లాస్ వేగాస్: అద్భుతమేమీ జరగలేదు. అనుభవమే గెలిచింది. అంచనాలకు అనుగుణంగా రాణించిన అమెరికా స్టార్ బాక్సర్ ఫ్లాయిడ్ మేవెదర్ రూ. 1700 కోట్ల ‘మెగా ఫైట్’లో పైచేయి సాధించాడు. ఐర్లాండ్‌కు చెందిన కానర్‌ మెక్‌గ్రెగర్‌తో జరిగిన సూపర్‌ వెల్టర్‌వెయిట్‌ బౌట్‌ లో మేవెదర్ విజేతగా నిలిచాడు.  తద్వారా తన కెరీర్ లో అజేయంగా 50 మ్యాచ్ లు గెలిచిన తొలి బాక్సర్ గా చరిత్ర సృష్టించాడు. రెండేళ్ల క్రిత పకియావ్ తో జరిగిన బిగ్ ఫైట్ లో గెలిచిన తరువాత బాక్సింగ్ కు వీడ్కోలు  పలికిన మేవెదర్.. మళ్లీ మనసు మార్చుకుని మెక్ గ్రెగర్ తో పోరుకు సిద్ధమయ్యాడు.
 
 భారత కాలమాన ప్రకారం ఆదివారం ఉదయం తొమ్మిది గంటలకు జరిగిన పోరులో మేవెదర్ తన జైత్రయాత్రను కొనసాగించాడు.  అల్టిమేట్‌ ఫైటింగ్‌ చాంపియనషిప్‌(యూఎఫ్సీ ) చాంపియన్ అయిన మెక్‌గ్రెగర్‌ కు ఏమాత్రం అవకాశం ఇవ్వకుండా ఏకపక్ష విజయాన్ని సాధించాడు. మెక్ గ్రెగర్ నుంచి ప్రతిఘటన  ఎదుర్కొన్నప్పటికీ అనుభవాన్ని ఉపయోగించి మేవెదర్ సూపర్‌ వెల్టర్‌వెయిట్‌ టైటిల్ ను దక్కించుకున్నాడు.  ఈ విజయంతో దాదాపు రూ.1200 కోట్లను మేవెదర్ తన ఖాతాలో వేసుకోగా, సుమారు రూ. 400 కోట్లు మెక్ గ్రెగర్ కు దక్కనున్నాయి.
  


 వాషింగ్టన్:అమెరికా స్టార్ బాక్సర్ ఫ్లాయిడ్ మేవెదర్ గురించి బాక్సింగ్ అభిమానులకు పెద్దగా పరిచయం చేయాల్సిన అవసరం లేదు.  మేవేదర్ రింగ్ లో దిగాడంటే ప్రత్యర్థులకు చెమటలు పట్టాల్సిందే. ఇప్పటివరకూ ఓటమి చూడని ధీరుడు. తన కెరీర్ లో 49సార్లు పడితే అన్నింటిలోనూ మేవెదర్దే విజయం. అందులో 26 నాకౌట్లు. 2015లో జరిగిన మెగా ఫైట్ లో  ఫిలిప్పీన్స్ మేటి బాక్సర్ మ్యానీ పాకియోను మట్టికరిపించి 18 కోట్ల డాలర్లు (రూ. 1147 కోట్లు)ను తన ఖాతాలో వేసుకున్న ఆల్ టైమ్ గ్రేట్. 
  
 అయితే ప్రస్తుతం మరో పోరులో తలపడేందుకు సిద్ధమవుతున్నాడు మేవెదర్. గత మే నెలలో అతడి 50వ గేమ్ ఉంటుందని భావించిన అది జరగలేదు. తాజాగా అతని పునరాగమనంపై మళ్లీ వార్తలు వస్తున్నాయి. ఇప్పటికే కెరీర్ కు గుడ్ బై చెప్పిన మేవెదర్ మళ్ల్లీ బరిలోకి దిగే యోచనలో ఉన్నాడు.ఈ మేరకు తన తదుపరి పోరు గ్రెగర్‌తో కానీ బదౌవ్ జాక్ లతో ఉండవచ్చనే మేవెదర్ స్సష్టం చేశాడు. ఇక్కడ మెక్ గ్రెగర్ మాత్రమే మేవెదర్ తో పోటీని ధృవీకరించాడు. ఇప్పటికే మా ఇద్దరి పోరుకు కాంట్రాక్ట్ కుదుర్చుకున్నట్లు వెల్లడించాడు. ఈ పోరు ఖరీదు సుమారు రూ. 700 కోట్లు ఉంటుందని అంచనా. మరి ఆ మెగా ఫైట్ ఎప్పుడో అనే దానిపై స్పష్టత రావాల్సి ఉంది.
 
  


 ► ఆద్యంతం అద్వితీయ ప్రదర్శన
 ► 2015లో తమ ముద్రను  చాటుకున్న
 ► అగ్రశ్రేణి క్రీడాకారులు
 వేదికలు మారినా... ప్రత్యర్థులు మారినా... కొత్త సవాళ్లు ఎదురైనా... తమదైన శైలిలో ముందుకు దూసుకుపోతూ... అందరిలో ప్రత్యేకంగా నిలుస్తూ... ఈ ఏడాదీ పలువురు అగ్రశ్రేణి క్రీడాకారులు తమ జైత్రయాత్రను కొనసాగించారు. వచ్చే సంవత్సరంలో కూడా మెరుపులు మెరిపించేందుకు సిద్ధంగా ఉన్నామని సంకేతాలు ఇచ్చారు. టీం ఈవెంట్లతో పోలిస్తే వ్యక్తిగత క్రీడాంశాలకు చెందిన వారే ఈసారి తళుక్కుమనిపించారు.
                                                                                       -సాక్షి క్రీడావిభాగం
  
 ‘రాకెట్’తో రఫ్ ఆడించారు...
 ఉత్సాహం ఉండాలేకాని విజయాలు సాధించేందుకు వయసు అడ్డంకి కాదని అమెరికా టెన్నిస్ స్టార్ సెరెనా విలియమ్స్ మళ్లీ నిరూపించింది. మహిళల టెన్నిస్‌లో ఈ ఏడాది సెరెనా తన హవా కొనసాగించింది. ఆస్ట్రేలియన్ ఓపెన్, ఫ్రెంచ్ ఓపెన్, వింబుల్డన్ గ్రాండ్‌స్లామ్ టైటిల్స్ నెగ్గిన ఈ నల్లకలువ యూఎస్ ఓపెన్‌లో మాత్రం ఒత్తిడికి తలవంచింది. సెమీఫైనల్లో రొబెర్టా విన్సీ (ఇటలీ) చేతిలో ఓడిపోయింది. తద్వారా 1988లో స్టెఫీ గ్రాఫ్ తర్వాత ఒకే ఏడాది నాలుగు గ్రాండ్‌స్లామ్ సింగిల్స్ టైటిల్స్ సాధించిన క్రీడాకారిణిగా చరిత్ర సృష్టించే అవకాశాన్ని చేజార్చుకుంది.
 
 ఈ ఏడాది మొత్తం ఐదు టైటిల్స్‌ను సాధించిన సెరెనా 53 మ్యాచ్‌ల్లో గెలిచి, కేవలం మూడింటిలో మాత్రమే ఓడిపోయింది. ఏడాది మొత్తంలో కోటీ ఐదు లక్షల 82 వేల 642 డాలర్ల ప్రైజ్‌మనీ (రూ. 70 కోట్ల 19 లక్షలు) సొంతం చేసుకుంది. పురుషుల విభాగంలో సెర్బియా స్టార్ నొవాక్ జొకోవిచ్ జోరు కొనసాగింది. నాలుగు గ్రాండ్‌స్లామ్ టోర్నీల్లోనూ ఫైనల్స్‌కు చేరుకున్నాడు. ఫ్రెంచ్ ఓపెన్ ఫైనల్లో వావ్రింకా (స్విట్జర్లాండ్) చేతిలో ఓడిపోయి రన్నరప్‌గా నిలిచినా జొకోవిచ్... ఆస్ట్రేలియన్, వింబుల్డన్, యూఎస్ ఓపెన్‌లలో విజేతగా నిలిచాడు. సీజన్ ముగింపు టోర్నమెంట్ ఏటీపీ వరల్డ్ టూర్ ఫైనల్స్‌లో వరుసగా నాలుగో ఏడాది చాంపియన్‌గా నిలిచి ఈ ఘనత సాధించిన తొలి ప్లేయర్‌గా చరిత్ర సృష్టించాడు. ఏడాది మొత్తంలో 82 మ్యాచ్‌ల్లో గెలిచి, 6 మ్యాచ్‌ల్లో ఓడిన జొకోవిచ్ 11 టైటిల్స్‌ను దక్కించుకున్నాడు. 2 కోట్ల 15 లక్షల 92 వేల 125 డాలర్ల (రూ. 143 కోట్లు) ప్రైజ్‌మనీని గెల్చుకున్నాడు.
 
 
  
  ‘బోల్ట్’ బిగించాడు...
  ఈ ఏడాది తాను బరిలోకి దిగిన అన్ని రేసుల్లో ఉసేన్ బోల్ట్ అజేయంగా నిలిచాడు. బీజింగ్ వేదికగా జరిగిన ప్రపంచ చాంపియన్‌షిప్‌లో బోల్ట్ 100 మీటర్లు, 200 మీటర్లతోపాటు 4్ఠ100 మీటర్ల రిలేలోనూ స్వర్ణ పతకాలు సొంతం చేసుకొని తనకు తిరుగులేదని చాటుకున్నాడు. అయితే కొత్తగా ప్రపంచ రికార్డులు నమోదు చేయలేకపోయాడు. అమెరికా స్ప్రింటర్ జస్టిన్ గాట్లిన్ నుంచి గట్టిపోటీ తప్పదనుకున్నా... బోల్ట్ వేగం ముందు గాట్లిన్‌తోపాటు ఇతర అథ్లెట్స్ కూడా వెనుకబడిపోయారు. వచ్చే ఏడాది రియో ఒలింపిక్స్ ఉండటంతో ఈ సంవత్సరం బోల్ట్ ఎంపిక చేసుకున్న కొన్ని ఈవెంట్స్‌లోనే పాల్గొన్నాడు.
  
    ప్రపంచ చాంపియన్‌షిప్‌లో మూడు స్వర్ణాలు నెగ్గిన అతను ఈ మెగా ఈవెంట్‌లో తన స్వర్ణాల సంఖ్యను 11కు పెంచుకొని ఈ ఘనత సాధించిన ఏకైక అథ్లెట్‌గా గుర్తింపు పొందాడు. మరోవైపు డెకాథ్లాన్ (పది క్రీడాంశాల సమాహారం) ఈవెంట్‌లో అమెరికాకు చెందిన యాష్టన్ ఈటన్ 9045 పాయింట్లు స్కోరు చేసి కొత్త ప్రపంచ రికార్డు నెలకొల్పాడు. అంతేకాకుండా ఈ ఏడాది అత్యుత్తమ అథ్లెట్ పురస్కారాన్ని గెల్చుకున్నాడు.
  
  అదే జోరు... అదే ఫలితం
 ఫార్ములావన్‌లో వరుసగా రెండో ఏడాది తన హవా కొనసాగించిన మెర్సిడెస్ జట్టు డ్రైవర్ లూయిస్ హామిల్టన్ మూడోసారి ప్రపంచ డ్రైవర్స్ చాంపియన్‌షిప్ టైటిల్‌ను దక్కించుకున్నాడు. తొలిసారి 2008లో ఈ ఘనత సాధించిన అతను గతేడాది అగ్రస్థానాన్ని సంపాదించాడు. ఈ సంవత్సరం కూడా ఆద్యంతం అలరించిన హామిల్టన్ తన ప్రత్యర్థులకు ఏమాత్రం అవకాశం ఇవ్వకుండా మూడు రేసులు మిగిలి ఉండగానే ప్రపంచ టైటిల్‌ను ఖాయం చేసుకున్నాడు. ఈ సీజన్‌లో జరిగిన 19 రేసుల్లో హామిల్టన్ 10 రేసుల్లో విజేతగా నిలిచి, ఆరు రేసుల్లో రెండో స్థానాన్ని పొందాడు.
  
  కాసులు కురిపించిన బిగ్ ఫైట్...
  ఈ సంవత్సరం యావత్ క్రీడాప్రపంచం అభిమానులను ఆకర్షించిన ఈవెంట్స్‌లో ఒకటిగా నిలిచింది మేవెదర్ (అమెరికా)- పకియావ్ (ఫిలిప్పీన్స్) బాక్సింగ్ బౌట్. లాస్‌వేగాస్‌లో మే 2వ తేదీన జరిగిన ఈ బౌట్ ద్వారా నమ్మశక్యంకాని రీతిలో రూ.2500 కోట్ల ఆదాయం వచ్చింది. తుది ఫలితంతో సంబంధం లేకుండా ఈ మొత్తంలో మేవెదర్‌కు రూ. 945 కోట్లు, పకియావ్‌కు రూ. 630 కోట్లు లభించాయి. నిర్ణీత 12 రౌండ్‌లపాటు జరిగిన ఈ బౌట్‌లో మేవెదర్ పూర్తి ఆధిపత్యం చలాయించి పకియావ్‌ను ఓడించాడు. పకియావ్‌తో బౌట్ తర్వాత మరో బౌట్‌లో పాల్గొన్న మేవెదర్ అందులోనూ నెగ్గి తన ప్రొఫెషనల్ కెరీర్‌ను 49 విజయాలతో అజేయంగా ముగించాడు.
  
  మారిన్ మెరిసె...
  మహిళల బ్యాడ్మింటన్‌లో చైనా దూకుడుకు చెక్ పెడుతూ స్పెయిన్ అమ్మాయి కరోలినా మారిన్ ఈ ఏడాది తన ప్రత్యేకతను చాటుకుంది. ప్రపంచ చాంపియన్‌షిప్ ఫైనల్లో సైనా నెహ్వాల్ (భారత్)ను ఓడించి వరుసగా రెండో ఏడాది విజేతగా నిలిచిన మారిన్... ఈ ఏడాది ఐదు సూపర్ సిరీస్ (ఆల్ ఇంగ్లండ్, మలేసియా ఓపెన్, ఆస్ట్రేలియన్, ఫ్రెంచ్, హాంకాంగ్) టైటిల్స్‌ను కైవసం చేసుకోవడం విశేషం.
  
  భళా... బార్సిలోనా క్లబ్
  ప్రపంచ ఫుట్‌బాల్‌లోని అత్యంత మేటి క్లబ్‌లలో ఒకటైన బార్సిలోనా జట్టు ఈ ఏడాది నిలకడగా రాణించింది. స్పానిష్ లీగ్ లా లిగా టైటిల్‌ను నెగ్గిన బార్సిలోనా జట్టు ఆ తర్వాత అదే జోరును కొనసాగించి చాంపియన్స్ లీగ్, యూరోపియన్ సూపర్ కప్ టైటిల్స్‌ను హస్తగతం చేసుకుంది. లియోనెల్ మెస్సీ, నెమార్, పీకే, సురెజ్, ఇనియెస్టా లాంటి స్టార్ ఆటగాళ్లతో కూడిన బార్సిలోనా జట్టు సీజన్ చివర్లో ప్రపంచ క్లబ్ చాంపియన్‌షిప్‌లోనూ విజేతగా నిలిచి ఏడాదిని ఘనంగా ముగించింది.
  
  


 బాక్సింగ్‌ చరిత్రలో ఎంతో హైప్‌ క్రియేట్‌ చేసిన మేవెదర్‌, పాకియో పోరాటంపై ఇండియా బాక్సింగ్‌ మాజీ కోచ్‌ చిరంజీవి పెదవి విప్పారు. మేవెదర్‌ డిఫెన్స్‌ బాగుందని,  ప్రత్యర్థి పంచ్‌లకు ఏమాత్రం అందకుండా కోర్టంతా కలియదిరుగుతూ ప్రఖ్యాత మహ్మదాలీని మరిపించాడని చిరంజీవి అన్నారు. ప్రపంచ చరిత్రలో ఇద్దరు గొప్ప బాక్సర్లు మహమ్మదలీ, టైసన్‌లను మీడియా హైప్‌తో మేవెదర్‌ మించిపోయాడని ఆయన తెలిపారు.
 
 ఇక.. ప్రపంచవ్యాప్తంగా ఈ బౌట్‌ని ఆదరించిన బాక్సింగ్‌ లవర్స్‌కు థాంక్స్‌ చెప్పాడు మేవెదర్‌. పాయింట్ల తేడాలో ఓడిపోయినప్పటికీ, మెనీ పాకియోలో మంచి బాక్సర్‌ ఉన్నాడని ప్రశంసలు కురిపించాడు. అతడిని అంత ఈజీగా ఓడించలేనని తను వేసిన అంచనా నిజమైందని ఫ్లాయిడ్‌ మేవెదర్‌ చెప్పాడు.
 
 ఈ పోరాటంలో తానే గెలిచినట్టు మెన్నీ పాకియో చెప్పుకున్నాడు. తను కొడుతున్న పంచ్‌లను తప్పించుకునేందుకు మేవెదర్‌ కోర్టంతా కలియదిరిగాడని... తను గెలిచినట్టు చెప్పుకునేందుకు ఇది చాలని అన్నాడు పాకియో. మొత్తానికి ఇది మంచి ఫైట్‌ అని పోటీ అనంతరం పాకియో సమర్థించుకున్నాడు.


 లాస్‌వేగాస్‌: మహా యుద్ధంలో ఫ్లాయిడ్ మేవెదర్ గెలుపొందాడు. ఫిలిప్పీన్స్ బాక్సర్ మ్యానీ పాకియో పోరాడి ఓడాడు. బాక్సింగ్ క్రీడా చరిత్రలోనే అత్యంత ఖరీదైన ఈ ‘శతాబ్దపు పోరు’లో అమెరికా మహాబలుడు మేవెదర్ విజయకేతనం ఎగురవేశాడు. ప్రత్యర్థి పాకియోను పడగొట్టి టైటిల్ కైవశం చేసుకున్నాడు. న్యాయ నిర్ణేతలు ఏకగ్రీవంగా మేవెదర్ ను విజేతగా ప్రకటించారు. మేవెదర్ కు 1500 కోట్ల రూపాయల ప్రైజ్ మనీ లభించింది.
 
 12 రౌండ్ల పాటు జరిగిన మహాపోరులో హోరాహోరీగా జరిగిన మ్యాచ్ లో ఇద్దరు యోధులు నువ్వా-నేనా అన్నట్టు తలపడ్డారు. ఆద్యంతం ఉత్కంఠభరితంగా సాగిన 'రింగ్' ఫైట్ లో బాక్సలిద్దరూ పంచ్ లతో విరుచుకుపడ్డారు. అనుకున్న సమయానికి కంటే గంట సేపు ఆలస్యంగా మ్యాచ్ ప్రారంభమైంది. 'రింగ్'లో పాకియో చురుగ్గా కదిలినట్టు కనిపించాడు. మేవెదర్ మాత్రం ఆచితూచి ఆడాడు. పాకియో ఎటాకింగ్ చేయగా, మేవెదర్ ఆత్మరక్షణకు ప్రాధాన్యం ఇచ్చాడు. చివరి రెండు రౌండ్లులో మేవెదర్ దూకుడు పెంచాడు. పాకియోపై ఎటాక్ చేసి అతడిని ఆత్మరక్షణలో పడేశాడు.
 
 మ్యాచ్ ముగిసిన తర్వాత న్యాయనిర్ణేతలు మేవెదర్ ను విజేతగా ప్రకటిస్తూ ఏకగ్రీవ నిర్ణయం వెలువరించారు. తన కెరీర్‌లో పోటీపడిన 48 బౌట్‌లలోనూ గెలిచి తన అజేయ రికార్డు మెరుగుపరుచుకున్నాడు. మరో బౌట్ గెలిస్తే అమెరికా దిగ్గజ బాక్సర్ రాకీ మార్సియానో రికార్డు 49-0ను చేరుకుంటాడు.
 
 ఈ బౌట్ ద్వారా వచ్చే ఆదాయంలో 60 శాతం మేవెదర్ కు... 40 శాతం పాకియో కు చెల్లిస్తారు. విశ్లేషకుల అంచనా ప్రకారం ఈ బౌట్ ద్వారా రూ. 2500 కోట్ల ఆదాయం వచ్చే అవకాశముంది. ఈ బౌట్‌కు రిఫరీగా కెన్నీ బేలిస్ వ్యవహరించారు. ఆయనకు 25 వేల డాలర్లు (రూ. 16 లక్షలు) ఫీజు ఇస్తారు. బాక్సింగ్‌లో ఓ రిఫరీకి ఇంత భారీ మొత్తం చెల్లించడం ఇదే ప్రథమం.


 లాస్‌వేగాస్‌: ఫ్లాయిడ్ మేవెదర్ (అమెరికా), మ్యానీ పాకియో (ఫిలిప్పీన్స్) బాక్సింగ్ యుద్ధం రసవత్తరంగా సాగుతోంది. ఇద్దరు మహాబలులు హోరాహోరీ తలపడుతున్నారు. వెల్టర్ వెయిట్ కేటగిరీ (63.5 కేజీల నుంచి 67 కేజీల వరకు) జరుగుతున్న పోరులో బ్యాక్సింగ్ కింగ్ లు ఇద్దరూ కొదమ సింహలా కలబడడుతున్నారు.
 
 బాక్సింగ్ క్రీడా చరిత్రలోనే అత్యంత ఖరీదైన ఈ ‘శతాబ్దపు పోరు’పాకియో పైచేయి సాధించాడు. ఎటాకింగ్ తో మేవెదర్ ను పాకియో ను బెంబేలెత్తిస్తున్నాడు. మేవెదర్ ఆత్మరక్షణ కే ఎక్కువ ప్రాధాన్యం ఇస్తున్నాడు. అయితే మొదట వెనకబడినట్టు కనబడిన మేవెదర్ తర్వాత పుంజుకున్నాడు.


 లాస్‌వేగాస్‌: బాక్సింగ్ క్రీడా చరిత్రలోనే అత్యంత ఖరీదైన ఈ ‘శతాబ్దపు పోరు’కు తెర లేచింది. మహా బలుల యుద్ధం మొదలైంది. ‘రింగ్’లో కింగ్స్‌ ఫ్లాయిడ్ మేవెదర్ (అమెరికా), మ్యానీ పాకియో (ఫిలిప్పీన్స్) ముఖాముఖి పోటీకి దిగారు.
 
 వెల్టర్ వెయిట్ కేటగిరీ (63.5 కేజీల నుంచి 67 కేజీల వరకు)లో జరిగే ఈ బౌట్‌లో మూడు నిమిషాల నిడివిగల 12 రౌండ్లు ఉంటాయి. నిర్ణీత 12 రౌండ్లలోపు ఎవరైనా నాకౌట్ అయితే బౌట్ అక్కడే ముగుస్తుంది. ఒకవేళ బౌట్ పూర్తిగా 12 రౌండ్లు జరిగితే పాయింట్ల ఆధారంగా విజేతను నిర్ణయిస్తారు. మొత్తానికి 45 నిమిషాల పాటు పోరు సాగే అవకాశముంది.
 
 విశ్లేషకుల అంచనా ప్రకారం ఈ బౌట్ ద్వారా రూ. 2500 కోట్ల ఆదాయం వచ్చే అవకాశముంది. ముందే కుదిరిన ఏకాభిప్రాయం ప్రకారం ఫలితంతో సంబంధం లేకుండా ఈ బౌట్ ద్వారా వచ్చే ఆదాయంలో 60 శాతం మేవెదర్ ఖాతాలోకి... 40 శాతం పాకియో ఖాతాలోకి వెళ్తుంది.


 మేవెదర్‌తో పాకియో అమీతుమీ నేడే
 ప్రొఫెషనల్ కెరీర్‌లో పరాజయమెరుగని బాక్సర్ ఒకవైపు... పట్టుదల ఉండాలేగాని అట్టడుగు స్థాయి నుంచి అగ్రపథానికి చేరుకోవచ్చని నిరూపించిన బాక్సర్ మరోవైపు... నేపథ్యాలు వేరైనా దశాబ్దకాలంగా ‘రింగ్’లో కింగ్స్‌గా వెలుగొందుతున్న వారిద్దరే ఫ్లాయిడ్ మేవెదర్ (అమెరికా), మ్యానీ పాకియో (ఫిలిప్పీన్స్). ఈ ఇద్దరు దిగ్గజాల మధ్య పోరు నిర్వహించేందుకు ఐదేళ్లుగా సాగిన ప్రయత్నాలు ఈ ఏడాది ఫలించాయి. భారత కాలమానం ప్రకారం నేటి ఉదయం 8.30 గంటలకు మొదలయ్యే ఈ ‘శతాబ్దపు పోరు’లో విజేతగా ఎవరు నిలుస్తారో వేచి చూడాలి.
 
 సాక్షి క్రీడావిభాగం
 బాక్సింగ్ క్రీడా చరిత్రలోనే అత్యంత ఖరీ దైన పోటీకి అమెరికాలోని లాస్‌వేగాస్‌లో మరి కొన్ని గంటల్లో తెరలేవనుంది. పదేళ్లకంటే ఎక్కువ కాలం నుంచి ప్రొఫెషనల్ బాక్సింగ్‌లో ఉన్నప్ప టికీ ఈ బౌట్ ద్వారా మేవెదర్, పాకియోల పేర్లు అందరి నోళ్లలో నానుతున్నాయి. ఈ బౌట్ విశేషాలు, బాక్సర్ల నేపథ్యం గురించి క్లుప్తంగా...
 
 ఎలా జరుగుతుందంటే...
 వెల్టర్ వెయిట్ కేటగిరీ (63.5 కేజీల నుంచి 67 కేజీల వరకు)లో జరిగే ఈ బౌట్‌లో మూడు నిమిషాల నిడివిగల 12 రౌండ్లు ఉంటాయి. నిర్ణీత 12 రౌండ్లలోపు ఎవరైనా నాకౌట్ అయితే బౌట్ అక్కడే ముగుస్తుంది. ఒకవేళ బౌట్ పూర్తిగా 12 రౌండ్లు జరిగితే పాయింట్ల ఆధారంగా విజేతను నిర్ణయిస్తారు. మొత్తానికి 45 నిమిషాల పోరాటం ద్వారా ఈ ఇద్దరు బాక్సర్లు వందల కోట్లు జమచేసుకోనున్నారు.
 
 ఆదాయమెంతంటే....
 ముందే కుదిరిన ఏకాభిప్రాయం ప్రకారం ఫలితంతో సంబంధం లేకుండా ఈ బౌట్ ద్వారా వచ్చే ఆదాయంలో 60 శాతం మేవెదర్ ఖాతాలోకి... 40 శాతం పాకియో ఖాతాలోకి వెళ్తుంది.  విశ్లేషకుల అంచనా ప్రకారం ఈ బౌట్ ద్వారా రూ. 2500 కోట్ల ఆదాయం వచ్చే అవకాశముంది. అదే జరిగితే మేవెదర్‌కు దాదాపు రూ. 1500 కోట్లు, పాకియోకు దాదాపు రూ. 1000 కోట్లు వస్తాయి. ఈ బౌట్‌కు రిఫరీగా కెన్నీ బేలిస్ వ్యవహరిస్తారు. ఆయనకు 25 వేల డాలర్లు (రూ. 16 లక్షలు) ఫీజు ఇస్తారు. బాక్సింగ్‌లో ఓ రిఫరీకి ఇంత భారీ మొత్తం చెల్లించడం ఇదే ప్రథమం.
 
 అజేయుడు...
 ‘అమెచ్యూర్’ బాక్సర్ హోదాలో మేవెదర్ 1996 అట్లాంటా ఒలింపిక్స్‌లో ఫెదర్ వెయిట్ కేటగిరిలో అమెరికాకు కాంస్య పతకం అందించాడు. అదే ఏడాది అతను ప్రొఫెషనల్ బాక్సర్‌గా మారిపోయాడు. ఆ తర్వాత మేవెదర్ తన కెరీర్‌లో పోటీపడిన 47 బౌట్‌లలోనూ గెలిచి అజేయుడుగా ఉన్నాడు. 38 ఏళ్ల మేవెదర్ తాను సాధించిన 47 విజయాల్లో 26 బౌట్‌లలో ప్రత్యర్థిని నాకౌట్ చేశాడు. ప్రపంచంలోనే అత్యంత సంపన్న క్రీడాకారుడైన మేవెదర్‌కు లక్షల డాలర్లు విలువవేసే అరుదైన ఎనిమిది కార్లు, రెండు ప్రత్యేక జెట్ విమానాలు ఉన్నాయి.
 
 పోరాట యోధుడు
 మేవెదర్ మాదిరిగా పాకియో అజేయుడు కాకపోయినా తన కెరీర్‌లో పోటీపడిన 64 బౌట్‌లలో 57 విజయాలు సాధించాడు. ఐదింటిలో ఓడిపోయాడు. మరో రెండు బౌట్‌లు ‘డ్రా’గా ముగిశాయి. 1995లో ప్రొఫెషనల్‌గా మారిన 36 ఏళ్ల పాకియోకు ఫిలిప్పీన్స్‌లో విశేష ఆదరణ ఉంది. అతని ‘ఫైట్’ జరుగుతున్న సమయంలో అందరూ టీవీలకు అతుక్కుపోతారని, ఆ సమయంలో దేశంలో ఎలాంటి నేరాలు సంభవించవని అంటుంటారు. కేవలం బాక్సింగ్‌లోనే కాకుండా బాస్కెట్‌బాల్‌లోనూ పాకియోకు ప్రవేశముంది. 2010లో ఫిలిప్పీన్స్ చట్టసభలో ప్రజా ప్రతినిధిగా ఎన్నికైన పాకియో సినిమాల్లోనూ నటించాడు. తన ఇంట్లోని కుక్కను తండ్రి చంపేసి వంటకం చేయడంతో తీవ్రంగా నొచ్చుకున్న పాకియో 12 ఏళ్ల వయస్సులో ఇంటి నుంచి వెళ్లిపోయాడు. వీధుల్లో మిఠాయిలు అమ్ముతూ జీవనం సాగించిన అతను బాక్సింగ్‌ను కెరీర్‌గా ఎంచుకొని 14 ఏళ్లకే ప్రొఫెషనల్‌గా మారాడు.
  


 దాదాపు ప్రపంచమంతా ఉత్కంఠతో ఎదురు చూస్తున్న క్షణాలు సమీపిస్తున్నాయి. ఐదేళ్ల నిరీక్షణకు కొన్ని గంటల్లోనే తెరలేవబోతోంది. ప్రపంచ బాక్సింగ్ చరిత్రలోనే అత్యంత 'రిచ్చెస్ట్ గేమ్'గా పరిగణిస్తున్న రింగ్ ఫైట్‌కు నగరంలోని 'ఎంజీఎం గ్రాండ్ గార్డెన్ ఎరీనా' వేదిక కాబోతోంది. స్టేడియంలోని మొత్తం 16,800 సీట్లకు టిక్కెట్లు హాట్ కేకుల్లా అమ్ముడుబోయాయి. 1900 కోట్ల రూపాయల బాక్సింగ్ పోరాటానికి అంతా సిద్ధమైంది. ఇక జూలు విదిలించి కొదమ సింహాల్లా రింగులోకి దూకడానికి జగద్విఖ్యాత బాక్సింగ్ చాంపియన్లు ఫ్లాయిడ్ మేవెథర్ జూనియర్, మన్నీ పేక్వియావో సిద్ధంగా ఉన్నారు.
 
 
 అమెరికాకు చెందిన 38 ఏళ్ల మేవెథర్ ఓటమి ఎరుగని వీరుడు. 14 సార్లు బాక్సింగ్‌లో ఛాంపియన్‌షిప్ సాధించారు. ఇక ఫిలిప్పీన్స్‌కు చెందిన 36 ఏళ్ల మన్నీ పేక్వియావో కూడా 2007 వరకు ఓటమి ఎరుగని వీరుడే. అందుకే ఆ రోజునే వీరిద్దరి మధ్య ఫైట్‌కు నిర్వాహకులు నిర్ణయం తీసుకున్నారు. వీరు ఎన్నడూ ముఖాముఖి ఫైట్ చేయలేదు. అందుకే నేడు ప్రపంచంలోని కోట్లాది మంది బాక్సింగ్ అభిమానులు అ క్షణం కోసం నిరీక్షిస్తున్నారు. మేవెథర్ డిఫెన్స్‌లో దిట్ట, శరీరానికి పెద్ద గాయం తగలకుండా ఆత్మరక్షణకు ఎక్కువ ప్రాధాన్యమిస్తారు. ఇక పేక్వియావోకు ఎదురుదాడిలో ఎదురు లేదు. అందుకనే ఆయనను ప్యాక్‌మేన్ అని ముద్దుగా పిలుస్తారు. ఇప్పుడు వీరిద్దరి పోరాటం ఎలా ఉంటుందన్న అంశంపై బాక్సింగ్ భవిష్యత్ ఆధారపడి ఉంది. పోరాటం పట్టు తప్పి చప్పగా సాగితే బాక్సింగ్ ఛాంపియన్‌షిప్‌లు కుప్పకూలుతాయని, ఉత్కంఠతో ప్రేక్షకుల నరాలు తెంపే తీరులో సాగితే భవిష్యత్ బాటంతా బంగారమేనని విశ్లేషకులు భావిస్తున్నారు.
  
 -1900 కోట్ల రూపాయల ఈ ఛాంపియన్‌షిప్‌లో విజేతకు ఖరీదైన మూడువేల పచ్చలు (ఎమెరాల్డ్స్) పొదిగిన పట్టాతో సత్కరిస్తారు. 1147 కోట్ల రూపాయలను అందజేస్తారు.
 -పరాజితుడికి 765 కోట్ల రూపాయలు అందజేస్తారు.
 -టిక్కెట్ల రూపంలో నిర్వాహకులకు ఇప్పటికే దాదాపు 500 కోట్ల రూపాయలు వచ్చాయి. టీవీ రైట్స ద్వారా కొన్ని వందల కోట్ల రూపాయలు వస్తాయి. వాటి వివరాలు వెల్లడి కాలేదు.
 -2007లో జరిగిన ఓ బాక్సింగ్ వరల్డ్ ఛాంపియన్‌షిప్ పోటీలో ప్రపంచవ్యాప్తంగా 25 కోట్ల మంది అభిమానులు ప్రత్యక్షంగా వీక్షించినట్టు అంచనా వేశారు. ఈసారి 30 కోట్లకు పైగానే వీక్షిస్తారని అంచనా.