌ చార్జీలను విధిస్తున్నారు. ఇకపై నెలలో విద్యుత్‌ వినియోగం 300 యూనిట్లకు మించితే వారి ఫిక్స్‌డ్‌ చార్జీలను కిలోవాట్‌కు రూ.10కి బదులు రూ.50 చొప్పున వసూలు చేస్తారు. ఉదాహరణకు ప్రస్తుతం నెలకు 300 యూనిట్లకుపైగా వినియోగించే గృహ వినియోగదారులకు ఫిక్స్‌డ్‌ చార్జీల కింద రూ.30 విధిస్తుంటే.. కొత్త ప్రతిపాదనలు అమల్లోకి వస్తే రూ.150 విధిస్తారు. » ఇక ఎల్టీ కేటగిరీలోని ఇతర వినియోగదారులకు సంబంధించిన ఫిక్స్‌డ్‌ చార్జీల పెంపునకు కూడా డిస్కంలు ప్రతిపాదనలు చేసినట్టు తెలిసింది. లోటెన్షన్‌ కేటగిరీలోకి గృహాలు, గృహేతర/ చిన్న వాణిజ్య, పరిశ్రమలు, కుటీర పరిశ్రమలు, వ్యవసాయ ఆధారిత కార్యకలాపాలు, వీధి దీపాలు, తాగునీటి సరఫరా పథకాలు, సాధారణ వినియోగదారులు వస్తారు. వీటికి విద్యుత్‌ చార్జీలను యథాతథంగా కొనసాగించాలని డిస్కంలు ప్రతిపాదించాయి. ఆదాయ లోటు రూ.13,022 కోట్లు.. రాష్ట్ర డిస్కంలు 2024–25లో రూ.13,022 కోట్ల ఆదాయ లోటును ఎదుర్కోవాల్సి ఉంటుందని అంచనా వేశాయి. ఇందులో ఎస్పీడీసీఎల్‌ వాటా రూ.8,093 కోట్లు కాగా ఎన్పిడీసీఎల్‌ వాటా రూ.4,929 కోట్లు. విద్యుత్‌ చార్జీల పెంపుతో రూ.1,200 కోట్ల అదనపు ఆదాయాన్ని సమకూర్చుకుంటామని.. మిగతా రూ.11,822 కోట్లను రాష్ట్ర ప్రభుత్వం సబ్సిడీ రూపంలో అందజేస్తుందని డిస్కంలు ఈఆర్సీకి ఇచి్చన ప్రతిపాదనల్లో పేర్కొన్నాయి.

సాక్షి, హైదరాబాద్‌: త్వరలో రాష్ట్రంలో హైటెన్షన్‌ (హెచ్‌టీ) కేటగిరీ విద్యుత్‌ చార్జీలు పెరగనున్నాయి. హెచ్‌టీ కేటగిరీలో 11 కేవీ, 33 కేవీ, 132 కేవీ/ఆపై సామర్థ్యం .అనే మూడు ఉప కేటగిరీల విద్యుత్‌ కనెక్షన్లుండగా, మూడింటికి వేర్వేరు చార్జీలు విధిస్తున్నారు. ఇకపై 33 కేవీ, 132కేవీ/ఆపై సామర్థ్యం కనెక్షన్ల చార్జీలను 11 కేవీ కనెక్షన్ల చార్జీలకు సమానంగా పెంచేందుకు రాష్ట్ర విద్యుత్‌ పంపిణీ సంస్థ(డిస్కం)లు ప్రతిపాదించగా, రాష్ట్ర ప్రభుత్వం అనుమతిచ్చినట్టు సమాచారం.కొన్ని హెచ్‌టీ కేటగిరీల్లోని 33 కేవీ కనెక్షన్లకు యూనిట్‌ విద్యుత్‌పై అర్ధరూపాయి వరకు, 132 కేవీ/ఆపై సామర్థ్యం కలిగిన కనెక్షన్లకు రూపాయి వరకు విద్యుత్‌ చార్జీలు పెరగనున్నట్టు తెలిసింది. రాష్ట్రంలోని దక్షిణ/ఉత్తర తెలంగాణ విద్యుత్‌ పంపిణీ సంస్థ (టీజీఎస్పీడీసీఎల్‌/టీజీఎనీ్పడీసీఎల్‌) సంస్థలు వారంలోగా 2024–25 ఆర్థిక సంవత్సరానికి సంబంధించిన తమ వార్షిక ఆదాయ అవసరాల నివేదిక (ఏఆర్‌ఆర్‌)ను.. రాష్ట్ర విద్యుత్‌ నియంత్రణ మండలి (టీజీఈఆర్సీ)కి సమర్పించే అవకాశముంది. నవంబర్‌లోనే సమర్పించాల్సి ఉండగా... విద్యుత్‌ టారిఫ్‌ రెగ్యులేషన్స్‌ ప్రకారం ప్రతి ఏటా నవంబర్‌ 30లోగా వచ్చే ఆర్థిక సంవత్సరానికి సంబంధించిన విద్యుత్‌ టారిఫ్, ఏఆర్‌ఆర్‌ ప్రతిపాదనలను డిస్కంలు ఈఆర్సీకి సమర్పించాలి. గత బీఆర్‌ఎస్‌ ప్రభుత్వ హయాంలోనే విద్యుత్‌ చార్జీల పెంపునకు సంబంధించిన ప్రతిపాదనలను డిస్కంలు సిద్ధం చేయగా, శాసనసభ ఎన్నికల నేపథ్యంలో అప్పట్లో గడువు పొడిగింపు పొందాయి. ఉత్తర/దక్షిణ డిస్కంలు గత ఆర్థిక సంవత్సరం 2023–24లో రూ.6299.29 కోట్ల కొత్త నష్టాలను మూటగట్టుకోగా, వాటి మొత్తం నష్టాలు రూ.57,448 కోట్లకు ఎగబాకాయి. ఒక్క టీజీఎస్పీడీసీఎల్‌ నష్టాలే రూ.39,692 కోట్లకు చేరగా, మరో రూ.17,756 కోట్ల నష్టాల్లో టీజీఎన్పిడీసీఎల్‌ సంస్థ ఉంది. దీంతో చార్జీల పెంపు అనివార్యంగా మారిందని అధికారులు అంటున్నారు. గృహాలు, వాణిజ్య కేటగిరీలకు పెంపు లేదు లోటెన్షన్‌ కేటగిరీ పరిధిలోకి వచ్చే గృహాలు, గృహేతర/వాణిజ్య, పరిశ్రమలు, కుటీర పరిశ్రమలు, వ్యవసాయ ఆధారిత కార్యకలాపాలు, వీధి దీపాలు, తాగునీటి సరఫరా పథకాలు, సాధారణ వినియోగదారుల విద్యుత్‌ చార్జీలు పెరగవు. హెచ్‌టీలో చార్జీల మోత.. హెచ్‌టీ కేటగిరీలోని సాధారణ పరిశ్రమలు, లైట్స్‌ అండ్‌ ఫ్యాన్స్, కోళ్ల ఫారాలు, సీజనల్‌ పరిశ్రమలు, ఫెర్రో అల్లయ్‌ యూనిట్లు, ఇతరులు, విమానాశ్రయాలు, రైల్వే స్టేషన్లు, బస్‌ స్టేషన్లు, తాత్కాలిక సరఫరా వంటి వినియోగదారులు వస్తారు. ఈ కేటగిరీల వినియోగదారులు తమ అవసరాల మేరకు 11 కేవీ, 33 కేవీ, 132 కేవీ/ఆపై సామర్థ్యంతో విద్యుత్‌ కనెక్షన్లను కలిగి ఉన్నారు. 11 కేవీ కనెక్షన్‌తో సమానంగా సంబంధిత 33 కేవీ, 132 కేవీ/ఆపై కనెక్షన్ల చార్జీలను పెంచే అవకాశముంది.11 కేవీ కనెక్షన్ల చార్జీలు ఇప్పటికే అధికంగా ఉండడంతో యథాతథంగా ఉంచాలని నిర్ణయించారు. హెచ్‌టీ కేటగిరీలోని పారిశ్రామికవాడలు, ఆధ్యాతి్మక స్థలాలు, సాగునీటి పథకాలు, తాగునీటి పథకాలు, రైల్వే ట్రాక్షన్, మెట్రో రైలు, టౌన్‌ షిప్పులు/రెసిడెన్షియల్‌ కాలనీలు, చార్జింగ్‌ స్టేషన్లకు సంబంధించిన 11 కేవీ, 33 కేవీ, 132 కేవీ/ఆపై సామర్థ్యమున్న కనెక్షన్లకు ఒకే తరహా చార్జీలు వసూలు చేస్తున్నారు. దీంతో వీటికి చార్జీల పెంపు వర్తించకపోవచ్చు.


 
  సాక్షి, చిత్తూరు: రాష్ట్ర విభజనను వ్యతిరే కిస్తూ ట్రాన్స్‌కో ఉద్యోగులు చేస్తున్న మెరుపు సమ్మె రెండో రోజూ కొనసాగింది. విద్యుత్ ఉద్యోగులు సోమవారమూ సరఫరా నిలిపేసి తమ పవర్ పంచ్ చూపించారు. ఉదయం 6 నుంచి రాత్రి 7 గంటల వరకు సరఫరాను ఆపేశారు. జిల్లా మొత్తానికి హెచ్‌టీ లైన్ల నుంచి విద్యుత్ సరఫరా చేసే కలికిరి, రేణిగుంట, చిత్తూరు 220 కేవీ ప్రధాన సబ్‌స్టేషన్లను విద్యుత్ ఉద్యోగులు షట్‌డౌన్ చేశారు. జిల్లాలో హెల్పర్ల నుంచి డీఈల వరకు 2,200 మంది ఉద్యోగులు సమ్మె లో ఉన్నారు. ఫ్యూజ్‌కాల్స్, బ్రేక్‌డౌన్లు వేటికీ అటెండ్ కావడం లేదు. జిల్లాలోని 33 కేవీ సబ్‌స్టేషన్లు 295, 11కేవీ విద్యుత్ ఫీడర్లు 1100 పడకేశాయి. ప్రైవేట్ ఆస్పత్రులు, హోటల్స్, కంప్యూటర్ సెంటర్లు, జిరాక్స్ దుకాణాలు, వెల్డర్లు, పిండిమరలు, లేత్‌మిషన్లు, చిన్న పరిశ్రమలు, వాటర్‌సర్వీసు స్టేషన్లు, బేకరీల్లో  కార్యకలాపాలు పూర్తిగా స్తంభించాయి. రక్షిత మంచినీటి పథకాలకు మోటర్లు పనిచేయక గ్రామాల్లో జనం నీటి కోసం అవస్థలు పడ్డారు. జిల్లావ్యాప్తంగా కోట్ల రూపాయల వాణిజ్య కార్యకలాపాలకు అంతరాయం ఏర్పడింది. తిరుపతి నుంచి బయల్దేరే రైళ్ల పైన విద్యుత్ సమ్మె ప్రభావం పడింది. అన్ని రైళ్లకు డీజిల్ ఇంజిన్లు తగిలించి పంపింపేందుకు ఏర్పాట్లు చేశారు. రేణిగుంట, చిత్తూరు, వెంకటగిరిలోని విద్యుత్, రైల్వేట్రాక్షన్ సబ్‌స్టేషన్లకు విద్యుత్ సరఫరా నిలిపేశారు. ఆదివారం రాత్రి నుంచి కాట్పాడి (తమిళనాడు) రైల్వే ట్రాక్షన్‌కు విద్యు త్ సరఫరా తీసుకున్నారు. తిరుపతి పాస్‌పోర్టు కార్యాలయంలో పాస్‌పోర్టుల జారీ కోసం జనరేటర్లను ఏర్పాటు చేసుకున్నారు.
  
  10 మిలియన్లకు లక్ష యూనిట్లే సరఫరా
  జిల్లావ్యాప్తంగా రోజూ హెచ్‌టీ, ఎల్‌టీ సర్వీసులకు 10 మిలియన్ యూనిట్లు అవసరం కా గా లక్ష యూనిట్లు సరఫరా కావడం లేదు. విద్యుత్ ఉత్పత్తి చేసే ముద్దనూరు, విజయవాడ వీటీఎస్‌ల్లో ఉత్పత్తి స్తంభించడంతో ఈ పరిస్థితి ఏర్పడింది. విద్యుత్ సరఫరా లేకపోవడంతో సబ్‌స్టేషన్లను, ఫీడర్లను సైతం ఉద్యోగులు మూసేశారు.
  ఆస్పత్రులకు విద్యుత్ కష్టాలు జిల్లాలోని తిరుపతి, చిత్తూరులోని ప్రభుత్వ ప్రధాన ఆస్పత్రులకు మాత్రం విద్యుత్ సరఫరా నిరంతరాయంగా అందే ఏర్పాట్లు చేశా రు. స్విమ్స్, రూయా, బర్డు, జిల్లా ప్రధాన ప్రభుత్వాస్పత్రులకు సరఫరా అందింది. కుప్పం, పుత్తూరు, శ్రీకాళహస్తి, నగరి ఏరియా ఆస్పత్రుల్లో సరఫరా బంద్ కావడం, జనరేటర్లు లేకపోవడంతో వైద్యసేవలకు అంత రాయం ఏర్పడింది. పట్టణాల్లో ప్రైవేట్ ఆస్పత్రులు గంటల కొద్దీ జనరేటర్లతో నిర్వహించలేక కార్యకలాపాలు వాయిదా వేశాయి.
  
  పరిశ్రమలకు దెబ్బ
  జిల్లాలోని శ్రీనిఫుడ్స్, అమరరాజ బ్యాటరీస్, ల్యాంకో ఇండస్ట్రీస్, జ్యూస్ ఫ్యాక్టరీలు, పిగ్‌ఐరెన్, చిత్తూరు గ్రానైట్ ఫ్యాక్టరీస్, గాజుల మండ్యం పారిశ్రామికవాడల్లోని పరిశ్రమల్లో కార్యకలాపాలు స్తంభించాయి. బీఎస్‌ఎన్‌ఎల్ సెల్‌టవర్లకు జనరేటర్లు పూర్తిగా నిర్వహించే పరిస్థితి లేకపోవడంతో సిగ్నల్స్ పని చేయలేదు. వినియోగదారులు ఫోన్లు చేసుకోలేక ఇబ్బంది పడ్డారు. చిత్తూరు కేంద్రంగా ఉన్న పౌల్ట్రీ హేచరీస్‌లో కోడిపిల్లల ఉత్పత్తిపై ప్రభా వం పడింది. జనరేటర్లు ఉన్నా ఉష్ణోగ్రత అవసరమైన మేరకు నిర్వహించే పరిస్థితి లేదు.
  
  విమానాశ్రయంలో..
  రేణిగుంట, న్యూస్‌లైన్: రేణిగుంట విమానాశ్రయంలో ఉదయం 6 గంటల నుంచి కరెంటు సరఫరా నిలిపి వేశారు. టెర్మినల్ బిల్డింగ్ టెక్నికల్ బ్లాక్‌లోని ఉద్యోగులు ఎయిర్‌పోర్ట్ అగ్నిమాపక కేంద్రంలోని జనరేటర్ సాయంతో కార్యకలాపాలు నిర్వర్తించారు. సాయంత్రం వరకూ స్పైస్‌జెట్, ఎయిరిండియా,  జెట్‌లైట్ విమానాల రాకపోకలకు జనరేటర్‌తోనే సందేశాలను అందించారు.
  
  రైల్వేలో కరెంట్ ఎఫెక్ట్
  తిరుపతి అర్బన్, న్యూస్‌లైన్: కరెంటు కోతల ప్రభావం రైల్వే వ్యవస్థపైనా పడింది. తిరుపతి రైల్వేస్టేషన్‌లో రైళ్ల రాకపోకలు సూచించే డిస్‌ప్లే బోర్డులు పనిచేయక ప్రయాణికులు ఇబ్బందులు పడ్డారు. రిజర్వేషన్ కార్యాల యం, డెప్యూటీ స్టేషన్ మేనేజర్ కార్యాలయం, ఎంక్వయిరీ కౌంటర్, బుకింగ్ కౌంటర్లు జనరేటర్ సాయంతో కొనసాగాయి. జ్యూస్ స్టాల్స్, వాణిజ్య సముదాయాలు, లిఫ్ట్‌లు, రిజర్వేషన్ విచారణ మిషన్లు పనిచేయలేదు. వెయిటింగ్ హాళ్లలో అంధకారం అలముకుంది. వెయిటింగ్ హాళ్లలో ఏసీలు పనిచేయక ప్రయాణికులు సిబ్బందితో వాగ్వాదానికి దిగారు. రైల్వే స్టేషన్ నుంచి ఈస్టు పోలీసుస్టేషన్ వరకు, ఉత్తరం వైపు నాలుగు కాళ్ల మండపం వరకు అంధకారం నెలకొనడంతో యాత్రికులు ఇబ్బందిపడ్డారు. రైల్వే భద్రతా కార్యాల యాల్లో ఇంటర్నెట్ వ్యవస్థ పనిచేయకపోవడంతో ఉన్నతాధికారులకు సమాచారం చేరవేయలేక ఇబ్బంది పడ్డారు.
  
  రెండో రోజూ డీజిల్ ఇంజన్లే
  తిరుపతి నుంచి వివిధ ప్రాంతాలకు వెళ్లే రైళ్లను రెండో రోజైన సోమవారమూ డీజిల్ ఇంజన్‌లతోనే నడిపారు. ఢిల్లీ, ముంబయి, భువనేశ్వర్ తదితర బయట రాష్ట్రాల నుంచి తిరుపతి మీదుగా నడిచే రైళ్లకు విద్యుత్ అంతరాయం లేకుండా తమిళనాడులోని కాట్పాడి నుంచి సరఫరాను రేణిగుంట వరకు ప్రత్యేక దశలో కొనసాగించారు. దక్షిణ మధ్య రైల్వే సికింద్రాబాద్ ఉన్నతాధికారుల ఉత్తర్వుల మేరకు మచిలీపట్నం ఎక్స్‌ప్రెస్‌ను సోమవారం రాత్రి రద్దు చేసినట్లు స్టేషన్ మేనేజర్ కూర్మారావు తెలిపారు.