సాధించారు...
  
 మూడో టెస్టులో  భారత్ ఘన విజయం
 ♦ 2-1తో సిరీస్ కైవసం
 ♦ చెలరేగిన ఇషాంత్, అశ్విన్
 ♦ మ్యాథ్యూస్ శతకం వృథా
  
  వెళ్లిన ప్రతిసారి ఏదో ఓ వైఫల్యంతో వెనక్కి వచ్చేస్తున్న పరిస్థితి... జట్టులో సీనియర్లు లేరు... అనుభవమూ అంతంత మాత్రమే... కొత్త ఆశలు.. కొంగొత్త సవాళ్లతో జట్టులోకి వచ్చిన కుర్రాళ్లు... ప్రత్యర్థిదేమో.. సొంతగడ్డపై బెబ్బులిలా పోరాడే తత్వం... తొలి టెస్టు ఓటమి ప్రభావం ఓ మూలన మిణుకుమంటున్నా.... మైదానంలో పరిస్థితులు సవాళ్లుగా మారుతున్నా.. మొక్కవోని ఆత్మవిశ్వాసంతో... నైపుణ్యాన్ని ఆయుధంగా మల్చుకుని లంక గడ్డపై యువ భారత్ రెచ్చిపోయింది. ప్రత్యర్థికి చుక్కలు చూపెడుతూ... తిరుగులేని ఆటతీరుతో 22 ఏళ్ల తర్వాత లంకలో సిరీస్‌ను సొంతం చేసుకుంది.
  
  ఒక విదేశీ సిరీస్‌లో తొలి టెస్టు ఓడి కూడా సిరీస్ గెలుచుకోవడం భారత్‌కు ఇదే తొలిసారి. అసలు ‘దూకుడు’ అనే మాట తమతోనే పుట్టిందా అన్నట్లు... దానికి కొత్త అర్థాన్ని చూపించాలన్నట్లు కెప్టెన్ పదే పదే తన సహచరులలో స్ఫూర్తి నింపే ప్రయత్నం చేశాడు. ఈ క్రమంలో కొన్ని విమర్శలు ఎదురైనా, డెరైక్టర్ రవిశాస్త్రి అండతో కోహ్లి తాను అనుకున్న వ్యూహాలకు కట్టుబడ్డాడు. ‘మూడు టెస్టుల సిరీస్ నా సత్తాకు సవాల్. ఎందుకంటే పూర్తి స్థాయి సిరీస్ ఉంటే నా వ్యూహాల్లో తప్పులు జరిగినా దిద్దుకోగలను’ అని సిరీస్‌కు ముందు కోహ్లి చెప్పా డు. తొలి టెస్టులో ఆద్యంతం ఆధిక్యం ప్రదర్శించినా, ఒకే సెషన్‌లో వెనుకబడి మ్యాచ్ కోల్పోవడం షాక్‌కు గురిచేసింది. దాంతో ఒక్కసారిగా అతనిపై తీవ్ర విమర్శలు వచ్చాయి. అయితే కోహ్లి నేర్చుకున్నాడు. తర్వాతి రెండు టెస్టుల్లో మ్యాచ్‌లు చేజారకుండా తాను అనుకున్న వ్యూహాలకు కట్టుబడి సిరీస్ సాధించాడు.
  బౌలింగ్ అద్భుతం : సొంతగడ్డపై అమోఘమైన రికార్డు ఉన్న అశ్విన్ ఇప్పుడు దానిని లంకలో కూడా కొనసాగించాడు. స్పిన్‌లో వైవిధ్యంతో పాటు బౌన్స్‌ను కూడా చక్కగా ఉపయోగించుకొని అతను 21 వికెట్లతో సత్తా చాటాడు. నాలుగేళ్ల తర్వాత జట్టులోకి వచ్చినా తన లెగ్‌స్పిన్‌లో పదును తగ్గలేదని నిరూపిస్తూ అమిత్ మిశ్రా సిరీస్‌లో సగటు, ఎకానమీ, స్ట్రైక్‌రేట్...ఇలా అన్నింటిలో అత్యుత్తమంగా నిలిచాడు. ఇక ఇషాంత్ బౌలింగ్ ప్రత్యర్థిని ‘తల బాదుకునేలా’ చేసింది.
 
 గత ఏడాది లార్డ్స్ టెస్టులో అద్భుత విజయాన్ని అందించిన ఇషాంత్ మరో సారి తన పేస్ పదునుతో జట్టును టెస్టు గెలిపించాడు. ఉమేశ్ ఎక్కువ వికెట్లు తీయకపోయినా (5) లంక టాపార్డర్‌ను పూర్తిగా కట్టి పడేశాడు.  మొత్తానికి కోహ్లి అనుకున్న ఐదుగురు బౌలర్ల సిద్ధాంతానికి వీరంతా న్యాయం చేశారు. 1988 తర్వాత భారత బౌలర్లు 3 టెస్టుల సిరీస్‌లో తొలిసారి అన్ని 60 వికెట్లు పడగొట్టడం విశేషం.
  ఐదు శతకాలు: సిరీస్‌లో గొప్పగా కనిపించకపోయినా భారత బ్యాటింగ్ ప్రదర్శన కూడా నిలకడగా సాగింది. ప్రతీ టెస్టుకు వేర్వేరు ఓపెనింగ్ జోడీలు బరిలోకి దిగినా ఇద్దరిలో ఒకరు రాణించడం జట్టుకు కలిసొచ్చింది. ధావన్, రాహుల్, పుజారా సెంచరీలు చేయగా, రెండో టెస్టులో రహానే కూడా కీలక శతకం బాదాడు.
 
 ముఖ్యంగా టెస్టు జట్టుకు పుజారా అవసరం ఎంత ఉందో అతను మూడో టెస్టులో స్వింగ్ బౌలింగ్‌ను ఎదుర్కొని చేసిన పరుగులు చూస్తే తెలుస్తుంది. కోహ్లి కూడా సెంచరీ చేసినా అతని స్థాయికి తగిన ప్రదర్శన మాత్రం రాలేదు. రోహిత్ ఎలాగోలా రెండు అర్ధ సెంచరీలు చేసినా...తనకు టెస్టుల్లో స్థానంపై వచ్చిన సందేహాలకు మాత్రం సమాధానమివ్వలేకపోయాడు.
 
  జోరు కొనసాగాలి : గత రెండేళ్లలో జొహన్నెస్‌బర్గ్, వెల్లింగ్టన్, గాలేలలో విజయానికి చేరువగా వచ్చినా... దానికి దూరమైన భారత్ ఇప్పుడు కొలంబోలో చివరకు లక్ష్యాన్ని చేరింది. సచిన్ రిటైర్మెంట్ తర్వాత తొలి సిరీస్ నెగ్గిన యువ ఆటగాళ్లలో గెలుపు కళ కనిపిస్తోంది. అయితే ఏ రకంగా చూసిన ప్రస్తుత శ్రీలంక జట్టు చాలా బలహీనం. మనకంటే అనుభవం తక్కువ ఉన్న ఆటగాళ్లు అక్కడ చాలా మంది ఉన్నారు. ఇది మన గెలుపు రికార్డును మార్చకపోవచ్చు గానీ...రానున్న దక్షిణాఫ్రికా సిరీస్‌లో సత్తా చాటితే కోహ్లి సేనకు తిరుగుండదు. మన గడ్డపై కూడా సఫారీలు ఎప్పుడైనా ప్రమాదకర ప్రత్యర్థే. వారిని నిలువరించి విజయం అందుకుంటే టెస్టుల్లో మన ముద్ర స్పష్టంగా కనిపిస్తుంది. -సాక్షి క్రీడా విభాగం
  
  కొలంబో : రాబోయేది మొత్తం టెస్టుల సీజన్. ఇందులో తొలి పరీక్షలో కోహ్లిసేన శ్రీలంకలో దిగ్విజయంగా పాసయింది. మూడు టెస్టుల సిరీస్‌ను 2-1తో సొంతం చేసుకుంది. అశ్విన్ (4/69), ఇషాంత్ (3/32) పరాక్రమం చూపెట్టడంతో మంగళవారం ముగి సిన చివరి టెస్టులో భారత్ 117 పరుగుల తేడాతో శ్రీలంకపై ఘన విజయం సాధించింది. 22 ఏళ్ల తర్వా త లంక గడ్డపై సిరీస్‌ను చేజిక్కించుకున్న టీమిండియా.. 2011 తర్వాత విదేశీ గడ్డపై తొలిసారి సిరీస్ విజయాన్ని సొంతం చేసుకుంది. 386 పరుగుల భారీ లక్ష్యాన్ని ఛేదించేందుకు బరిలోకి దిగిన లంక రెండో ఇన్నిం గ్స్‌లో 85 ఓవర్లలో 268 పరుగులకే ఆలౌటైంది. కెప్టెన్ మ్యాథ్యూస్ (240 బంతుల్లో 110; 13 ఫోర్లు) పోరాటానికి తోడు కుశాల్ పెరీరా (106 బంతుల్లో 70; 11 ఫోర్లు) సమయోచితంగా రాణించాడు. కానీ సహచరుల వైఫల్యం లంక జట్టుకు ఓటమిని మిగిల్చింది. పుజారాకు ‘మ్యాన్ ఆఫ్ ద మ్యాచ్’; అశ్విన్‌కు ‘మ్యాన్ ఆఫ్ ద సిరీస్’ లభించాయి.
 
  డ్రా వైపు మొగ్గినా: 67/3 ఓవర్‌నైట్ స్కోరుతో ఆఖరి రోజు ఆట కొనసాగించిన లంకేయులపై భారత బౌలర్లు ఒత్తిడి పెంచడంలో సఫలమయ్యారు. మ్యాథ్యూస్ నిలకడగా ఆడినా... రెండో ఎండ్‌లో కౌశల్ సిల్వ (27), తిరిమన్నే (12)లను అవుట్ చేయడంతో లంక 107 పరుగులకు 5 వికెట్లు కోల్పోయింది. అయితే రెండో సెషన్‌లో మ్యాథ్యూస్, కుశాల్ పెరీరాలు ఓ రేంజ్‌లో పోరాటం చేశారు. ఈ ఇద్దరి జోరుతో ఓ దశలో మ్యాచ్ డ్రా తప్పదేమో అనుకుంటున్న దశలో పెరీరా చేసిన తప్పు భారత్‌కు వరంగా మారింది. 77వ ఓవర్‌లో అశ్విన్ బంతిని అనవసరంగా రివర్స్ స్వీప్ ఆడి రోహిత్ చేతికి చిక్కాడు. ఫలితంగా ఈ ఇద్దరి మధ్య ఆరో వికెట్‌కు నెలకొన్న 135 పరుగుల భారీ భాగస్వామ్యానికి తెరపడింది. 81వ ఓవర్‌లో కొత్త బంతితో ఇషాంత్ నిప్పులు చెరిగాడు. మ్యాథ్యూస్‌ను అవుట్ చేసి మ్యాచ్‌ను మలుపుతిప్పాడు. తర్వాత అశ్విన్, మిశ్రాలు మిగతా మూడు వికెట్లు తీసి చిరస్మరణీయ విజయాన్ని అందించారు.
 
  స్కోరు వివరాలు
  భారత్ తొలి ఇన్నింగ్స్: 312 ఆలౌట్
  శ్రీలంక తొలి ఇన్నింగ్స్: 201 ఆలౌట్
  భారత్ రెండో ఇన్నింగ్స్: 274 ఆలౌట్
 
  శ్రీలంక రెండో ఇన్నింగ్స్: తరంగ (సి) ఓజా (బి) ఇషాంత్ 0; సిల్వ (సి) పుజారా (బి) ఉమేశ్ 27; కరుణరత్నే (సి) ఓజా (బి) ఉమేశ్ 0; చండిమల్ (సి) కోహ్లి (బి) ఇషాంత్ 18; మ్యాథ్యూస్ ఎల్బీడబ్ల్యు (బి) ఇషాంత్ 110; తిరిమన్నే (సి) రాహుల్ (బి) అశ్విన్ 12; కుశాల్ పెరీరా (సి) రోహిత్ (బి) అశ్విన్ 70; హెరాత్ ఎల్బీడబ్ల్యు (బి) అశ్విన్ 11; కౌశల్ నాటౌట్ 1; ప్రసాద్ (సి) బిన్నీ (బి) అశ్విన్ 6; ప్రదీప్ ఎల్బీడబ్ల్యు (బి) మిశ్రా 0; ఎక్స్‌ట్రాలు: 13; మొత్తం: (85 ఓవర్లలో ఆలౌట్) 268. వికెట్ల పతనం: 1-1; 2-2; 3-21; 4-74; 5-107; 6-242; 7-249; 8-257; 9-263; 10-268. బౌలింగ్: ఇషాంత్ 19- 5-32-3; ఉమేశ్ 15-3-65-2; బిన్నీ 13-3-49 -0; మిశ్రా 18-1-47-1; అశ్విన్ 20-2-69-4.
  
  200 ఇషాంత్ శర్మ టెస్టుల్లో తీసిన వికెట్ల సంఖ్య. కపిల్ దేవ్ (434), జహీర్ (311), శ్రీనాథ్ (236) ఈ ఘనత సాధించిన ఇతర భారత పేసర్లు.
  1     1993 తర్వాత లంక గడ్డపై సిరీస్ గెలవడం ఇదే తొలిసారి. గతంలో అజహర్ నేతృత్వం లోని టీమ్ 1-0తో సిరీస్‌ను గెలిచింది.
  
  ఇషాంత్‌పై టెస్టు నిషేధం
  కొలంబో: శ్రీలంకతో జరిగిన మూడో టెస్టులో దురుసుగా ప్రవర్తించినందుకు భారత పేసర్ ఇషాంత్ శర్మపై ఐసీసీ ఓ టెస్టు నిషేధాన్ని విధించింది. దీంతో నవంబర్‌లో దక్షిణాఫ్రికాతో జరిగే తొలి టెస్టుకు తను అందుబాటులో ఉండడు.  అలాగే శ్రీలంక బ్యాట్స్‌మన్ దినేశ్ చండిమాల్ కూడా ఇదే కారణంతో ఓ వన్డే మ్యాచ్ నిషేధానికి గురయ్యాడు. తనతో పాటు లాహిరు తిరిమన్నే, దమ్మిక ప్రసాద్‌ల మ్యాచ్ ఫీజులో ఐసీసీ 50 శాతం కోత విధించింది.
  
    టెస్టును డ్రా చేసుకోవడం అనేది మాకు చివరి ప్రత్యామ్నాయం. ప్రతి మ్యాచ్‌లోనూ విజయం కోసం అవసరమైతే ఓడిపోవడమనే రిస్క్‌ను చేయడానికి వెనుకాడం. ఈ విజయం మా ఉత్సాహాన్ని పెంచింది. 
 -కోహ్లి


 ♦ అజేయ సెంచరీతో చెలరేగిన ఓపెనర్
 ♦ అమిత్ మిశ్రా అర్ధసెంచరీ
 ♦ తొలి ఇన్నింగ్స్‌లో భారత్ 292/8
 ♦ }లంకతో మూడో టెస్టు
  
  కొలంబో : ‘మా టాప్-5 బ్యాట్స్‌మెన్‌లో పుజారాకు చోటు లేదు. అందరూ ఫామ్‌లో ఉన్నారు కాబట్టి స్థానం దక్కడం కష్టమే’  నిన్నటి వరకు భారత జట్టు మేనేజ్‌మెంట్ చేసిన వ్యాఖ్య ఇది. కానీ ఇప్పుడు... మూడో టెస్టులో ఫామ్‌లో ఉన్న ఆటగాళ్లందరూ బ్యాట్లు ఎత్తేసి పెవిలియన్‌కు వెళ్తుంటే... అదే పుజారా ఆపద్బాంధవుడిలా జట్టును ఆదుకున్నాడు. లంక బౌలర్లను సమర్థంగా ఎదుర్కొంటూ ఓపికగా బ్యాటింగ్ చేసి ఇన్నింగ్స్‌ను గాడిలో పెట్టాడు. చతేశ్వర్ (277 బంతుల్లో 135 బ్యాటింగ్; 13 ఫోర్లు) అజేయ సెంచరీతో శనివారం రెండో రోజు ఆట ముగిసే సమయానికి భారత్ తొలి ఇన్నింగ్స్‌లో 95.3 ఓవర్లలో 8 వికెట్లకు 292 పరుగులు చేసింది. అమిత్ మిశ్రా (87 బంతుల్లో 59; 7 ఫోర్లు) రాణించాడు. పుజారాతో పాటు ఇషాంత్ (2 బ్యాటింగ్) క్రీజులో ఉన్నాడు. మూడో సెషన్ చివర్లో వర్షం అంతరాయం కలిగించడంతో ఆటను ముందుగానే ముగించారు.
 
  50/2 ఓవర్‌నైట్ స్కోరుతో రెండో రోజు ఆట కొనసాగించిన పుజారా, కోహ్లి నెమ్మదిగా ఆడే ప్రయత్నం చేశారు. కానీ పిచ్ నుంచి సహకారం అందుకున్న లంక బౌలర్లు ఒత్తిడి పెంచారు. సెషన్ తొలి ఓవర్‌లో రెండుసార్లు ఎల్బీ అప్పీల్‌ల నుంచి బయటపడ్డ కోహ్లిని 24వ ఓవర్‌లో మ్యాథ్యూస్ అవుట్ చేశాడు. దీంతో మూడో వికెట్‌కు 50 పరుగుల భాగస్వామ్యం ముగిసింది. తొలి గంటలో భారత్ 15 ఓవర్లలో ఒక వికెట్ కోల్పోయి 22 పరుగులు చేసింది. తర్వాత రోహిత్ (26) స్పిన్నర్లపై అటాకింగ్‌కు దిగడంతో పరుగుల వేగం పెరిగింది. రెండో ఎండ్‌లో పుజారా కూడా కౌశల్ బౌలింగ్‌లో వరుస బౌండరీలు బాదాడు. దీంతో 41వ ఓవర్‌లో టీమిండియా 100 పరుగులకు చేరుకుంది.
 
  అదే క్రమంలో పుజారా 127 బంతుల్లో అర్ధసెంచరీ పూర్తి చేశాడు. లంచ్‌కు కొద్ది ముందు రోహిత్ భారీ షాట్‌కు ప్రయత్నించి అవుటయ్యాడు. ఈ ఇద్దరు నాలుగో వికెట్‌కు 55 పరుగులు జోడించారు. లంచ్ తర్వాత తొలి బంతికే బిన్నీ (0) వెనుదిరగడంతో భారత్ స్కోరు 119/5గా మారింది. తర్వాత నమన్ ఓజా (21) నిలకడగా ఆడి పుజారాకు చక్కని సహకారం అందించాడు. అయితే ఏడు పరుగుల తేడాలో ఓజా, అశ్విన్ (5) అవుట్‌కావడంతో భారత్ మరోసారి తడబడింది.
 
 ఈ దశలో టెయిలెండర్ మిశ్రా కీలక ఇన్నింగ్స్ ఆడగా... పుజారా 214 బంతుల్లో ఏడో సెంచరీ సాధించాడు. మిశ్రా, పుజారా ఎనిమిదో వికెట్‌కు 104 పరుగులు జోడించడంతో భారత్ మళ్లీ మ్యాచ్‌లోకి వచ్చింది. 71 బంతుల్లో అర్ధసెంచరీ చేసిన మిశ్రా సెషన్ చివర్లో అవుటయ్యాడు. తర్వాత ఇషాంత్ మరో వికెట్ పడకుండా రోజును ముగించాడు. దమ్మిక ప్రసాద్ 4 వికెట్లు తీశాడు.
 
  స్కోరు వివరాలు
  భారత్ తొలి ఇన్నింగ్స్: రాహుల్ (బి) ప్రసాద్ 2; పుజారా బ్యాటింగ్ 135; రహానే ఎల్బీడబ్ల్యు (బి) ప్రదీప్ 8; కోహ్లి (సి) పెరీరా (బి) మ్యాథ్యూస్ 18; రోహిత్ (సి) తరంగ (బి) ప్రసాద్ 26; బిన్నీ ఎల్బీడబ్ల్యు (బి) ప్రసాద్ 0; ఓజా (సి) తరంగ (బి) కౌశల్ 21; అశ్విన్ (సి) పెరీరా (బి) ప్రసాద్ 5; మిశ్రా (స్టంప్డ్) పెరీరా (బి) హెరాత్ 59; ఇషాంత్ బ్యాటింగ్ 2; ఎక్స్‌ట్రాలు: 16; మొత్తం: (95.3 ఓవర్లలో 8 వికెట్లకు) 292. వికెట్ల పతనం: 1-2; 2-14; 3-64; 4-119; 5-119; 6-173; 7-180; 8-284.
  బౌలింగ్: ప్రసాద్ 23.3-4-83-4; ప్రదీప్ 22-6-52-1; మ్యాథ్యూస్ 13-6-24-1; హెరాత్ 25-3-81-1; కౌశల్ 12-2-45-1.


 సిరీస్ విజయంపై భారత్ గురి
 ♦ ఆత్మవిశ్వాసంతో కోహ్లి సేన
 ♦ అనిశ్చితిలో శ్రీలంక
 ♦ నేటినుంచి మూడో టెస్టు
  
  తొలి టెస్టు చేతుల్లోకి వచ్చి పోయింది... తప్పును దిద్దుకున్న కోహ్లి సేన రెండో మ్యాచ్‌లో ప్రత్యర్థిని కుప్పకూల్చింది... ఇప్పుడు మిగిలింది మరో టెస్టు విజయం. మన ఆటగాళ్ల ప్రదర్శన, ప్రత్యర్థి ‘ఫామ్’ చూస్తే 22 ఏళ్ల తర్వాత లంక గడ్డపై సిరీస్ గెలిచేందుకు మన జట్టుకు ఇది సువర్ణావకాశం. మరో వైపు నాలుగున్నరేళ్ల క్రితం విదేశీ గడ్డపై సిరీస్ నెగ్గిన టీమిండియా ఆ తర్వాతి ఏడు సిరీస్‌లలో రిక్తహస్తాలతోనే వచ్చింది. ఈ నేపథ్యంలో ఈసారైనా అవకాశాన్ని అందుకుంటారా అనేది ఆసక్తికరం.
  
  కొలంబో : కెప్టెన్‌గా తొలి టెస్టు విజయాన్ని రుచి చూసిన విరాట్ కోహ్లి ఇప్పుడు తొలి సిరీస్ గెలుపుపై కన్నేశాడు. రెండో టెస్టులో అద్భుత విజయం తర్వాత రెట్టింపు ఉత్సాహంతో కనిపిస్తున్న టీమిండియా చివరి టెస్టుపై కూడా ఆత్మవిశ్వాసంతో ఉంది. నేటినుంచి (శుక్రవారం) ఇక్కడి సింహళీస్ స్పోర్ట్స్ క్లబ్‌లో జరిగే సిరీస్‌లో చివరిదైన మూడో టెస్టులో భారత్, శ్రీలంకతో తలపడుతుంది. మరో వైపు సంగక్కర రిటైర్మెంట్‌తో కొత్తగా కనిపిస్తున్న లంక, తుది జట్టు విషయంలో గందరగోళంలో ఉంది. సొంతగడ్డపై వరుసగా రెండో సిరీస్ ఓడిపోకూడదని భావిస్తున్న ఆ జట్టు ఏ మాత్రం పోటీ ఇస్తుందో చూడాలి.
 
  పుజారా, ఓజాలకు చోటు
  గాలే టెస్టులో రెండో ఇన్నింగ్స్ మినహా సిరీస్‌లో భారత జట్టు అన్ని విభాగాల్లో ప్రత్యర్థిపై ఆధిక్యం ప్రదర్శించింది. రోహిత్ శర్మ మినహా బ్యాటింగ్‌లో అంతా కీలక సమయాల్లో పరుగులు సాధించారు. లోకేశ్ రాహుల్, కోహ్లి, రహానే సెంచరీలు సాధించగా, సిరీస్‌నుంచి తప్పుకున్న ధావన్, విజయ్, సాహా కూడా ఆకట్టుకున్నారు. కాబట్టి జట్టు బ్యాటింగ్‌కు సంబంధించి భారత శిబిరంలో ఎలాంటి ఆందోళన లేదు. భారత్ ఆడిన గత నాలుగు టెస్టుల్లో స్థానం లభించని పుజారా మళ్లీ టీమ్‌లోకి రానున్నాడు. ఆర్డర్ విషయంలో కోహ్లి మరీ కొత్తగా ఆలోచించకపోతే పుజారా, రాహుల్ ఓపెనింగ్ చేస్తారు.
 
 తన సత్తాను నిరూపించుకునేందుకు పుజారాకు ఇది మంచి అవకాశం. వికెట్ కీపర్‌గా నమన్ ఓజాకు 32 ఏళ్ల వయసులో తొలి టెస్టు ఆడనున్నాడు. తుది జట్టులో ఈ రెండు మార్పులు ఖాయం. బిన్నీ బ్యాట్స్‌మన్‌గా పెద్దగా ప్రభావం చూపకపోయినా బౌలింగ్‌లో రాణించాడు కాబట్టి కోహ్లికి సమస్య లేదు. అందువల్ల కొత్తగా వచ్చిన కరుణ్ నాయర్ బెంచీకే పరిమితం కానున్నాడు. బౌలింగ్‌లో భారత్ మరోసారి తమ ప్రధానాస్త్రం అశ్విన్‌నే నమ్ముకుంది. 2 టెస్టుల్లో అతను ఇప్పటికే 17 వికెట్లు పడగొట్టి లంక బ్యాట్స్‌మెన్ పాలిట సింహస్వప్నంగా తయారయ్యాడు. అతనికి మిశ్రా (12 వికెట్లు) అండగా నిలుస్తుండగా... పేస్‌లో ఇషాంత్, ఉమేశ్ తమ వంతు పాత్ర పోషిస్తున్నారు.
 
  తరంగకు అవకాశం
  మరో వైపు కెప్టెన్ మ్యాథ్యూస్ చక్కటి ఫామ్‌లో ఉండటం మినహా... లంక పరిస్థితి ఆశాజనకంగా లేదు. మరో సీనియర్ హెరాత్ తొలి టెస్టులో చెలరేగినా, సారా ఓవల్‌లో తేలిపోయాడు. సంగక్కర స్థానంలో ఉపుల్ తరంగకు అవకాశం దక్కనుంది. అతడిని ఏ స్థానంలో ఆడించాలి, ప్రధాన బ్యాట్స్‌మన్ తిరిమన్నెను ముందుగా పంపించాలా వద్దా, వికెట్ కీపింగ్ ఎవరితో చేయించాలి... ఇలా ప్రతీది ఆ జట్టుకు సమస్యగా కనిపిస్తోంది. ఘోరంగా విఫలమవుతున్న ముబారక్ స్థానంలో వన్డే స్పెషలిస్ట్ కుషాల్ పెరీరా తొలి టెస్టు ఆడే అవకాశం ఉంది. అయితే అతడు కీపింగ్ చేస్తే చండీమల్ పూర్తి స్థాయి బ్యాట్స్‌మన్‌గా ఆర్డర్ మారవచ్చు.
 
 అశ్విన్ తీసిన 17 వికెట్లలో 12 లెఫ్ట్ హ్యండర్లవే ఉన్నాయి. అలాంటప్పుడు ఇద్దరు ఎడం చేతివాటం ఆటగాళ్లను బరిలోకి దించడం ఎంతవరకు ప్రయోజనమో ఆ జట్టు ఆలోచిస్తోంది. మ్యాథ్యూస్‌కు కూడా తాను ఆడే స్థానంపై స్పష్టత లేదు. బౌలింగ్‌లో గాయంనుంచి కోలుకున్న పేసర్ ప్రదీప్ తిరిగి జట్టులోకి రానుండటం ఊరట. అయితే రెండో టెస్టులో బ్యాటింగ్ చేస్తూ గాయపడిన ప్రధాన స్పిన్నర్ కౌశల్ దూరమైతే, దిల్‌రువాన్ పెరీరాను ఆడించాల్సి ఉంటుంది. మొత్తానికి తమ దిగ్గజాలు జయవర్ధనే, సంగక్కర రిటైర్ అయ్యాక తొలి టెస్టు ఆడుతున్న లంక మ్యాచ్‌ను కాపాడుకోవాలంటే తీవ్రంగా శ్రమించాల్సి ఉంటుంది.
 
  జట్లు(అంచనా) : భారత్: కోహ్లి (కెప్టెన్), పుజారా, రాహుల్, రహానే, రోహిత్, బిన్నీ, నమన్, అశ్విన్, ఉమేశ్, మిశ్రా, ఇషాంత్.
  శ్రీలంక: మ్యాథ్యూస్ (కెప్టెన్), కరుణరత్నే, సిల్వ, తరంగ, తిరిమన్నె, చండీమల్, కుషాల్ పెరీరా, ప్రసాద్, ప్రదీప్, హెరాత్, కౌశల్/దిల్‌రువాన్
  
  పిచ్, వాతావరణం
  ఇక్కడ జరిగిన గత ఐదు టెస్టుల్లో నాలుగు డ్రాగా ముగిశాయి. గత ఏడాది కాలంలో ప్రపంచంలోని అతి ‘ఫ్లాట్’ వికెట్‌లలో ఒకటిగా గుర్తింపు తెచ్చుకున్న ఎస్‌ఎస్‌సీ బ్యాటింగ్‌కు బాగా అనుకూలం. ఆరంభంలో కొంత పేస్ ప్రభావం చూపినా భారీ స్కోర్లకు అవకాశం ఉంది. వర్షం అంతరాయం కలిగించవచ్చు. గత కొన్ని రోజులుగా నగరంలో తరచూ వర్షం పడుతోంది.


 ♦ నేటినుంచి రెండో టెస్టు
 ♦ సంగక్కరకు ఇదే ఆఖరి మ్యాచ్
 ♦ ఉత్సాహంగా మ్యాథ్యూస్ సేన
 ♦ ఒత్తిడిలో కోహ్లి అండ్ కో
  
  క్రికెట్ ప్రపంచానికి మరో దిగ్గజం వీడ్కోలు పలుకుతున్న వేళ ఇది. దశాబ్దంన్నర కాలంగా శ్రీలంక క్రికెట్‌కు మూలస్థంభాల్లో ఒకడిగా నిలిచి అత్యుత్తమ విజయాలు అందించిన సంగ చివరి సారి మైదానంలోకి దిగబోతున్నాడు. ఈ నేపథ్యంలో గెలుపుతో అతని కెరీర్‌కు ఘనమైన ముగింపు పలకాలని సహచరులు భావిస్తున్నారు. మరో వైపు తొలి టెస్టులో అంది వచ్చిన విజయాన్ని చేజార్చుకున్న టీమిండియా తమ తప్పును సరిదిద్దుకునే ప్రయత్నంలో ఉంది. 22 ఏళ్ల తర్వాత లంక గడ్డపై సిరీస్ సొంతం చేసుకునేందుకు ఆశలు మిగిలి ఉండాలంటే భారత్ ఈ మ్యాచ్‌లో కచ్చితంగా నెగ్గాలి.
  
  కొలంబో : దూకుడుగా ఆడతారా లేక జాగ్రత్తగా ఇన్నిం గ్స్ నడిపిస్తారా...స్పిన్‌పై ఎదురు దాడి చేస్తారా లేక పేస్‌పై ప్రతాపం చూపిస్తారా... ఏమైనా చేయండి కానీ మ్యాచ్ నెగ్గాలి. రెండో టెస్టుకు ముందు భారత జట్టు ఆలోచనా తీరు ఇది. తొలి మ్యాచ్‌లో అనూహ్య పరాజయంతో షాక్ తిన్న టీమిండియా తమ పరువు నిలబెట్టుకునేందుకు బరి లోకి దిగుతోంది. మరో వైపు సంగక్కరకు విజయంతో వీడ్కోలు ఇవ్వాలని భావిస్తున్న శ్రీలంక కూడా అదే ఉత్సాహంతో కనిపిస్తోంది. ఈ నేపథ్యంలో నేటినుంచి (గురువారం) భారత్, శ్రీలంకల రెండో టెస్టు కోసం ఇక్కడి సారా ఓవల్ మైదానం సిద్ధమైంది. ఈ మ్యాచ్ డ్రాగా ముగిసినా భారత్ సిరీస్ గెలుచుకునే అవకాశం కోల్పోతుంది.
 
  బిన్నీకి చోటుందా!
  భారత జట్టు ప్రధానంగా రెండు మార్పులతో ఆడే అవకాశం ఉంది. ఫామ్‌లో ఉన్న శిఖర్ ధావన్ గాయంతో సిరీస్‌కు దూరం అయ్యాడు. అయితే ఏడాదిన్నరగా అంతే జోరు చూపించిన విజయ్... గాయం నుంచి కోలుకొని మ్యాచ్‌కు సిద్ధం కావడం శుభ పరిణామం. రాహుల్‌తో కలిసి అతను ఇన్నింగ్స్‌ను ఆరంభిస్తాడు. బుధవారం విజయ్ నెట్స్‌లో సుదీర్ఘంగా ప్రాక్టీస్ చేశాడు. ఎన్ని విమర్శలు వచ్చినా కెప్టెన్ కోహ్లి, శాస్త్రి తమ నమ్మకాన్ని కొనసాగిస్తూ రోహిత్‌కు మూడో స్థానంలో మరో చాన్స్ ఇచ్చే అవకాశం ఉంది. ఇక హడావిడిగా పిలిపించిన స్టువర్ట్ బిన్నీకి తుది జట్టులో స్థానం లభించవచ్చు. సారా ఓవల్ వికెట్ పేస్‌కు కాస్త అనుకూలిస్తుంది. పైగా గత మ్యాచ్‌లో బ్యాటింగ్ ఘోర వైఫల్యం దృష్ట్యా  లోయర్ ఆర్డర్లో బ్యాటింగ్ చేయగల ఆటగాడు జట్టుకు అవసరం. కాబట్టి హర్భజన్ సింగ్ స్థానంలో బిన్నీ రావచ్చు. ఇక మరో సారి అశ్విన్‌పై భారత్ ఆశలు పెట్టుకుంది.   
 
  ప్రదీప్ అవుట్
  మరో వైపు లంక ఓపెనర్లు కరుణరత్నే, కౌశల్ సిల్వ గత మ్యాచ్‌లో ఘోరంగా విఫలమయ్యారు. అయితే చాన్నాళ్లుగా నిలకడగా రాణించిన వీరిద్దరిపై మేనేజ్‌మెంట్ మరోసారి నమ్మకముంచింది. ఇక తన కెరీర్‌లో చివరి మ్యాచ్ ఆడుతున్న సంగక్కర మరో సారి తనకిష్టమైన మైదానంలో (50.29 సగటుతో 855 పరుగులు)  చిరస్మరణీయ ఆటతీరు కనబరుస్తాడా చూడాలి. పాక్‌తో సిరీస్‌లో విఫలమై ఓటమిలో భాగమైన సంగ ఈ సారి ఒక గొప్ప ఇన్నింగ్స్ ఆడి జట్టును విజేతగా నిలపాలని పట్టుదలగా ఉన్నాడు. మ్యాథ్యూస్ సహా మిడిలార్డర్ పటిష్టంగా ఉంది. పేసర్ నువాన్ ప్రదీప్ గాయంతో మ్యాచ్‌నుంచి తప్పుకున్నాడు. అతని స్థానంలో చమీరా లేదా విశ్వ చోటులోకి రావచ్చు. సారా ఓవల్ పిచ్‌ను చూస్తే లంకలో ప్రస్తుతం ఫాస్టెస్ట్ బౌలర్‌గా గుర్తింపు ఉన్న చమీరాకు అవకాశం దక్కవచ్చు. ఇక గత ప్రదర్శనతో హెరాత్ జోరు మీదుండగా, కౌశల్ కూడా సత్తా చాటేందుకు సిద్ధమయ్యాడు.
 
  జట్లు (అంచనా)
  భారత్: కోహ్లి (కెప్టెన్), విజయ్, రాహు ల్, రోహిత్, రహానే, సాహా, హర్భజన్/బిన్నీ, అశ్విన్, ఇషాంత్, మిశ్రా, ఆరోన్.
  శ్రీలంక: మ్యాథ్యూస్ (కెప్టె న్), కరుణరత్నే, సిల్వ, సంగక్కర, తిరిమన్నె, చండీమల్, ప్రసాద్, హెరాత్, కౌశల్, చమీరా/విశ్వ.
  
  ఉ. గం. 10 నుంచి సోనీ సిక్స్‌లో ప్రత్యక్ష ప్రసారం
  
  పిచ్, వాతావరణం
  శ్రీలంకలోని ఇతర మైదానాలతో పోలిస్తే సారా ఓవల్ ప్రతీసారి పేసర్లకే ఎక్కువగా అనుకూలిస్తుంది. అయితే కాస్త బౌన్స్ కూడా ఎక్కువగా ఉండి స్పిన్నర్లు ప్రయోజనం పొందే అవకాశం కూడా ఉంది. మ్యాచ్ జరిగే అన్ని రోజులూ వర్ష సూచన ఉంది.
  
  సారా ఓవల్‌లో జరిగిన 18 టెస్టుల్లో 14 మ్యాచ్‌లలో ఫలితం వచ్చింది.
  ఇక్కడ లంకతో 2 టెస్టుల్లో ఓడి ఒకటి గెలిచిన భారత్... చివరి సారి ఆడిన మ్యాచ్‌లో ప్రత్యర్థిపై గెలుపొందింది.
  తొలి టెస్టు ఓడి భారత్ సిరీస్ గెలవడం గతంలో రెండు సార్లు (1972, 2001) మాత్రమే జరిగింది.
  గత పది టెస్టుల్లో ఇక్కడ 7 సార్లు తొలి సారి బ్యాటింగ్ చేసిన జట్టు ఓడింది.


 శ్రీలంకలోని పురాతనమైన వేదికల్లో పి.సారా ఓవల్ కూడా ఒకటి. సంగక్కర సొంత క్లబ్ మైదానం కూడా. అందుకే ఈ మ్యాచ్‌లో భావోద్వేగాలు ఉంటాయి. ఈ మైదానంలోనే సంగ ఎదిగాడు. కాబట్టి అతనికి ప్రత్యేకమైన అనుభూతి ఉంటుంది. అద్భుతమైన కెరీర్‌ను సొంత ప్రేక్షకుల ముందు ముగించే అవకాశం ప్రతి క్రికెటర్‌కు లభించదు. నిస్సందేహంగా సంగక్కర గొప్ప ఆటగాడు. బ్యాట్స్‌మన్‌గా ఎన్నో రికార్డులు సాధించాడు. సంగ ఫిట్‌నెస్, సామర్థ్యం, ఆటపై అతనికి ఉన్న మక్కువకు సలాం చేయాల్సిందే.
 
 ఓ బౌలర్‌గా నేనూ సంగక్కర నుంచి చాలా ఇబ్బందులు ఎదుర్కొన్నా. అతనికి బౌలింగ్ చేయడం ఎప్పుడూ ఓ సవాలే. కాలంతో పాటు అతనూ పరిణతి చెందాడు. ఫలితంగా గత 2-3 ఏళ్ల నుంచి కెరీర్‌లోనే ఉత్తమ క్రికెట్ ఆడుతున్నాడు. మైదానం లోపలా, బయటా సంగక్కరది చాలా మంచి వ్యక్తిత్వం. మరో పాత్రలో అతను క్రికెట్‌కు తన సేవలందించి రుణం తీర్చుకుంటాడని భావిస్తున్నా. సంగక్కరతో పాటు అతని కుటుంబానికి నా శుభాకాంక్షలు.
 
  ఇక రెండో టెస్టు విషయానికొస్తే భారత జట్టు సన్నాహాకాలు అంత బాగా లేవు. తొలి టెస్టులో టాప్ స్కోరర్‌గా నిలిచిన ధావన్ గాయంతో స్వదేశానికి పయనమయ్యాడు. ఆల్‌రౌండర్ బిన్నీ లంక వెళ్లాడు. విరాట్, జట్టు మేనేజ్‌మెంట్ బిన్నీని బ్యాట్స్‌మన్‌గా పరిగణనలోకి తీసుకుంది. ఐదో బౌలర్‌గా అతన్ని ఉపయోగించుకోవాలనుకుంటే... తొలి టెస్టులో ఐదో బౌలర్ అవసరం అంతగా రాలేదు. కాబట్టి స్పెషలిస్ట్ బ్యాట్స్‌మన్ ఉంటే బాగుండేది. మిగతా బౌలర్లు అశ్విన్‌కు సరైన సహకారం అందిస్తే మరింత బాగుంటుంది. జట్టులో ఒక్కరి వ్యక్తిగత ప్రదర్శన వల్ల మ్యాచ్ గెలవలేరు. జట్టు మొత్తం సమష్టిగా రాణించి సిరీస్‌లో పుంజుకోవాలి.
 
 మురళీ విజయ్ ఫిట్‌నెస్ పరీక్ష పాస్ కాకుంటే కచ్చితంగా పుజారాను ఆడించాలి. ఓవల్ వికెట్ చాలా కఠినంగా ఉంటుంది. ఇది లంకకు అనుకూలంగా మారుతుంది. సంగక్కర, మ్యాథ్యూస్‌లు కుదురుకుంటే భారత్‌కు కష్టాలు తప్పవు. ఇప్పుడు లంకేయులు సంగక్కర రిటైర్మెంట్, విజయం అనే రెండు అంశాలపై దృష్టి పెడతారు. కాబట్టి భారత్ కేవలం ఆటపైనే దృష్టిసారించాలి. గాలెలో మాదిరిగా ఆట ఆరంభంలోనే మ్యాచ్‌పై పట్టు బిగించి మంచి ముగింపు ఇవ్వాలి.